Pelaareegerak 2:7 - Ala Wone Peenok Peebi Mbanak

⁷ Kit yi eekak ndi eekak abok aret eekwi kiigak, at Aliku kinogoba Ala nen ale'nggen kinoba pinagage, tu o karu nggwok nonggologo pereegim yi paga wogwe kiigak, ndegengginake, eerit wage kagak, tahun 40 eereegerak o. Eeke kagak, at Aliku kinogoba Ala kinom logonet, kit kiniki uugwe mbakwi nogo a'me nggilik-nggelok aret eeppinagit wagagerak nogo o.

Pelaareegerak 2:7 ပူးပေါင်းရင်းမြစ်များ

Wakkagagerak 12:2

Time namenggendak me, Nale'nggen koba pagage logonet, Kat paga nen kanebunu nggwok wigak yuwak nduk eeppagage, Kendage nggwok aruwak nduk tiyappagage, Eeriminggirak paga Aakumi ambik obeelom eeppiige logomunggun o.

Wakkagagerak 24:35

At Aliku ALA nen nogoba Abarakam ale'nggen oba pege logonet, aanggumi tapi-ndomba inom, keledai-unta inom, mbuti wu perak-emas inom, ayeloman mini kumi-aap inom, alik negen ngginu-ngginu eerogo wogoreegerak paga aap nggwok eenggi warak aret agagerak wonage o.”

Wakkagagerak 26:12

Ndi, at Itak nogo it inom nogome aret wonage logonet, yi mendek ndi mendek yarit nage logonet, “Ero ambit nen anggen ambiret mbanggolaagin,” mba'nuk, yareegerak kwe, at Aliku ALA ale'nggen oba pege me, ero ambit paga anggen ambik 100 negen aret yege me,

Wakkagagerak 30:27

Yoge mbareegi, at Laban nen ari logonet, “Kat nimbirak wonogwe paga at Aliku ALA ale'nggen noba panege logonet, ena koonogo wo'nege neenu me, kat nabuwa mba'nuk ninom ya'i logowok o, namboko!

Wakkagagerak 39:3

At Yutup nogo Aliku ALA imbirak wonage, ndi, Aliku ALA imbirak logonet, yi yabu ndi yabu eeke ti, op mban eerit nage, eeke nogo Potipat nen enegen kage nagagerik,

Wakkagagerak 39:5

At ame inom, amindik-amendek inom, arum logowak nduk, mippereegerak kuli nen at Yutup wonage paga at Aliku ALA ale'nggen aap Metit mendek Potipat nogo ame pege logonet, amindik-amendek oome mendek inom, endekem mendek inom, abok aret obeelom eeppege nagagerak.

Nekemiya 9:21

tahun 40 paga o karume wogwe iigak, inamendek ambi lek age, inayum nibik ari, iniyok piirogo pege, eeka'lek aret wonagagerak.

Ayup 23:10

Togop aret kwe, An eeke minggirak perak, at eenu aret me, Mbuti emas kani paga worakwi iinok, Abe age menggi kwak, an nabut mbanogo togop aret eerogo panigin o.

Ndawi 1:6

It aap iniki abe koonak nen eerit nogwe nogo, Aliku ALA nen enegen wogonake menggerak kwe, It aap maluk eeka nen eerit nogwe nogo, Lek eerogo piige menggim time aret nogo menggaarak o.

Ndawi 107:4

It ando nen kota ambi ye mbambatinuk logorak kobak aret me, O karume ya agak nda agak nugwi,

Ndawi 31:7

Kat nen andi-pandi eerogo panugwi nogo neege, Ee'nakwi paga yagan wake nogo liippanege, Eekendak me, An niniki ale'nggen mbake, Kiniki kunik ee'nake kenok, Nale'nggen nen ndawi wake, Eerigin o.

Ndawi 90:17

Ninogoba Ala o. Kale'nggen ninoba pinanege, Nineenggi paga eerit nugwi nogo omaawi eerogo pege, Nineenggi paga eerit nugwi nogo lek age kero, nu'lek eerogo pege, Eeke logot o.

Wundeegwaarak 16:35

Ndi, it aakumi Iterali tahun 40 eeke kagak mbi mana mban nenet o Kanan aakumi wonogwe kuli paga aret ari wogogwaarak.

Oteya 13:5

O karume iri'ngga abu lek nggween mbuk aago kagak an aret wogoren wage logonet, inarum wonagagirak o.

