Yakobut 2:6 - Ala Wone Peenok Peebi Mbanak

⁶ It aap ineenggi lek nogo, Ala nen aret miirinabeegerak kagak, kit nen meek eerogo piigwi kiigi o. Piyak-payak eekkinako logonet, niikkiren wone owak loonggo menggam pinagi nogwe nogo ti, it aap ineenggi warak nen eerogo pinagagwi nogo lek a?

Yakobut 2:6 ပူးပေါင်းရင်းမြစ်များ

Ndawi 10:10

It nogo nen yikkologo logonet, “Ala abe'ninaka'lek mbo pinanege, Enegen kumaappatinuk wonage me, Enegen wo'ninaka'lek wonage, Eeke agaarik o,” yinuk, It piginakaatak nogo inuut tebenogo piigwi iinok, kweyak yogwe, It inomaawi ambik paga tebenogo piigwi me, ngginnogwe, Eeko menggaarak.

Ndawi 10:14

Togop yogo menggaarak kwe, Ale-pale eerogo piigwi, Iniki andi eerogo piigwi, Eekwi nogo kat Ala kenegen iige, Onggo eeppiyoorak nduk, koonogo pege, Eeke menggendak o. Elege moono yeenggwaarage menggendak keenok, Aakumi inagap ndakkoloorak meek mendek nogo Kabu'me ari wogo menggaarak o.

Ndawi 10:2

It maluk eeka nen iniki wogoppako logonet, “Aap ineenggi lek ti, ndogop eeppiyaawok o,” Yinuk, kote koonogo punuk, Kwaarinabit namenggaarak kwe, It aret yilunggologwe,

Ndawi 10:8

Aap inagap ndakkoloorak meek mendek nogo it nen kok nggereninabuwok nduk, Aakumi inawoore'nggam eyoongga ku'mbanak me, Kumaa'na'nuk toriigwi, Time nen it maluk eeka'lek ugun wonogwe nogo inoori wundi wogwe, Eeko menggaarak.

Ndawi 12:5

Kaliku ALA nen ari logonet, “It aap meek mendek tebenogo piigwi, It ineenggi lek nen, Yogop eeppinanuwak lak, ao, yinuk, iniki wakkologwe, Eekwi iinok, An pilak ari logonet, Ndogop eeppinanuwak lak, ao, nombakwi nogo, Inagap ndarogo piyaagin,” yereegindak me,

Ndawi 14:6

Kit maluk eerit nogo monggotak yi, It aap ineenggi lek tebenak mendek nogo Inaru non mbanogo piigo monggotak kwe, Ineebe op logowak nduk, Aliku ALA nen it piirogo menggerak.

Kini Wuppiige 14:31

Aap ambi nen aap ineenggi lek nogo tebenogo piige kenok, at ogobakkigirogo piyareegerak nogo aret meek eerogo pege menggerak kwe, Aap ambi nen it aap eekkoloorak meek nogo inabuwa mbake kenok perak, Ala aret ayuk wuke menggerak.

Kini Wuppiige 17:5

Aap ambi nen aap ineenggi lek mendek nogo miyuk-meya eerogo piige kenok, at ogobakkigirogo piyareegerak nogo aret meek eerogo pege menggerak. Aap ambi nen aakumi maluk inoba aremenggerak me, “Op togon eeki,” yinuk, ale'nggen mbake kenok, at yemenggerak onggo oba arigin lek ti lek, oba arigin aret o.

Kini Wuppiige 18:23

Aap eenggi lek nogo nen, “Nabuwa ket o,” yinuk, yoranet nege menggerak kwe, It aap ineenggi warak nogo nen perak, wone onggo panggok togon yorogo menggaarak.

Kini Wuppiige 22:16

Aap ambi eenggi warak eekkolaakit nduk, it aap ineenggi lek nogo tebenogo piige logonet, inamendek wagangge inom, Aap ambi nen it ineenggi warak onggo lek we wogorage inom, imbirak ndak-ndak ineenggi lek aret eekkologo menggaarak.

Kini Wuppiige 22:7

Aakumi ineenggi warak nen aakumi ineenggi lek inabu'me piigwi, Ndi, aap inanomat mbanak nen aap inanomat porogo wonage nogo inayeloman eerogo piigwi, Eeko menggaarak.

Wone Alom Kibingga 5:8

Aap ambi yabu unde wonage nogo owe nen enegen wagangge, ndi, it imbirak inoweewi tiyarogon nen inigen wogonakwi, eeko menggaarak me, kat nen o ambime it aakumi meek mendek tebenogo piinok wonogwe, wone yugu ndak-ndak eeppiiga'lek inawone yiluk-yiluk mbanggwi, eekwi kenegen iige kenok, “Aap yi eekwi iya!” mbariyak mage o.

Yetaya 53:3

Aakumi nen, “Ogole o,” yinuk, meek ombakwi, mbo pugwi, eereegwaarak o. At aaninggin-paaninggin nen iniki wakko'net unggwage, Andi-pandi kage, eeke nagagerak o. “Aap yi ogole o,” yinuk, inete nobakkologo mengga kwak at kenok, “Ogole o,” yinuk, meek ombako nogogwaarak me, Nit kunduk, “Aap abe o,” yinuk, ayuk wurulik o.

