Yeremiya 3:25 - Ala Wone Peenok Peebi Mbanak25 Nit inom, ninombomini inom, nen ninogoba Kaliku Ala maluk eerogo pagagwi, Nit tawe paga nen nok, yogondak kuli ninogoba Kaliku Ala koone yugu nogo eeka'lek mbo pugwi, Eerit wogo ogoorik me, Ninenggali nen ninuut kuru agan wanggwi, Ninendage maluk agaarak ninagabiti nen ninayum ninenete paga nobakkologwe, Eeruwok o,” yinuk, yoreegwaarak. အခန်းကိုကြည့်ပါ။ |
An yorage nogo inaruk konenggwi, liippugwi, eeka'lek aret agaarik o. O aa'nduk nen inaruk logu negen eeppunuk wonogwe iinok, Nda'nogogwaarak kuli nen nok yogondak kuli aakumi nen, Inogogun ambik o, yinuk, yorogwe iige, Ndi, an kunduk, wone yorage taganogo punuk, alik agan nugwi abet aret iige, Eeke minggirak kwe,
It maluk eekwi nen aret maluk eeginake, It an noone ineebi mbakwi nen aret ineebe andi-pandi eerogo piige, Eerigin o. Togop me, it nen, Ninogoba Aliku Ala mbo pugwi, At ayuk wukwi, eeka'lek niinok, Abu maluk aret eekwi, niniki andi eekkoloorak mendek eekwi, eeko ogoorik kogo o, yinuk, Ineenu ogwe, iniki liippugwi, eeko logowak o,” yinuk, at ninogoba Omaawi Lombok Menggerak Aliku ALA nen yegerak me, yokkiragi o.
“Aap ambi kote kiraake me pigaganggwi iinok, enggali age menggi kwak, It Iterali paga wiganak abok aret inom, inoweewi aap inendagembogut inom, aap inendagembogut inawuri nagawan-nagawan inom, Inake eeka an neebe unde inom, inoweewi an nen yorage neegak yoraga inom, abok aret inenggali agaarak wonogo agaarik o.
Aliku ninogoba Ala eeriyak yo'nirage ti, nineebi o, yinuk, yogwe, It inambik inagugi eeko menggam eyo eno'mbak nggwok wiganak abu'me time inom iniki kunik eeginabit nogwe, Noone yorage nogo eeka'lek mbo pugwi, Eekwi ti, Maluk abet aret eeko ogoorik o, yinuk, ti mban yo'nugwi iinok, inabuwa nen teppiyaagin, yegerak o, yinuk, wone eerogo nappumunggun o,” yinuk, yo'negerak o.
It Ala apuri nen yogo logonet, “Nonggop nduk nit yime kwi'ndik-kwi'ndak mban ogoorik? Nit nen at Aliku ninogoba Ala maluk eeppogoorak paga at nen niyo kanggo menggaarak mendek toologo wo'nirage, Ninenggaawak lek eerogo pinanikit nduk koonogo pege, Eereegerak me, Nit mbet-mbet kuwak eekwi, Kuwak eeppunuk, o kota-kota yugum pak wurik me time unggwi nogo logomonggoorik, kambit nogwe, Eeruwok o.
It nen an neebe unde logowak nduk, nowagam wogwe, namindik-namendek alik leenak nogo piga wogwe, nake abu alik leenak warogo wo'nugwi nogo koorok ari wogwe, eeriyak mondok mage o. Ogole warak lombok eerit nogo nogogwaarak paga inenggali ogogwaarak nogo, inenggali mbakak nogo logowak o, yinuk, Naliku Nitok Minggirak an ALA nen aret yagi o.
Aliku ALA nen ari logonet, “O karume anggur anggen yugu kogo nagaatik, inale'nggen mbako mengga kwak, It Iterali aa'nduk lombok iige nagagirik, nale'nggen ambik mbake, Eyo wuli anggen aa'nduk yugu nogo kogo nagaatik, inale'nggen mbako mengga kwak, It Iterali inombomini iige nagagirik, nale'nggen mbake, Eereegirak kwe, Puut Peyot paga woraanuk, ogole warak kugi Mba'an ake ineebe nggomoorogo pakwi, Mugurok nogo logonet, ogole warak iniki kunik eereegwaarak nogo, ineebe ndak-ndak inogole warak aret eekkologwe, Eereegwaarak o.
Aliku ALA nen ari logonet, “It aakumi nen Naliku an ALA maluk eerogo paneegwaarak me, An nen it aakumi ti anggon-panggon lombok eerogo piige neenok, aakumi inigen mbuk yu'nduk agan nogo mengga kwak nugu logogun o. Liirubu kale'ngga eerogo mbo pogo mengga kwak, aakumi inamiya togop aret eerogo pugwi, Inaan wurik ogole o, yinuk, mbo pogo mengga kwak, inaanagale togop aret kilirogo mbo pugwi, Eerugun o.