Yeremiya 18:7 - Ala Wone Peenok Peebi Mbanak

⁷ “Ne ambi eyom paga it aakumi ambi mendek ilik, it aap inabu'me piigo menggam ambi a, an nen eyo omanggen kwak kinogo wumbiige, o wurik kwak minogo piige, lek eerogo piige, eerigin o, yoraminggirak kwe,

Yeremiya 18:7 ပူးပေါင်းရင်းမြစ်များ

Wakkagagerak 6:6

iniki mbake logonet, “It aakumi an nen ogobakkigirogo o nggween paga piigirak yi, eekwi paga an niniki puru eerogo panugwi me, ao,” yinuk, iniki wakkolage nagagerik,

Yeremiya 1:10

Aakumi inanebunu lombok wonogwe me inom, aap inendagembogut inabu'me piinok menggam inom, eyo alom kinggwi kwak eerogo piige, o minggwi kwak minogo piige, lek eerogo piige, pak langgunogo pugwi kwak eerogo piige, o wurogo pugwi kwak eeppiige, awi yakwi kwak eerogo piige, eeke logonok nduk, ne yogondak yi paga mippagage yi, keenu aru o,” yinuk, yo'nereegerak.

Yeremiya 31:28

Aa'nduk eyo alom kinggwi kwak eerogo piigwi, o minggwi kwak minogo piigwi, pak langgunogo pugwi kwak eerogo piigwi, ineebe lek eerogo piigwi, maluk eeppiigwi, eeruwak nduk, eekwi iigak, nenegen wogoren nege nagagirak ndak-ndak, yogondak o wukwi kwak eekwi, awi yakwi kwak eekwi, eekwi iigak, nenegen wogoren nege logogin o,” yinuk, Aliku ALA nen aret yegerak o.

Yeremiya 42:10

Aaninggin inoba piige nagagirak nogo paga niniki wakkolage me, it o yime mondok logorak kenok, an nen it o minggwi kwak eerogo piyaagin lek, o wukwi kwak eerogo piige, ndi, alom kinogo wumbugwi kwak kinogo wumbiyaagin lek yi awi ndi awi yakwi kwak eerogo piige, eerigin o, yinuk, yegerak.

Yeremiya 45:4

Ari mbaken, Aliku ALA nen, Yoru, yo'negerak nogo yi aret. An nen o yi abok aret o wukaatak minogo pugwi kwak eerogo piige, ndi, awi yakaatak alom kinogo nappugwi kwak eerogo piige, eerigin me,

Yetikiyen 33:14

Ndi, an Ala nen aap maluk eeka nogo yoge logonet, Kat abet aret kambumunggun o, yoriminggirak kagak, at nen maluk eeke logomenggerak nogo mbo punuk, obeelom mban eerit nage, a'me nggelok eeppiinet nage, eeke logonet,

Ndaniyen 11:4

Togop aret eerit-eerit irip paga at abu'me piinok logowam ti, mbogut oolo ya'i o wiya agi-ogu, aru-ogwe, warit wage menggim pa'nggwe o nenaarak time mogonik-mogonak arit namenggerak me, at paga wiganak nen o 4 mogonnarigin time wone lengganogo yorogwe, aa'nduk at abu'me piinok logowam omaawi logomenggi kwak wonogwe, eeko logogun lek o. Ata, at abu'me piinok logowam ti, abu lek age kagak, aap alik unde eeppiyaagin o.

Amot 9:8

“Aakumi inowe endagembogut abu'me menggam maluk mban eekwi yi, Naliku Nitok Minggirak an ALA nen abet aret nenegen wogonake minggirak o. It togop eekwi paga o nggween paga yime nen inenggaawak lek eerogo piyaagin kwe, It Yakup paga wiganak perak, mondok lek eerogo piyaagin lek o,” yinuk, Aliku ALA nen aret yegerak o.

Yunut 3:10

Eerogo wumbogo mbareegwa, Ala nen it maluk eekwi nogo mbo punuk, yungguninuk, at owagam wogwe maloppiige nagagerik, aaninggin inoba piyaakit mbareegerak nogo, “Eeppiyaagin lek o,” yinuk, inabuwa nen teppiyareegerak.

Yunut 3:4

Yunut nogo, o kota time unggwi nage nagagerik, nage kagak nogo ambit yegak nage nagagerik, wone yorage logonet, “Nogo 40 yinuk, o kota Niniwe yi, mondok lek eerogo pigin o,” yinuk, yoragagerak.