Wayu 15:3 - Ala Wone Peenok Peebi Mbanak

³ ndi, Ala ayeloman Muta endawi inom, Ndomba Aagaluk nogo endawi inom, wakwi, eeko logonet, “Komaawi lombok menggendak ninogoba Ala kat aret o. Kat eeke menggendak nogo ti, eerubok mendek mondok iya lombok eeke menggendak o. Yi aakumi ndi aakumi aa'nduk wonogogwaarak, yogondak wonogwe, peebi logogun abok inowe kendagembogut kat aret o. Kat eeke menggendak nogo ti, mondok a'me nggelok abe mban eeke menggendak o.

Wayu 15:3 ပူးပေါင်းရင်းမြစ်များ

Wakkagagerak 17:1

Ti'nuk, at Abaram nogo ndarak kagak tahun 99 eeke nagagerik wonage me, at Aliku ALA nogo at owagam wage nagagerik, yoge logonet, “Nomaawi Lombok Minggirak an Ala aret me, an nenggaanom paga maluk eeka'lek obeelom mban eerit nage logot o.”

1 Mbinineegwaarak 6:49

at Karun apuri-ombowologwe inom perak, Ala ayeloman Muta nen wone lengganogo yoragagerak nogo ndak-ndak, Ala awooliya wurik Mage Lombok Menggim time aakumi Iterali inomaluk lek eerogo piyaawak nduk, nggami aanggo wakwi kwak, Ala ake warogo kani kunggak eerak paga inom, obari abe kaga nogo mendek kani kunggak ogobakkigirik paga inom, Ala ake kani kunggak yuwak nduk, mippiyareegerak.

2 Mbinineegwaarak 24:6

Mbet-mbet kuwak eeri naga'lek mbareegwa, aap endagembogut nen it Ala unde inowe Yoyara nogo, woraawak nduk, wiige nagagerik, wage mbareegi, yoge logonet, “Aliku ALA ayeloman Muta inom, it Iterali inoweewi kuwak eerak inom, nen Ala inom lambungge menggim awooliya ogobakkigiriyak wu pogo logorak yereegwaarak nogo, o Yekura paga, o Yerutalem paga, wu pugu it Lewi mendek nen kuwak ee'nuk, woraawak nduk, yoraga'lek nonggop nduk wonage agandik?” yinuk, yoreegerak.

Nekemiya 9:14

Nogo 6 yippunuk, ko'lu paga nake leenogo pateegirak o, yinuk, ineenu eeppiige, Yogop ee'nu ndogop ee'nu, wone inom, wone lengganak inom, eeko logorak wone inom, kayeloman Muta nen yoraawak nduk, yoge, eereegindak o.

Ayup 36:24

Lek aret me, At eerit nage nogo aakumi nen ndawi anep pugwi, It aakumi abok aret inigen kogwe, O nda nen inigen nakkogwe, Eereegwaarak nogo Tiyappenok nduk, abeke logot o.

Ayup 5:9

Nit eeriyak meek kogwe nogo, at aret eeke, Ndi, eerubok mendek nit lingginiyak meek nogo, at aret eerit nage, Eeke logonet,

Ndawi 105:5

Aliku ALA ayeloman Abarakam paga wiganak yi wae. At leenogo pinagareegerak Yakup ombowologwe yi wae. At Aliku ALA iya tit eerogo pit wagagerak inom, Eerubok mendek eeke nagagerak nogo inom, “Aaninggin ndogop eeppinagagin o,” yinuk, kit kinom ogoorak yoragagerak nogo inom, Abeko logonip o.

Ndawi 111:2

Aliku ALA mondok iya tit eerit nage menggerak o. Aap at eerit nage inikilom mbako menggaarak abok nen liippogo menggaarak.

Ndawi 111:7

At eenggi paga eerit nage nogo Abe liirogon mban eeke, a'me nggelok mban eeke, Eeke menggerak. Eeko logorak wone yugu nogo, “Eerigin aret o,” Yinuk, iniki panggombunuk logorak op aret o.

