Wakkagagerak 22:17 - Ala Wone Peenok Peebi Mbanak

¹⁷ an nen abet aret nale'nggen nggwok togon oba pege logonet, ombowologwe laaluguragan mbogut paga wonage inom, mbini kale'ngga niyo aa'nggi paga wonage inom, ti pogom abu ngginu-ngginu eerogo wogorigin o. Ombowologwe nda'naremenggaarak nogo nen inawim tebenogo piinok, inawi time aret unde a'nuk logogun o.

Wakkagagerak 22:17 ပူးပေါင်းရင်းမြစ်များ

Wakkagagerak 12:2

Time namenggendak me, Nale'nggen koba pagage logonet, Kat paga nen kanebunu nggwok wigak yuwak nduk eeppagage, Kendage nggwok aruwak nduk tiyappagage, Eeriminggirak paga Aakumi ambik obeelom eeppiige logomunggun o.

Wakkagagerak 13:16

Yoge nagagerik, “Mbini kale'ngga lingginiyak op nen lingginogo kapuri ndaganaburak ti, ndak-ndak wokkirigin, yokkiriyak kwe, lingginiyak meek me, Mbini kale'ngga lingginiyak meek ti kokwak aret wokkirigin o, yinuk, yokkigi o.

Wakkagagerak 15:5

Yo'nuk, at Abaram wonok endekem wundi nage nagagerik, yoge logonet, “Yogondak kat kena mbogut paga ni'nage logomenggendik, laaluguragan mbogut paga wonage ti, keenggi lingginiyak wakket o. Laaluguragan lingginiyak meek ti kwak, kat ndaremenggendak paga togop aret wigak yugun o,” yoreegerak.

Wakkagagerak 17:6

Kat kombowologwe ambik eerogo wokkege, yi aakumi ndi aakumi inanebunu lombok inombo agago pagage, kat paga wiganak nen yi aap ndi aap inendagembogut eerogo piige, eerigin o, yinuk, wone abuk nggaruk togon mbaneegurak nogo aret yokkigi o.”

Wakkagagerak 24:60

at kolaga iriwi nogo nen inale'nggen oba pogo logonet, “Niriluk o. Kat keebe ambit nen aret kwe, Yi aakumi ndi aakumi apit aret kat paga nen wigannarit wundi nogo logogun o. Kat kaagalogwe ndaganabemenggendak wiganak nen, Yi aakumi ndi aakumi inom ogoorak menggaarak inabu'me tebenogo piinok inawi time aret logogun o.”

Wakkagagerak 25:11

Ndi, at Abarakam nogo kangge mbareegi, apuluk Itak nogo niyo nggween kabunik me endage, At Itok Menggerak Nen Enegen Liippaneegim, tooneegwam nogome aret wonage me, at Ala nen ale'nggen oba pege nagagerak.

Wakkagagerak 26:24

Nage nagagerik, oonikiya nogo yege me, at Aliku ALA at owagam wage nagagerik, yoge logonet, “Kat kogoba Abarakam ogoba Ala an aret o. An mondok-mondok karum wonage, ndi, nale'nggen koba pagage logonet, nayeloman Abarakam wone abuk nggaruk togon yoreegirak nogo ndak-ndak kat kapuri-kombowologwe ambik aret wiganogo piige, eerigin me, kagabiti mbarugun o.”

Wakkagagerak 26:4

An nen kat kapuri-kombowologwe ti, laaluguragan mbogut paga ambik wonage ti pogom, ambik agago wokkege, ndi, o yime taganak abok aret it unde eeppunuk logowak nduk, wogorage, eerigin o. At Abarakam nogo nen an wone ari minggirak inom, Yogop ee'nu ndogop ee'nu, wone yugu inom, wone lengganak inom, Yogop eeriyak ndogop eeriyak mage wone yugu inom, mondok liippunuk, yanggonak mban eeke nagagerak me, kit ndak-ndak eekwi paga it yi aakumi ndi aakumi o nggween paga yime menggaarak abok aret inale'nggen mbako logogun o,” yoreegerak.

Wakkagagerak 28:3

Ndi, at Omaawi Lombok Menggerak Ala nogo nen ale'nggen koba pagamenggerak paga kapuri ambik aret ndaganake, kombowologwe ambik aret wigak yogwe, eerit namenggaarak paga kat keebe ti, yi aakumi ndi aakumi inanebunu lombok wiganogo piyaamunggun o.

