Yeremiya 50:2 - Ala Wone Peenok Peebi Mbanak

² “Aakumi inanebunu lombok inenggela'me yorage, Inaruk liirogon konenuwak nduk wone yoranet nage, Ineenu agak ndiimbu walok eeke logonet, koone nggwok paga yoranet nage, Eeke logonet, Wone ambi kumaarogo puurak lek abok yoroorak nogo yi aret. O Mbaben nogo muk tebenggola unggwogwe, Agugi Mben nogo abu enggali age, Agugi Merorak nogo iniki ma'nage, Inagugi ogut aago nogo inenggali age, Inagugiwak abu yigirik-noonom age, Eerigin o.

Yeremiya 50:2 ပူးပေါင်းရင်းမြစ်များ

Ndawi 64:9

Yi aap ndi aap abok aret Ala nen eeppiyamenggerak iigo logomenggaarik, inagabiti mbakwi, “Ala nen yogop eeppiigerak kogo o,” yinuk, wone wonok aakumi yoranet nogwe, Ala eeke menggerak nogo iniki koonit nugwi, Eeko logogun o.

Ndawi 96:3

At mondok tiyanak menggerak nogo, it aakumi lombok inenggela'me mbininogo yorogwe, At iya tit eeke menggerak nogo Aakumi inanebunu lombok yoranet nugwi, Eeko logonip o.

Ndawi 97:7

It aap abok aret kugi inogut ogobakkigippiinok inalut eekwi, “Ninagugiwak iya o,” yinuk, tiyappiigwi, Eekwi nogo Inenggali arugun me, Kit yi kugi ndi kugi yi wae. Aliku ALA abu'me tebe yinuk alut eeko logonip o.

Yetaya 12:4

Ne ti eyom paga kit nen it yorogo logonet, “Aliku ALA, Wa, yogwi, At endage kunogo kinoone nggwok paga yogwi, At eerit wagagerak nogo yi aakumi ndi aakumi inenggela'me yoranet nugwi, At endage tiyanak lombok menggerak nogo wiganogo pit nugwi, Eeko logonip o.

Yetaya 13:2

“It an nawuri leenogo piigirak nogo wone lengganogo yorage, An nawuri aap wakaa'ngget nen an nanini paga aakumi eeppiyoorak mbake nogo eeppiinok, Ala eegin tiyak yigi o, yinuk, inale'nggen mbariyak nogo wiirage, Eekirak me, Wim eeruwok nduk, puut eerilek paga ndiimbu walok eekwi, Nawim o, yinuk, keekok yogwe, It aap nagawan-nagawan inaru unggwogo menggam unggwit nawok nduk, Kuwak ari woraanip o, yinuk, yorogwe, Eeko logowak o.

Yetaya 21:9

Yogondak perak, it aap inaguda mbere'mbo nen inanggweendo wim eeka nikkenok wogwe nenegen iigi o. Nenegen iige nagarik, Kit taani o? yorage mbaki, it nen an yo'nogo logonet, Lek o. O Mbaben nogo muk lek aga o. Lek aga o! Inalut eeko menggaarak inagugi ogut aago nogo nggween paga yigirik-noonom ma'naga, yo'negaarak me, yokkigi o,” yinuk, yo'nege kagarak o.

Yetaya 39:1

Ne ti eyom paga aap Mbaben inowe endagembogut Mbalaran aput Merorak-Mbalaran nogo, Kitikiya andi eeke nagagerik, obeelom eereegerak konembunuk, liiru mbanak inom, ale'nggen mbaruwak nduk amendek inom, nappiya wagagerak wonok iri wogo mbareegwa,

Yetaya 46:1

Aakumi Mbaben inagugi Mben nogo tebek ari, Inagugi Nebo nogo ngginnage, Eekaarak o. It kugi ti, inogut ogobakkigirik nogo nggweendo paga kwippunuk, tapi nen wonok nogwe, Tapi ta'liila eerak iigak, inagugi inogut ti, inoba luurogo piigwi iinok, aaninggin kagak wonok nogwe, Eeko agaarik o.

Yetaya 48:20

Kit o Mbaben nen wundi woraanip o. Kit Mbaben mendek ineenggime nen kole mbaganip o. Wone yi, kinikime nggelok ari kenok, kuum-keek agan nugwi, Wone yi wonok o irip-irip time yoranet nugwi, “Aliku ALA nen ayeloman mini nit Yakup paga wiganak nogo wondet eerogo pinanegi o,” yinuk, agan nugwi, Eeko logonip o.

Yetaya 48:6

Eeriyak yorage nagagirak koneneegwaarak nogo muk eerit wagagerak liippogo logowak o. Liippunuk, Ala yereegerak ndak-ndak arit wage abet aret o, yinuk, yaga'lek nonggop nduk wonogo agaarik? O yogondak kuli nen an yorage nogo ti, peebi eeriyak wone alik ngget mendek yorage, It ineenu aga'lek tabarak wone nogo yorage, Eeke logogin o.

