Yeremiya 1:15 - Ala Wone Peenok Peebi Mbanak

¹⁵ At Aliku ALA nen ari logonet, “An nen it yi aakumi ndi aakumi o omarip paga pa'nggwe wonogwe inabu'me piinok menggaarak abok aret inayonggo piyaakit nduk, eeke agarik o. Inayonggo piige neenok, wogo logomenggaarik, It wone lengganogo yorogo menggam inalitak lombok o Yerutalem tu unggwogo menggam ogobakkigirogo pit wogwe, O Yerutalem pak wurik eraanu endekem yendok-wandok ogobakkigirogo pugwi, O kota-kota Yekura wonogo menggam abok aret unde eekkolaawok nduk, eekwi, Eerugun o.

Yeremiya 1:15 ပူးပေါင်းရင်းမြစ်များ

Yetaya 22:7

Inanggween mili kobappaga wonage nogo paga nggweendo wim eeka mban yagabit aago wonogwe, It wim eeka kuda paga kwi'ndak wogwe nogo, o inagota tu pak mbanak paga li'luk eeppunuk wonogwe, Eekwi iinok,

Yeremiya 10:22

Kinaruk o! Wone ambi agan wage yi, kinaruk koneninip o. O omarip paga pa'nggwe nen keekok agan wogo agaarik o. Wone ti agan wogwe paga nen o Yekura kota-kota yi oone ndi oone lek age, Nggeewo owo iname aret age, Eerigin o.

Yeremiya 10:25

It yi aakumi ndi aakumi nen Yakup paga wiganak nogo inambeme yonggorinakwi, Ineebe mondok lek eerogo inambeme yonggorinabit nogwe, Inawi alom lek eerogo pugwi, Eereegwaarak me, It yi aakumi ndi aakumi, Ninogoba Ala aret o, yinuk, yogolik nogo inom, It aakumi inanebunu lombok kendage kunogo yogolik nogo inom, kanini inoba piige logot o.

Yeremiya 13:20

Kat Yerutalem yi wae. It aakumi o omarip paga pa'nggwe nen wogwe yi, kuut pila yinuk, kenegen pegiyet o. Ndomba kwak kaagalogwe unde eeppagareegerak nogo ineebe ngge o? Ndomba kwak kaagalogwe nen eerit nagaarak paga kale'nggen mbake nagagindak nogo ineebe ngge me agaarik o.

Yeremiya 25:28

Ndi, toolak keenggi paga wogoramenggendak waganogo noorak ineebi mbakwi iinok perak, at Omaawi Lombok Menggerak Aliku ALA nen yegerak yoroorak nogo yi aret. Noorak ineebi, yuurak lek mondok nunggo logowak, yegerak o.

Yeremiya 25:9

yi aakumi ndi aakumi o omarip paga pa'nggwe wonogwe nogo abok aret inom, it Mbaben mendek inowe endagembogut nayeloman Nebukanetat inom, yonggo piyaminggirak wogo logonet, o yi tebenggola unggwogwe, it o yime menggaarak inom, yi aakumi ndi aakumi enaagan-ambokan wonogwe inom, abok aret tebenogo piigwi, eerugun o. It o yime menggaarak nogo mondok pup eerogo piige, inamineeri ne agan noorak mendek eerogo piige, inagi'ndok kanggo logowak nduk eerogo piige, ndi, o nggween yi, mondok mbuk aago mondok-mondok logowak nduk, eerogo pege, eerigin,” yegerak o.

Yeremiya 33:10

At Aliku ALA nen yegerak nogo yi aret. Kit nen yogo logonet, O yi, aakumi inom, ndiimbu-nggwiya inom, abu wonogolik kugume aret o, yinuk, yogo monggotak kwe, o Yekura kota-kota inom, o Yerutalem tu nogo menggam inom, aakumi kunduk, ndiimbu-nggwiya kunduk, ineebe lek paga yi oone ndi oone lek agaarak nogome

Yeremiya 34:1

At aakumi Mbaben inowe endagembogut Nebukanetat inom, awuri ineegin warak inom, it at abu'me logonet, o nggween paga yime aakumi inabu'me piinok, wone lengganogo yorogo nogogwam inom, aakumi inanebunu lombok inom, it abok aret nen o kota Yerutalem wonogwe kunduk, o kota Yerutalem enaagan-ambokan kota-kota wonogwe abok aret kunduk, inom wim eekwi eyom paga Aliku ALA nen wone at Yeremiya yoreegerak nogo yi aret.

Yeremiya 34:22

At Aliku ALA nen ari logonet, “O kota yi, tebenogo puwak nduk, an nen wone lengganogo yoraminggirak paga iniyokan wogo logomenggaarik, inom wim nambuko logonet, o tebenogo pugwi, o kani mbelenogo pugwi, eeko logogun o. Ndi, an nen o Yekura kota-kota nogome aakumi wonogwe lek kugume aret eerogo pigin o,” yinuk, yegerak.

Yeremiya 39:3

Langgunogo pogo nogogwaarik, aap Mbaben mendek inowe endagembogut awuri inengga warak, aap Neregan-Taretet inom, aap Tanggat-Nebo inom, aap endagembogut awi nggwok abe wurik arum menggaarak inowe Tarekim inom, aap nagawan Neregan-Taretet inom, aap it Mbaben inowe endagembogut awuri inengga warak eegu inom, tu endage, Oolo Unggwogo Menggam time kwi'nari unggwogogwaarak.