Wakkagagerak 28:4

Ala nen Abarakam wogoreegim aap nggiru negen wonage menggenom o yi, yogondak kat unde eekkolaanok nduk, at Ala nen Abarakam ale'nggen oba pege nagagerak pogom kat kombowologwe kinom kinoba pinagage logogin o,” yinuk,

Wakkagagerak 32:13

Tamban eeppunuk, nogome nogo yege nagagerik, at aanggumi ando oweeluk Etawu iniki ale'nggen eerogo wogoriyak nduk,

2 Tamuwen 17:11

Togop aret me, kat eeriyak yokkiri o. It aakumi Iterali o Ndan kuli nen nok, o Mberetiyeba kuli, mbini niyo aa'nggi paga menggi kwak menggaarak abok aret kuwak eeppiige logomenggendik, kat nen aret wogoren Ndawut kinom wim namburi nanu o.

1 Endagembogut 4:20

It aakumi Yekura mendek inom, Iterali mendek inom, ineebe lambunik mbini-kale'ngga niyo aa'nggi paga wonage nogo kokwak wonogo logonet, inambi inom, inagi inom, iniki ale'nggen paga nonggo nogogwaarak.

1 Endagembogut 9:26

Aap endagembogut Talomo nen o Erom niyo kole yenggenak Laut Merah aa'nggi paga o Elot koorok kota Etiyon-Nggebet nogome yi yiiro ndi yiiro ogobakkigirogo nigake nagagerak.

1 Mbinineegwaarak 27:23

At Aliku ALA nen, “It Iterali mendek ti, laaluguragan mbogut paga wonage ineenggi lingginiyak meek menggi kwak, arugun o,” yinuk, yereegerak me, at Ndawut nen ineebe eenggi linggininake logonet, ndarak iigak tahun 20 nen ogu nggwe eerak kero, eenggi linggininabulik aret.

2 Mbinineegwaarak 1:9

Togop aret me, o yogondak Kaliku nogoba Ala wae. Aakumi ambik lombok liirubu kwak wonogwe nogo, inowe nendagembogut logokit nduk, mippaneegindak me, wone abuk nggaruk togon koonogo nogoba Ndawut yoreegindak nogo eeke keyaakit nduk, eeru o.

Nekemiya 9:23

It inapuri ti, laaluguragan mbogut paga menggi kwak eerogo piige, inombomini yorage logonet, Unggwi nogo logomonggotik, unde eeppatinuk, logomunggup o, yoragaginom nogome piya wage, eereegindak o.

Wundeegwaarak 32:13

It kayeloman mini Abarakam inom, Itak inom, Yakup inom, kat kendage kumbatinuk, yorage logonet, Kinombowologwe laaluguragan mbogut paga ambik wonage ti kwak wokkirage, ndi, nggween ti nogo kinombowologwe mondok-mondok unde eeppunuk, logowak nduk, wogorage, eerigin o, yinuk, wone abuk nggaruk togon yoragagindak nogo aberu o.”

Yetaya 48:19

It paga wiganak mbini-kale'ngga kwak wigannogwe, Inombowologwe mbini lingginiyak meek kwak ogwe, Inendage lek aga'lek ki lombok wonogwe, An neegak aakumi nen inooka'lek inaani ndegenak wonogwe, Eeko logonetak o,” yinuk, yegerak me yokkiragi o.

Yeremiya 32:22

O nggween mili lombok yilak amburu inom, nggiin amburu inom, niyo eneeri negen kila-kila wungge menggim time wokkiraagin o, yinuk, kumbuk mbanogo inombomini yoragagenom nogo aret wogorage mbareegin,

Yeremiya 33:22

Togop eeriyak meek aret me, an nayeloman Ndawut paga wiganak inom, ndi, it an nenggaanom paga nake eeko menggaarak Lewi mendek inom, laaluguragan mbogut paga wonogwe nogo ineenggi lingginiyak meek kwak, mbini niyo aa'nggi paga wonage nogo wakkoorak meek kwak, it inombowologwe togop aret wiganogo piyaagin o,” yinuk, yegerak o.

Oteya 1:10

Togop aret kwe, mbini niyo aa'nggi paga wonage nogo ambik me, aaninggin wakkogwe, ineenggi lingginggwi, eeriyak meek menggi kwak, it Iterali mendek ineebe togop aret arugun o. Ogo mbaremengga, Kit an napuri lek o, yinuk, yoragagim nogome, It an neenik minggirak Ala napuri aret o, yinuk, yoraagin o.

Oteya 2:1

Togop me, kat nen, Kit Ala apuri o, yinuk, koreewi yorage, ndi, Ala kinabuwa mbaka o, yinuk, kiriwi yorage, eerumunggun o,” yinuk, yoreegerak.

