Takariya 7:11 - Ala Wone Peenok Peebi Mbanak

¹¹ Yoragagirak kwe, wone ti, liippunuk nineebi mbakwi, inogogumbuk logonet, wone ti, inambokan mbo punuk, inaruk nakkologwe, eereegwaarak o.

Takariya 7:11 ပူးပေါင်းရင်းမြစ်များ

2 Mbinineegwaarak 33:10

At Aliku ALA nen aap Manate inom, aakumi at abu'me menggaarak inom, wone yoragagerak kwe, liippega'lek mbareegwa,

Nekemiya 9:17

Koneniyak nineebi o, yinuk, it inenggela'me iya tit eeke nagagindak nogo mari eerogo mbo pugwi, ndi, inanobak yugum pogom a'nuk, Ala nen yo'nirage logorak nineebi o, yinuk, O Metit niniyokan nanuk, aakumi inayeloman ari noorak wo'niren nawak nduk, aap ambi mippuwok o, yinuk, yogwe, eereegwaarak kwe, kat Ala nen, Inomaluk nogo mbo nappikit lak, ao, mbake, kiniki yanggorogon teppiige, inabuwa mbake, kaan aganggenggwi lek yungguppunuk eeppiige, kat kiniki kunik aganake nogo, nggaruk yaga'lek kunik aret wonage, eeke menggendak me, it mbo piyoolik o.

Nekemiya 9:26

Kat togop aret eeppiige keegak kwe, inogogumbuk a'nuk, koone yorage nogo, Eeriyak nineebi o, yinuk, eeko logorak wone lengganogo yorage nagagindak nogo inambokan mbo punuk, it yungguninuk kowagam woraawak nduk, koone yoraga nen yorogo nogogwaarak nogo inookwi, ndi, kat meek eerogo pagarak meek aret kwe, mondok iya tit miyuk-meya eerogo pagagwi, eeko mbareegwa,

Nekemiya 9:29

Eeko logorak wone lengganogo yorage nagagindak mbo pereegwaarak nogo, yungguninuk mugurok nawak nduk, kurumbi yorage keegak kwe, iniki wogoppako logonet, Yogop ee'nu ndogop ee'nu, yoragagindak nogo, Eeriyak nineebi o, yinuk, yogwe, ndi, eeko logorak wone nogo eekwi iinok, ineenik logorak op kwe, taganogo punuk, maluk eerit nogwe, inanobak yugum pogom a'nuk, koone koneniyak, Nineebi o, yinuk, inogogumbuk logonet, inambokan mbo pagagwi, eereegwaarak wonogwe iigak,

Wundeegwaarak 10:3

Nappege mbareegi, Muta Karun imbirak Pirawun owagam nogo nogogwaarik, at yogo logonet, “Aakumi Iberani inogoba Aliku Ala nen ari logonet, At Pirawun wogoppake logonet, eewa yaga'lek ti, ne mande logonuk, an nabu'me iniki tebeppatinuk logogin o? An napuri aakumi Iterali mendek ti, nalut eeri nawak nduk teppiyaawak o.

Yetaya 46:12

Togop me, kit aap, An mban iya, mbarit nega yi wae. Kit an noone yugu eeka'lek monggotak yi wae. An yokkirage kinaruk konenggo logonip o.

Yetaya 6:10

Ndi, it aakumi ti, inigen kogwe, inaruk konenggwi, iniki liippatinuk yunggup-melak eekwi, Eekwi iinok, An nen obeelom eeginake neyo, inogogumbuk ogwe, Inaruk logu kwak ogwe, inigen mbuk kwak ogwe, Eeruwak nduk eeppiya nage, Eeru o.”

Yetaya 65:12

An nen wiirage neegak kwe, it nen onggo ambi yo'nugwi, Noone yorage neegak kwe, inaruk konenggwi, Eeka'lek logonet, An nenggaanom paga maluk mban eerit nugwi, An neebi mbake minggirak nogo aret inikilom mba'nuk eerit nugwi, Eeko nogogwaarak nogo paga Wooluwak nen ineebe nawak nduk koonogo pigin me, Inuut yinduk-wanduk aago iigak, inoorugun o,” yinuk, yegerak me, yokkiragi o.

