Yeremiya 16:16 - Ala Wone Peenok Peebi Mbanak

¹⁶ At Aliku Ala nen ari logonet, “It aap yikwe wagangga ambik woraawak nduk yonggo piyaminggirak wogo logomenggaarik, it aap ti, piginabit nogo logogun o. Ti'nuk, towe warit nega ambik woraawak nduk, yonggo piyaminggirak wogo logomenggaarik, it aap ti, puut-puut tiyarogon wonogwe, puut-puut teberogon wonogwe, yugum ambe nggaganak me wonogwe, eerak wonogwe iinok, inooko logogun o.

Yeremiya 16:16 ပူးပေါင်းရင်းမြစ်များ

Wakkagagerak 10:9

At nen Aliku ALA agabiti mbaka'lek anini wulo aakumi inooka wonagagerak me, aap ambi anini ambik kenok, aakumi nen yogo logonet, “Aliku ALA agabiti mbaka'lek anini wulo aakumi inooka aap Nimorot kokwak eeke yi,” yinuk, yogo nogogwaarak.

Yetaya 2:21

Aliku ALA nen nggween yi, na'ndo-wa'ndo eerikit nduk mi'na'nuk, Abu tiyanak pi wakugak obaanggi-obaangge li'luk ee'nuk wage, Aakumi inamineeri ne agan noorak mendek eeppiige, Eeke kenok, Aakumi nen yugum ndoome unggwit nogwe, Yugum ambe nggaganak tiyarogon me lagit nogwe, Eerugun o.

Yetaya 7:19

Wiiremenggerak abok aret wogo logonet, o nggelok-nggobok me inom, puut-puut yugum ambe nggaganak me inom, eyo alokwi enggela'me inom, ndomba inagari'ngga mbanogo nenet nugu menggam inom, abok aret ninggirogo pi woraagun o.

Yeremiya 25:9

yi aakumi ndi aakumi o omarip paga pa'nggwe wonogwe nogo abok aret inom, it Mbaben mendek inowe endagembogut nayeloman Nebukanetat inom, yonggo piyaminggirak wogo logonet, o yi tebenggola unggwogwe, it o yime menggaarak inom, yi aakumi ndi aakumi enaagan-ambokan wonogwe inom, abok aret tebenogo piigwi, eerugun o. It o yime menggaarak nogo mondok pup eerogo piige, inamineeri ne agan noorak mendek eerogo piige, inagi'ndok kanggo logowak nduk eerogo piige, ndi, o nggween yi, mondok mbuk aago mondok-mondok logowak nduk, eerogo pege, eerigin,” yegerak o.

Yeremiya 4:29

It aap wim eeka kuda paga wogwe inom, it aap ineegin warak inom, Ineebe apit aago wogwe inoone inaruk konenggo logomenggaarik, It yi kota ndi kota wonogwe nogo mbo punuk kole mbaganit ando eyoongga inikime unggwit nogwe, Ando puut-puut yugum paga lagit nogwe, Eerugun me, Yi kota ndi kota aakumi logogun lek o wuum lu agan nage logogin o.

Yeremiya 49:5

It yi awi ndi awi inaagan-ambokan wonogwe abok aret nogo nen Inamineeri ne agan noorak mendek inoba kwippiya woraawak nduk, nappiya woraagin o,” yinuk, at Omaawi Lombok Menggerak Aliku inogoba ALA nen yegerak me, yokkiragi o. “Ti eeppiige neenok, it inalitik-inalitak o time nen mugogo wumbiyamenggaarak ambime agak eerit nugwi nogo At ambi nen it kuwak eerogo piyaagin lek aret o.

Yeremiya 6:9

At Omaawi Lombok Menggerak Aliku ALA nen yegerak nogo yi aret. “Anggur anggen eegu pugulik pup eerogo mbanggo mengga kwak It aakumi Iterali eegu yumbunik ti, togop aret pup eerogo piyaawak o. Aap anggur anggen mbambunuk, eegu ambitak wonage kero kwaarogo eenggi paga mbanit nage menggi kwak, Iterali yumbunik eegu ambitak wonogwe iyo, maluk eeppiyoorak ne ambi liirogon kwaarinabit nawak,” yegerak o.

