Wayu 22:10 - Ala Wone Peenok Peebi Mbanak

¹⁰ Yo'nege nagaarik, “Peebi eeriyak wone yokkege neegak liiru mbanggendak nogo, eeriyak abu aret panggo yi wagaarak me, wone ti, kumaapporogo logorak mage o. Ata, yi aap ndi aap yoranet nege logot o.

Wayu 22:10 ပူးပေါင်းရင်းမြစ်များ

Yetaya 13:6

Naliku an ALA nen eeppiyoorak eyom muk panggo yi wagaarak me, inale yikkologwe, Ti eeppiyoorak eyom ti, Nomaawi Lombok Minggirak an nen it lek eerogo piyaagin me, inaleenggu maakkologwe, Eeko logowak o.

Yetaya 8:16

Wone at Ala nen yo'negerak abok aret yokkirage yi, liirogon waganggwi, Kit an noone wagangga nen eeko logorak wone yugu yi, nggirik-nggerok porogo wonogwe, Eeko logonip o.

Yetikiyen 12:23

Aliku Itok Menggerak ALA nen yegerak yoroorak nogo yi aret. It yogwe ti, an nen lek eerogo pigin me, it Iterali wonogwe me time ambinom yogo logogun lek aret, yegerak yoret o. It nogo yorage logonet, Inabinggaanggo kagaatak a'me nggelok yagak eeke eyom abu koorok ari wage me,

Ndaniyen 12:4

Togop aret eeko logogun kwe, kat Ndaniyen perak, wone an yokkigirak mbuku pirik-perek aago paga liiru mbanemenggendak abok aret ti, lambunogo amburu nabenogo punuk, aakumi yoraga'lek keegak, o age yobok kuli aret ari woraagin o. Wone ti, kiraarak kagak, it aakumi apit aret, Yi age yi, nineenu aruwok lak, yinuk, yi awi ndi awi kwaarit namenggaarak kagak kwe, kiraarak mban logowak o,” yinuk, yo'nereegerak.

Ndaniyen 12:9

Yoge mbaki, at nen an yo'nege logonet, “Ndaniyen wae. Wone yokkigirak mbuku paga liiru mbanak yi, lambunogo amburu nabenogo punuk kiraarak kagak o age yobok kuli aret ari woraagin me, yogondak we aret nak o.

Ndaniyen 8:26

Kabinggaanggo kage logonet, ko'lu-kii'me kubondendok nen lingginit kiyoma ari noorak kagandak nogo ti, abet aret eeriyak yokkege kagandak kwe, o peebi eeriyak yokkege kagandak me, wone ti, kinikime tebembunuk logomunggun o,” yinuk, yo'nege kagagirak.

Matiyut 10:27

An nen oonikiya negen kote kumaarogo yokkirage nogo ti, kit nggwok paga o eya paga yorogwe, ndi, yagakop wone paga yogwe konenggwi nogo ti, o kirin paga laganuk, kuum-keek paga paganogo yorogwe, eeko logonu o.

Oroma 13:11

“O yogondak eraambe abu alik negen arit wage kagi,” mba'nuk, niniki-kiniki kunik aganako logonip o. Ninagap ndariyak nogo ti, nda negen kagak abet mbareegurak kwe, yogondak perak, abu panggo yi wagaarak me, kit nogo yugwi negen wonogwe yi, kineenik ariyak eyom panggo yi wagaarak me nduk, yokkiragi o.

Oroma 13:12

O apit lek age kagak, o kilim nagaburak abu panggo yi wagaarak me, o apit paga logonet eeko mengga kwak, eerit nugwi nogo mbo punuk, o weeremenggerak eya paga wim namburuwak nduk, ineegin-inarege li'luk aago mengga kwak, kit togop aret eeppunuk logonip o.

2 Tetalonika 2:3

It aakumi pilit togop agan wogo logonet, kinambokan laganukwak, liippiigo logonip o. Ninowe woroorak nogo ti, aakumi nen Ala wone, “Nineebi o,” yinuk, mbo pugwi, ndi, at mondok maluk eeka lek eerogo puurak ake lengganak nogo, kin ari wage, eeka'lek iigak, woraagin lek o.

