Tepaniya 3:13 - Ala Wone Peenok Peebi Mbanak

¹³ It aakumi Iterali mendek eegu yumbunik wonogwe nogo nen maluk eekwi, Inoone pilit pugunggwi, Wone mbanggo logonet, inoone pilit ambi pugunogo yorogwe, Eeko logogun lek aret o. Ndomba iri'ngga nenok, iniki ugun nogo yege menggi kwak, it togop aret eerogo piyaagin me, Aakumi ambi nen mbaaninako logogun lek aret,” yegerak me, yokkiragi o.

Tepaniya 3:13 ပူးပေါင်းရင်းမြစ်များ

2 Mbinineegwaarak 20:30

At Yotapat ogoba Ala nen at Yotapat iniki tayenak ugun logowak nduk, enaagan-ambokan awim wogwe iyo, non mbanogo piyareegerak me, at Yotapat abu'me piinok wonage menggim abolok lek obeelom aret wonagagerak.

Ayup 11:19

Kat nogo yege me, It ambi nen piyakkakwi lek ugun logonok nduk eeppagage, Eeke kenok, Aakumi ambik inale'nggen nen keyage wokkako logogun o.

Ndawi 119:3

It nogo ti, maluk eekulik At eeriyak mbake nogo mban eerit nogo menggaarak o.

Ndawi 120:2

Kaliku ALA wae. Aakumi inoone pilit yo'nugwi, nambokan laganggwi, Eekwi me nili yu o.

Ndawi 120:3

Kit aap pilit yaga yi wae. Aliku ALA nen aaninggin nano mendek eeppinagage, Ti eeppinagage logonet, ngge mendek inom eeppinagage, Eerigin mbakop? Lek o.

Ndawi 23:2

Iri'ngga mili wonage me wimbanege, Wo'neren niyo yenggenak abolok lek me pani nage,

Yetaya 17:2

Ndi, o Tiriya kota-kota mondok-mondok mbo punuk, mbaganggwi iigak, Kambin-ndomba ye mbambunuk, time windak wonogo logogun me, ndinduk yuwak nduk, Aap ambi nen mbaaniigo logogun mondok lek aret o.

Yetaya 35:8

O time tu nggwok wonage logogin me, tu endage, “Aap Iniki Kikak Naka'lek Nogo Menggam,” yogo logogun o. It aakumi inabin koorak lek maluk eeko menggaarak kenok, tu ti paga nogo logogun lek o. Ata, it tu ti paga noorak uugwe mbakwi kenok mban nogwe, It aap iniki yuundurak kwe, tu kin aret me, kobak aga'lek nogwe, Eeko logogun o.

Yetaya 54:14

Obeelom mban eerit namenggerak paga nu'lek eerogo patigin o. It tebenogo puurak nda wonogwe me, agabiti mbarigin lek o. Iniki a'nggan woorak nda lombok wonogwe me, ka woraagun lek mban.

Yetaya 6:13

O time aap ineebe 10 inooko logonet, ambiret teppegak eeremenggaarak nogo, Ambokan unggwogo logonet, inoorogo piinet nogo logogun kwe, Eyo win inom, eyo teno inom, muurogo pegaatak kwe, andokon wonage menggi kwak, Aakumi alik leenak yumbunik nogo paga nen inagarip wundigin o,” yinuk, yo'nege kagarak o.

Yetaya 60:21

Ti ari nage kenok, aagalogwe abok aret iniki abe koonak ogwe, Ndi, nggween ti nogo, unde eeppatinuk mondok-mondok wonogwe, Eeko logogun o. An abu tiyanak, Wi! nugwi nogo aakumi inigen neego logowak nduk, neenggi lombok paga nen agarip ambi luurogo yareegirak it aret me,

Yetaya 63:8

At Aliku ALA nen, “It ti, an napuri abet aret o. It an napuri aret me, nenggali aruwak nduk, eerugun lek o,” yinuk, ari nagagerik, Inagap Ndaka aret agagerak.

Yetaya 65:10

It an napuri mu'neren nugu logorak mbakwi nogo inake o Taron ti, Kambin-ndomba iri'ngga mbanogo nenet nugu logowam aret age, O Aaninggin Eeppiiga Kobappaga time tapi-lembu windak logowam aret age, Eerigin o.

Yeremiya 23:4

Nandomba obeelom ndegeninako logowak nduk, aap ndegeninaka alik ambi mippiyaminggirak abe ndegeninakwi paga inagabiti mbakwi, inogut nggigik ari, ambit-ambi kobak age, eerugun lek,” yegerak o.

