Yakobut 3:13 - Ala Wone Peenok Peebi Mbanak13 Kit aap ambi kinenggela'me iniki warak logonet, yi mendek ndi mendek mbet-mbet yelok kage menggerak kenok, aap ti, iniki tebenak logonet, iniki warak nen obeelom eerit nage kinigen kogo logobagip nduk, eerit nage logowak o. အခန်းကိုကြည့်ပါ။ |
Yakobut 3:13
46 ပူးပေါင်းရင်းမြစ်များ
At wone lengganogo yorage nogo, “E o,” yinuk, eekwi iinok, maluk eeppiyaagin lek o. Aap ambi aaninggin mondok iya oba kwi'ndak wonage kagak, “Wone ti eyom paga yori unggwage,” ndi, “Nonggop eerogo yori unggwage,” eeriyak eyom abok koonak me, ugun-ugun yori unggwageelik o. Aap iniki warak nen perak, ndi eyom paga yori unggwage, ndi, nonggop eerogo punuk, yori unggwage, eeriyak nogo eenu me, at yori unggwage menggerak.
It aakumi tebenogo piinok wonogwe nogo wone obeelom wone yorage logokit nduk, Aliku ALA nen amburu eerogo mippanegerak me, Aliku Itok Menggerak ALA Aberiniki noba panegerak wonage agaarik o. It iniki wakkologwe nogo iniki teeluk eerogo piige, It keele maarak wonogwe nogo, “Muk wondet eerogo pinagagerak o,” yinuk, yorage, It keele maarogo piigo menggam piyareegwaarak wonogwe nogo, “Wumbiya wa'nip o,” yorage, “Aliku ALA nen obeelom eeppinaniyak tahun nogo yi aret aga o,” yinuk, agan nage, “Ninogoba Ala maluk onggo eeppiyoorak ne nogo yi aret o,” yinuk, yoranet nege, It aakumi apit aret iniki puru yogwe wonogwe nogo iniki eyak wappiige, O Tiyon le yogo logonet, purok inanobak paga yikut eerak obaane'me inabetagi ngget mendek yirippiige, Iniki puru aago wonogwe nogo obaane'me nggiraanak eeppiinet nage, It iniki aaninggin ndugu aago wonogwe nogo inale'nggen nen ndawi wako logowak nduk eeppiige, Eeruwak nduk, Nappani wagaarak o. It aakumi ti, at Aliku ALA abu tiyanak, “Wi!” ugwi nogo, aakumi inigen kogo logowak nduk, Awi luurogo punuk, yappereegerak aakumi nen, “Eyo teno kwak Obeelom Mban Eeka,” yinuk, yogo logorak nogo it aret o.
Kit aakumi o yime kiniki tebenak logonet, Aliku ALA nen, Yogop ee'nu ndogop ee'nu, ari menggerak ndak-ndak eekwi yi, Aliku ALA mugurok nogo logonip o. Aliku ALA anini eeppinagi woroorak eyom paga kit kinoba pinagage kagak eerukwak, Kit abe koonak mban eerit nugwi, Kiniki tebenak logonet, eerit nugwi, Eeko logonip o.
An nayum yonggolak kinomba langgumbinagage, ndi, luurik-maarak eerogo kinoba pinagage, eeke ti, aaninggin lek teeluk aret me, an nayum yonggolak kinomba ko'nok, noba yanggonak niniki tebenak logonet, eeke minggirak nogo mamunggolaanip o. Aaninggin kagak mamunggologwe kiinok, eerit nogo logonet, Niniki yanggo yigi, yinuk, yogo logomunggup o,” yoragagerak.
“At Pawulut nda wonage logonet, agabiti mbaka'lek mondok lok togon yo'nirage, ndi, nit ninenggaanom kenok perak, agabiti mbakak oone yanggorogon yo'nirage, eeke menggerak o,” yogo monggotak kwe, Keritut ninabuwa nen oone yanggorogon yo'nirage menggi kwak, an Pawulut togon ndak-ndak, niniki, “Ao,” mbake logonet, wone ambi yokkira.
It Ala apuri kuwak eerit nogo menggaarak alik nogo nen, kit kiniki kunik paga Ala apuri ugun wogonakwi, ndi, “Pawulut oreewi inom nen it o Korindut mendek tiyappiigwi nogo ti, ti eekwi paga tiyappiigwi iigo,” yinuk, yogwe, eeruwak nduk, it kiya wogwe ti, kiniki kunik paga liirogon wogoninako logonip o.
