Yeremiya 43:12 - Ala Wone Peenok Peebi Mbanak

^12-13 Aakumi Metit mendek inagugi awi wurik kani paarogo pit nage, inagugiwak kani kungge, eegu kugun wonok nage, eerigin o. Aap ndomba ndegeninaka nen ndomba inabi inayum paga lenggek yegetak ponggonogo nappogo mengga kwak, o Metit togop aret eerogo pege logomenggerik, o Metit oonegen alut eeko logorak eyak mippugu ayuk warak nogo yigirik-noonom eerogo pege, it Metit mendek inagugi awi wurik nogo kani pit nage, eeppunuk, aru non mbanogo pega'lek kuuri'me aret nagin, yoraamunggun o,” yinuk, yoreegerak.

Yeremiya 43:12 ပူးပေါင်းရင်းမြစ်များ

2 Tamuwen 5:21

Ndi, it aap Pilitin mendek inagugiwak mbo punuk, mbaganit nogwe iigak, at Ndawut awuri inom nen waganeegwaarak.

Etet 6:9

yum nogo inom, kuda nogo inom, it kawuri inendage warak nagawan-nagawan inowe ambi wogoge keenok, at nogo nen aap kat tiyappuurak kinikilom mbake nogo, yum nogo yirippege, kuda nogo amborowak paga kwippege, eeppunuk, o kota oolo tinime wonok nege logonet, Aap endagembogut nen aap ambi tiyappuurak inikilom mbake kenok, yogop aret eeppege menggerak o, yinuk, aa'nduk a'nuk, oone nggwok paga agan nawak o,” yinuk, yoreegerak.

Ayup 40:10

Togop aret mbake keenok, Kendage tiyanak kayuk warak keyaawak nduk nege, Kat aap nggwok, Wi, yuwak nduk, Kobaanggi-kobaangge li'luk eekko'nok nege,

Ndawi 104:2

Kabinak paga keebe lenggembatinuk wonage, Yum tabak paga ooliya lenggenogo punuk mengga kwak, Kat togop aret mbogut mbiganogo punuk wonage,

Ndawi 132:16

It aap an neebe unde o yime wonogwe nogo Aakumi inake eerit nugwi paga aakumi nen, “Ninagap ndarak aret kogo o,” mbaruwak nduk, Yum yippiigo mengga kwak eeppiige, O Tiyon apuri an nake leenak nogo inale'nggen nen keekok yogo logowak nduk eerogo piige,

Ndawi 132:18

Ndi, at awim nogo inenggali ti, Yum yirik kwak nugu logowak nduk eeppiige, Eerigin kwe, At Ndawut perak, Endagembogut logonet wone lengganogo yorage menggim ti, Nggare-nggare kwak me, abinak lan ari logogin o,” Yinuk, yoreegindak nogo o!

Wundeegwaarak 12:12

Ti eekwi wonogwe iigak, Naliku ALA an aret me, oonikiya ti paga o Metit irip-irip abok aret nage logonet, aakumi Metit mendek inapuri manggu ndarak inom, inaanggumi aa'nduk ndarak inom, abok aret inooke, inagugi abok aret inomaawi lek eerogo piige, eerigin o.

Yetaya 19:1

O Metit mendek eeppiyoorak Ala nen abinggaanggo paga yoreegerak nogo yi aret. Ndugwi mbe agan nage ti paga Aliku ALA kwi'na'nuk o Metit nage yi, kaanip o. It Metit mendek inagugi ogut aago nogo inaganak wake, It aakumi Metit mendek iniki ma'nage, Eeko agaarik o.

Yetaya 21:9

Yogondak perak, it aap inaguda mbere'mbo nen inanggweendo wim eeka nikkenok wogwe nenegen iigi o. Nenegen iige nagarik, Kit taani o? yorage mbaki, it nen an yo'nogo logonet, Lek o. O Mbaben nogo muk lek aga o. Lek aga o! Inalut eeko menggaarak inagugi ogut aago nogo nggween paga yigirik-noonom ma'naga, yo'negaarak me, yokkigi o,” yinuk, yo'nege kagarak o.

Yetaya 46:1

Aakumi Mbaben inagugi Mben nogo tebek ari, Inagugi Nebo nogo ngginnage, Eekaarak o. It kugi ti, inogut ogobakkigirik nogo nggweendo paga kwippunuk, tapi nen wonok nogwe, Tapi ta'liila eerak iigak, inagugi inogut ti, inoba luurogo piigwi iinok, aaninggin kagak wonok nogwe, Eeko agaarik o.

Yetaya 46:2

Kugi ti, imbirak ambugwi aret tebek yogwe, ngginnogwe, eekaarak me, Inogut aago aaninggin kagak wonok nogwe nogo, it kugi nen it inogut nogo inagap ndakkoloorak meek me, Keele maarak negen inom nogo agaarik o.

