Takariya 10:1 - Ala Wone Peenok Peebi Mbanak

¹ O mayu nggwok woraawak nduk, Aliku ALA nen ndugwi kuwak eerogo pege, It aakumi inalitak inake mayu nggwok wogorage, Mayu wogoramenggerak paga yi mendek ndi mendek yarak nogo obeelom eerogo pege, Eeke menggerak me, Yi mendek ndi mendek agarit larit nage eyom paga mayu woraawak nduk, Aliku ALA nggino yogo logonip o.

Takariya 10:1 ပူးပေါင်းရင်းမြစ်များ

1 Endagembogut 17:1

Aap awi o Nggileyat yaga'lelo Titebe mendek Eliya nogo nen aap Akap yoge logonet, “An yaga'lek neegak yi tahun ndi tahun paga mayu wage, miinanggen luurogo pege, eeka'lek aret kaamunggun o, yinuk, at ake eeke minggirak Aliku Iterali inogoba Ala eenik menggerak endage kumbunuk, yokkigi o,” yoreegerak

Ayup 29:23

Mayu wage kero tokkogo mengga kwak, noone ari neyo an to'nakwi, O kibi wonagaatik, o mayu wage kenok, nggween wup eerogo nengge menggi kwak, an noone ari neegak, it togop aret eekwi,

Ndawi 104:13

Kat kawi wurogo pit lagagenom nogome nen Puut-puut paga niyo ndik-ndik eerogo wuppit wage menggendak o. Kat eeke menggendak paga nggween yi, Abu ki eerak aret wonage menggerak o.

Ndawi 135:7

At piirogo menggim nen Ndugwi o nggween irip-irip nen nippit wage, Mayu wage kagak o kimbik kilanogo nappit wage, O wiya warit woraawak nduk, wumbit wage, Eeke menggerak o.

Ndawi 65:9

O nggween yi, kat unde wake logonet, mayu wuppit wage, Nggween mili lubunogo pit nage, Eeke menggendak paga Anggen ka'let age menggerak o. It aakumi inambi-inombaato ambik nonggo logowak nduk, Kat koonogo piige menggendak me, Yi niyo ndi niyo nage nogo porok ari kero, niyo mban logowak nduk, mayu wambi wage,

Ndawi 72:6

O mayu iri'ngga paga wambit wage, Mayu wambit wage logonet nggween yawenogo pege, Eeke menggi kwak, At togop aret wonage logogin o.

Kini Wuppiige 16:15

Aap endagembogut enete eya aago wonage kenok, “Nili yigin, kagi,” mbakwi, O kibi wonagaatik, ndugwi ogom eeke kenok, inale'nggen mbakwi kwak, aap endagembogut inabuwa nen obeelom eeppiige kenok, inale'nggen mbakwi, Eeko menggaarak.

Yetaya 30:23

At nen kineyabume yi mendek ndi mendek awi yarumonggotak mbilanuwak nduk, mayu nappi woramenggerak paga kinambi ambik abe aret nunggo logomunggup o. Ne ti eyom paga kinaanggumi nggween nggwok wiganak paga inagari'ngga abe nenet nugwi,

Yetaya 5:6

Neyabu anggur awi yarak nogo anggup mbanogo nagabit nage, mogot mbanogo pit nage, Eerigin lek nggween nggwi-nggwi mban eerogo piminggirak me, Nggonggoondu penggaarogo pege, alok-palok mban lagangge, Ndugwi nen o mayu wuppi wage kero, Mage, yoriminggirak me, nggween mbuk age, Eerigin o,” Yegerak me, yokkiragi.

Yeremiya 10:13

At oone ngguurubu negen ari kenok, niyo mbogut paga narak wonage nogo kilak-tamok eeke, Ameraakot o ilin-unggut nen nippit wage, O yabok pindanogo nappege logonet, mayu wuppit wage, O wiya kuwak eerogo pege menggim nen nappit wage, Eeke menggerak o.

Yeremiya 14:22

It yi aakumi ndi aakumi aanom warogo ayuk wuko menggaarak inagugi nogo nen o mayu wuppi wage, Ndi, mbogut alik nen o mayu lubu-lubu wurabit wage, Eeko menggaarak mbakop? Lek aret o! Kat ninogoba Kaliku Ala kalik nen mban aret eeke menggendak o. Ti abok aret eerit nage nogo ti, kat nen aret eeke menggendak me, nit niniki kat paga lunik aret ogoorik o.