Yeremiya 10:11

Togop me, kit Ala apuri yi wae. “It nen mbogut ogobakkigirogo pugwi, nggween nenaarogo pugwi, eerulik inagugi nogo, o nggween paga yime nen inenggaawak lek ogwe, mbogut abu'me o oolo ya'i nen ineebe lek ogwe, eerugun, yegerak o, yinuk, yi aakumi ndi aakumi yorogo logonip o,” yinuk, yegerak me, yokkiragi o.

Yeremiya 10:15

Kugi inogut eerak nogo ti, we aanom warogo aret eerak kenok, aakumi nen meek eerogo pugwi me, Eeko menggaarak onggo inoba piyoorak eyom panggoni wage kenok, inenggaawak lek aret arugun o.

Yeremiya 31:10

Togop me, it yi aakumi ndi aakumi Naliku ALA nen wone yorage yi, inaruk konenggwi, It aakumi o nda niyo aa'nggi paga wonogwe ti, apit aret yoranet nogwe, Eeko logorak nogo yi aret. At it Iterali mak eerogo piyareegerak nogo nen aret kuwak eerogo piya wage, Aap ndomba ndegeninaka kwak at apuri inarum wake, Eeke logogin ti aret.

Yeremiya 4:16

Aliku ALA nen ari logonet, “Wone yi, it yi aakumi ndi aakumi yorage, It kota Yerutalem wonogwe nogo yorage, Eeke logorak nogo yi aret. At kota Yerutalem nen, Ala yo'nege nogo eeriyak neebi o, yinuk, an mbo paneegerak me, Yerutalem oonda mbaniyak aap wim eeka o nda nen wogwe, It Yekura inawi kota-kota tebenogo piyaawok nduk, Nawim yi o, yinuk, nggomookwi, Eeppunuk, Aap ambi eyabu yarak anggen mbaniyak arum wake menggi kwak, at aret wakkunggo agaarik o,” yinuk, yegerak o.

Yeremiya 46:14

“It aakumi o Metit wonogwe nogo yorage, It o Migiron wonogwe nogo yorage, It o Membit wonogwe inom, o Tapanaket wonogwe inom, yorage, Eeke logorak nogo yi aret. Aakumi it inaagan-inambokan wonogwe ti, wooluwak paga ineebe nenet nagin me, ineegin-inawooluwak woppunuk, Wim eeri nawam lombok arit nawak o.

Yeremiya 50:46

O Mbaben tebenggola unggwi waga o, yinuk, keekok yogwe paga nggween nuk ari, Le yi-yi wo-wo yogwe nogo, yi aakumi ndi aakumi wonogwe me ari nage, Eerigin o.

Yeremiya 51:12

O Mbaben yugum pak wurik langgunogo puwak nduk, ndiimbu walok eekwi, Wim inoba wundi wogwe iyo, tum logowak nduk piigwi, Pen warit nawak nduk, inaa'nduk nappiigwi, Ku tebembunuk logowak nduk eerogo piigwi, Eeko logowak o. Naliku an ALA eeriyak kooneegirak nogo aret eeke, Ndi, it aakumi o Mbaben wonogwe nogo eeppiyoorak wone lengganogo yoragagirak nogo aret eeke, Eerigin me,

Yeremiya 51:27

“At aap inowe endagembogut o omarip paga pa'nggwe wonage nogo nen o nggween paga yi, ndiimbu walok eeke, Yi aakumi ndi aakumi inenggela'me oone nggwok eeka trompet oonebu eeke, Aakumi inanebunu lombok inenggela'me o Mbaben wim eeri ungguurak eyak maganake, O Ararat inom, Mini inom, Atekenak inom, nen o Mbaben tebenogo pi ungguwak nduk, inayonggo piige, Wim eeriyak ineegin warak inowe mippege, Wurin ninggirik mengga kwak kuda paga kwi'na'nuk inaa'nduk nappiige,

Yeremiya 51:31

It aakumi tu andogon-andogon abok aret unggwi wogo logonet, o kota tebeni unggwi wogwe, Niyo ayo mbaninuk wundogo menggam inogo ndoonogo kwi'nogwe, Inoori unggwogwe iyo, yugum pak wurik kani paarogo pit nagaarak paga aan ndu-ndu wangge, Aap ineegin warak inomanggen tayok ari, Eekerak o, yinuk, Mbe agan aap o Mbaben inowe endagembogut eenu aruwak nduk, wone yugu ambi yori nagak, ambi yori nagak, eekwi, Wone wonok ambi nappegak, ambi nappegak, eekwi, Eeko agaarik o,” Yinuk, yegerak o.