Yetaya 49:18

Kat kaagalogwe wologwe kuwak ari wogwe, kat kowagam wogwe, eekwi yi, kuut pilak yinuk, kenegen pegiyet o. Kwe aap lambumbuurak nduk, obaanggi-obaangge li'luk eerogo pogo mengga kwak, It kuwak a'nuk wonogwe nogo paga kat kiniki ale'nggen nggwok eerogo pagagun o, yinuk, An neenik minggirak Naliku ALA nen mondok abet aret yokkigi o.

Yetaya 52:1

O Tiyon yi wae. Pilak yu o. Pilak yu o! Yum yiko mengga kwak komaawi eekkolage, O kota abe alik leenak Yerutalem yi wae. Kayum abe yirik keenok, “Wi,” kugwi nogo aret yikkolage, Eeke logot o. It aap inagabolo mbanak lek maluk inoba lenggenak wonogwe nogo nen kinikime ambinom unggwi woraagun lek aret o.

Yetaya 59:17

Ti eeppiyaakit nduk, tin yikkologo mengga kwak at a'me nggelok eeppiiga nogo yikkolage, Mbuti petagi inanobak paga yikkologo mengga kwak inagap ndariyak wone yikkolage, Aap inane'me inooruwok nduk towe eeruwak yikkologo mengga kwak, maluk onggo eeppiyaakit nduk, ayum yikkolage, Towe yuut eeruwak mendaarak inambokan tek eerogo wurako mengga kwak, at omaawi togop aret eekkolage, Eereegerak.

Yetaya 61:10

O Tiyon nen ari logonet, “Aap kwe lambumbugwi paga aap nen anobak paga obaanggi-obaangge eekkolage menggi kwak, Kolaga nen alilibano eekkolage menggi kwak, Yum yippiigo mengga kokwak at nogoba Ala nen nagap ndarogo panege, Yum age langgumbiigo mengga kwak, an obeelom eerit nage logokit nduk eeppanege, Eekerak me, Aliku ALA eeppanegerak ti paga nale'nggen alik negen ee'nake, Nogoba Ala nen eekerak paga niniki ale'nggen kani negen wunuk ari, Eeke agaarik o.

Yetaya 61:5

It aap endekem mendek nen kinaanggumi kambin-ndomba ndegeninakwi, It aap nggiru nen kineyabu eeppinagagwi, It kineyabu anggur yarak me wola yippinagagwi, Eekwi iigak,

Yeremiya 10:11

Togop me, kit Ala apuri yi wae. “It nen mbogut ogobakkigirogo pugwi, nggween nenaarogo pugwi, eerulik inagugi nogo, o nggween paga yime nen inenggaawak lek ogwe, mbogut abu'me o oolo ya'i nen ineebe lek ogwe, eerugun, yegerak o, yinuk, yi aakumi ndi aakumi yorogo logonip o,” yinuk, yegerak me, yokkiragi o.

Yeremiya 10:15

Kugi inogut eerak nogo ti, we aanom warogo aret eerak kenok, aakumi nen meek eerogo pugwi me, Eeko menggaarak onggo inoba piyoorak eyom panggoni wage kenok, inenggaawak lek aret arugun o.

Yeremiya 25:19

Ndi, amburu nawak nduk toolak wogorage kagarak ti, it Metit mendek inowe endagembogut Pirawun inom, ayeloman mini ake eeka inom, awuri inom eeka inom, at apuri aakumi Metit mendek abok aret inom,

Yeremiya 46:25

At Omaawi Lombok Menggerak Iterali inogoba Aliku Ala nen ari logonet, “It o Tebe mendek inagugi Amon nogo inom, at Pirawun inom, o Metit wonogwe inom, it inagugi inom, it inoweewi inendagembogut inom, it aap Pirawun paga panggombunuk wonogwe nogo inom, abok aret maluk onggo aaninggin inoba piyaakit nduk eeke agarik o.

Yeremiya 48:7

Inayugum pak wurik paga, Inamendek ambik kuwak aago wonage paga, Iniki panggombugwi kwe, it togon tebenogo piigwi, Kugi Kamot kugun wonok nogo logonet, It aap kugi Kamot unde inom, ake eeka inom, wogoren mbo piya nogwe, Eerugun o.

Yeremiya 49:27

O Ndamitik pak wurik an nen kani paarogo pigin me, Kani nenet nage logonet, Aap endagembogut Mben-Karat eebe op logorak awi o nggwok abe wurit nagagerak nogo kani nenet nage logogin o,” yinuk, at Omaawi Lombok Menggerak Aliku ALA nen aret yegerak o.