Yeremiya 11:10

An yorage nagagirak nogo inombomini nen, Eeriyak, nineebi o, yinuk, mbo punuk, maluk eerit nugu nogogwaarak nogo aret mugurok nogwe, an wonage neegak kwe, kugi mugurok nogo logonet, ayuk wukwi, eeko agaarik o. It Iterali paga wiganak inom, it Yekura paga wiganak inom, nen wone eeko logorak inombomini ninom koonogo pereegirak nogo piinogo mbo pereegwaarak me,

Yeremiya 13:10

It aakumi inobaabut maluk logonet, noone konembunuk, eeriyak ineebi mbakwi, inogogumbuk logonet, it eeriyak mbakwi mban mugurok nogwe, an wonage neegak, kugi mugurok nogo logonet, ayuk wukwi, alut eekwi, eeko menggaarak nogo ti, kobee'le nibik yegerak ambi eeriyak meek ti pogom aret wonogwe me,

Yeremiya 17:23

inaruk konenggwi, liippugwi, eeka'lek tagambunuk inanobak yugum pogom logonet, noone konenggwi, iniki koonnaruwak nduk, yorage nogo waganggwi, eeka'lek mbo pereegwaarak o,” yinuk, yegerak o.

Yeremiya 17:27

an wone yoragagirak konembunuk nogo 6 yippunuk ko'lu paga alik leenogo pugwi lek, ne 7 ti paga inamendek luurik-maarak aago wonok o Yerutalem tu unggwi wogo menggam unggwi wogwe iinok, o Yerutalem tu unggwogo menggam time kani noguk yuurak lek mendek wuninogo piminggirak paga, aap inendagembogut inawi nggwok abe wurik abok aret kani pup eerogo nengge logogin, yegerak, yoret o,” yinuk, yo'negerak me, yokkiragi o.

Yeremiya 19:15

“At Omaawi Lombok Menggerak Iterali inogoba Aliku ALA nen yegerak nogo yi aret. It o kota yime menggaarak inom, o Yerutalem enaagan-ambokan yaga'lelo-yaga'lelo wonogwe inom, inanobak yugum pogom kumbunuk iigak, yorage nagarak nogo, Koneniyak nineebi o, yinuk, yagaarak me, aaninggin-paaninggin inoba piyoorak yoragarak nogo abok aret inoba kwippiigak eeke logogin, yegerak me, yokkiragi o,” yinuk, yoragagerak.

Yeremiya 35:15

Kulinik-kalinik an yorage neegak yoraga nayeloman mini nogo, nappiya wagak eeke neenok, At Ala wonage kagak kinagugiwak ayuk wuppunuk mugurok noorak mage o. Kit maluk eerit nugwi nogo mbo punuk, kiniyokan wogwe, kinobaabut alik ngget mendek eekkologwe, eekwi kiinok, Aliku ALA nen kit inom, kinombomini inom, nggween wokkiragagim nogome aret logomunggup o, yinuk, yoragak mban eeko nogogwaarak kwe, it nen an noone liippugwi, inaruk konenggwi, eeka'lek aret agaarik o.

Yeremiya 36:31

Ndi, at inom, at paga wiganak inom, at ake eeko menggaarak inom, maluk eekwi paga aaninggin mondok nggwik togon inoba piige logonet, it o Yerutalem menggaarak inom, it aakumi Yekura wonogwe me inom, an ari inaruk konenggo logolik me, aaninggin-paaninggin inoba kwippiinet noorak yoragagirak nogo aret inoba kwippiyaagin, yegerak, yori nak o,” yinuk, yoreegerak.

Yeremiya 42:21

At kinogoba Aliku Ala nen, “Yoret,” yo'negerak abok aret an yogondak yokkiragarak kwe, “Eeriyak, nineebi,” mbakotak me,

Yeremiya 44:16

“At Aliku ALA yegerak me, yokkiragi o, yinuk, yo'nirage nogo, nit ninaruk konenggo logogun lek aret o.

Yeremiya 5:21

It inigen wonage kwe, inigen kaga'lek wonogwe, Ndi, inaruk wonage kwe, inaruk konengga'lek wonogwe, Eekwi iniki lek wi-wa ti, Wone inaruk konenggo logorak nogo yi aret.

Yeremiya 5:3

Kaliku nogoba ALA o! It aap iniki abu koonak logonet, li'lak eeko menggaarak nogo kenegen pegiinet nage menggendak nogo lek a? Yawi paga inookendak kwe, it nen andi kogwe, Aan lebenogo piigendak kwe, iniki koonnage, Eeka'lek aret agaarik o. It inanobak yugum pogom eeppatinuk, “Ninomaluk mbo puurak, Nineebi,” mba'nuk agaarik o.

Yeremiya 7:24

it nen an noone inaruk konenggwi, liirogon eekwi, eerulik inogogumbuk logonet, maluk eeriyak iniki koonggwi nogo mban mugurok nogo nogogwaarak me, an ari nogo inengga loolo punuk, mugurok naga'lek inambokan yungguninuk nogo nogogwaarak.