Yeremiya 5:24

It inikime nen, O mayu wage menggim ari wage kenok, mayu wuppi wage nagaatik, amburu mbangge menggim ari wage kenok, kibi loongge, Ndi, yakootak anggen mbanogo puwok nduk o kibi kagak, Tamban ndi kuli aruwak o, yinuk, koonogo pinanege, Eeke menggerak Aliku ninogoba Ala ayuk wuruwok o, yinuk, iniki me mbariyak kwe, Mbaka'lek aret wonogo menggaarak.

Yeremiya 51:16

At oone ngguurubu negen ari kenok, niyo mbogut paga narak wonage nogo kilak-tamok eeke, Ameraakot o ilin-unggut nen nippit wage, O yabok pindanogo nappege logonet, mayu wuppit wage, O wiya kuwak eerogo pege menggim nen nappit wage, Eeke menggerak o.

Yetikiyen 34:26

It ineebe paga inom, nabuut enaagan-ambokan it wonogo menggam nogo paga inom, nale'nggen eerogo piige logonet, o mayu wage menggim age paga mayu wuppi woraminggirak wage logonet, yi mendek ndi mendek obeelom eerogo pit wage kenok, inale'nggen mbako logogun o.

Yetikiyen 36:37

At Aliku Itok Menggerak ALA nen yegerak nogo yi aret. “Aa'nduk it Iterali mendek nen, Nineebe ambik wigannaruwok o, yinuk, yo'nogo mbareegwa, ambik eerogo piyareegi kwak, ambinom yo'niriyak, Op aret, mbake neegak yo'nugwi iinok, ndomba ineebe ambik lombok mengga kwak,

Oteya 10:12

An mu'neren woroorak eyom muk panggoni wagaarak me, Mayu wuppi wage menggi kwak, Naliku ALA wage logominggirik, obeelom eerogo piyaakit nduk, A'me nggelok eeka eeppiyoorak awi kwak yumbunit nogwe, Aakumi iniki kunik aganaburak anggen kwak mbanit nugwi, Ineyabu nggulaame yabu eerit unggwogwe, Eeko logowak o.

Oteya 6:3

Togop me, At Aliku ALA ti, nit ninogoba aret o, yinuk, paganggwi, At eeke menggerak nineenu arit unggwogwe, Eeko logowok o. Ti eekwi niinok, oonegen lagi wage logonet, eya pindanogo pege menggi kwak at abet aret niya wage, O mayu wage menggim age kenok, mbogut paga nen mayu wuranet wage menggi kwak ninowagam wage, O kibi wonagaatik, o mayu wage logonet, nggween miin eerogo pege menggi kwak, at nen obeelom eerogo pinanege, Eerigin o, Yinuk, yogo agaarik o.

Amot 4:7

“Tut kenagan penembunuk, anggen mbaniyak aret kwe, o mayu wura wage kero, tu nake, O kota ambime mayu wuppi wage logonet, o kota ambime mayu wuppi waga'lek mbo piige, Ineyabu ambi yagat wurik me o mayu wogorage logonet, ineyabu ambi yagat wurik me o mayu wogoraga'lek mbuk eerogo piige, Eereegirak paga

Mika 5:7

Singa ndiimbu-nggwiya eyonggaame mendek inenggela'me wonage menggi kwak, Singa awooluk kambin-ndomba inenggela'me unggwi nanuk, Yimbik togon eerogo nappiige, nibinik-ndelenak eerogo nenet nage, Eeke me, Ambeme nen ndiniyak meek menggi kwak, At Yakup mendek ando yumbunik nogo, togop aret aakumi inanebunu lombok inenggela'me wonogwe, Yi aakumi ndi aakumi ambik inenggela'me arit namenggaarak wonogwe, Eeko logogun o.

Yaya 16:23

Ti eyom paga kit nen wone ambi kin wo'neyaamunggup lek o. Ti mendek wo'niret o, yinuk, nogoba nggino yogwi kiinok, an nendage kumbunuk, wokkirage kaamunggup o.

1 Korindut 3:6

An nen awi yake, ndi, Apolot nen niyo kilike, eekwi niigak, Ala nen perak, awi yarak mbilanuwak nduk eereegerak.

Pelaareegerak 28:23

At Aliku ALA nen mbogut kit kinirimbaga wonage nogo yugum tembaga negen kunogo pege, kinanggween mbuti kwak mbuk kunogo pege, ndi, mayu wurabi worookwak wun inom, liirubu aa'ngga inom, nogo mban wurabit wage kagak, kineebe aret lek ogwe, eeke logogin o.

Yakobut 5:7

Togop me, nowe-nawot o. Ti eeppinagagwi nogo koonikit nduk, ninowe woraagin me, kiniki kwippunuk logonip o. Aap ambi nen mbi awi yaketak nogo mayu kage, kibi kage, eeke kagak, kole aruwak nduk iniki kwippunuk, tokkage menggerak nogo liippinip o.