Yeremiya 11:12 - Ala Wone Peenok Peebi Mbanak

¹² “It o Yekura kota-kota wonogwe inom, it Yerutalem wonogwe inom, obari abe kaga inagugi inake kani kunggwi nogo nen, Yeenggwa niret o, yinuk, inoone nggwok paga nggino yoramenggaarak kwe, aaninggin inoba kwi'nari wage kenok, it inagugi ti nen yeenggwaaraagin mondok lek aret o.

Yeremiya 11:12 ပူးပေါင်းရင်းမြစ်များ

2 Mbinineegwaarak 28:22

Aap endagembogut Akat nogo nen Aliku ALA liirogon mugurok nage logolik, mbo pegak negen eereegerak kwe, aaninggin oba agak mban age ti paga abunuk mbo pereegerak.

Yetaya 45:20

“It yi aakumi ndi aakumi inenggela'me nen kole mbaganit nogogwaarak abok aret ti, Kuwak ogo logomenggaarik, nowagam wogwe, Nowagam wa'nuk, ninom wone mbanggwi, Eeko logowok o. It aap inagugi ogut eyo paga ogobakkigirik wonok nugwi, Inagugi ogut eerak nen yeenggwaaroorak meek kagak, nggino yogwi, Eekwi nogo ti, Ineenggo'lek wi negen aret wonogo agaarik o.

Yetaya 46:7

Ti'nuk, kugi ogut aago nogo inuumbaga piyaninuk, nogo nagaatik, at logorak mbareegwam nogome kwippugwi, Eekwi iinok, Taati aret mi'ndak wonage menggerak o. Time nen ya langgok nage, Inoone nggwok paga yogwi kwe, wone onggo yorage, Aap maluk inoba kwi'nage kenok, inagap ndake, Eekeelik o.

Yeremiya 18:15

An napuri perak, kobak eerogo mbo panugwi, It inagugi ogut aanom warogo kagak ake obari abe kaga kani kunggwi, Eekwi iigak, Inagugi nogo nen Napuri tu aa'nduk mugurok nogo nogogwaarak nogo Mugurok nugu logonet, iniyogobit lik togon ngginnogo logowak nduk, eeppiigwi, Tu abe yarak kagak nomonogo punuk, tu maluk tiyak-tebek paga nugu logowak nduk, eerogo piigwi, Eereegwaarak.

Yeremiya 2:28

It Yekura mendek ti, ineenggi paga nen inalut eeriyak inogobamini nen ogobakkigirogo pateegwaarak nogo ngga wonogwe? Inawi kota ambik aret wonage ti kwak inagugi kunduk ambik togop aret wonogwe me, Aaninggin inoba ari wage kenok, inagugi ti nen aret inagap ndari woraawak o.

Yeremiya 44:8

It nen o Metit aap nggiru negen ari wa'nuk wonogo logonet, an wonage neegak ineenggi paga ogobakkigirik inagugiwak nogo ake obari abe kaga kani kunggwi paga nanini wunduwak nduk, nonggop nduk eeko agaarik? Inenggaawak lek eerogo pakwi, yi aakumi ndi aakumi o nggween paga wonogwe inenggela'me iigak, aakumi nen, Pulunik aret, inombaruwak nduk eekkologwe, meek eerogo piyaawak nduk eekkologwe, eeko agaarik o.

Pelaareegerak 32:37

Aliku ALA nen ari logonet, Yugum Nu'lek Menggi Kwak Menggerak nogo nen kinarum logowak nduk, Nobaane'me kiniki panggonak wonage nogo nggeeme agaarik o.

Pelaareegerak 32:38

Nalut eekwi nobaane'me kugi eeko logonet, It inake warogo kani kunggwi kiinok, amok nunggwi, Anggur amburu toologo it inake pugwi kiinok nunggwi, Eeko menggaarak nogo ineebe ngge o? It nen yeenggwa kiraawak nduk mi'nogwe, Kinarum logowak nduk inabu'me pinagagwi, Eeko logowak o.

Owak Loongga 10:14

Kit aaninggin kinoba wonage kenok, kinagugi miikkologotak nen kinagap ndakkinabuwak nduk, nggino yori nogo logomunggup o.”