Yeremiya 22:16 - Ala Wone Peenok Peebi Mbanak

¹⁶ It aap ineenggi lek inom, it ambi eekkoloorak meek tebenak mendek inom, Inawone amburu liirogon mbanogo inowak looninake nagagerak ti paga endage obeelom wonagagerak o. It aap an Naliku ALA liippanugwi iinok, togop aret eeko menggaarak nogo lek a?

Yeremiya 22:16 ပူးပေါင်းရင်းမြစ်များ

1 Mbinineegwaarak 28:9

Yorage nagagerik, aput Talomo yoge logonet, “Ndi, kat naput Talomo wae. At Aliku ALA nen yi aakumi ndi aakumi inikime maloppiige, Ndogop eerikit, koonggwi nogo, Nonggop nduk koonggwi, yinuk, eenu age, eeke menggerak me, kat nen Aliku ALA kwaake keenok, kimbirak lambunumunggun kwe, at mbo pege keenok perak, at nen kat mondok-mondok mbo pagagin o. Togop me, kogoba an nogoba Ala ti, An nogoba aret o, mbake logomenggendik, kiniki nen, Ala ake eeke logokit o, yinuk, kiniki-keebe nggaruk togon Ala wogo'nuk, ake eeke logomunggun o.

Ndawi 36:10

It kinom kunik nogo kiniki kunik eeginake, Iniki abe koonak nogo obeelom mban eeppiige, Eeke logot o.

Ndawi 9:10

It aakumi iniki Kaliku ALA koba panggombunuk mukkeren wogwe iinok, Kat mbo piigeelik me, Kendage inom, eeke menggendak inom, ineenu nogo nen Iniki koba panggombunuk aberak menggaarak o.

Kini Wuppiige 31:9

Eeppiige logonet, eekaatak a'me nggelok mban inowak looninake, Aap ineenggi lek inom, aap tebenak wonogwe inom, tebenogo piyookwak, inaana'le mbanogo piige, Eeke logot o.

Yetaya 1:17

Eeko logomenggaarik, Obeelom eeriyak mendek mamunggologwe, A'me nggelok eeriyak mendek mugurok nogwe, Aap tebenak mendek iniki eyak wappiigwi, Elege moono inake koonggwi, Kumi togwe eeppiyoorak inawone mbanggwi, Eeko logowak o,” yinuk, ari kagarak me, yokkiragi o.

Yeremiya 5:28

Abe mban nunggwi paga ineebe kole inamburu tene yogwe wonogwe, Eeko menggaarak. Maluk mban eerit nogo logonet, Ti kuli aret o, yogwe, Elege moono inawone amburu mbanggo logonet, it eeppiyoorak koonggwi, It aakumi ineenggi lek op eeppiyoorak koonak nogo eeppiyoorak inaana'le mbanggwi, Eekulik aret o.

Yeremiya 9:16

It inom, inombomini inom, aakumi abu ineenggo'lek mendek ineenggime mak eerogo piige, ineebe inooruwak nduk, nappiya woraminggirak muguren nogwe iigak, an nen inenggaawak lek eerogo piige, eerigin,” yegerak o.

Yeremiya 9:24

Ata, aap ambi nen wone tiyappuurak mbake kenok, wone eebe tiyappuurak nogo yi aret. O nggween paga yime aakumi inabuwa mbakwi, Eekaatak a'me nggelok eeppiigwi, obeelom mban eeppiinet nugwi, Eekwi paga ninikilom mbake minggirak Naliku ALA neebe at eenu wonage, Ndi, an eeke minggirak liippanege, Eeke logorak ti aret o,” yinuk, Aliku ALA nen aret yegerak o.

Yeremiya 9:3

Aliku ALA nen ari logonet, “It aakumi ti, inamili yigin agale wurik paga maale lumbunuk tekkoorak kwak logonet, Pilit pugunogo nappit noorak mban koonogo pugwi, It wone abet aret agan nugwi nogo o yime wiganogo pugwi lek pilit wone mban wiganogo pugwi, Ala ti, ninogoba aret o, yinuk, yaga'lek maluk ambi eekak mban eerit nugwi, Eeko menggaarak o,” yinuk, yegerak o.

Mika 6:8

Nit aakumi yi, obeelom eeko logorak ti, Aliku ALA nen muk yo'niragagerak o. Ndi, Aliku ALA nen eeko logorak ninombake nogo ti, ngge o? Lek o. Nit eeko logorak ninombake nogo ti, a'me nggelok eeppiinet nugwi, Aakumi inabuwa mbako logorak ninikilom mbakwi, Niniki tebeppatinuk, ninogoba Ala mugurok nogwe, Eeko logorak ninombake ti aret o.

Yaya 16:3

Ti eekkinabugun nogo ti, an nogoba nimbirak ineenggo'lek me eekkinabugun o.

Yaya 17:3

It aakumi mondok-mondok ineenik logorak nogo ti, kat Ala abet aret kalik menggendak inom, ndi, kat nen nappani wagagindak an Yetut Keritut inom, ineenu ogwe ti aret o.

Yaya 17:6

It aakumi o nggween paga yime menggaarak ando leenogo wo'nereegindak nogo, kat Ala eeke menggendak abok paganogo yoragagirak o. It aakumi wo'nereegindak nogo ti, kat kapuri kenok aret wo'nereegindak me, kat koone yoragagirak nogo aret eeko menggaarak o.

Yaya 8:19

Yorage mbareegi, it nen at yogo logonet, “Kogoba eebe ngge o?” Yogo mbareegwa, at nen, “An inom, an nogoba inom, kit kineenggo'lek aret ogotik o. An neebe kit kineenu a'netak nen, an nogoba kunduk kineenu a'netak o,” yinuk, yoragagerak.

Titut 1:16

It aap ti nen yogo logonet, “Ala nineenu o,” yogo menggaarak kwe, it eerit nugwi paga nen perak, “Ala nineebi,” mbako logonet, yogwe yelok iigo monggoorak. Ala wone konengga'lek taganogo pit nogo logonet, obeelom ambi eekulik maluk mban eekwi me, inogole warak aret iigo monggoorak o.

1 Tamuwen 2:2

Yugum kole itok menggi kwak, Ninogoba Ala kat togop aret wonage menggendak o. Kaliku ALA kikak nakeelik abu obeelom wonage kwak, Togop ambi wonage lek o. Kat wonage menggendak kwak, ambi wonage lek mban.