1 Peterut 4:7

O age yobok paga eeriyak abu koorok panggo yi wagaarak me, tamban eeko logobagip nduk, kiniki kwi'ndak nu'lek logonet, kinagaket paga logonip o.

Wayu 1:11

yo'nege logonet, “Eeriyak titikkege neegak, mbuku pirik-perek aago paga liiru mbangge logomenggendik, it Ala apuri o Epetut inom, Timirina inom, Peragamut inom, Tiyatira inom, Taririt inom, Pilarelipiya inom, Laworikiya inom, nggereya 7 paga kuwak eekwi nogo abok aret pekkaawak nduk, nappunu o,” yinuk, yo'nege konenggirak o.

Wayu 1:3

wone yi eeriyak nogo abu panggo yegerak me, it aakumi nen peebi eeriyak wone liiru mbanak yi, pekkagak mbininogo yorogwe, ndi, yorogwe iigak, inaruk konembunuk, liirogon waganggwi, eekwi iinok, Ala nen ale'nggen inoba piige logogin o.

Wayu 10:4

O ngguurubu ne 7 paga ari naruk konembunuk, ari nogo liiru mbanikit nduk eeke me, mbogut paga nen oone ambi yo'nege logonet, “O ngguurubu ne 7 paga ari konenggendak nogo ti, liiru mbanugun o. Ata, kinikime mban kumaapporogo logot o,” yinuk, yo'nege kagarak.

Wayu 22:16

Kit an napuri yi awi ndi awi kuwak eerit nogo monggotak nogo, peebi eeriyak wone yi, paganogo yokkira woraawak nduk, nayonggo nege menggerak malayikat ambi nappi wagarak nogo ti, an Yetut nen aret o. O weerikit nduk eeke kagak, laaluguragan ambiret kere ari nogo pogom anebunu Ndawut paga wiganak agarip ndarak nogo an aret o,” yinuk, yo'negerak.

Wayu 22:18

Ti yo'nege nagaarik, ambinom yo'nege logonet, “Peebi eeriyak wone yokkege neegak liiru mbanggendak nogo, aakumi konembunuk, wone alik ambi inom nabenogo pugwi iinok, andi-pandi aganaburak kugi alom 7 porogo wonogwe iige nagandik, liiru mbanggendak nogo nen inooruwak nduk, Ala nen nappiya woraagin o.

Wayu 22:20

Kat keenu a'nok nduk, wone yi, paganogo yokkegerak nogo nen, An logonuk lek mbet-mbet wagi o, yinuk, abet aret ari kagarak me, wone ti, abu aret yokkigi o,” yinuk, yo'nege kagarak. Yo'nege mbaki, an nen, “Noweeluk Yetut mbet-mbet woraawak lak ao,” yinuk, “Amin,” yagarak.

Wayu 22:7

An mbet-mbet woraagin o, yinuk, yegerak me yokkigi o. Ndi, peebi eeriyak wone an yokkege neegak, liiru mbanggendak nogo, it aakumi liippunuk, mugurok nogwe iinok, iniki ale'nggen aret kogo logogun o,” yinuk, yo'nege kagarak.

Wayu 22:9

at nen an yo'nege logonet, “Togop eerugun o. It koreewi Ala nen yorage kagak yoraga inom, it wone liiru mbanggendak liippunuk mugurok nogo logomenggaarak nogo inom, kat inom, an kit pogom Ala ayeloman aret me, Ala mban alut eeke logot o,” yinuk, yo'negerak.

Wayu 5:1

Ti eekwi iige nagarik, ti'nuk, ambi kage logonet, mbuku pirik-perek aago ambi nggorek peenok-peenok liiru mbanak me, “Piiniyak lek o,” yinuk, ambi perengge keele maake, ambi perengge keele maake, eerit keele 7 paga maarak at wone lengganogo yorage menggim eyo ndoonak paga kwi'ndak wonage nogo eenggi abe'nggan porogo wonage kagarak.