Amot 4:1

Tapi amok ambik puut Tamariya o Mbatan mendek mengga kwak kit kumi o puut Tamariya mendek kinaanogum anggen yi wae. Kit nen aakumi ineenggi lek wi-wi eerogo piigwi, It aakumi tebenak mendek meek inombako logonet, yeenggwaaraga'lek mbo piigwi, “Anggur amburu nawok nen wo'nira wa'nip o,” yinuk, kinogonggelomini yorogwe, Eeko monggotak yi, Wone yokkirage yi, kinaruk konenggo logonip o.

Amot 5:11

It aap ambi eekkoloorak meek mendek nogo wi-wi aganako logonet, inambi gandum anggen mbanak nogo ndinogo waganggwi, Eeko monggotak o. Togop me, kinawi nggwok yugum abe amuni mbanak paga wurumonggotak kwe, o time ye mbanggola unggwogwe, Anggur awi yarumonggotak abe mili kwit agan laganemenggerak kwe, amburu toologo nunggwi, Eeko logomunggup lek o.

Abakuk 3:14

It aakumi ambi eekkoloorak meek kumaarak wonogwe nogo, at awuri nen inambeme yonggorinabuwok nduk, eeko logonet, Nanonggwan aga o, yinuk, inale'nggen mbako mengga kwak, At awuri wim eeka nen nit mappinanuwok nduk, o wiya warit wage menggi kwak wogwe iigak, At awooluwak yabok togon eerogo inowe nogo anobak polok togon warogo pege,

Takariya 7:10

Kumi nanu inom, elege moono inom, aakumi nggiru inom, ineenggi lek inom, tebenogo piigwi, it mban-mban at ambi maluk eeppegak eeriyak koonogo pugwi, eerugwaarik, yegerak me, yokkiragi o,” yinuk, yoragagirak o.

Yaya 8:49

Yogo mbareegwa, Yetut nen it yorage logonet, “Lek o. An kugi ninikime wonage lek aret o. An nogoba tiyappege minggirak kwe, kit nen an tebembanugwi kiinok, yokkiragi o.

Nappiigak 13:50

Pawulut Mbaranabat imbirak inooruwak nduk, it Yakuri mendek nogo nen kumi nggaganin Ala inagabiti mbako nogogwaarak inom, it o kota time mendek inoweewi inendage warak inom, inikime manabi nogo mbareegwa, o time nen mugogo wumbiyareegwaarak.

Nappiigak 17:6

it imbirak ineebe lek mbareegwa, at Yaton inom, ninoreewi ando inom, nigiren inoweewi o kota unde inowagam piya nogogwaarak. Piya nogo nogogwaarik, it yorogo logonet, “O yi awi ndi awi abok aret piyaginabit nugu menggaarak nogo, ineebe yime wagaarak me,

Nappiigak 18:12

Ala wone mamunirage wonage me, at Nggaliyo aakumi Akaya mendek inowe gubernur mi'ndak wonage kagak, it Yakuri mendek abok lambumbunuk ambugwi mi'nogo nogogwaarik, Pawulut pippunuk eebe wonok, wone amburu mbanggo menggam pi nogogwaarak.

Nappiigak 8:3

Aleenggu maakwi iigak kwe, at Tawulut nen perak, it Ala apuri kuwak eerit nogwe nogo kumi nen, aap nen, lek eerogo piinet nage logonet, o ambi me unggwage, niigogo wumbiige, ambi me unggwage, niigogo wumbiige, eerit wogoren keele maarogo mambiigo menggam nogome piya nage nagagerak.

1 Korindut 11:22

Wologwe! Kinagi-kinambi nonggo logorak kinawi wurik lek kenok, Ala awi wurik me ugun-ugun eeri unggwogo ogotik? Ndi, Ala apuri kuwak eeko menggaarak meek eerogo piigo logonet, it inamendek lek nogo inenggali kaawak nduk, eeginakwi lek mba'nuk yogo ogotik? Kit togop aret eekwi me, an nonggop yokkira? “Kit op aret eekwi o,” yinuk, yokkiroorak mbakop? Mondok lek o.

Yakobut 2:3

aap yum abe kigirikwe yirik nogo ayuk wuppunuk, yogo logonet, “Nogoba o. Kwi'nogo menggam abe paga yayi kwi'nari mok o,” yogwi, ndi, aap eenggi lek nogo ayuk wuka'lek logonet, “We taati mi'ndak logorak a, ilin me nggween paga time kwi'nagan a,” yinuk, yogwi, eekwi kiinok,

Yakobut 5:4

It kineyabu eeppinagagaarak nogo, onggo ndak-ndak wogoroorak kagak eeko nogogutak me, it inoone mumun kokop yokkirogwe yi, iyaanip o. It ando anggen yugu wonok kira wogwe nogo kunduk, inoone yogwe at Omaawi Lombok Menggerak ninogoba nogo, muk aruk konengge agaarik o.

Yakobut 5:6

It aakumi maluk eekeelik nogo nen wone onggo yokkiraga'lek iigak, kit nen mban pilit wone inoba piinok, inooko nogogutak nogo o.