Ndawi 139:14

Neebe mondok iya, “Wi,” yuurak mendek Ogobakkigirogo paneegindak me, “Wa,” yokkege agarik o. Kat eerit nage menggendak ti, Mondok iya lombok an abu neenu aret o.

Ndawi 145:17

Aliku ALA eerit nage menggerak abok aret A'me nggelok mban eerit nage, At eeke menggerak abok aret ti, Aakumi inabuwa mba'nuk eeppiinet nage, Eeke menggerak.

Ndawi 145:6

Komaawi paga inamineeri ne agan noorak mendek Eereegindak nogo it yorogwe iigak, Kendage nggwok wonage nogo mbininogo yoranet nage, Eeke logogin o.

Ndawi 18:30

Kat nogoba Ala perak, Eerit nage menggendak nogo ti, abu abe mban aret o. Kaliku ALA koone ti, Pilit lek abet mban ari menggendak o. Ineebe op logorak kabu'me wonogwe iinok, Keebe nggeemu kwak nobappiirogo menggendak o.

Ndawi 78:12

O Metit inom, o Towan kobappaga inom, Ninombomini inigen iigak, Ala nen eerubok mendek eeke logonet,

Ndawi 92:5

Kaliku ALA wae. Kat eerit nage menggendak nogo ti, nggwok lombok wonage, Ndi, kiniki koonogo pege menggendak nogo ti, Tabarak lombok wonage, Eeke menggendak me, iya o!

Ndawi 99:4

At endagembogut mondok tiyanak wonage, Eekaatak a'me nggelok eeppiigo logorak inikilom mbake, Ndak-ndak eeppiinet nogo logorak wone lengganogo pege, Obeelom mban eerit nugwi wone inom, Eekwi a'me nggelok eeppiigwi wone inom, It Yakup paga wiganak eeko logowak nduk, Lengganogo yorage, Eereegerak o.

Yetaya 33:22

At Aliku ALA ti, ninowak loongga, Aliku ALA ti, eeko logorak wone lengganogo yo'niraga, Aliku ALA ti, ninowe endagembogut aga, Aret me, ninagap ndarigin nogo ti, at aret o.

Yetaya 45:21

It alom ngge panggombunuk eekwi nogo, an lik togon yo'nugwi, Wone nonggop yo'niriyak nogo inagugi inom wone mbanggwi, Eeruwak o. Wone agaarak yi, aga'lek kagak ariyak nduk, o aa'nduk lombok ta nen yoranet nage, O maan nen wone ti, ta nen inaruk paga pit nage, Eereegerak mbakop? An Naliku ALA nen yoragagirak nogo lek a? An wonage neegak, Ala alik ambi wonage lek aret o. Inagap Ndaka iniki abe koonak alik ambi lek, an Ala nalik aret minggirak o.

Ndaniyen 6:20

Nage nagagerik, mbuun ambe paga koorok taati panggo yi nanuk, “Nonggop aga?” yinuk, iniki piirik logonet, oone nggwok paga, “At eenik menggerak Ala ayeloman kat Ndaniyen wae. Kat ko'lu-kii'me alut eekak mban eeke menggendak kogoba Ala nen singa inambeme nen kagap ndakerak ilik?”

Ndaniyen 9:11

Nit Iterali mendek abok aret eeko logorak koone yugu nogo, Eeriyak nineebi o, yinuk, taganogo mbo pogoorak o. Kat kendage maluk eerogo pogo nogoorak me, Maluk eekwi iinok, pulunogo piige, maluk eekwi onggo aaninggin inoba piige, eerigin o, yinuk, kumbuk mbambunuk yoragagindak kat Ala kayeloman Muta liiru mbaneegerak nogo ndak-ndak nit ninoba kwippinanggendak o.

Oteya 14:9

An wonage neegak, it Eparayim ti, inagugi inom wone mbanggo logorak op ya? Lek me, Yeenggwa niret o, yo'nugwi iinok, an nen aret wone onggo yorage, An nen aret inarum wake, Eeke logogin o. An ti, eyo kilu-kilu engga mili lubu ari menggi kwak minggirak me, An paga kunik logonet, anggen yogo logogun o, yinuk, yegerak me, yokkiragi o,” yoragagirak.