Togop me, at Ala nen kinabuwa mbake logonet, at apuri maluk eeka'lek alik leenak logobagip nduk, miikkinabeegerak me, yum yikkologo mengga kwak kinobaabut ngget mendek eekkologo logonet, aakumi inabuwa mbakwi, kiniki yanggonak paga obeelom eeppiigwi, kiniki tebenak logonet nugwi, kinoone omaawi lek yanggorogon yorogwe, inoone kinoba pinagagwi iinok liippunuk yorogwe,
Kat keebe awo tawe aret me nduk, aakumi nen tebenogo pagarak ti mage o. Ari menggendak inom, eeke menggendak inom, aakumi kiniki kunik aganake menggendak inom, Ala wone abet mbake menggendak inom, maluk eerukwak, kenegen tebenak nege menggendak nogo inom, eeke ti paga it aap abet mbako menggaarak kat in wakkagak logonet, eeke logot o.
Kat perak, Ala aput aret me, eekwi ti mendek mamunggolookwak, ogole nen mbagangge logot o. Obeelom kenok mban eekwi, Ala wone liippunuk eekwi, iniki abet mbakwi, aakumi iniki kunik aganakwi, aaninggin inoba age kagak, inogogumbuk logonet waganggwi, iniki yanggonak paga yorogwe, ti mendek eeriyak kenok mban mugurok nage logot o.
At Ala nen ari logonet, “An teppinagage, eraanggi mbo pinagage, eerigin lek o,” yinuk, yereegerak me, wu mban uugwe-uugwe mbarit nugwi paga wu ti, ayeloman eekkinabukwak, liippogo logonip o. Kinamendek nano mendek ambi wonage kenok, “Yi abu aret wonage o,” yinuk, kiniki tayenak logonet, ale'nggen paga nugu logomunggup o. Ala nen, “An mbo pinagagin lek o,” yinuk, yereegerak wone ti paga niniki panggombunuk, “Ninogoba nen yeenggwaanirage menggerak me, aakumi nen an eeppanugwi nogo, an nagabiti mbarigin lek o,” yinuk, yogo logorak ti op aret o.
Togop aret kwe, kit ambi nen, “Kat abet mban mbake kwe, an perak, eebe inom aret eeke o,” yinuk, yogwe kiigirak me, wologo wae. Kit abet mbakwi nogo, eebe inom eeka'lek kiinok, “Yi aap abet mbaka'lek aret,” kinombarugun kwe, an perak, abet mba'nuk eebe inom aret eeke me, “Yi aap abet mbake aret,” nombarugun yi kogo ogotik?
At agi iniki warak menggerak nogo nen koonogo pinanege nogo ti, nit kikak naka'lek obeelom mban wonogwe, ugun logowak nduk, “Mage,” yorogwe, niniki yanggonak paga yorogwe, yo'nirogwe iinok, “E o,” yinuk, eekwi, aakumi inabuwa nen obeelom eeppiigwi, eyoonggen abe yi'nage menggi kwak, nit togop aret obeelom eerit nugwi, aap ambi obeelom eeppugwi, ambi maluk eeppugwi, eeka'lek ndak-ndak eeppiigwi, niniki laakot logonet yoraga'lek abe paga mban yorogwe, eeko logowak nduk, ee'ninake menggerak aret o.
At Ala nen ari logonet, “An maluk eekeelik alik leenak minggirak ndak-ndak, kit togon maluk eeka'lek alik leenak togop aret logonip o,” yinuk, yereegerak wone liiru mbanak wonage me, at Ala maluk eekeelik alik leenak menggerak nogo nen kinayonggo pereegerak me, kit togon maluk eeka'lek alik leenak logonet, eerit nogo logonip o.
kit perak, o apit me wonogwe nogo mbo punuk, o eya iya lombok kenok, aakumi nen, “Wi!” ugo menggam nogome logobagip nduk, Ala nen kinayonggo pereegerak nogo at eeke menggerak mendek paganogo yorogo logobagip nduk, “Kit an mendek aret o,” yinuk, miirogo pinagage, “Kinendagembogut logonet, an neebe unde logorak kit aret o,” yinuk, mippinagage, “Kit an napuri maluk eeka'lek nake leenak logomunggup o,” yinuk, leenogo pinagage, ndi, “Kit an napuri lombok aret o,” yinuk, eekkinake, eereegerak o.
ကြော်ငြာတွေ