Tepaniya 3:19 - Ala Wone Peenok Peebi Mbanak

¹⁹ Ne ti eyom paga it aakumi nen o Tiyon aagalogwe tebenogo piigwi nogo, an nen mi'na'nuk it lek eerogo piige, Iniyok yilugu wonogwe nogo, inagap ndarogo piige, It mappiyareegwaarak aakumi inenggela'me wonogwe nogo, kuwak eerogo piya wage, Eeke logominggirik, Yi o ndi o it o Tiyon aagalogwe inendage maluk eerogo piyareegwam nogome nen inendage tiyappiigwi, inayuk wukwi, Eeko logowak nduk Eerogo piyaagin o.

Tepaniya 3:19 ပူးပေါင်းရင်းမြစ်များ

Yetaya 26:11

Kaliku ALA wae. Maluk onggo aaninggin inoba piyoorak keenggi nippunuk wonage kwe, Inigen keega'lek aret agaarik o. Kapuri alik eekwi iyo, kiniki aganggen kerek togon panggombiinet nage nogo Inigen keego logomenggaarik, inenggali age, Ndi, kani nenet nage menggi kwak, kawim aaninggin inoba piyoorak koonogo pegendak nogo it aret inoba kwi'nage, Eeruwak o.

Yetaya 33:1

Kat aakumi maluk eerogo piiga yi wae. Kat maluk eerogo pagaga'lek iigak, kat nen mban maluk eerogo piinet nage me, kabuwa o. Kat aakumi inambokan lagangga yi wae. Aakumi nen kat kambokan lagangga'lek iigak, kalik nen mban it inambokan lagangge me, kabuwa o. Kat maluk abu aret eerogo piige keenok, it nen kat aret maluk eerogo pagagwi, Ndi, abu aret aakumi inambokan lagangge keenok, it nen kat aret kambokan laganggwi, Eerugun o.

Yetaya 60:14

It aap tebenogo pugwi inapuri nogo abu'me tebe yi unggwogwe, Ndi, it aap meek eerogo pugwi nogo nen inendobanggun yindumbunuk, iyok paga pirik-perek yogwe, Eeko logonet, Aliku ALA agota o, yinuk, yogwi, At Kikak Nakeelik Alik Leenak Iterali inogoba o Tiyon unde o, yinuk, yogwi, Eeko logogun o.

Yetaya 60:18

Aap iniki worokot nen aakumi maluk eeppiinet nugu agaarik o, yinuk, at wonage me time nen yogwe, O maluk eerogo pugwi, o yigirik-noonom eerogo pugwi, eekaarak o, yinuk, anggween paga time nen yogwe, Eekwi nogo ambinom konenggo logogun lek o. At nen, Nayugum pak wurik ti, Nagap Ndaka o, ari, Ndi, Narunggambe ti, Nalut Eeka o, ari, Eeke logogin o.

Yetaya 61:7

Kit kinenggali mbakak nugu nogotak obaane'me ne mbere wogorogo mengga kwak kit an napuri wokkirage, Kinendage maluk agaarak obaane'me eyate wokkiramenggerak paga kinale'nggen age, Eerigin o. Kinanggween paga wonogwe kiigak eyate ne mbere kwak wokkiraagin me, kinale'nggen mondok-mondok eekkinake logogin o.

Yetaya 62:7

O Yerutalem aa'nduk wonagagi kwak eerogo pege, It aakumi yi o ndi o abok aret nen Yerutalem tiyappuwak nduk, eeppege, Eeka'lek kagak, Kurumbi yoga'lek ugun puk logorak mage o.

Yeremiya 30:16

Togop aret kwe, it an napuri inambeme yonggorinakwi nogo aakumi alik nen it inambeme yonggorinakwi, It an napuri wogoren mbo piya nogwe nogo, aakumi alik nen it wogoren mbo piya nogwe, It inamendek kugun waganggwi nogo, it inamendek kugun waganggwi, Ndi, it an napuri ineebe kugun wogoren nogwe nogo, aakumi nen it ineebe kugun wogoren nogwe, Eeruwak nduk, An nen eerogo piyaagin kwe,

Yeremiya 30:19

Ti eeke neenok, inenggela'me nen, Wa! yo'nogo logonet, ndawi wakwi inoone konenggwi, Ndi, inale'nggen nen inoone yogwe konenggwi, Eeko logogun o. It ineebe mbuuluk aga'lek ambik aret wigannaruwak nduk, eerogo piige, It meek eerogo piiga'lek inendage tiyappiigo logowak nduk, eeppiige, Eerigin o.

Yeremiya 31:8

O omarip paga pa'nggwe nen wogoren wage, O nggween irip-irip time nen kuwak eerogo piya wage, Eerigin abet aret mbako logowak o. Kuwak eerogo piinok, inenggela'me nen it inigen mbuk inom, inendop yilugu inom, kumi inabila inom, kumi elege ndaruwok nduk, yagan wakwi inom, It ineebe apit lambunik nggwok aago wogoren iname iniyokan piya woraagin o.