Mika 7:20

O maan iyaalok togon kat nen ninombomini kinom wone abuk nggaruk togon koonogo punuk, kumbuk mbaneegindak nogo ndak-ndak, Kat nen Yakup yoreegindak nogo liirogon eeppege, Abarakam yoreegindak nogo abuwa mba'nuk, ndak-ndak eeppege, Eerumunggun o.

Tepaniya 3:5

Aliku ALA at enggela'me wonage logonet, maluk ambi eeppiigeelik obeelom mban eeppiige, At puk aga'lek ko'lu-kii'me o kubondendok nen inawone amburu mbanogo punuk, a'me nggelok mban eeppiige, Eeke menggerak kwe, It aap maluk eeka iniki nggolawe nogo, inenggali mbaka'lek maluk mban eerit nugu menggaarak o.

Takariya 9:9

O Tiyon aagalogwe kit yi wae. Kinale'nggen nen lubuk yogwe. O Yerutalem aagalogwe kit yi wae. Kinale'nggen nen kina'mit piyanggogwe, Eeko logonip o. A'me nggelok eeppinagit nage, kinagap ndake, Iniki yanggonak logonet yokkirage, Eeke menggerak kinowe endagembogut nogo keledai awo ndarak amborowak paga kwi'ndak kiya wage ti, kinigen kaanip o.

Yaya 1:17

Ala nen wone lengganogo yoge kenok, Muta nen yo'niragagerak kwe, Ala iniki kunik nen eeppinanege, “Ala ndogop menggerak o,” yinuk, liirogon paganogo yo'nirage, eereegerak nogo ti, Yetut Keritut aret o.

Pelaareegerak 31:30

Yoragagerak kuwak eerogo piya wogo mbareegwa, it aakumi Iterali wonogwe nogo abok inaruk iigak, at Muta nen ndawi alom me nen tiyanit nagagi-nagagi irip yubuni nagagerak nogo yi aret o.

Pelaareegerak 32:3

At Ala ti, yugum omaawi nu'lek menggi kwak logonet, Abu obeelom mban eeke, At eeppiinet nage ti, abe koonak a'me nggelok mban eeppiinet nage, At eraambe ninggin age, yegetak mbeyok ari, Eekeelik, mondok li'lak eeke, Eeke menggerak me, Aliku ALA endage tiyappege neegak, Kit kunduk, Ninogoba Ala alik nggwok aret o, yinuk, ayuk wuko logonip o.

Pelaareegerak 34:5

Yoge mbareegi, at Aliku ALA ayeloman Muta nogo at Aliku ALA nen yoreegerak nogo ndak-ndak, o Mowap time aret kambeegerak.

1 Timotiyut 1:17

Ndi, yogondak, naput o. Yi o ndi o aakumi aa'nduk wonogogwaarak inom, yogondak wonogwe inom, peebi logorak inom, ninogoba endagembogut kanggeelik mondok itok eenik menggerak ninigen kogolik alik menggerak Ala nogo endage mondok-mondok tiyanak ayuk warak logogin o. Amin!

Iberani 3:5

At Muta nen, “An Ala ayeloman aret me,” yinuk, ake eerit nage logonet, peebi eeriyak wone aakumi ineenu aruwak nduk, Ala awi wurik me puk aga'lek ko'lu-kii'me at ake eeke nagagerak kwe,

Yotuwa 22:5

Wunda nogo logomonggotik, at Aliku kinogoba Ala kiniki kunik eekwi, at eeriyak mbake nogo mban eerit nogwe, Yogop ee'nu ndogop ee'nu, wone yugu nogo liirogon eekwi, at paga mban kiniki panggombunuk wonogwe, kiniki inom, kineebe inom, abok aret at mban wogo'nuk mugurok nogwe, eeko logonip o, yinuk, at Aliku ALA ayeloman Muta nen eeko logorak wone lengganogo yokkiragagerak liiru mbanak nogo ti, abu liirogon aret eeko logomunggup o,” yoragagerak.

