Wakkagagerak 7:1 - Ala Wone Peenok Peebi Mbanak

¹ Ti'nuk, at Aliku ALA nen Nu yoge logonet, “O yogondak yi eyom paga ndarak kat kinom wonogwe nogo inenggela'me nen kalik mban obeelom koonak eerit nage keege nagarak me, kat kapurilogwe kinom linik-lenok aret yiiro wurik me time unggwi nanu o.”

Wakkagagerak 7:1 ပူးပေါင်းရင်းမြစ်များ

Wakkagagerak 6:18

It abok aret ndonggoninabit nage logonet kwe, kat kakwe kimbirak inom, kapurilogwe it inakuwi inom, abok aret kinagap ndarikit nduk, yiiro kat wuremenggenom nogome aret unggwi namunggup o, yinuk, noone abuk nggaruk togon aret yokkiragi o.”

Wakkagagerak 6:9

Aap Nu eeke nagagerak wone yi aret. At Nu apuri ineebe kenagan nogo inendage Tem, Kam, Yapet, aret ndaganabeegerak. Ndi, it yi aakumi ndi aakumi o nggween paga wonogogwaarak nogo abok aret Ala enggaanom paga maluk mban eerit nogwe, yi awi ndi awi abok aret inanini nen ugun-ugun eerit nogwe, eekwi iigak kwe, at Nu alik perak, o ti eyom paga aakumi at inom wonogogwaarak nogo inenggela'me logonet, maluk eeke, aakumi inoone at oba pugwi, eeka'lek obeelom mban eerit nage logonet, Ala imbirak iniki kunik aret wonagagerak.

2 Tamuwen 22:24

An maluk eeka'lek neyaawak nduk eeke, An maluk eerit nookwak, narum wakkolage, Eeke minggirak me,

Kini Wuppiige 10:9

Aap wi-wi aganakulik kenok ti, tu kuuri'me aret nugu menggaarak kwe, Aap wi-wi aganaka perak, at eeke nogo aakumi ineenu ogo menggaarak.

Kini Wuppiige 14:26

Aap ambi Aliku ALA ayuk wuke ti, pak wurogo pereegi kwak aret me, At apuri ineebe op logowok nduk, time aret ari unggwogo menggaarak o.

Kini Wuppiige 18:10

Aliku ALA endage ti, o nggorek omaawi wurik kwak aret wonage me, Aap iniki abe koonak nogo nen mbe agan time unggwi na'nuk, ineebe obeelom aret wonogo menggaarak o.

Yetikiyen 14:14

it aap ineebe kenagan aap Nu inom, Ndaniyen inom, Ayup inom, o ti enggela'me logomenggaarak kwe, it iniki abe koonak eerit nugwi paga ineebe kenagan ti mban inili eerogo piige logonet, o time wonogwe nogo abok aret lek eerogo piyane o, yinuk, Naliku Nitok Minggirak an ALA nen aret yagi o.

Tepaniya 2:3

Kit aakumi o yime kiniki tebenak logonet, Aliku ALA nen, Yogop ee'nu ndogop ee'nu, ari menggerak ndak-ndak eekwi yi, Aliku ALA mugurok nogo logonip o. Aliku ALA anini eeppinagi woroorak eyom paga kit kinoba pinagage kagak eerukwak, Kit abe koonak mban eerit nugwi, Kiniki tebenak logonet, eerit nugwi, Eeko logonip o.

Lukat 1:6

It imbirak ninogoba Ala nen, “Yogop ee'nu, ndogop ee'nu,” yegetak wone inom, lengganinaketak wone inom, alik eerulik mondok ndak-ndak aret eerit nugu nogogwaarak me, Ala nen it iniki mondok abe koonak aret iige nagagerak.

Lukat 17:26

Aap Nu wonage kagak, eerit nugu nogogwaarak nogo pogom, an aap aret nda'nagagirak woroorak eyom paga it aakumi togop aret eerit nugu logogun o.

Nappiigak 2:39

Ala nen, Wokkiraagin o, yinuk, abok yokkiragagerak nogo ti, kit inom, kit kinapurilogwe inom, it aap nda menggaarak inom, peebi ninogoba Ala nen wiigiraagin nogo abok kinake aret yokkiragagerak o,” yinuk, yoragagerak.

Iberani 11:7

Aap Nu kunduk, peebi eeriyak awo kin kaga'lek kagak, Ala nen kurumbi yoge mbareegi, “Yi abet aret eeriyak yo'nege kagi,” yinuk, ayuk wuke logonet, akwe-apuri inom inagap ndaruwak nduk, o yiiro wureegerak. Ala nen at yoreegerak nogo abet mba'nuk, yiiro wureegerak ti paga, “Kit aakumi maluk eekwi onggo niyo paga kinoorigin o,” yinuk, ineenu eeppiyareegerak me, nit abet mbakwi paga at Ala nen, “Aap yi, iniki abe koonak aret o,” yinuk, yo'nirage nogo ndak-ndak, at Nu iniki abet mbareegerak paga, “Aap yi, iniki abe koonak o,” yinuk, yereegerak.

1 Peterut 3:20

Obeelom wone yora nagagerak nogo ti, aap Nu nen maan aa'nduk it aakumi Ala wone yorage kagak, taganogo mbo pogo mbareegwa, Ala nen, “Mbet-mbet inoorikit,” mbareegerak kwe, aap Nu nogo o awo wuke kenok, iniki yanggo yinuk, tokkage kagak, o nogo wuke mbareegi, aap Nu apuri inom ineebe 8 mban unggwogogwaarak nogo, niyo nen wogoren laganeegerak paga inagap ndake logonet, it ando apit niyo ndonggoninabeegerak inogoma keele maarak o apit me wonogwe me, wone obeelom wone yora nagagerak nogo it aret o.