Yeremiya 23:11 - Ala Wone Peenok Peebi Mbanak

¹¹ “It aap an noone yoraga inom, neebe unde inom, An noone liippega'lek ugun eerit nugu logonet, nawi wurik me kunduk maluk eerit nugwi iigirak o,” yinuk, Aliku ALA nen aret yegerak o.

Yeremiya 23:11 ပူးပေါင်းရင်းမြစ်များ

2 Mbinineegwaarak 33:5

Aliku ALA awi wurik me owa'nagat mbere wurik nogome laaluguragan yigin abigan abok inake warogo wogoragak ogobakkigirogo pit nage,

2 Mbinineegwaarak 33:7

At Aliku ALA nen Ndawut aput Talomo imbirak yorage logonet, “It aakumi Iterali inanebunu lombok inawi kota-kota iigak, an o leenogo pereegim o Yerutalem nawi wurik yime mban nendage mondok-mondok ki logogin me, it aakumi Iterali nen eeko logorak wone inom, wone lengganak inom, Yogop ee'nu ndogop ee'nu, wone inom, an yoragagirak nayeloman Muta nen liiru mbanogo wogoragagerak nogo, porogo logonet, liirogon eerit nogwe iinok, it inombomini logowam inanggween wogoragagim nogome nen ya agak nda agak nugu logowak nduk, eeppiyaagin lek o,” yinuk, yoragagerak kagak kwe, at Manate nen kugigwe Atiyera ageyo arelen ogobakkigirogo pereegerak nogo wonok, Aliku ALA awi wurik me yinogo pi unggwagagerak.

2 Mbinineegwaarak 36:14

It Ala unde inarum menggaarak inom, it aakumi inom, logonet-logonet it kunduk Ala mugurok noolik mbo punuk, yi aakumi ndi aakumi ogole warak mendek eerit nogwe nogo mugurok nogwe, Aliku ALA awi wurik o Yerutalem leenogo pereegim nogo maluk eerogo pugwi, eereegwaarak.

Etara 10:18

It aap Ala unde paga wiganak nen kumi alik mendek wogonabeegwaarak inendage yi aret. Aap Yotarak aput Yetuwa oreewi inom it paga wiganak ti, Maateya, Eliyetet, Yarip, Nggeraliya aret.

Yeremiya 11:15

It an napuri niniki kunik nogo nen an nawi wurik me logonet, Inoreewi ambik inom maluk eeriyak koonogo pit nogwe ti, nonggop nduk eeko agaarik o? Ndomba nake nggomoorak titik nugwi ti paga Maluk eekwi onggo eeppinanigin lek teppinanigin, mba'nuk inale'nggen mbako agaarik ya?” yinuk, yegerak o.

Yeremiya 23:15

Togop me, at Omaawi Lombok Menggerak Aliku ALA nen yorage kagak yoraga eeriyak yegerak yi aret. “It an noone yoraga negen eekko'nok it Yerutalem mendek yorogwe paga noone liippunuk, Eeriyak ineebi mbaka nogo mendek o yime abok aret wigak yegerak me, It aap ti, inambi ale mendek nawak nduk, wogorage, Niyo kambuurak mendek inom nenggelak-kenggelak eeppunuk nawak nduk, wogorage, Eerigin,” yegerak o.

Yeremiya 32:34

An nawi wurik nendage kunggo menggam inikime time ogole warak inagugiwak pi unggwogogwaarak paga nawi wurik ti maluk eerogo pugwi,

Yeremiya 5:31

It aap an nen wone yorage neegak yoraga nogo nen, Ndogop eeke kaamunggup o, yinuk, we pilit pugunit nugwi, It aap an neebe unde nogo nen it iniki mbakwi mban mamuninabit nugwi, Ndi, it ti eekwi nogo it an napuri kunduk, inikilom mbako logonet konenggwi, Eekwi ti aret me, O age yobok panggoni wage kenok it nano eerugun o?” yinuk, yegerak me, yokkiragi o.

Yeremiya 50:6

It an napuri nogo ndomba kobak aago kwak nugwi, It ndegeninaka nen nomonogo tu alik paga piya nogwe, Puut-puut time iri'ngga kwaarogo nenet nugu logowak nduk, mbo piigwi, Eeko mbareegwa, Iname nogo yogo menggam woroorak kobak a'nuk, puut ambime nen puut ambime agak nugwi, Eerit nugwi me,

Yeremiya 6:13

“It aap inendage lek inom, inendage warak inom, abok aret ambi kolaawok nduk mugurok nugwi, It an wone yorage neegak yoraga inom, it an neebe unde inom, abok ndak-ndak inoone pilit pugunggo logonet, aakumi wi-wi eeginabit nugwi, Eeko menggaarak.

