Yaya 14:9 - Ala Wone Peenok Peebi Mbanak

⁹ Yoge mbareegi, at Yetut nen, “Piliput wae! An o maan togon nimbirak wonage minggirak kwe, kat awo liippanega'lek me, ari agandik? Aap ambit ambi an enegen neege kenok, an nogoba aret enegen kage me, kat nen, Kogoba ni'niyet o, yagandak ti, nonggop nduk yagan o?

Yaya 14:9 ပူးပေါင်းရင်းမြစ်များ

Wakkagagerak 26:9

Itak wiireegerak wage mbareegi, yoge logonet, “Kwe Iribaka yi, kat kakwe aret kagak, nonggop nduk, Nakwe lek nawuluk, yagandak?” Yoge mbareegi, at Itak nen, “Lek o. An nakwe o, ari neenok, nooko logonet, nakwe ndinukwak, mba'nuk, Nawuluk, yagarak o.”

Ndawi 11:1

An nen Aliku ALA abu'me wonage me, Neebe op aret wonage neegak, Kit nen an yo'nogo logonet, “It aap maluk mendek nen Aap iniki koonak mendek inooriyak nduk, Ineegin agale wukwi, Inomaale ineegin agale paga luumbugwi, Namburogo nappuurak nduk o apit me ari unggwogwe, Eekwi ti, pegiyet o. Tiiru oolo yinik kinogo wumbugwi iinok, o miyak ari menggi kwak, eeriyak kenok, It aap iniki abe koonak mendek nogo nonggop arugun, mbaken? Meek me, towe wiganinuk puut paga ari nage menggi kwak, Kat kabuut paga time nak o,” yinuk, yo'nugwi ti, Nonggoti yo'nogo ogotik?

Yeremiya 2:23

“It nen, Nit maluk ninoba lenggenak lek aret o. Ndi, kugi Mba'an mugurok nogolik o, yinuk, yogwe ti, nonggop togon yogo menggaarak? It o kobappaga time nugu logonet, inobaabut maluk eeko nogogwaarak nogo iniki aberuwak o. Wam kooli wali kwaarit nggare agan nagak-wagak agan nege menggi kwak,

Marakut 9:19

Yoge mbareegi, at Yetut nen, “Kit aakumi yogondak wonogwe kiniki noba panggombunuk abet nombaka'lek nugu monggotak yi, wologwe! An ne mande ninom logonuk, name nagin kwe? Ne mande niniki yanggo yinuk kit ninom logogin kwe?” yorage nagagerik, “Wulaga ti, wonok wa'nip o.”

Lukat 12:56

Kit kiniki laakot logonet, yogo monggotak yi wae! Mbogut-nggween enete liippunuk, Ti togop aret arigin kagi o, yinuk, yogo monggotak kwe, yogondak yi eyom paga ariyak nogo kit nonggop nduk liippunuk, E! Ti togop aret arigin kagi, yinuk, yaga'lek aret ogotik?” yinuk, yoragagerak.

Yaya 1:14

At Wone nogo, aap aret age nagagerik, ninom aret wonagagerak. Ninom logonet, oona ngginik kagak, iniki kunik nen eeppinanege, Ala ndogop menggerak o, yinuk, liirogon yo'nirage, eeke kogo logonet, at Ala aput ambolom ndarak me, ogoba nen tiyappereegerak mondok tiyanak aret kogogurak o.

Yaya 10:30

An nogoba nimbirak ambit aret o,” yinuk, yoragagerak.

Yaya 12:45

Kit ambi nen an kinigen neegwi kiinok, at nappani wagagerak nogo aret kinigen kogo monggotak.

Yaya 14:20

Ti eyom paga an nogoba inikime wonage, kit an ninikime wonogwe, ndi, an kit kinikime wonage nogo kineenu arumunggup o.

Yaya 14:7

Kit abet aret an kineenu wonogwe kenok, an nogoba kunduk, kineenu aret wonogwe o. At eebe kinigen kogotak me, yogondak yi kuli paga nen at kineenu aret o,” yinuk, yoragagerak.

Yaya 8:19

Yorage mbareegi, it nen at yogo logonet, “Kogoba eebe ngge o?” Yogo mbareegwa, at nen, “An inom, an nogoba inom, kit kineenggo'lek aret ogotik o. An neebe kit kineenu a'netak nen, an nogoba kunduk kineenu a'netak o,” yinuk, yoragagerak.

1 Korindut 15:12

At Keritut nogo kambunuk nogo menggam nen eenik eerogo mippereegerak wone nit nen yokkirogwe niigak kwe, kit ando nen yogo logonet, “Aakumi kanggwi nogo ineenik arugun lek o,” yinuk, nonggop nduk yogo ogotik?

Pilipi 2:6

At Keritut nogo ti, Ala iniki menggerak kokwak, Keritut iniki ndak-ndak aret wonagagerak kwe, “Ala nimbirak ndak-ndak tiyanak aret me, an tiyanak logokit,” ti mbarulik.

Kolote 1:15

Ala etenggen ninigen kaga'lek kwe, at etenggen ndak-ndak ti, Keritut aret me, liippogo ogoorik o. Ala aput manggu ndarak Keritut aret me, yi mendek ndi mendek wakkagagerak nogo, tebenak kagak, at mondok tiyanak aret agaarik o.

Iberani 1:3

Ogoba mondok tiyanak eebe eya ndelenak-welenak aago kenok, “Wi!” ugwi nogo kokwak, aput ndak-ndak aret menggerak. Aput nogo ti, ogoba iniki ndak-ndak aret. Yi mendek ndi mendek wakkagagerak nogo abok aret, at oone omaawi paga pipporogo menggerak. Ninomaluk abok aret lek eerogo mbo nappege nagagerik, at agi mbogut paga mondok tiyanak menggerak nogo, eenggi abe'nggan paga tiyarogon kwi'nari laganeegerak wonage o.

1 Yaya 5:20

At Ala aput wambi wage nagagerik, Ala ambit alik lombok menggerak nogo nit liippuwok nduk nineenu eeppinaneegerak o. Ndi, at alik lombok menggerak Ala aput Yetut Keritut imbirak ninom niniki ambit kunik aret ogoorik o. At Yetut Keritut ti, at alik lombok menggerak Ala nogo aret me, nineenik mondok logorak unde eeppinanege menggerak alom at aret o.