Yeremiya 51:44

Kugi Mben o Mbaben wonage nogo aaninggin oba kwippege, Yi mendek ndi mendek at ambeme yonggoleegerak nogo kilirogo wumbi woraawak nduk, eeppege, Eerigin me, Aakumi inanebunu lombok at owagam wagak eekwi nogo ambinom eeko logogun lek o. Ndi, o Mbaben ayugum pak wurik kunduk, langguk yigin o,” yinuk, Alik Ku ALA nen yegerak o.

Yeremiya 51:47

Inagugi ogut eerak o Mbaben wonage nogo yigirik-noonom eerogo piyoorak eyom abet aret panggoni woraagin me, Ari wage kenok, yigirik-noonom eerogo piyaagin o. Piige neenok, it o time wonogwe abok aret inenggali ogwe, It inenggela'me time aakumi inooremenggaarak nggween paga ngginnarit nogwe, Eerugun o.

Yeremiya 51:52

It o Mbaben inagugi ogut eerak yigirik-noonom eerogo piyoorak eyom abet aret panggoni woraagin me, Ari wage kenok, o time inookwi andi nen yagan warit nogwe nogo inoone inaruk konenggo logogun o,” Yinuk, Aliku ALA nen aret yegerak.

Yeremiya 51:8

O Mbaben logonuk lek yini-panip tebenogo pogo logonet, Yigirik-noonom eerogo pugun me, ale yikkolage logowak o. Agabolo mbanit namenggerak andi nogo obeelom age kagak eerukwak, Awin amburu wappuurak kwaari nawak o.

Yeremiya 52:31

Ndi, aap Yekura endagembogut Yoyakin wonok, o Mbaben keele maarogo mbo pi nagagerak wonage kagak, tahun 36 eeppunuk, ambi age paga aap Ewin-Merorak o Mbaben inowe endagembogut agagerak. Age nagagerik, tahun ti paga tut 11 penembunuk, ambi penenak tanggal 25 tut ti paga, at Yoyakin nogo keele maarogo mambiigo menggam wonage me, piinogo wumbereegerak.

Yeremiya 6:18

Togop me, it yi aakumi ndi aakumi ti, inaruk konenggwi, An eeke neyaawak nduk, kuwak aago ti, it an napuri inoba ariyak nogo liippugwi,

Ndaniyen 1:2

Oonda mbani unggwage kagak, at Ala nen aakumi Yekura mendek inowe endagembogut Yoyakim tebenogo puwak nduk, eeppege mbareegi, tebenogo punuk, Ala awi wurik me eekak ake nogo ando waawak nduk eeppege mbareegi, wagangge nagagerik, wonok o Mbaben at agugi alut eeke menggim yime pi woranuk, at agugi awi wurik me yi mendek ndi mendek abe kenok pege menggim nogome mambereegerak.

Ndaniyen 3:14

it yorage logonet, “Kit Tarerak inom, Metak inom, Abe'nego inom, kit yi, an nagugi inalut eekwi, ndi, an nen ogut mbuti emas paga eerogo mippigirak nogo abu'me tebe yinuk, ayuk wukwi, eerulik ti abet aret a?

Tepaniya 2:11

At Aliku ALA nen it aakumi o nggween paga yime inagugi lek eerogo piige kenok, Inagabiti nen, “Aliku ALA ti, iya!” yinuk, yi aakumi ndi aakumi nggween paga wonogwe abok aret inalitik-inalitak menggam logonet, Aliku ALA abu'me tebe yinuk, at alut eeko logogun o.

Wayu 18:2

Wambi wage nagaarik, oone mondok omaawi paga ari logonet, “O kota nggwok Mbaben nogo, mondok lek eerogo pigi o. Lek eerogo pigi o. It o kota Mbaben menggaarak nogo ti, kwe yawukak pogom me, Kwe nogo nen iniki nengge kenok, Ee'nabi woraanip o, ari kenok, Yi aap ndi aap inanebunu lombok abok aret, anggur amburu nenok, kumili-kumili agan nugu mengga kwak, ugun-ugun kwe nogo eeppi wogwe, Yi aap ndi aap inoweewi inendagembogut o nggween paga menggaarak abok aret kwe nogo eeri unggwogwe, Ndi, kwe nogo nen aap iniki nengge kenok, eeppi unggwagak eekwi paga It aakumi yi awi ndi awi kunggo menggam unde menggaarak nogo, ineenggi warak eekkologwe, eekwi iinok, O Mbaben nogo pup eerogo pegerak me, Yogondak yi kugi ndi kugi inom, it kambeegwaarak inogoma inom, yi towe ndi towe nen aakumi kanggaatak nunggwi iinok inogole yogo menggaarak inom, Abok aret inawi eekkola unggwa-ga o,” yinuk, oone nggwok paga ari naruk konenggirak.