Wayu 22:7 - Ala Wone Peenok Peebi Mbanak

⁷ An mbet-mbet woraagin o, yinuk, yegerak me yokkigi o. Ndi, peebi eeriyak wone an yokkege neegak, liiru mbanggendak nogo, it aakumi liippunuk, mugurok nogwe iinok, iniki ale'nggen aret kogo logogun o,” yinuk, yo'nege kagarak.

Wayu 22:7 ပူးပေါင်းရင်းမြစ်များ

Wayu 1:11

yo'nege logonet, “Eeriyak titikkege neegak, mbuku pirik-perek aago paga liiru mbangge logomenggendik, it Ala apuri o Epetut inom, Timirina inom, Peragamut inom, Tiyatira inom, Taririt inom, Pilarelipiya inom, Laworikiya inom, nggereya 7 paga kuwak eekwi nogo abok aret pekkaawak nduk, nappunu o,” yinuk, yo'nege konenggirak o.

Wayu 1:3

wone yi eeriyak nogo abu panggo yegerak me, it aakumi nen peebi eeriyak wone liiru mbanak yi, pekkagak mbininogo yorogwe, ndi, yorogwe iigak, inaruk konembunuk, liirogon waganggwi, eekwi iinok, Ala nen ale'nggen inoba piige logogin o.

Wayu 16:15

Ti'nuk, at oone yo'nege menggerak nogo nen, ambinom yo'nege logonet, “An aap yogoot wagangga pogom abera'lek me woraagin me, aakumi inenggaanom nggwok paga kinagap mbelanak nogwe kiinok, kinenggali ogwe kiyo, liippogo logonip o. Kinayum abu ndigik-ndegek eerogo patinuk, kinagaket paga wonogwe me, an wage neenok, kiniki ale'nggen eekkinake kaamunggup o,” yinuk, yo'nege kagarak.

Wayu 2:16

it maluk eekwi nogo ti, iniki koombunuk, mbo pogo logowak o. Mbo pega'lek iinok perak, an mbet-mbet wage logominggirik, mbuti togowa an nambeme wonage yi nogo paga inoori wambi woraagin o.

Wayu 22:12

Yo'nege kage nagarik, at Yetut nen, “O maan aa'nduk togon wonagagirak alom Alpa inom, peebi irip paga mondok logorak Omega inom, ti an mban aret me, an logonuk lek mbet-mbet wage logominggirik, yi aap ndi aap eeko logomenggaarak paga onggo wogoroorak mbakirak nogo inalitik-inalitak ndak-ndak wogora woraagin me, liippogo logowak o,” yinuk, yo'nege kagarak.

Wayu 22:18

Ti yo'nege nagaarik, ambinom yo'nege logonet, “Peebi eeriyak wone yokkege neegak liiru mbanggendak nogo, aakumi konembunuk, wone alik ambi inom nabenogo pugwi iinok, andi-pandi aganaburak kugi alom 7 porogo wonogwe iige nagandik, liiru mbanggendak nogo nen inooruwak nduk, Ala nen nappiya woraagin o.

Wayu 22:19

Ndi, at Ala nen, Ineenik aganaka anggen nunggwi, o kota obeelom alik leenak nogome unggwi nogwe, eeko logorak o, yinuk, yereegerak mbuku yi paga liiru mbanak wonage kwe, peebi eeriyak wone yokkege neegak liiru mbanggendak yi, aakumi nen konembunuk, ando waganggo logonet, Ando ti woorak lek o, yinuk, mbo pugwi iinok, at Ala nen it aap ti, anggen nogo nunggwi, ndi, o kota nogome unggwi nogwe, eerugun lek, Kit endekem aret logonip o, yinuk, yoraagin.

Wayu 22:20

Kat keenu a'nok nduk, wone yi, paganogo yokkegerak nogo nen, An logonuk lek mbet-mbet wagi o, yinuk, abet aret ari kagarak me, wone ti, abu aret yokkigi o,” yinuk, yo'nege kagarak. Yo'nege mbaki, an nen, “Noweeluk Yetut mbet-mbet woraawak lak ao,” yinuk, “Amin,” yagarak.

Wayu 22:21

Kit kinowe Yetut nogo iniki kunik en obeelom eeppinagage logonet, kinarum aret logogin o. Amin.

Wayu 3:11

An logonuk lek mbet-mbet aret woraagin o. Ndi, wage logominggirik, it abet mba'nuk waganeegwaarak nogo liirogon porogo wonogwe iinok, nggare-nggare mendaarak nogo mendek yippiya woraagin me, aakumi nen waganggwi iyo, liippunuk, tum wako logowak o.

Wayu 3:3

It wone mamunirogwe iigak, inaruk konembunuk waganeegwaarak nogo abeppunuk, inomaluk mbo pogo logomenggaarik, wone koneneegwaarak nogo aret liirogon porogo logorak yoraawak nduk yokkigi o. Ndi, Nit nonggop eeko ogoorik o, yinuk, inomaluk mbo pugwi lek iinok perak, aap yogoot woorak nduk wage menggi kwak, an o ndiyom paga woroorak ineenggo'lek iigak, togop aret abera'lek me perak togon inowagam woraagin o.