Yeremiya 39:8 - Ala Wone Peenok Peebi Mbanak

⁸ It aap Mbaben mendek nen aap endagembogut awi o nggwok abe wurik nogo kani pugwi, it aakumi inawi wurik kani mbelanogo pit nogwe, yugum pak Yerutalem wurik langgu-langgu eerogo wuppit nogwe, eereegwaarak.

Yeremiya 39:8 ပူးပေါင်းရင်းမြစ်များ

2 Endagembogut 25:8

Ndi, aap Nebukanetat nogo aap Mbaben mendek inowe endagembogut wonage kagak, tahun 18 eeppunuk, ambi eerak tut 5 penenak tanggal 7 paga aap endagembogut inom eeka ambi at eebe wonok nega inowe endage Nebutararan o Yerutalem wagagerak.

2 Mbinineegwaarak 36:19

Ala awi wurik kani pege, o Yerutalem yendok-wandok yugum pak wurik nogo, langgunogo pit nage, aap yo'nggok inawi o nggwok abe wurik me, yi mendek ndi mendek abe wonage nogo inom kani pege, eereegerak.

Nekemiya 1:3

Kin wogonake mbareegi, it nen an yo'nogo logonet, “Lek o. It aakumi wogoren piya wagagerak yime nen o Yerutalem nogogwaarak wonogwe nogo, aaninggin-paaninggin inoba kwi'nagaarak wonogwe, inenggali mbakak nugwi, eeko agaarik o. Ndi, o Yerutalem ti, yugum pak wurik yinik-minik eerogo pugwi, tu unggwogo menggam pak ambe mbanak nogo kani mbelanogo pugwi, eerogo pereegwaarak wonage o,” yinuk, yo'nereegwaarak.

Yetaya 5:9

An naruk konengge neegak, at Omaawi Lombok Menggerak Aliku ALA nen yegerak nogo yi aret. “O yo'nggok obeelom wurik apit aret aakumi wonaga'lek o wuum lu agan nage logogin o.

Yeremiya 17:27

an wone yoragagirak konembunuk nogo 6 yippunuk ko'lu paga alik leenogo pugwi lek, ne 7 ti paga inamendek luurik-maarak aago wonok o Yerutalem tu unggwi wogo menggam unggwi wogwe iinok, o Yerutalem tu unggwogo menggam time kani noguk yuurak lek mendek wuninogo piminggirak paga, aap inendagembogut inawi nggwok abe wurik abok aret kani pup eerogo nengge logogin, yegerak, yoret o,” yinuk, yo'negerak me, yokkiragi o.

Yeremiya 21:10

Aliku ALA nen ari logonet, O kota yi, an nen obeelom eerogo puurak mbarulik maluk eerogo puurak abu koonogo pigirak me, it aakumi Mbaben mendek inowe endagembogut eenggime pege neenok, at nen kani pemenggerak paga pup eerogo aret nagin, yegerak, yoraabagip nduk, yokkiragi o,” yinuk, yoragagerak.

Yeremiya 32:29

It Mbaben mendek o yi tebenggola ungguwok nduk eekwi nen unggwi wa'nuk, o yi, kani pogo logonet, it aakumi inawi kirin ndoonak paga obari abe kaga kugi Mba'an ake kani kunggwi, an neegak kwe, anggur amburu inagugi inake kilirogo pugwi, eekwi paga nanini mbareegirak inawi wurik nogo, inom kani pit namenggaarak pup eerogo nanet nage logogin,” yo'nereegerak o.

Yeremiya 34:2

“Iterali inogoba Aliku Ala nen, Kat aakumi Yekura inowe endagembogut Terekiya wonage me nanuk, wone yoriyak nogo yi aret. At Aliku ALA nen ari logonet, O kota Yerutalem yi, aap endagembogut Mbaben mendek eenggime pikit nduk eeke me, ti pege neenok, at nen o kota yi, kani mbelenogo pigin o.

Yeremiya 34:22

At Aliku ALA nen ari logonet, “O kota yi, tebenogo puwak nduk, an nen wone lengganogo yoraminggirak paga iniyokan wogo logomenggaarik, inom wim nambuko logonet, o tebenogo pugwi, o kani mbelenogo pugwi, eeko logogun o. Ndi, an nen o Yekura kota-kota nogome aakumi wonogwe lek kugume aret eerogo pigin o,” yinuk, yegerak.

