Yeremiya 32:18 - Ala Wone Peenok Peebi Mbanak

¹⁸ Yi aakumi ndi aakumi ambik ineenggi lingginiyak meek nogo inabuwa nen kiniki kunik eeginake menggendak kwe, inogobamini inomaluk paga inapurilogwe aaninggin inoba piige menggendak o. Kat mondok iya komaawi ambik Ala aret. Kendage ti, Komaawi Lombok Menggendak Kaliku ALA aret o.

Yeremiya 32:18 ပူးပေါင်းရင်းမြစ်များ

Wakkagagerak 49:24

At Omaawi Ambik Menggerak an Yakup Yeenggwa Nega nen yeenggwa kege, At Omaawi Ambik Yugum nu'lek menggi kwak logonet, An Iterali Ndegennaka nen kat ndegenggake, Eeke menggerak me, Keenggi aaninggin ambik lek teeluk aret wonage, Keegin keenggime nu'lek porogo wonage, Eeke logomunggun o.

2 Endagembogut 9:26

At Aliku ALA nen ari logonet, Aap Nabot apurilogwe inom kobit inamiya wunakendak nogo nenegen kagarak o. Inamiya wunakendak inamee'nggo waminggirak nogo aap Nabot eyabume yi aret mbo piyaagin o, yinuk, aap Akap yoreegerak me, at Aliku ALA nen yoreegerak nogo ndak-ndak, eebe waganogo aap Nabot eyabume onggo kuneegim time aret mbo nappu o,” yoreegerak.

Nekemiya 1:5

“Kaliku nogoba ALA wae. Mbogut paga menggendak kat Ala aret o. Kat abu nggwok wonage keenok, aakumi kayuk wuko logonet, pi wakkakwi Ala nogo nen, Yogop ee'nu ndogop ee'nu, wone yereegindak eerit nugwi, it iniki kunik eekkakwi, eekwi iinok, kinom wone koonogo pereegindak nogo li'lak aret eeppiige menggendak me,

Ndawi 50:1

At Omaawi Lombok Menggerak Aliku Ala oone ari, Oonegen lagi wage menggim nen nok, o kilu yi nage menggim kuli It nggween paga yime menggaarak nogo wiirage,

Ndawi 89:9

Yi laut ngguk-lagap eerogo wumbi wage nogo, Kat aret unde wonage, Niyo kole yenggenak kilaarak-mogonik eeke nogo, Kat nen abolok lek eerogo pege, Eeke menggendak o.

Wundeegwaarak 34:6

peleppegak Muta enaame pa'nggwe ari nage logonet, “Naliku ALA an aret o. Naliku an Ala nen aakumi inabuwa mbake, niniki yanggonak paga inooka'lek teppiige, niniki aanaganggenggwi lek liippunuk koongge, niniki kunik eeginake logonet, yi obeelom ndi obeelom eeppiige, wone eeriyak yorage nogo ndak-ndak aret eeppiige, eeke logonet,

Wundeegwaarak 34:7

yi aakumi ndi aakumi apit aret inabuwa mbake minggirak me, iniki nen maluk eeriyak koonggwi inom, noone yugu eeriyak, Neebi o, yinuk, taganggwi inom, maluk eeriyak koongga'lek kagak perak togon maluk eekwi inom, inomaluk ti lek eerogo puurak op kwe, aap ambi nen kulinik-kalinik maluk eeke kenok perak, an teppigin lek o. At maluk eeremenggerak onggo at inom, at apurilogwe inom, ombowologwe inom, ombowologwe inapuri inom, inoba kwippiinet wundi nage logogin o,” yinuk, oone nggwok paga yoreegerak.

Yetaya 10:21

Eegu yumbunik nogo iniyokan wogwe, At Omaawi Menggerak Ala owagam wogwe, Eerugun o.

Yetaya 57:15

At endage Kikak Nakeelik, Alik Leenak, Abu Tiyanak, Ayuk Warak, Mondok Itok Menggerak nen ari logonet, “An o abe alik leenak abu tiyanak minggim wonage minggirak kwe, It aap, An maluk eekirak, ao, mbakwi nogo iniki ale'nggen eerogo piige, Iniki tebenak wonogwe iinok, iniki eyak wappiige, Eerikit nduk, It aap, An maluk eekirak, ao, mbakwi inom, iniki tebenak inom, ninom wonage minggirak o.

Yetaya 9:6

Elege ambi nit ninake muk nda'nage, Wulaga ambi muk aret wo'nirage, Eereegerak me, At wone lengganogo yo'nirage logorak ti, at obaalombok aret logogin o. At endage ti, Wone Kooninaka Mondok Iya, Omaawi Lombok Menggerak Ala, Ninogoba Kanggeelik Mondok Eenik Menggerak, Aakumi Lambuninaka Endagembogut o, yinuk, yogo logogun.

Yeremiya 10:16

At Yakup iniki kunik mbake nogo perak, togop lek o. At yi mendek ndi mendek apit aret wakkage nagagerik, Eyate kwak inanebunu Iterali mendek warak eerogo piyareegerak nogo ti, Endage, Omaawi Lombok Menggerak Aliku ALA aret o.