Leendawi 4:18

Tu nugwi niinok, ninom ogoorak nen inigen wo'niren nugu nogogwaarak me, Ninawoore'nggam nen wundi naga'lek puk aret wonogogurak o. Nit nda'nogogurak eyom abu aret lek arit nage, Nineenik logorak kuli abu aret ari nage, Ndi, nit kambuurak eyom panggoni wage, Eereegerak me,

Leendawi 4:19

Towe nggindooni o oolo ya'i nggare agan nege ti, iya negen kwe, It nit mu'niren-ma'niren nugwi inogowa perak, iya lombok wonogwe me, Puut-puut paga mu'niren nugwi, o karume paga wangge'ninakwi, Eeko nogogwaarak o.

Oteya 10:10

It maluk eekwi onggo aaninggin inoba kwippiyaakit, mbake kenok, aret eeppiyaagin o. It maluk oba luk-luk eerit nogwe paga aaninggin inoba kwippiyaawak nduk, An nen it aakumi inanebunu lombok inayonggo piminggirak kuwak ari woraagun o.

Amot 4:2

At Aliku Itok Menggerak ALA nogo maluk eekeelik yegetak a'me nggelok mban eeke menggerak me, At ari kit abet mbarumunggup nduk kumbuk mbangge logonet, “Inogobak me ya'nggage nggelembunuk, inalitak lombok nigiren wundi nogwe, Yikwe warak nikkenok wunggo mengga kwak inalitak nigiren wunggwi, Eeginaburak eyom abet aret ari woraagin me,

Amot 5:19

Aap ambi singa nen mugurok nage kenok, kole mbagangge me, beruang imbirak aabuk age menggi kwak, Aap ambi ame unggwi nanuk, eenggi kobat nabenak paga, “Piga,” yinuk, eeke me, waalo nen eenggi nogo eyak mbangge menggi kwak, Aliku ALA woroorak ne ti, togop aret o.

Mika 7:2

It aap Ala mugurok nogwe nogo, o yime inenggaawak lek aret iige, Aap iniki abe koonak ambiriluk ambi lek aret kage, Eeke agarik o. It abok aret aakumi inooriyak nduk, enaarak negen wonogwe, Towe yilunggagak yum yugu wonok nugu mengga kwak, it ambi nen inoreeluk ambi wariyak nduk eerit nugwi, Eeko agaarik o.

Tepaniya 1:12

Ne ti eyom paga an nen ndi wuninik wonok o Yerutalem maleninabit nage logonet, Anggur amburu abe tookwi iigak, ogogwe o'luwam linogo pege menggi kwak, it aap togop aago wonogo logonet, Aliku ALA nen obeelom eeppinanege, maluk eerogo pinanege, Eerigin lek, mba'nuk, Iniki ugun kobak aago wonogwe nogo, kwaappiinok, aaninggin inoba kwippiyaagin o

1 Tamuwen 24:11

Kooka'lek teppagage logonet, kayum irip mban mbuuluk mbanogo waganggirak neenggime wonage yi, pekket o, nogoba. An tebenogo pagakit nduk, koone taganit nage, an maluk eeppagage, eekirak noba wonage lek yum yi paga keenu aru o. Kat perak, an nooriyak nduk, mu'neren-ma'neren nege menggendak ti,

1 Tamuwen 26:20

Togop aret me, aap ambi towe wonde wariyak nduk, eyonggaame puurom kwaarit nege menggi kwak, an nggeewo abi kwak neegak, kat aakumi Iterali inowe kendagembogut nen aret nooriyak nduk, kwaa'nabit nege me, namiya nggween paga nda wambuurak lek o. Ata, Aliku ALA awooliya wurik me enggaanom paga aret wambuwak o,” yinuk, yoreegerak.