Takariya 9:16 - Ala Wone Peenok Peebi Mbanak

¹⁶ Aap ndomba ndegeninaka nen andomba ndegeninake menggi kwak, ne ti paga at Aliku inogoba Ala nen apuri inagap ndarigin o. Nggare-nggare yugum abinak mendek nabenak kere'li-kere'lo eeke menggi kwak, It at apuri Aliku ALA anggween paga logonet, togop aago aret logogun o.

Takariya 9:16 ပူးပေါင်းရင်းမြစ်များ

Ndawi 100:3

At Aliku ti, Ala aret me, kineenu a'nip o. At nen aret nineebe ogobakkigirogo pinaneegerak me, Nit at mendek aret ogoorik o. Ndomba ndegeninako mengga kwak, Ndegenninake menggerak at apuri nit aret o.

Wundeegwaarak 28:21

Yugum 12 koonogo pemenggaarak ti paga aap Iterali apuri 12 nogo inendage ambitak mban cap negen eerogo inendage ayo waganogo puwak o.

Wundeegwaarak 28:9

Pugwi iinok, yugum pugagi negen pindan-pindan eeke menggerak kiritoperat mbere wagangge logomenggendik, at Iterali apuri nda'nogogwaarak nogo ndak-ndak yugum ambi paga inendage 6 ayo waganogo pege, ndi, yugum ore nogo paga inendage 6 ayo waganogo pege, eerumunggun o.

Yetaya 40:10

At Aliku Itok Menggerak ALA ayuk warak logonet wage, At eenggi omaawi paga tebenogo piinet wage, It eeppiyoorak nduk liirit-laarit eeke nagagerak nogo inom wage, At ale'nggen kaakit nduk, eeppiige nagagerak nogo inom a'nuk wage, Eeke yi, kaanip o.

Yetaya 54:12

At arum nggayo logorak nogo, yugum maa'ngga kunik yatipit paga wuke, Arungga ti, yugum kere'li-kere'lo aago paga mbangge, Awi kobat ti, yugum onggo nggwok mendek paga nabenit lagangge, Eerigin o.

Yetaya 60:14

It aap tebenogo pugwi inapuri nogo abu'me tebe yi unggwogwe, Ndi, it aap meek eerogo pugwi nogo nen inendobanggun yindumbunuk, iyok paga pirik-perek yogwe, Eeko logonet, Aliku ALA agota o, yinuk, yogwi, At Kikak Nakeelik Alik Leenak Iterali inogoba o Tiyon unde o, yinuk, yogwi, Eeko logogun o.

Yetaya 60:3

Yi aakumi ndi aakumi abok aret pelen-pelen ka wogwe, At eya abinak lan agan lagangge kenok, yi aap ndi aap inendagembogut owagam wogwe, Eeko logogun o.

Yetaya 62:3

Yanggwi eeruwak mendaarak yirik lan ari menggi kwak keebe Aliku ALA eenggime wonage, Aap endagembogut enggare-nggare iniki kundugu menggi kwak, keebe kogoba Ala eenggi paga wonage, Eerak logomunggun o.

Yeremiya 23:3

Aliku ALA nen ari logonet, “Nandomba yi awi ndi awi wumbiyareegirak eegu yumbunik nogo an lombok nen kuwak eerogo inagari'ngga mbanogo nenet nogo nogogwam piya woraminggirak time wonogo logonet, inaagalogwe ambik aret ndaganakwi, ineebe apit aret wigannogwe, eeko logogun o.

Yeremiya 31:10

Togop me, it yi aakumi ndi aakumi Naliku ALA nen wone yorage yi, inaruk konenggwi, It aakumi o nda niyo aa'nggi paga wonogwe ti, apit aret yoranet nogwe, Eeko logorak nogo yi aret. At it Iterali mak eerogo piyareegerak nogo nen aret kuwak eerogo piya wage, Aap ndomba ndegeninaka kwak at apuri inarum wake, Eeke logogin ti aret.

Yeremiya 31:11

Naliku ALA nen it aakumi Yakup mendek nogo inonggo mbanogo piige, It aakumi mondok inomaawi wonogwe ineenggime nen wondet eerogo piige, Eerigin me,

Yetikiyen 34:11

Togop aret me, Aliku Itok Menggerak ALA nen yegerak nogo yi aret. “An nalik nen abet aret nandomba kwaarinake logominggirik, unde wogonake logogin o.