Yeremiya 50:2

“Aakumi inanebunu lombok inenggela'me yorage, Inaruk liirogon konenuwak nduk wone yoranet nage, Ineenu agak ndiimbu walok eeke logonet, koone nggwok paga yoranet nage, Eeke logonet, Wone ambi kumaarogo puurak lek abok yoroorak nogo yi aret. O Mbaben nogo muk tebenggola unggwogwe, Agugi Mben nogo abu enggali age, Agugi Merorak nogo iniki ma'nage, Inagugi ogut aago nogo inenggali age, Inagugiwak abu yigirik-noonom age, Eerigin o.

Yeremiya 51:44

Kugi Mben o Mbaben wonage nogo aaninggin oba kwippege, Yi mendek ndi mendek at ambeme yonggoleegerak nogo kilirogo wumbi woraawak nduk, eeppege, Eerigin me, Aakumi inanebunu lombok at owagam wagak eekwi nogo ambinom eeko logogun lek o. Ndi, o Mbaben ayugum pak wurik kunduk, langguk yigin o,” yinuk, Alik Ku ALA nen yegerak o.

Yetikiyen 29:11

Aakumi ambiriluk ambi tu ti paga nogwe, inaanggumi kunduk tu ti paga nogwe, eeko logogun lek o. Nggween ti paga aakumi ambiriluk ambi ye mbambatinuk wonogwe lek iigak, tahun 40 aret eerigin o.

Yetikiyen 29:19

Togop me, Aliku Itok Menggerak ALA nen yegerak nogo yi aret. “An nen o Metit ti, it Mbaben mendek inowe endagembogut Nebukanetat wogorigin o. Wogoge neenok, inamindik-inamendek time wonage nogo abok aret kabelogo wagangge, at awuri ineegin warak eeremenggaarak onggo eeppiyoorak nduk, iname unggunuk inamendek kologwe, yi mendek ndi mendek o time wonage nogo kugun waganggwi, eerugun o.

Yetikiyen 30:13

At Aliku Itok Menggerak ALA nen yegerak nogo yi aret. “O Metit time inagugiwak pup eerogo pege, O Membit time inagugi ogut aago nogo lek eerogo pege, Eerigin o, O Metit time aap inowe endagembogut ambinom logogin lek me, Aakumi o time inagabiti mbakak nugu logowak nduk, eerogo piige,

Ndaniyen 11:8

Tebenogo piinok, it inagugiwak inom, inagugi ogut mbuti owak paga aago inom, inamindik-inamendek mbuti perak paga, emas paga, ogobakkigirik onggo iya mendek inom, kugun wonok o Metit pi nagin o. Pi namenggerak at o omarip paga pa'nggwe endagembogut nogo, ambi mbaanggaga'lek ame ugun wonage kagak, tahun mande negen eerigin o.

Tepaniya 2:11

At Aliku ALA nen it aakumi o nggween paga yime inagugi lek eerogo piige kenok, Inagabiti nen, “Aliku ALA ti, iya!” yinuk, yi aakumi ndi aakumi nggween paga wonogwe abok aret inalitik-inalitak menggam logonet, Aliku ALA abu'me tebe yinuk, at alut eeko logogun o.

Oroma 13:12

O apit lek age kagak, o kilim nagaburak abu panggo yi wagaarak me, o apit paga logonet eeko mengga kwak, eerit nugwi nogo mbo punuk, o weeremenggerak eya paga wim namburuwak nduk, ineegin-inarege li'luk aago mengga kwak, kit togop aret eeppunuk logonip o.

Epetut 4:24

Ala maluk eekeelik obaabut abu abe koonak menggerak nogo kokwak, kit ndak-ndak kinobaabut mondok ngget mendek eerogo pinagawak nduk, yokkiragi o.

Epetut 6:11

Ibilit nen iniki koombunuk, kinambokan lagani wage kero, mugogo nappegak eeko logobagip nduk, Ala nen at eegin-omaale li'luk eerogo pinagareegerak nogo, waganggo logonip o.

Kolote 3:12

Togop me, at Ala nen kinabuwa mbake logonet, at apuri maluk eeka'lek alik leenak logobagip nduk, miikkinabeegerak me, yum yikkologo mengga kwak kinobaabut ngget mendek eekkologo logonet, aakumi inabuwa mbakwi, kiniki yanggonak paga obeelom eeppiigwi, kiniki tebenak logonet nugwi, kinoone omaawi lek yanggorogon yorogwe, inoone kinoba pinagagwi iinok liippunuk yorogwe,

Kolote 3:14

Yokkiragarak ti abok aret eerit nogo logonet, kit kiniki ambit lambunik ale'nggen nggwok logorak alom nogo ti, yum yippunuk inobate keele nggerenggologo mengga kwak niniki-kiniki kunik aganakwi nogo aret me, ti inom aret eerit nogo logonip o.