Yeremiya 30:10

“Togop me, nayeloman Yakup paga ndarak ti, inagabiti mbakwi, Iterali paga wiganak ti, inaganak wakwi, Eerugwaarik o,” yinuk, Aliku ALA nen aret yegerak me, yokkiragi o. At Aliku ALA nen ari logonet, “It o nda wonogwe me nen inagap ndake, It Yakup paga wiganak mbo piya nogogwam nen wogoren wundi wage, Eerigin o. It Yakup mendek aa'nduk o abolok lek kagak iniki ugun tayenak wonogogwa kwak togop aret logogun o. Op wonogwe me, it ambi nen iniki ma'naruwak nduk, eeppiyaagun lek o.

Yeremiya 31:33

“Ti eyom abu aret age kenok, it Iterali paga wiganak wone ngget mendek ninom koonogo puurak nogo yi aret. Eeko logorak yoragagirak nogo inikime nabenogo piige, Inikime liiru negen mbanogo piige, Eerigin me, An nen it inogoba age, ndi, it nen an napuri ogwe, Eerugun o.

Yetikiyen 39:26

Eeke neegak, it Iterali ti, it inanggween paga aakumi ambi nen mbaaniiga'lek iniki ugun tayenak obeelom aret wonogo logonet kwe, an yorage nogo liippunuk, eeka'lek mbo paninuk, maluk eerit nogo nogogwaarak paga inenggali arit nugwi nogo, inami eerogo pugun o.

Yowen 3:17

Aliku ALA nen ari logonet, Togop eeke neenok, it nen Naliku inogoba Ala an nogo, nabuut alik leenak Tiyon paga minggirak ineenu arugun o. Ndi, Yerutalem ti, o abu alik leenak lombok arigin me, It aakumi inambik nen o time ambinom tebenggola wogo logogun mondok lek aret o.

Yowen 3:21

Ndi, it nen maluk eeppiigo nogogwaarak an onggo eeppiiga'lek nogo, ti eyom paga eeppiige logogin o, yinuk, yegerak me, yokkiragi o. Aliku ALA ti, o Tiyon mondok-mondok logogin o, yinuk, wone yoragagerak ti aret.

Ala Unde 26:6

Inale'nggen paga iname ugun obeelom logowak nduk, eeppiyaagin me, inagabiti mbaka'lek iniki ugun nogo yugun o. Ndi, ta'ngge anini warak mendek iname nen mugogo nappege, inom wim mbanak nogo wogwe iyo non mbanogo piige, eeke neegak,

Mika 4:4

Inalitik-inalitak inageyo anggur alome kwi'ndak wonogwe, Inageyo wuli alome iniki ugun tayenak wonogwe, Eekwi iigak, “Aap ambi nen inogut nggigik yuwak nduk, eeppiyaagin lek aret o,” yinuk, At Omaawi Lombok Menggerak Aliku ALA nen aret yegerak me, yagi o.

Mika 4:7

It inendop yilugu negen eegu yumbunik wonogwe nogo, inendop abe awi wiganggo logowak nduk, eerogo piige, Ndi, it aakumi wumbiyareegwaarak nogo, inanebunu wakaa'ngget lombok logowak nduk, eerogo piige, Eeke logominggirik, Naliku an ALA nen aret puut Tiyon paga logonet, inowe nendagembogut a'nuk, Ne ti paga nen nok, mondok-mondok wone lengganogo yorage logogin o.

Mika 7:14

Kaliku ALA wae. Keyate negen kapuri kiniki kundugu ndomba kuwak aago kwak logonet, Eyonggaame iri'ngga abu mili nenet nugu menggam wonogwe nogo, yawi paga teeriren nege logot o. O aa'nduk togon iri'ngga mbanogo nenet nogo nogogwam O Mbatiyan paga, o Nggileyat paga, nenet nugu logowak nduk, teppiyet o.

Tepaniya 2:7

Kit monggo'nom time aap Yekura paga wiganak eegu yumbunik nogo, unde eeppatinuk wonogo logonet, Inaanggumi kambin-ndomba inagari'ngga mbanogo nonggo logowak nduk, time piigwi, Ndi, oonikiya paga it Atekelon mendek inawi wurik me time inanogo yikkologwe, Eekwi iigak, At Aliku inogoba Ala nen ineebe liirogon aret ndegeninake, Aa'nduk wonogogwa kwak eerogo piige, Eerigin o.

