Yaya 8:34 - Ala Wone Peenok Peebi Mbanak

³⁴ Yogo mbareegwa, Yetut nen, “Ayeloman ambi ogoba abu'me logonet, aruk konok mban eeke menggi kwak, kit maluk eeriyak mban eekkinake kenok, maluk ti, ayeloman aret logomunggup o, yinuk, mondok abet aret yokkiragi o.

Yaya 8:34 ပူးပေါင်းရင်းမြစ်များ

1 Endagembogut 21:25

Ti yoreegerak nogo ti, Akap akwe Iteben nen ogonggelo maluk eeruwak nduk, inikime manake kagak, Akap nen, “Maluk ayeloman arikit o,” yinuk, miike nagagerik, Aliku ALA enegen kagak maluk mban eerit nage nagagerak kokwak, aap togop ambi lek aret o.

Kini Wuppiige 5:22

Aap maluk mendek nen maluk eerit nugwi ti, keele pugu kwak me, inenggaanok nggerenggologwe, Ndi, it inobaalombok inomaluk ti nen keele kwak maarogo pakwi, Eeko menggaarak o.

Matiyut 5:18

Mbogut-nggween awo lek aga'lek kagak, Ala wone yugu Muta liiru mbaneegerak ando mbuuriluk ambi awo a'me lik yega'lek kagak, lek arigin lek o. Ata, mondok ndak-ndak aret arigin o, yinuk, abet aret yokkiragi o.

Yaya 3:3

Yoge mbareegi, at Yetut nen onggo at yoge logonet, “Aap ambit-ambi ngget nda'naga'lek kenok, Ala abu'me piige menggim enegen kaagin lek o, yinuk, mondok abet aret yokkigi o.”

Nappiigak 8:23

Komaluk koba luurik maarak aago wonage kagak, wam ambiki aleegwi negen koone andiigwi ari keegi o.”

Oroma 6:12

Togop me, kinagabolo kanggo monggotak mendek kagak kiniki nen nengge nogo mugurok nogo logonet, maluk eeriyak mban eekkinake kero, tebenogo pegak eeko logonip o.

Oroma 6:16

Wulaga ambi, “Nogoba nen yo'nege kenok, eeke logokit,” mbake nagaatik, yanggonak mban eerit nage paga, “Wulaga ti, aap nogo ayeloman aret kogo o,” yinuk, yogo menggaarak kineenggo'lek me, yogo ogotik? Ti ndak-ndak, maluk eeriyak eekkinake kenok, tebenogo pega'lek, “Eerikit aret,” mba'nuk, eerit nogotak-nogotak irip paga kineebe aret kambit nogo logomonggotak kwe, Ala nen ari kenok, “Eerikit,” mba'nuk eerit nogwe kiinok perak, obeelom aret agago pinagage kaamunggup o.

Oroma 6:6

Nit maluk ayeloman logonet, niniki maan mendek nen maluk mban eeriyak ee'ninake nogo, ambinom eerit noorak ee'ninake kero, omaawi lek eerogo puwak nduk, Keritut ninom eyo karo-karo paga ninooreegwaarak nineenu me, yokkirogo ogoorik o.

Oroma 7:14

Wone Muta yoreegerak ti, Ala nen aret yoreegerak nineenu kwe, an perak, aakumi aret o. Aap ambi ayeloman onggo mbanggetak me, at oone konembunuk mban eeke menggi kwak, an togop aret maluk eeke logokit nduk maluk ayeloman aret agagirak o.

Oroma 7:25

Nagap ndaruwak nduk, ninowe Yetut Keritut wo'niragagerak me, “Ala wa,” yinuk, keyage wake agarik o. Togop me, niniki peenok paga nen Ala yereegerak wone yugu, “Eerikit,” mbake paga, “An Ala ayeloman aret kagi,” mbake, ndi, niniki maan mendek peenok nogo nen maluk eeriyak ee'nake nogo aret eeke paga, “An maluk ayeloman aret kagi,” mbake, eeke minggirak o, obak!

Oroma 8:21

Ti eereegerak nogo ti, yi mendek ndi mendek at wakkagagerak nogo nen, “Ki logowok lak, ao,” mbakaatak kwe, mbuk age, “Nineenik logowok lak, ao,” mbakaatak kwe, kanggwi, eeko menggaarak nogo, peebi at apuri nabelan-kabelan eerogo piinok, tiyappiige logonet, yi mendek ndi mendek inom ki eerogo piinok, tiyappiyaagin iniki mondok lunik logonet, aret eereegerak o.

Titut 3:3

Nit kunduk, maan togop aret nineenggo'lek wi negen wonogwe, wone yo'niragaatak konengga'lek wonogwe, tu alik me nomo agan nogwe, aap ambi ayeloman yoge kenok, “E o,” yinuk, eeke menggi kwak, nit niniki nengge kenok eeriyak ninikilom mbakwi nogo mban eekwi, eeko nogogurak. Yi mendek ndi mendek eerit nogo logonet, maluk mban eekwi, neebi-keebi yogwe, nanini-kanini yogwe, ti mendek mban eeko nogogurak kwe,