Yeremiya 21:9 - Ala Wone Peenok Peebi Mbanak

⁹ It o kota yime logorak mbakwi iinok, wooluwak paga, mbi noogelo paga, kugilingga paga, aret kambugun kwe, it o kota yime mbo punuk, it aap tebenogo piya ungguurak eekwi Mbaben mendek nogo iya wunggo logomenggaarik, Ninooriyak mage o, yorogwe iinok, inoorugun lek ineebe aret inagap ndakkolaagun, yegerak o.

Yeremiya 21:9 ပူးပေါင်းရင်းမြစ်များ

Yeremiya 14:12

It nen inambe mage negen logonet, Yeenggwa niret o, yinuk, nggino yo'nirimenggaarak kwe, inoone yogwe an naruk konengge, ndi, ndomba warogo nake kani kunggwi, gandum anggen yigirik niri wogwe, eeremenggaarak kwe, nale'nggen nen wagangge, eerigin lek o. Ata, wooluwak paga, mbi noogelo paga, kugilingga paga, ineebe lek eerogo piyaagin o.”

Yeremiya 21:7

Aliku ALA nen ari logonet, Ti eeke logominggirik, it Yekura inowe endagembogut Terekiya inom, aap endagembogut awuri inom, it aakumi kugilengga paga kanggwi, wooluwak paga warak kanggwi, mbi noogelo paga kanggwi, eeka'lek teppiyamenggerak it o kota yime menggaarak inom, nogo waganogo aap Mbaben inowe endagembogut Nebukanetat inom, it inooriyak eekwi inawim nogo inom, ineenggime piyaminggirak at aap endagembogut ti nen inabuwa mbake, ambi teppiige, obeelom eeppiige, eerigin mondok lek abok aret inoorogo piyaagin, yegerak, yori nabagip nduk, yokkiragi o.

Yeremiya 24:10

An nen wooluwak paga inooruwak nduk nappiya wage, mbi noogelo inoba piige, kugilingga inoba kwippiige, eeke neegak, it inombomini inom o nggween wogoragagim nogome ambiriluk ambi logogun lek inenggaawak mondok lek aret arugun o,” yinuk, Aliku ALA nen yo'nege kagagirak.

Yeremiya 27:11

It aakumi ambi mendek nen eyo tapi inuut paga pogo mengga kwak, Aap Mbaben inowe endagembogut aaninggin ninoba pinanege ti kagak piyanggo logowok o, yinuk, oone konembunuk eekwi iinok perak, it inanggween paga time teppiyaminggirak wonogo logonet, ineyabu waganogo yakko'net nogo logogun o, yinuk, Aliku ALA nen inogobamini yora nawak nduk, Yoret, yo'negerak me, yokkiragi o,” yinuk, nappiyareegirak.

Yeremiya 27:12

Ndi, wone eerogo nappiyareegirak nogo ndak-ndak it Yekura inowe endagembogut Terekiya yoreegirak. Yoge logonet, “Eyo aaninggin tapi inuut paga pogo mengga kwak, aap Mbaben inowe endagembogut nen eeriyak aaninggin kinoba pinagage kenok, E o. Eeko logowok o, yinuk, abu'me logonet ake eekwi, aakumi at apuri nogo inake eekwi, eekwi kiinok, kinagap ndarak aret logomunggup o.

Yeremiya 27:13

At Aliku ALA nen, It aakumi ambi mendek nen it Mbaben mendek inowe endagembogut oone konenggo logorak ineebi yogwe iinok, wooluwak paga inooruwak nduk eeppiige, mbi noogelo inoba piige, kugilingga inoba kwippiige, eerigin o, yinuk, yereegerak nogo kagak, kat inom, aakumi kat kapuri inom, ti paga kambuurak nonggop nduk eeko ogotik?

Yeremiya 39:18

An nen at agap ndarigin me, wooluwak paga warak kambigin lek o. Iniki an noba panggombanegerak paga kugun wogoren nogo mengga kwak, agap ndarak aret logogin o, yinuk, Aliku ALA nen aret yegerak, yori nak o,” yinuk, yoreegerak.

Yeremiya 45:5

nonggop nduk, An mban obeelom logokit, mbake agaarik? At togop mbarugurik o. Yi aakumi ndi aakumi abok aret aaninggin lombok inoba piyaminggirak kwe, at perak, yi o ndi o nege me, wakwi iyo, eebe ili eerak logowak nduk, ndegengge logogin o, yinuk, Aliku ALA nen yegerak me, yokkigi o,” yinuk, yoreegerak ti aret.

Yetikiyen 5:12

O kota Yerutalem inikime time at aagalogwe ando mogonak kugilingga paga nen ilik, mbi noogelo paga nen a, kanggwi, kota pak wurik endekem ando mogonak wooluwak paga inoorak kanggwi, ndi, ando mogonak o wiya irip-irip warit nage menggi kwak mappiige logominggirik, nawooluwak nutik muguren nage neenok kanggwi, eerugun o.