Yeremiya 10:6

Kaliku ALA wae. Kat ndak-ndak ambi wonage lek aret o. Kat mondok nggwok aret me, kendage kunggwi iinok, komaawi paga eerit nage menggendak.

Yeremiya 20:11

It togop aret yogwe kwe, aap wim wakaa'ngget menggi kwak Kaliku ALA nimbirak aret wonage me, It an piyak-payak ee'nabit nugwi nogo nen ambi eeppanega'lek it aret iniyogobit lik togon yigeebu wambugun o. Eeppaniyak mbakwi nogo mbeyok yemenggerak paga inenggali ogwe, Inendage maluk aremenggerak nogo kobak aga'lek aberak mban wonogwe, Eeko logogun o.

Yeremiya 31:35

Aliku ALA nen yegerak nogo yi aret. “O liingge eya eeke logot o,” yinuk, oonegen yoge, “Oonikiya eya eeko logonip o,” yinuk, tut laaluguragan imbirak wone lengganogo yorage, Niyo nggwok yenggenak laut kilaarak-mogonik eeke logonet, oonebu ari logowak nduk, eerogo pege, Eeke menggerak endage Omaawi Lombok Menggerak Aliku ALA nen ari logonet,

Yeremiya 33:2

“O nggween yi ogobakkigirogo pege, o yi nenaarogo pit nage, nggween alom kwippege, eereegerak endage Aliku ALA aret me, Aliku ALA nen an yo'nege logonet,

Yeremiya 50:34

Togop eerogo piinok wonogwe kwe, an Wondet Eerogo Piiga ti, nomaawi wonage, Nendage ti, Nomaawi Lombok Minggirak Naliku ALA aret o. An nen aret it Iterali inanggween paga wonogo logonet, inabolok lek logorak eerogo piige, Ndi, it o Mbaben wonogwe perak, inabolok mban yogo logorak eerogo piige, Eeruwak nduk, Iterali inawone liirogon amburu mbanogo piige logogin,” yegerak o.

Ndaniyen 2:45

Yugum kole puut paga aakumi ineenggi paga nen langgunogo nappi woroolik alik en yelek togon wangge logonet, ogut mbuti owak paga inom, mbuti tembaga paga inom, nggabok paga inom, mbuti perak paga inom, mbuti emas paga inom, ogobakkigirik nogo aan lebenogo pege kabinggaanggo kagandak alom nogo ti aret. At Tiyanak Lombok Menggerak Ala nogo nen peebi ariyak nogoba kendagembogut kabinggaanggo paga yokkegerak nogo ti aret. Kabinggaanggo kagandak nogo ti abet aret me, Alom yogop aret o, yinuk, yokkigirak nogo ti, abet mba'nok nduk yokkigi o,” yinuk, yoreegerak.

Abakuk 1:12

Kaliku ALA wae. Kat kanggeelik mondok kitok menggendak nogo lek a? Kat nogoba Ala maluk eekeelik nogoba obeelom mban wonage menggendak o. It Mbaben mendek nen nit aaninggin-paaninggin eerogo pinanuwak nduk, koonogo piige, Kat yugum kole lunik kwak ninogoba wae. Nit maluk eekwi onggo ninoba kwippinanuwak nduk, kat nen aret it mippiige, Eereegindak kagi o.

Matiyut 27:25

Yorage mbareegi, it aakumi abok aret inoone wonggok togon yogo logonet, “At amiya ti, nit ninapuri-ninombowologwe ninom ninoba logorak op aret o.”

Lukat 6:38

Ugun wogorogwe kiinok, ugun wokkirogwe kaamunggup o. Togolowa'na eno korok togon yonggoppunuk, nggwik-nggwik eeke, tebenogo wuppege, eeppunuk, a'nggan ngginu-ngginu wangge kagak, kinabu'me ngginggirogo mengga kwak, ndak-ndak wokkirage kaamunggup o. Wakkagak nogo paga wakkaanuk aakumi wogorogo monggotak nogo ti, ndak-ndak wakkaanuk wokkirage kaamunggup o,” yoragagerak.

Pelaareegerak 10:17

Ndi, at Aliku kinogoba Ala ti, yi kugi ndi kugi at obaane'me punuk, alut eekwi nogo abok aret at abu'me iigak, at Ala alik aret irimbaga wonage o. Ndi, yi aap ndi aap yo'nggok tebenak iigak, at Aliku ALA alik tiyanak aret wonage o. At mondok tiyanak omaawi ambik mondok iya lombok me, at ambi iya, ambi meek mbake, ndi, at ambi eeppinanuwak nduk, wu wogogwi iinok wagangge, eekeelik o.

Pelaareegerak 7:21

At Aliku kinogoba Ala omaawi ambik ayuk warak iya lombok menggerak nogo, kinenggela'me wonage me, it aakumi ti, ineebe paga kinaganak ndik-ndik eeriyak mage o.