Mika 1:9

It Tamariya mendek inawin nogo obeelom aga'lek it Yekura mendek inoba lenggennari nage, An mendek wonogo menggam o Yerutalem nogome tu unggwi nogo menggam paga muk ari nage, eekerak wonage agaarik o.

Oroma 4:13

At Ala nen, “Kat Abarakam kombowologwe kinom yi awi ndi awi nggween unde arumunggup o,” yinuk, abok yoreegerak nogo ti, Ala nen Muta wone yoreegerak nogo woppunuk, eerit nage paga yoreegerak ti lek o. Ata, at Abarakam Ala abet mbareegerak paga, “Kat obeelom aret keegi o,” yinuk, abok yoreegerak.

Oroma 9:27

At Yetaya nen ari logonet, “It aakumi Iterali mendek ineebe mbini niyo aa'nggi paga menggi kwak wonogwe kwe, Ineebe mbuuluk mban inagap ndarigin o. It aakumi o nggween paga yime wonogwe lek eerogo piyoorak koonogo pugu nogo, At ninogoba nen abera'lek me mondok nggwik togon aret inoorigin me,” yinuk, yereegerak nogo ti, it Iterali aret eeppiyoorak nduk yereegerak o.

1 Korindut 15:57

ineegin tiyak ari menggi kwak, at ninowe Yetut Keritut eereegerak paga nit kambuurak ee'ninake tit kagak ninale'nggen kogo logowok nduk omaawi wo'nirage menggerak me, “Ninogoba Ala wa,” yinuk, at mban alut eeko logowok o.

Epetut 1:3

Ala wonage menggim mbogut paga mendek eeppinaniyak mbake menggerak nogo mendek abok aret, Keritut ninom kumbinaneegerak paga nen eeppinanege me, ninowe Yetut Keritut ogoba Ala mondok alut eeko logowok o.

Pelaareegerak 1:11

At Aliku kinombomini inogoba Ala nen wone abuk nggaruk togon yokkiragagerak nogo ndak-ndak, yogondak kineebe ambinom nda'narit namunggup-namunggup aap ineenggi lingginiyak meek aret eerogo pinagage, at ale'nggen kinoba pinagage, eeke logowak o.

Pelaareegerak 10:22

O maan kit kinombomini ineebe we 70 iluk aret o Metit nogogwaarak kwe, yogondak perak, at Aliku kinogoba Ala nen kineebe laaluguragan mbogut paga wonage ti kokwak agago pinagagerak wonage o,” yinuk, yoragagerak.

Pelaareegerak 13:17

At Aliku kinogoba Ala nen wone, Yogop ee'nu ndogop ee'nu, yereegerak an yogondak mamunggirage yi, kinaruk liirogon konembunuk, nggirik-nggerok porogo logonet, obeelom mban eerit nogwe enegen kiinok, at Aliku ALA anini kani omoonuk negen wungge ti, lek age logomenggerik, kinombomini inom wone abuk nggaruk togon kumbuk mbanogo yoragagerak nogo ndak-ndak aret kit kinabuwa mba'nuk teppinagage, iniki kunik eekkinake, kineebe ambik lombok eerogo pinagage, eerigin me, yi mendek ndi mendek maluk kenok, kani kuniyak nduk, leenogo pugu nogo kineenggime wonage kwaakkiyookwak, ambiriluk ambi woorak abu mage o,” yinuk, yoragagerak.

Pelaareegerak 21:19

agalo-ogoba nen wulaga ti, wonok it inawi kota tu unggwi wogo menggam aap inoweewi wone mbangga wonogwe me taati pi nawak o.

Iberani 11:12

Ndi, aap Abarakam nogo apuluk ndaka'lek me, kambeegerak negen wonagagerak kwe, iniki abet mbareegerak paga ombowologwe laaluguragan mbogut paga wonage kwak, mbini kale'ngga yi aa'nggi paga wonage ineenggi lingginiyak meek kwak, nogo ndak-ndak aap ambit Abarakam paga ombowologwe aret wigannogogwaarak.

Wayu 11:15

Yo'nege mbaki, nenegen wonage me, malayikat 6 inarompet oone eeko mbaka, ambi nogo nen arompet nogo oone eeke mbaki, it mbogut paga time nen inoone nggwok yogo logonet, “O nggween paga time aakumi inabu'me piinok menggam abok aret, at ninogoba inom, at leenogo mippereegerak Keritut inom, imbirak inoone konenggo logowok nduk, inabu'me ari waga o. Ari wogwe iinok, Keritut nogo nen inowe endagembogut logonet, mondok-mondok wone lengganogo yorage logogin o,” yinuk, yogwe iigirak.