Yeremiya 4:16

Aliku ALA nen ari logonet, “Wone yi, it yi aakumi ndi aakumi yorage, It kota Yerutalem wonogwe nogo yorage, Eeke logorak nogo yi aret. At kota Yerutalem nen, Ala yo'nege nogo eeriyak neebi o, yinuk, an mbo paneegerak me, Yerutalem oonda mbaniyak aap wim eeka o nda nen wogwe, It Yekura inawi kota-kota tebenogo piyaawok nduk, Nawim yi o, yinuk, nggomookwi, Eeppunuk, Aap ambi eyabu yarak anggen mbaniyak arum wake menggi kwak, at aret wakkunggo agaarik o,” yinuk, yegerak o.

Yeremiya 43:10

Ti eeke logomenggendik, it yorage logonet, At Omaawi Lombok Menggerak Iterali inogoba Aliku Ala nen yegerak nogo yi aret. At nayeloman it Mbaben mendek inowe endagembogut Nebukanetat woraawak nduk, yoriminggirak wage kenok, yugum mbenanogo piminggim yime at wone lengganogo yorage logowam eerogo pigin me, irimbaga time awooliya wuppunuk, wone lengganogo yorage logogin o.

Yeremiya 44:6

an nanini kani kunik negen mi'nage logonet, o Yekura kota-kota inom, o Yerutalem tu paga tu paga inom, nanini kilirogo wuppit wagagirak paga o ti, aakumi wonogwe lek nggween mbuk eerogo pereegirak yogondak inigen kogwe ti aret o,” yinuk, yegerak o.

Yeremiya 46:24

O Metit Aagalukwe kwak, it Metit mendek ti, aakumi o omarip paga pa'nggwe nen wogwe nogo ineenggime piyaagin me, inenggali arugun o,” yinuk, Aliku ALA nen aret yegerak o.

Yeremiya 5:15

Aliku ALA nen ari logonet, “It Iterali paga wiganak ti, aakumi ambi inoone ineenggo'lek me, yogwe liippugulik wonogwe, O aa'nduk nen nok yogondak kuli inendage lek ageelik mondok ki wonage, Eeke menggerak nogo O nda nen tebenogo piya woraawak nduk, nappiya woraagin o.

Yeremiya 6:22

At Aliku ALA nen yegerak nogo yi aret. “It aap wim eeka aago o omarip paga pa'nggwe nen wogwe, It aakumi inanebunu nggwok ambi o irip-irip nen woraawak nduk, inikime manabit nugwi, Eekwi ti, abet aret o.

Yeremiya 9:11

At Aliku ALA nen ari logonet, “O Yerutalem ti, an nen o langgu-langgu aago nigabak negen eerogo pigin me, Nggeewo owo iname ari unggwogo logogun o. Ndi, o Yekura kota-kota ti kunduk, o owak mbanak aret eerogo pigin me, Aakumi inawi time logogun lek aret,” yegerak o.

Leendawi 5:11

O Tiyon time kumi maluk eerogo piigwi, O Yekura kota-kota time komologwe aap kigin waka'lek mendek maluk eeppiigwi,

Yetikiyen 32:30

It aap nagawan-nagawan o omarip paga pa'nggwe wonogwe abok aret inom, aakumi o Tiron mendek abok aret inom, nen inomaawi paga aakumi inamineeri ne agan noorak mendek eeginabit nogo nogogwaarak kwe, inoorak kambunuk wambit nogogwaarak wonogwe nogo, it ndak-ndak inendage lek kanggo nagaatik, wambit nogogwaarak wonogo agaarik o. It wooluwak paga inoorak kambeegwaarak wonogwe me, inagabolo mbanak lek kagak wambeegwaarak inom wonogwe, it aap mbuun ambena wambit nogogwaarak wonogwe nogo, inom wonogo logonet inenggali mbakak wonogwe, eerak aret agaarik o.

Yowen 2:20

It wim eeka ambik aago o omarip paga pa'nggwe nen woramenggaarak nogo ti, kit wonogwe me nen wumbiinok, Pelek iranet o karume eerilek paga nda time piya nage logonet, Inaa'nduk nogwe nogo ti, niyo yenggenak laut oonegen lagi wage menggim pa'nggwe wonage me nogome nappiige, Ndi, inambokan age wobok nogwe nogo ti, niyo yenggenak laut oonegen kilu yi nage menggim pa'nggwe wonage me nogome nappiige, Eerigin o. Eeke neenok, Ineebe kambit namenggaarak nogo pili ogwe, inobari ndi wuke, Eerigin o, yinuk, yegerak me, yokkiragi o. At Aliku ALA nen abet aret mondok iya tit eereegerak me,

Takariya 6:6

Nggweendo kuda mili nen nikkenok nogwe nogo, o omarip paga pa'nggwe nage, nggweendo kuda yanggwi nen nikkenok nogwe nogo, oonegen kilu yi nage menggim pa'nggwe nage, ndi, nggweendo kuda winibegek eerak nen nikkenok nogwe nogo, o ame pa'nggwe nage, eerugun o,” yinuk, yo'nege kagarak.