Yeremiya 7:30

Aliku ALA nen ari logonet, “It aap Yekura mendek nen an nenggaanom paga maluk lombok eeko logonet, inagugi ogut eerak ogole warak mendek nogo an nendage yogo menggam nawi wurik me nogome mippit nagaarak ti paga maluk eerogo pegaarak o.

Yeremiya 8:10

It inakuwi ndinogo aap alik wogorage, Ndi, ineyabu eerak nogo it aap o tebengga wogorage, Eerigin o. It aap inendage lek inom, inendage warak inom, abok aret ambi kolaawok nduk, mugurok nugwi, It an yorage neegak yoraga inom, it an neebe unde inom, abok ndak-ndak inoone pilit pugunggo logonet, aakumi wi-wi aganabit nugwi, Eeko menggaarak.

Leendawi 2:20

“Kaliku ALA wae. An eeppanege yi kwak, Ambi ta eeppigirak, nduk eeppanege agandik? Lek aret me, An yi, kenegen pe'neege, liippanege, eeru o. It kumi inaagalogwe inikime nen lombok ndarak inabuwa mbako logonet, ndegeninakwi nogo inoorogo nunggwi, Ndi, it aap keebe unde inom, yorage keegak yoraga inom, nogoba Ala kawi wurik alik leenak me nogome nen inoorogo piigwi, Eekwi ti, op mbaken?

Yetikiyen 23:39

Inaagalogwe inoorogo inagugi inake kani kuneegwaarak ne ti paga aret, an nawi alik leenak menggim nogome unggunuk, ogole warak lombok eerogo pit nogogwaarak. Abet aret an nawi wurik ti aret maluk eerogo pit nogogwaarak.

Yetikiyen 44:10

“It aakumi Iterali nomo agan tu alik paga nogwe iigak, it Lewi mendek nen an mbo panugo nogogwaarik, an wonage neegak kwe, inagugiwak ayuk wurit nogo nogogwaarak me, maluk eeko nogogwaarak onggo eeppiyoorak ti, it inobaalombok aret inoba logogin o.

Yetikiyen 7:20

It mbuti perak paga, emas paga, inobaanggi-inobaangge abu kigirikwe eerogo punuk, tiyappatit nugu nogogwaarak nogo, nggoorogo ti paga ogole warak mendek inagugiwak nogo eerogo pugwi, inagugi ogut ogole warak mendek ogobakkigirogo pugwi, eeko nogogwaarak me, it ineraaket nen, Ogole warak me, Iya, yuwak nduk, eerogo pigin o.

Yetikiyen 8:11

Ogut eerak wonage nogo eraaninu aap Iterali mendek inoweewi ineebe 70 mi'ndak wonogwe, ndi, aap Tapan aput Yaataniya it inenggela'me mi'ndak wonage, eerak logonet, it inalitik-inalitak obari abe kaga kani anggen ndoongga ineenggime porogo wonogwe iigak, obari abe kaga nogo kani ndoonak nogo paga nen ka'luk lagangge kagagirak.

Yetikiyen 8:16

Kage mbareegi, at nen an wo'neren Aliku ALA awi wurik oore'nggam akem time pani nage mbareegi, at awi wurik me tu unggwogo menggam enaame wone mbanggo menggam inom, ake warogo wogogo menggam inom, oolo taati aap ineebe 25 negen nen Aliku ALA awi wurik inambokan punuk, ina oonegen wundi wage menggim pa'nggwe na'na'nuk, oonegen wundi wage nogo inendobanggun yindumbunuk, ayuk wukwi iyareegirak.

Tepaniya 3:3

At inom eeka aap inendage warak wonogwe nogo ti, Singa at nengge menggerak naakit nduk oone nggwok ari menggi kwak, wonogwe, At aagalogwe inowak loongga ti, nggeewo owo nen nggwiya wappunuk ko'lu noorak mbakulik, o ne ambit weege paga uwiirogo wurako mengga kwak, wonogwe,

Tepaniya 3:4

At enggela'me it Ala nen yorage kagak yoraga nogo ti, liirogon yoraga'lek ugun-ugun yorogwe me, “Yi abet aret yo'nirogwe,” mbaka'lek wonogwe, At enggela'me it aap Ala unde nogo nen Ala ake leenogo pugu nogo, maluk eerogo pugwi, Ala wone Muta nen liiru mbaneegerak nogo, taganogo punuk, it mbakwi nogo mban mugurok nogwe, Eeko menggaarak o.