Yeremiya 7:26

an yorage nogo inaruk konenggwi, iniki liippugwi, eeka'lek inogogumbuk logonet, inombomini maluk eeko nogogwa kwak lek it yogondak wonogwe yi, abunuk nggwok lombok eeko menggaarak,” yegerak me, yokkiragi o.

Yeremiya 8:5

Eeko menggaarak kagak, it aakumi yi, nonggop nduk tu nomo agan mban nogwe, It Yerutalem wonogwe nogo nonggop nduk nomoninuk nogwe, Eeko agaarik mbakop? Aakumi inambokan lagangga kagak mugurok nogo logonet, iniyokan woroorak ineebi mbako menggaarak.

Yetikiyen 14:5

Ti eerigin nogo ti, it aakumi Iterali mendek nen yi kugi ndi kugi ambik mugurok nogo logonet, an mbo paneegwaarak nogo, iniki yungguk togon nowagam woraawak nduk, eerigin o.

Yetikiyen 3:7

it Iterali mendek wonogwe me, nappagage me, kat koone yorage koneniyak ineebi mbarugun o. It Iterali mendek abok aret iniki omaawi inanobak yugum pogom wonogwe me, an noone koneniyak ineebi mbakwi ndak-ndak, kat koone kunduk, koneniyak ineebi mbarugun o.

Yetikiyen 5:6

yi aakumi ndi aakumi inom, yi o ndi o wonogwe inom, at eraanu wanggerak wonogwe nogo ti, an noone yugu kunduk, wone lengganogo yorage nagagirak kunduk, Eeko logorak nineebi o, yinuk, mbo pereegwaarak nogo ti, iya negen kwe, at Yerutalem ti, maluk eerit nage logonet, mbo pereegerak ti perak, mondok iya lombok aret o. Noone yugu nogo mbo pege, wone lengganogo yorage nagagirak nogo mugurok naga'lek taganogo pugwi, eereegwaarak o,” yinuk, an yo'nege kagagirak.

Ndaniyen 9:5

Nit maluk aret eekwi, koone taganogo pugwi, eekoorak o. Nit abu maluk aret eekwi, Koone ari eeriyak nineebi o, yogwe, eeko logonet, wone, Yogop ee'nu ndogop ee'nu, yo'niragagindak inom, wone lengganogo yo'niragagindak inom, taganogo mbo pogoorak o.

Oteya 4:16

It Iterali ti, tapi ndugum anobak yugum kwak wonogwe me, Ndomba aagalogwe kwak iri'ngga abe nenet nugu logowam time Naliku ALA nen nonggop togon piyoorak. Lek aret o.

Tepaniya 3:2

At Ala nen aruk wake nogo liirogon konengge, Wone yoge nogo, E o, yinuk, wagangge, Aliku ALA paga iniki panggombege, At ogoba Ala owagam wa'nuk yoge, Eeka'lek aret menggerak o.

Takariya 1:4

It aap an Ala nen yorage neegak yoraga nen aa'nduk togon it kombomini yorogo logonet, At Omaawi Lombok Menggerak Aliku ALA nen, Ineraambe maluk menggaarak inom, maluk eerit nugu menggaarak inom, mbo punuk, an mu'neren woraawak, yegerak o, yinuk, yorogo nogogwaarak kwe, it nen an noone inaruk konenggwi, liippugwi, eeriyak ineebi mbako nogogwa kwak, it togop eeko logogwaarik o, yinuk, Naliku ALA nen aret yagi o.

Nappiigak 7:51

Kinogogumbuk kiniki omaawi logonet, Ala oone konengga'lek kit aret. Kinombomini Ala oone taganggo nogogwa kwak, Aberiniki oone taganggwi kit aret o.

Nappiigak 7:57

Yorage mbareegi, it nogo nen inoone nggwok aret ya-mba yogo logonet, inaruk nakko'nok, abok aret kok piga nogo nogogwaarik,

Iberani 12:25

at nen wone yokkirage nogo konembunuk, mbo pugup o. Liirogon aret porogo logonip o. At nggween paga logonet, Ala nen eeriyak mbareegerak nogo yorage mbareegi, “Nineebi o,” yinuk, mbo pogo mbareegwa, Ala nen teppiyoolik mondok inooreegerak me, yogondak at mbogut paga wonage nogo nen wone yo'nirage nogo mbo pugwi niinok, nit teppinanigin mbakop? Lek o. Mondok ninoorigin aret o.