Amot 2:10

It aakumi Amori mendek wonogo menggam unde eeppatinuk logowak nduk, o Metit nen wogoren wundi wage, Tahun 40 eeke kagak, o karume wogoren nege,

Linggineegwaarak 1:1

It aakumi Iterali mendek o Metit nen wundi wogo nogogwaarik, karume puut Tinayi paga wonogwe iigak, tahun mbere eeppunuk, tut ambi penembunuk, ambi penengge tanggal 1 paga at Muta nogo Ala inom lambungge menggim awooliya wurik me wonage me, at Aliku ALA nen at yoge logonet,

Linggineegwaarak 14:33

It an noone liirogon konembunuk, eerulik me, inomaluk onggo inapurilogwe inoba pege neegak, o karume yime aret ndomba ndegeninabit yagak-ndagak nugwi iigak, tahun 40 paga inogobamini kambit namengga-namengga irip paga it ambi kambuurak yugu nogo aret ari nagin o.

Linggineegwaarak 14:34

O inigen yombooni nogwe iigak, nogo 40 aret yegaarak nogo ti, nogo ambit yegaarak ti, tahun ambit eeriyak kwak aret me, an nambot iige ineenu aruwak nduk, inomaluk onggo inoba piyaminggirak aaninggin piyaninuk nugwi iigak, tahun 40 aret eerigin o.

Linggineegwaarak 22:12

Yoge mbareegi, at Ala nen Mbileyam yoge logonet, “It aakumi wagaarak wonogwe ti, an nale'nggen muk inoba piigirak wonage me, kinom nage logomenggendik, pulunogo piya noorak mondok mage o,” yinuk, yoreegerak.

Linggineegwaarak 32:13

Aliku ALA anini ka'luk aagi negen Iterali inoba piinok, mbo piige mbareegi, o karume yagak-ndagak nugwi iigak, tahun 40 eeko logonet, it inom ndak-ndak ndarak abok aret Aliku ALA enggaanom paga maluk eereegwaarak nogo karume time kambit nawak nduk, eeppiyareegerak.

Lukat 22:35

Yoge nagagerik, it apit yorage logonet, “Kinawu nggerenak inom, wokkirogwe iinok yonggoliyak yum inom, kiniyogogut nggerenak sepatu inom, an nen wonok noorak mage o, yokkirage mbareegi, nogo logonet, kit kinamendek ambi lek kenok, Ao, mbako nogogutak ilik, lek a?” Yorage mbareegi, it nen, “Nit niniki togop ambi mbarulik o, ninogoba.”

Yaya 10:27

An nandomba ti, an noone konenggo menggaarak. An nen it neenu minggirak me, it nen an mu'neren wogo menggaarak.

Pelaareegerak 1:19

Yorage nagagerik, ti'nuk, ambi yorage logonet, “At Aliku ninogoba Ala nen wone yo'niragagerak nogo ndak-ndak nit o puut Korep nen tu o karu nggwok nonggologo pereegim mondok iya tit kagak o puut nggelok-nggobok aap Amori menggam pa'nggwe nen nok, o Kareti-Mbareneya aret ari wogogurak kineenu nogo o.

Pelaareegerak 1:46

Nomonak aret kagak, kit o Kareti mondok elaambirik aret wonogogutak nogo o,” yinuk, yoragagerak.

Pelaareegerak 2:14

Nit tu Kareti-Mbareneya nen ambime unggwagak ambime unggwagak eerit nugu nogogurik, niyo Teret wunda wogogurak kuli ti, tahun 38 aret agagerak. Age kagak, at Aliku ALA nen wone abuk nggaruk togon kumbuk mbanogo yo'niragagerak nogo ndak-ndak, it aap wim eeka ineegin warak inom ndak-ndak ndarak o Metit nen wundi wogogwaarak nogo abok aret aakumi Iterali inenggela'me nen kambit nogogwaarak.

Pelaareegerak 2:6

Kit kinambi inom, kinaniyo inom, noorak nduk, kit kinawu paga it inoba onggo mbanogo nanet namunggup o.

Pelaareegerak 29:4

Kinigen kogogutak kwe, at Aliku ALA nen kit yelok kaamunggup nduk, kiniki ngget wokkirage, kinigen lik togon kaamunggup nduk, kinigen obeelom eeppinagage, liirogon konenggo logomunggup nduk, kinaruk abe eerogo pinagage, eeka'lek o yogondak yi kuli aret wonogo ogotik o.

Pelaareegerak 29:5

Ndi, tahun 40 paga an nen tu karume paga wokkiren wage neegak, kinayum yirik nibik ari, kiniyok ogut nggerenak nogo nibinik-ndelenak age,