Wakkagagerak 3:19 - Ala Wone Peenok Peebi Mbanak

¹⁹ Ndi, yabu ligak wuundamo eeppunuk kambi-mbiingga nengge logonet aret kangge logomunggun o. Kat keebe nggween mendek paga aret wakkagak agago ogobakkigikkakirak me, kangge logomenggendik, kiyokan nggween aret age logomunggun o,” yinuk, yoreegerak.

Wakkagagerak 3:19 ပူးပေါင်းရင်းမြစ်များ

Wakkagagerak 18:27

Yoge mbareegi, at Abarakam nen ambinom yoge logonet, “An abu meek liirubu wun pogom logonet, wone yokkiriyak meek aret kwe, kagak yokkege me, mbe'niriyak mage o, nogoba.

Wakkagagerak 2:7

Ti'nuk, peebi at Aliku Ala nen nggween mbuuluk ambi nggalenogo wagangge nagagerik, aap aret ogobakkigirogo punuk, at eenik nogo ogobak me pu eerogo mambege mbareegi, aap nogo eenik a'nuk oone warak aret agagerak.

Wakkagagerak 23:4

“An aap alik mendek nggiru wagarak kinenggela'me ninom wonage neegak, nakwe kanggerak me, an nakwe pege, ndi, an mendek kanggwi iinok piigwi, eeko logorak me, kinanggween ambi onggo mbanikit nduk, yo'ninip o.”

Wakkagagerak 3:18

Ndi, nggween pulunogo pigirak yi paga igale inom, iri'ngga-kale'ngga alok warak mendek inom, kat kake wundemenggerak me, kambi-mbiingga ti, iri'ngga-kale'ngga ti aret nengge logomunggun o.

Wakkagagerak 5:5

at Ala nen Aram nogo ogobakkigireegerak wonage kagak lambuk togon tahun sembilan ratus tiga puluh eeke nagagerik, aret kambeegerak.

Ayup 1:21

Alut eeke logonet, “Nagalo inikime nen we nagap mbelanak nda'nagagirak me, Kambunuk, we nagap mbelanak aret nagin o. Kaliku ALA nen wo'nege, Kaliku ALA nen mban wogonake, Eekendak me, Kaliku ALA kendage mban tiyappege logokit o,” yinuk, yoreegerak.

Ayup 10:9

Nggween nggabok paga neebe longgo warogo ogobakkigi'nabeegindak nogo aberu o. Ogobakkigirogo paneegindak aret kwe, ti'nuk, Kena logurogon liirubu kwak eerogo paniyak nduk, Eeke agandik ya?

Ayup 19:26

Nagabolo pili age kagak, neebe Ala nenegen kaagin aret o.

Ayup 21:26

Imbirak ndak-ndak aret nggween me taambiigwi, Imbirak aret anggolenggen inoba nugut-tiyak yogwe, Eeko menggaarak.

Ayup 34:15

Aakumi abok ambugwi aret kanggwi, Iniyokan liirubu aret ari nogwe, Eeko logonetak o.

Ayup 4:19

It inawi nggabok nggween paga wurik me wonogwe, Inawi liirubu paga o eyak kwippunuk wonogwe, Tigit-tigit mbaaniigwi iigak kanggo mengga kwak, Mbet-mbet kanggwi, Eekwi nogo ti, Abunuk eeppiige logogin lek mbake agandik?

Ndawi 104:23

It aakumi yabu eeko menggam nogome eeri wunggwi, It eeko logorak mbakwi nogo eerit nogwe, Eekwi iigak, O kiyoma aret ari nage menggerak o.

Ndawi 104:29

Wogoraga'lek kenete niminik wonage keenok, inaganak wake, Ndi, iniki wagangge keenok, kanggo nagaatik, Liirubu mendek aret me, liirubu aret ogwe, Eeko menggaarak o.

Ndawi 127:2

It aap Aliku ALA iniki kunik eeginake nogo, Nogo yugwi iigak, inambi wogorage menggerak me, Kit kinambi noorak kwaakkologo logonet, O kuubondendok kineenik a'nuk, Yabu ta'liila eekwi tit kiigak, O kiip age kenok, kiname nogo yi unggwogwe ti, We aanom warogo aret eeko monggotak o.