Tepaniya 3:5

Aliku ALA at enggela'me wonage logonet, maluk ambi eeppiigeelik obeelom mban eeppiige, At puk aga'lek ko'lu-kii'me o kubondendok nen inawone amburu mbanogo punuk, a'me nggelok mban eeppiige, Eeke menggerak kwe, It aap maluk eeka iniki nggolawe nogo, inenggali mbaka'lek maluk mban eerit nugu menggaarak o.

Takariya 8:12

“Anggen yaremenggaarak nogo abe lagangge, eyo anggur nogo anggen abe yege, inanggween amburu eerogo pemenggerak paga anggen abe mbanggologwe, mbogut paga nen mayu wuppi wage, eeruwak nduk, eeppiyaagin o. Yi mendek ndi mendek abok aret ti, an napuri eegu yumbunik yi, ineyate kwak unde logowak nduk, eeppiyaagin o.

Takariya 8:16

Togop aret me, it eeko logorak nogo yi aret. It-it wone pilit lek abet mendek mban yogwe, inowak loonggo menggam inowak loonggo logonet, eekaatak a'me nggelok mban eeppiigwi, Wone ti abu liirogon yaga o, yinuk, yuwak nduk, eeppiigwi, eeko logowak o.

Takariya 8:3

At Aliku ALA nen an yo'nege logonet, “An niyokan o Tiyon wage logominggirik, o kota Yerutalem enggela'me time aret logogin o. Time wonage neegak, o Yerutalem endage ti, Kota Liirogon Eeka o, yogwe, ndi, Nomaawi Lombok Minggirak Naliku ALA nabuut nogo endage, Puut Alik Leenak o, yogwe, eeko logogun o,” yinuk, yo'nege,

Matiyut 13:41

An aap aret nda'nagagirak nogo nen it malayikat nogo nappiya wage neenok, wogo logomenggaarik, it Ala abu'me piige menggim logonet, aakumi maluk eeruwak nduk, inikime manabit nogo menggaarak ineebe inom, yi aap ndi aap maluk eeko menggaarak ineebe inom, kuwak eerogo

Yaya 1:47

Yoge mbareegi, Yetut nen aap Natanayen at owagam wage enegen kage nagagerik, at abok ari logonet, “Aap Iterali mondok abe oone mbere ariilik yi kaanip o.”

Kolote 3:9

Nit niniki ngget ogobakkigika Ala nogo nen, at eeke menggerak kineenu arubagip nduk, at iniki pogom kit kiniki ngget ogobakkigirogo pinagage kagak, kit kinobaabut maan mendek paga maluk eeko nogogutak nogo, nggonenogo mbo punuk, kinobaabut ngget mendek eekkologogutak me, kit-kit aret pilit pugunggwi ti mage o.

1 Peterut 3:14

Togop eekulik kwe, kit obeelom wone yoranet nugwi kiigak andi-pandi eerogo pinagagwi iinok, “Nonggop nduk eeppinanugwi?” yinuk, kinagabiti nen kiniki piirik eerugup o. Ata, “Ala ale'nggen ninoba pinanigin o,” yinuk, kiniki ale'nggen paga waganggo logonip o.

1 Yaya 5:18

Aap ambi Ala nen ndareegerak kenok, at maluk eerit nageelik ti, nineenu aret o. Ala aput Yetut nen aap ti, liirogon aret porogo menggerak me, at maluk eeka nogo nen aap ti, maluk eeppuurak mondok meek aret o.

Wayu 14:5

It nogo pilit wone ambi abu yogolik me, maluk ambi inoba mondok lek aret iigirak o.

Wayu 21:27

Ndi, it maluk inikime porogo wonogwe, maluk peyak wurik kagak ugun eerit nugwi, pilit pugunggwi, eeko menggaarak nogo kenok perak, unggwi nogwe iyoolik o. Ata, it aakumi ineenik mondok-mondok aganaburak inendage mbuku paga liiru mbanak Ndomba Aagaluk porogo wonage kenok mban unggwi nogwe iigirak o.

Wayu 21:8

it Ala wone mugurok noorak inagabiti mbaka inom, abet mbariyak ineebi mbaka inom, maluk peyak wurik kagak ugun eerit nega inom, aakumi inooka inom, kumi ugun wurinaka inom, magagirak iyagalo inom, kugiwak amili kungga inom, pilit pugungga inom, it abok aret it logowam pipuk eerogo pereegim kani omoonuk wunuk mban ari menggim nogome mbo nappiyaagin o. Aa'nduk ineenik logonuk, kambemenggaarak kwe, kani omoonu'me nappiyoorak nogo ti, peebi ne ambi kanggwi nogo kokwak aret o,” yinuk, yo'nege kagarak.