Takariya 14:4 - Ala Wone Peenok Peebi Mbanak

⁴ Ne ti paga at iyok o Yerutalem oonegen wundi wage menggim pa'nggwe puut Tayitun paga pi wambi wage kagak, puut Tayitun ti, oonegen wundi wage menggim pa'nggwe nen nok, oonegen kilu yi nage menggim pa'nggwe nggoguk ari mbaremenggi, puut peenok nggaganak langgo narok o omarip paga pa'nggwe ari nage, peenok nggaganak nogo langgo narok o ame pa'nggwe ari nage, eeke kagak, oolo time kobak kole aret nonggologo pigin o.

Takariya 14:4 ပူးပေါင်းရင်းမြစ်များ

2 Tamuwen 15:30

Ndi, at Ndawut nogo iyok ogut nggoorogo pege, ayum anobak paga nobakkolage, ee'nuk, le agan puut Tayitun lagi nage mbareegi, it aakumi inom nogwe nogo kunduk, abok aret togop mban inayum inanobak paga nobappunuk, le agan lagi nogogwaarak.

Yetikiyen 11:23

Kage neegak, Aliku ALA abinak nogo o kota enggela'me nen agi lagangge nagagerik, oonegen wundi wage menggim pa'nggwe puut irimbaga taati ari nage kagagirak o.

Yetikiyen 38:20

Ti eeke logonet, yi yikwe ndi yikwe niyo nggwok laut paga wonage inom, yi towe ndi towe o oolo ya'i wiga agan nugwi inom, ndiimbu-nggwiya eyonggaame mendek inom, yi mendek ndi mendek o nggween paga inaanogum paga tu agan nugwi inom, yi aakumi ndi aakumi o nggween paga wonogwe abok aret inom, an netenggen neego logomenggaarik, inaganak wake kagak, yi puut ndi puut yanggunogo nagabit nage, puut eegwak-eegwak nggwi wonet wage, yugum pak wurik abok aret langgu-langgu nggween paga wambit nage, eerigin o.

Yetikiyen 43:2

Iterali inogoba Ala abu tiyanak eya aago kagak oonegen lagi wage menggim pa'nggwe nen wage kage neegak, at abu tiyanak eya pindanogo nggween paga pege logonet, niyo takut oone wo ari menggi kwak, oone ari kagagirak.

Abakuk 3:6

At mi'nage kagak, nggween na'ndo-wa'ndo eeke, At enegen enaagan-ambokan pi'nage kagak, yi aakumi ndi aakumi inaganak warit nage, Puut-puut aa'nduk lombok nen itok negen wonage nogo, yigirogo wurabit wage, Puut-puut teberogon o maan nen wonage nogo, aambira-mbira wangge, Eeke kagarak o. Ti eeke kagarak ti, o aa'nduk lombok eeke nagagerak nogo aret eeke kagarak.

Takariya 14:10

O Nggeba nen nok, kota Yerutalem ambokan o ame pa'nggwe kota Irimon kuli nggween ti abok aret, o Araba-Yoraran kobak nabunogo pereegi kwak eerogo pigin kwe, o kota Yerutalem perak, tu unggwogo menggam endage, Mbeniyamin, kuli nen nok, tu unggwogo menggam endage, Aa'nduk, kuli nen nok, tu unggwogo menggam, Unggu'me, kuli nen nok, o nggorek wurik Kananen kuli nen nok, aap endagembogut ake anggur aambiranggo menggam kuli, tiyarogon menggerak ndak-ndak aret eerogo pigin o.

Takariya 14:7

Ne ti alik lombok eerogo pigin me, o weege, o kiip age, eeke nogo lek age logonet, o liingge mban aret logogin o. Ti eeriyak nogo ti, Aliku ALA eenu menggerak o.

Takariya 14:8

Ne ti paga niyo ineenik aganake logorak o Yerutalem paga nen wungge logomenggerik, mogonogo ando oonegen lagi wage menggim pa'nggwe laut paga kuni nage, ando oonegen kilu yi nage menggim pa'nggwe laut paga kuni nage, eeke kagak, o kibi age, o mayu wage, eeke logogin o.

Takariya 4:7

Togop me, puut nggorek kat yi wae. An nomaawi ambik, mbake keegak, at Terubaben wage logonet, kat yanggunogo paganuk, kobappaga eerogo pagagin o. Kobappaga eerogo paganuk, yugum aa'nduk lombok ogowa kwippege kagak, aakumi keekok yogo logonet, Ala ale'nggen koba wonage o. Ala ale'nggen koba wonage o, yinuk, at yorugun o,” yinuk, puut nogo yoge kagarak o.

Marakut 11:23

Kiniki yungguppegak eeka'lek kinoone yogwe, Ndak-ndak arigin, mbako logonet, Puut nggwok yi, Aan wogonogo yi yenggenak me lebengge keyaagin o, yogwi kiinok, togop aret eeke kaamunggup o, yinuk, abet aret yokkiragi o.