Ndawi 22:15

Niyoowak woloonak telo agan nage menggi kwak, Nomaawi lek ee'nabit unggwage, Namili piyanogo nalelaan paga nabeni lagangge, Togop eeke kagak Aakumi kanggaatak inowak paga mbo panege agandik o.

Ndawi 22:29

It aap ineenggi warak o nggween paga wonogwe yi, Abok aret inambi ndonggorogon nenok kalut eekwi, It aakumi kambak mendek inom, It ineenik ambinom logorak meek mendek inom, Abok aret kabu'me tebe yi unggwogwe, Eeko logogun o.

Ndawi 90:3

Tahun seribu eerit wage nogo ti, o ne ambit weege kwak kage, Ne ambit oonikiya paga tum wako mengga kwak kage, Eeke menggendak me, Kat nen aakumi inagabolo nogo Iniyokan nggween ari nawak nduk yorage logonet, “Aakumi inapuri yi wae. Kiniyokan liirubu ari nanip o,” Yinuk, yorage menggendak o.

Kini Wuppiige 21:16

Aap ambi nen it ineenu logonet eeko menggaarak inaru nogo mbo punuk nomo agan Aakumi kambunuk nogo menggam kuwak eerak wonogwe me, nggelok yi nage menggerak.

Wone Alom Kibingga 1:13

Wonage logonet, yi wone ndi wone alom maloppege, niniki warak paga mbogut abu'me yime eeko menggaarak abok aret liippege, eerikit nduk, niniki mbere lek ambit eeppunuk, eereegirak. Ala nen it aakumi inoba ariyak kooneegerak nogo mondok aaninggin lombok inoba wonage kagagirak.

Wone Alom Kibingga 1:3

Aakumi nen mo andi kagak yabu ligak wuundamo nggwiirit eerit nugwi ti, nano eekkolaawok nduk, eerit nugwi mbakop?

Wone Alom Kibingga 12:7

Ndi, kat keebe liirubu paga eerak me, kiyokan nggween ari nage, Kiniki at nen wokkereegerak iyokan Ala wonageme ari nage, Eeka'lek kagak, At ogobakkigirogo pagareegerak Ala nogo abeke logot o

Wone Alom Kibingga 3:20

It imbirak nggween mendek wogome, imbirak ndak-ndak iniyokan ngggween aret ari nagun o.

Wone Alom Kibingga 5:15

Inagalomini inikime nen we inagap mbelanak aret nda'nogo menggaarak me, nogo logonet kunduk, we togop aret nogo menggaarak. Ndi, nogo logonet, ligak wuundamo eeremenggaarak nogo ambiriluk ambi ineenggime wonok nagun abu lek aret o.

Ndaniyen 12:2

It aakumi apit aago kambemenggaarak nggween me nogo yugwi nogo, ineenik a'nuk mi'narugun o. It ando mondok-mondok ineenik logowak nduk mi'nogwe, ndi, ando perak, inenggali mbakak mondok-mondok yagan wako logowak nduk mi'nogwe, eerugun o.

1 Korindut 15:47

Aap aa'nduk wakkagagerak nogo ti, nggween mendek aret wakkagagerak. Ndi, aap peebi mendek nogo ti, at awi alom mbogut paga nen aret wagagerak.

Epetut 4:28

Kit yogoot waganggo monggotak nogo, ambinom yogoot waagup o. Ata, kineenggi paga nen mban eerogo nunggwi, it aakumi inamendek lek iinok yeenggwaarogwe, eeko logobagip nduk, yabu ambi eeriyak miippunuk, kineenggi omaawi paga eekko'net nogo logonip o.

1 Tetalonika 2:9

Noreewi o. Nit eerit mban nogo logonet, ndeyak eerogo pinaneegerak nogo ti, kiniki abe'nip o. Ala nen yo'niragagerak wone obeelom wone nogo yokkirogo logonet, “Kit mban ambinom aaninggin kinoba pinagukwak,” mba'nuk, nit nen liingge inom, oonikiya inom, eekko'net nogo nogogurak nogo o.

2 Tetalonika 3:10

Ninom logonet, “Aap ambi yabu eeka'lek kenok, mbi magariyak mage o,” yokkirogo nogogurak nogo o.

Iberani 9:27

Nit ne mbere paga kambugun lek o. Ne ambit mban kambuurak koonak me, ne ambit kanggwi niinok, Ala nen ninowak loonigin nogo ndak-ndak