Yetikiyen 34:12

Aap ndomba ndegeninaka ambi nen andomba ndegeninake me, andomba ma'nogwe iinok, mbo piigeelik kwaarinabit nage menggi kwak, an nandomba togop aret kwaarinabit nagin o. Ndi, o tit narogo pege, o yumaak eerogo pege, eeke paga ma'narit namenggaarak wonogwe me nen inagap ndarogo wogoren piya woraagin o.

Yetikiyen 34:31

Ndomba nagari'ngga mbanogo nenet nugwi ti, nandomba kwak it napuri aret, ndi, it inogoba Ala ti, an aret agarik o,” yinuk, Aliku Itok Menggerak ALA nen aret yegerak me, yokkiragi o, yoragagirak.

Mika 5:4

At eebe paga iniki ugun tayenak nu'lek aganaka aret logogin o. It aakumi o Atiyut mendek nen nit ninanggween tebenggola unggwogwe, Ninobak wurik nogo langgunogo punuk, unggwi wogwe, Eeruwok nduk, eekwi iinok, Ndomba ndegeninako mengga kwak ninoweewi ineebe 7 ilik, 8 a, pilak yogo logonet, inoba kwi'naruwak nduk, mippiyaagun o.

Mika 7:14

Kaliku ALA wae. Keyate negen kapuri kiniki kundugu ndomba kuwak aago kwak logonet, Eyonggaame iri'ngga abu mili nenet nugu menggam wonogwe nogo, yawi paga teeriren nege logot o. O aa'nduk togon iri'ngga mbanogo nenet nogo nogogwam O Mbatiyan paga, o Nggileyat paga, nenet nugu logowak nduk, teppiyet o.

Tepaniya 3:20

Ne ti eyom paga an nen kuwak eerogo piige, Ne ti eyom paga iname piya wage, Eerigin o. Ndi, inigen iigak, aa'nduk inale'nggen paga wonogogwaarak kwak eerogo piige neenok, It yi aakumi ndi aakumi o nggween paga wonogwe yi abok aret inendage tiyappiigwi, inayuk wukwi, Eeko logogun o,” yinuk, yegerak me, yokkiragi o, yoragagerak.

Agayi 2:23

At Omaawi Lombok Menggerak Aliku ALA nen ari logonet, Ne ti eyom paga an Naliku ALA nen at Teyaletiyen aput an nayeloman Terubaben nogo, nobaane'me wone lengganogo yorage logowak nduk, leenogo piminggirak me, amburu cap eekak aap endagembogut eenggi oolo paga yirik menggi kwak, an namberaarenggen negen at eenggi paga yippigin o, yinuk, Nomaawi Lombok Minggirak Naliku an ALA nen aret yagarak me yoru o, yinuk, yegerak me, yokkigi o,” yoreegerak.

Takariya 10:6

It Yekura paga wiganak mendek nogo inomaawi eeppiige, It aap Yutup paga wiganak mendek inagap ndarogo piige, Eerogo piige logominggirik, Inabuwa nen wogoren iniyokan iname piya woraagin o. Piya wage logominggirik, Naliku inogoba Ala an aret a'nuk, wonage logogin o. Ndi, an mbo piyareegirak kwe, mbo piyoolik negen eerogo piyaagin me, It nggino yo'nugwi iinok, inoone konengge logogin o.

Takariya 8:23

At Omaawi Lombok Menggerak Aliku ALA nen an yo'nege logonet, “Ne ti eyom paga yi aap ndi aap inanebunu alitak inom, inoone alitak inom, ineebe 10 nen aap Yakuri mendek ambi ayum nggorek ineenggi mondok omaawi pipporogo logonet, Kit Ala kinom wonogwe ninaruk konenggoorak me, kit ninom noorak uugwe mbako ogoorik o, yinuk, yorogo logogun o,” yinuk, an yo'nege, eereegerak ti aret.

Lukat 12:32

Yorage nagagerik, at Yetut nen, “Nandombalogwe wae! Ala nen kit at abu'me pinagarak inikilom mbareegerak me, kinagabiti mbarugup o.

Yaya 10:27

An nandomba ti, an noone konenggo menggaarak. An nen it neenu minggirak me, it nen an mu'neren wogo menggaarak.