Wayu 1:8

Aa'nduk wonagagerak, yogondak wonage, peebi logogin at omaawi lombok menggerak ninogoba Ala nen ari logonet, “O maan aa'nduk togon wonagagirak Alpa inom, ndi, peebi irip paga mondok logorak Omega inom, ti an aret o,” yinuk, ari menggerak o.

Wayu 11:17

“Kat komaawi lombok menggendak aa'nduk wonagagindak, yogondak wonage, ninogoba Ala nogo kat aret o. It aakumi abok inowe kendagembogut logonet, wone lengganogo yorage logokit nduk, unde agagindak nogo, Yogondak yi eyom paga aret eeke logokit nduk, mi'nagandak me, Wa, wa, yokkogo o.

Wayu 14:3

Konengge nagarik, at wone lengganogo yorage menggim menggerak eebe nogo inom, it aakumi nen iigulik mendek ineebe 4 nogo inom, ndi, it mbogut paga wonogwe inoweewi inom, wonogwe iigak, it ineebe seratus empat puluh empat ribu nogo nen inabu'me wanggeko logonet, ndawi ngget mendek wakwi iigirak. Ndi, ndawi wakwi iigirak nogo ti, it aakumi ugun nen mamumbunuk tiyaniyak abu meek o. Ata, at Ala nen, “It o nggween paga time logorak lek o,” yinuk, aap seratus empat puluh empat ribu inonggo mbaneegerak nogo nen mban tiyaniyak perak op me, tiyanggwi iigirak o.

Wayu 14:8

Agan nage mbaki, ore ambi wage logonet, “O kota nggwok Mbaben ti, kwe mbabilu ya wukak pogom me, amburu kumili aganaka nenok, ugun-ugun eerit nogo mengga kwak, maluk ugun eerit nugwi, iniki nengge kenok maluk ugun eerit nugwi, eeko logonet, Nit eekwi yi, it yi aakumi ndi aakumi inanebunu lombok abok aret ndak-ndak eeko logowak o, yinuk, mamuninako menggaarak me, inawi inom, ineebe inom, abu pup eerogo piigi o. Pup eerogo piigi o,” yinuk, ari naruk konenggirak.

Wayu 17:14

Ndomba Aagaluk nogo tebenogo puwok nduk, inom wim nggagambunuk namburit namenggaarak kwe, Ndomba Aagaluk nogo ti, aakumi inoweewi inowe inom, ndi, yi aap ndi aap inendagembogut inowe endagembogut inom, ti, at alik aret me, apuri miirinake nagagerik, yonggo piyareegerak inom liirogon eerit nogwe nogo, inom wunggo logonet, nggeewo awuri inom tebenogo piyaagin o,” yinuk, yo'nege kagarak.

Wayu 19:16

Ndi, at endage nogo ti, Aap Inendagembogut Inowe Endagembogut inom, Aakumi Inoweewi Inowe inom, nogo ti aret me, ambogoyum paga inom, ambulok paga inom, at endage ti, liiru mbanak wonage kagarak.

Wayu 19:2

Kwe yawukak mondok iya eerit nage nogo nen, Ee'nabi woraanip o, ari kenok, Yi aap ndi aap abok aret eeppi unggwagak eekwi paga o nggween paga time maluk eerogo pege nagagerak nogo onggo kwe nogo oba kwippege, Ndi, kwe nogo nen kat kayeloman mini inooreegerak inane'me wake, Eekendak me, Kat kalik mondok obeelom irip-kunduk eerogo aakumi liirogon inowak loongge logonet, Kwe nogo owak loonogo maluk onggo eeppegendak me, Wa!” yinuk,

Wayu 4:8

Aakumi nen iigulik mendek ineebe 4 nogo ti, inalitak lombok ina'naabit 6 aret me, ineebe paga apit aret inigen warak mban wonogwe iigirak. It nogo puk aga'lek ko'lu-kii'me inoone yogo logonet, “Maan wonagagindak, yogondak wonage, peebi logomunggun, nogo ti, kat mondok itok komaawi lombok menggendak ninogoba Ala aret me, Kat mondok obeelom alik leenak aret o. Kat mondok obeelom alik leenak aret o. Kat mondok obeelom alik leenak aret o,” yinuk, yogak mban eeko logonet,