Yeremiya 37:10

It aap Mbaben mendek inawuri wim eeka abok aret inoori wogwe nogo mugogo wumbiyoorak op nen, it mbaganggwi iigak, eegu maale warak ooliyana puk arit namenggaarak nogo nen aret wundi wogo logonet, o kota yi, kani pup eerogo pene, yegerak, yori nanip o,” yinuk, yoragagerak.

Yeremiya 38:18

Ndi, aap endagembogut Mbaben mendek awuri inabu'me tebe yi unggigin lek kenok perak, o kota ti, it Mbaben mendek ineenggime piyaminggirak me, kani mbelanogo pugwi iigak, at kunduk, ineenggime nen mbaganigin lek,” yegerak me, yokkigi o.

Yeremiya 5:10

It inawim nogo nen napuri ineyabu anggur yarak me lagi nogo logomenggaarik, Maluk eerogo pit noorak op aret kwe, abu lek eerogo pugwaarik o. It aakumi yi, Naliku an ALA napuri lek negen iigirak me, Eno'mbak mbanogo mbo nappit nogo mengga kwak it togop aret eeppiinet nogo logowak o.

Yeremiya 7:20

Yo'nege nagaarik, Aliku Itok Menggerak ALA nen yegerak nogo yi aret. “Nanini kani kunik pogom o yi paga wuppi woraminggirak paga aakumi ineebe inom, inaanggumi inom, inageyo inom, ineyabu yarak anggen mbanak inom, abok aret nenet nage logogin me, nogonogo puurak meek aret kaagun,” yegerak o.

Leendawi 1:10

Awim nen amendek obeelom iniki kundugu nogo waganeegwaarak o. Kaliku ALA nen, “Nawi wurik abu leenak nogome aakumi ugun ungguurak lek an napuri nen mban unggwi nogo logorak,” yereegindak kagak, Yi aakumi ndi aakumi endekem mendek nen unggwi nogwe enegen iyareegerak o.

Leendawi 2:2

Abuwa mbaka'lek nogoba Ala nen it Yakup mendek wonogo menggam abok aret pup eerogo pege, At anini nen o Yekura Aagalukwe obak wurik abok aret yigirik-noonom eerogo wurabit nage, At abu'me piige menggim inom, at arum menggaarak nagawan-nagawan inom, inendage maluk eerogo pege, Eereegerak.

Leendawi 2:7

Inogoba Ala nen at ake warogo kani kunggak ogobakkigirik nogo mbo pege, At awi wurik alik leenak nogo mbo punuk nage, O Tiyon oweewi inendagembogut inawi o nggwok abe wurik nogo, yigirik-noonom eerogo puwak nduk, awim ineenggime pege, Eereegerak me, Iterali inale'nggen paga laago lariyak koonak nogo lako logonet, inale'nggen nen keekok piyanggogo mengga kwak awim nen Aliku ALA awi wurik me unggunuk logonet keekok piyanggogogwaarak.

Yetikiyen 16:41

At awi apit wurit nagagerak nogo, kani mbilanogo pugwi, it kumi abok inigen iigak maluk eeke nagagerak onggo at oba kwippugwi, eerugun. Ti eeppugwi iinok, at ugun, Ee'nabuwak, mbarit nege nogo, lek eerogo pege, Ee'nabuwak o, yinuk, onggo wogorage menggerak nogo, lek eerogo pege, eerigin o.

Yetikiyen 23:47

Aap eerak ti nen yugum paga oweeluk awuluk imbirak lomba eerogo inookwi, paloowi paga ineebe nggarik-nggarek eerogo inookwi, inaagalogwe wologwe-komologwe inoorit nogwe, ndi, inawi wurik kani mbelanogo piigwi, eerugun o.

Yetikiyen 33:21

Mbo pinani wogogwaarak wonogwe niigak, tahun 11 eeppunuk, ambi eerak tut 9 penembunuk, ambi penenak tanggal 5 tut ti paga aap ambi o Yerutalem nen peberagangge eerak an neya wage nagagerik, yo'nege logonet, “O kota ti, abu aret lek eerogo pegaarak o,” yinuk, yo'nereegerak.

Amot 2:5

An nen o Yekura yime kani nappi woraminggirak paga o Yerutalem yugum pak wurik me inarum logorak inawi wurik nogo kani nen lek eerogo nagin o,” yinuk, yegerak o.

Mika 3:12

Togop aret yogo monggotak me, o Tiyon ti, yabu kabunogo nippit nogo mengga kwak age, O kota Yerutalem ti, nggween yigirik-noonom eerak logonak negen age, Ndi, puut Ala awi wurik menggim ti, alok-palok mban kunogo pege, Eerigin o.