Yeremiya 33:9

Ti eerogo piyaminggirak paga it o kota yime menggaarak nogo nen, yi aakumi ndi aakumi nggween paga wonogwe abok aret an obeelom eerogo piyaminggirak inaruk konenggwi nogo inenggaanom paga iya nombakwi, nendage tiyappanugwi, nayuk wukwi, eekwi iinok, an nale'nggen nggwok aret mbarigin o. O Yerutalem yi, ineebe abu obeelom wonogwe, iniki ugun tayenak wonogwe, eeko logowak nduk, eerogo piige neenok, inogut nanuk, inaganak warigin, yegerak o.

Yeremiya 46:28

At nayeloman Yakup paga wiganak ti, ninom logogin me, inagabiti mbarugwaarik o. Tak-mak eerogo yi aakumi ndi aakumi wonogo menggam inenggela'me It Yakup mendek nappiinet naminggirak logowam nogome ineebe lek eerogo piyaagin kwe, It perak, lek eerogo piyaagin lek o. Eerit nogo nogogwaarak onggo aaninggin inoba piyaagin lek ti lek, eeppiyaagin aret me, Iniki koonnaruwak nduk, eeppiige ti, eekaarak ndak-ndak aret eerogo piige logogin o,” yinuk, Aliku ALA nen aret yegerak me yokkiragi o.

Yetikiyen 16:27

Mi'nage mbareegi, neebi nen neenggi omaawi paga anggween wogoreegirak nogo mbuuluk eerogo pege, inom ogoorak nen, At enggali lek ugun eerit nage yi iya, mbareegwaarak it Pilitin mendek nogo ineenggime piige, eereegirak o.

Yetikiyen 34:16

It lek ogwe iinok, an nen kwaarinake, kobak aago nugwi iinok, wogoren piya wage, inawinde-inobaande aago iinok, nggerembiige, inomaawi lek iinok, inomaawi eerogo piige, eeke logonet kwe, ineeruwak anen pera-pera aago inom, inomaawi ambik wonogwe inom, ti lek eerogo piyaagin o. Nandomba unde wogonake logonet, it inobaabut eekwi ndak-ndak eeppiige logogin o.

Yetikiyen 39:13

It o Iterali time wonogwe abok aret neenggi-keenggi nggween taambiigo logomenggaarak me, an neegin tiyak ari eyom paga it eeremenggaarak ti nogo inendage agan nogo logogun o, yinuk, Naliku Nitok Minggirak an ALA nen aret yagi o.

Yetikiyen 39:26

Eeke neegak, it Iterali ti, it inanggween paga aakumi ambi nen mbaaniiga'lek iniki ugun tayenak obeelom aret wonogo logonet kwe, an yorage nogo liippunuk, eeka'lek mbo paninuk, maluk eerit nogo nogogwaarak paga inenggali arit nugwi nogo, inami eerogo pugun o.

Mika 7:10

“Kit kinogoba Aliku Ala nogo ngge o?” yinuk, yo'nirogogwaarak ninawim nogo nen nit ee'ninake ti, Inigen niigo logomenggaarik, inenggali nen inete wandinik logonet, nogo logogun o. It tebenogo piinok, purok tu paga iniyok amok mbanggo mengga kwak, togop eeppiige iyaagun o.

Takariya 8:23

At Omaawi Lombok Menggerak Aliku ALA nen an yo'nege logonet, “Ne ti eyom paga yi aap ndi aap inanebunu alitak inom, inoone alitak inom, ineebe 10 nen aap Yakuri mendek ambi ayum nggorek ineenggi mondok omaawi pipporogo logonet, Kit Ala kinom wonogwe ninaruk konenggoorak me, kit ninom noorak uugwe mbako ogoorik o, yinuk, yorogo logogun o,” yinuk, an yo'nege, eereegerak ti aret.

Iberani 12:13

kiniyok andi nogo abunuk andi eekkinake kero, obeelom aruwak nduk, tu abe mot-mot yarak paga nogo logonip o.

Wayu 20:9

Iige nagarik, o kobak nonggologo pereegim time aakumi mbini negen togop aret kuwak eeppunuk, it abet mbareegwaarak Ala apuri nogo inookwi, ndi, o kota Ala inikilom mbake menggim nogo lek eerogo pugwi, eeruwok nduk, oo'nggut panggeko mbaka, kani mbogut paga nen wunuk agan wambi wage logonet, aakumi nogo tigitogon nenet nage kagarak.

Owak Loongga 1:7

Mbanogo pogo mbareegwa, at Aroni-Mbetek nen ari logonet, “An nen aap inendagembogut lombok ineebe 70 nogo ineenggi iyagalo imbirak inom, iniyok iyagalo imbirak inom, mbanogo piyareegirak wonogo logonet, nambi nengge neegak, nageyo ndoonak abu'me ameneno wanggetak anebenogo nonggo nogogwaarak nogo ndak-ndak, Ala nen inamee'nggo ee'naki o,” yinuk, ari mbareegi, at eebe o Yerutalem wonok nogogwaarak me, time aret kambeegerak.