Oteya 9:7 - Ala Wone Peenok Peebi Mbanak

⁷ Aaninggin kinoba kwippinagarak eyom muk panggoni wage, Maluk eekwi onggo ndak-ndak eeppinagarak ne muk panggo yi wage, Eeke me, Kit Iterali kineenu eeppinagagi o. Kit maluk nggwok lombok eerit nugwi, At kineebi lombok ombakwi, Eekwi me, At nen yorage kagak yokkiraga nogo ti, “Wi nen aret ari,” mbakwi, Ndi, it aap iniki warak nen yokkiraga ti, “Iniki mbanak nen aret ari,” yogwe, Eeko ogotik.

Oteya 9:7 ပူးပေါင်းရင်းမြစ်များ

2 Endagembogut 9:11

Mbagangge kagak at Yeku nogo oreewi wonogwe me iya wungge mbareegi, at oreewi ambi nen at yogo logonet, “Wone ambi wonage ilik, lek a? Aap iniki mbanak nogo ti, nonggop nduk keya wagaarak?” Yoge mbareegi, at Yeku nen, “Aap ti, eebe inom, ari menggerak inom, abu kineenu aret o.”

Yetaya 10:3

Togop eekwi me, eekotak onggo aaninggin kinoba ari wage, Kineebe lek eerogo pinagarak nduk, o nda nen wogwe, Eeriyak eyom paga nano eeriyak mbakop? “Yeenggwa niret o,” yinuk, mbe agan aap ta yori nogwe, Kinamendek ambik aago nogo o nggeeme punuk mbaganggwi, Eeriyak mbakop?

Yetaya 26:11

Kaliku ALA wae. Maluk onggo aaninggin inoba piyoorak keenggi nippunuk wonage kwe, Inigen keega'lek aret agaarik o. Kapuri alik eekwi iyo, kiniki aganggen kerek togon panggombiinet nage nogo Inigen keego logomenggaarik, inenggali age, Ndi, kani nenet nage menggi kwak, kawim aaninggin inoba piyoorak koonogo pegendak nogo it aret inoba kwi'nage, Eeruwak o.

Yetaya 34:8

Ti eerigin nogo ti, at Aliku ALA nen it aakumi maluk eeppiigo nogogwaarak onggo eeppiyoorak eyom punik wonage, O Tiyon eeppiigo nogogwaarak inawone mbanogo piyoorak tahun ambi koonak wonage, Eerak aret agaarik o.

Yetaya 44:25

Peebi ndogop arigin o, yinuk, Ala nen yo'nirage kagak yokkirogo o, yinuk, Yorogo logonet, ineenu agak mendek eeppiigwi nogo abut laganogo piige, Inobagari negen yorogo menggaarak nogo inagi'ndok kambuwak nduk eerogo piige, It aap iniki warak nen yorogwe nogo abut laganogo, Aap wi nen yogwe, mbaruwak nduk eeppiige,

Yeremiya 10:15

Kugi inogut eerak nogo ti, we aanom warogo aret eerak kenok, aakumi nen meek eerogo pugwi me, Eeko menggaarak onggo inoba piyoorak eyom panggoni wage kenok, inenggaawak lek aret arugun o.

Yeremiya 11:23

It aap Anatot mendek aaninggin inoba piyoorak tahun punogo pereegirak ndak-ndak ari wage kenok, aaninggin inoba kwippiyaagin me, ambiriluk ambi eenik logogin abu lek aret o,” yinuk, Aliku ALA nen aret yegerak o.

Yeremiya 16:18

Inagugi ogut inoone yogolik ogole warak mendek an nanggween paga time pi unggwogogwaarak paga nanggween enete maluk eerogo pugwi, an neyate negen nanggween time eekulik mendek kagak eerit nugu logonet, o time inagugiwak mban yagabit eerogo pit nogwe, eekaarak paga inobaabut maluk lombok logonet, maluk eerit nugwi onggo aaninggin ne ambi inoba piinok, ne ambi inom aret nduguk togon inoba kwippiyaagin,” yegerak o.

Yeremiya 23:13

“An nen yorage neegak yoraga Tamariya mendek eeriyak lek mendek kagak eekwi iyareegirak nogo ti, Kugi Mba'an nen yorage kagak yorogo nogogwaarak paga an napuri Iterali nogo tu abe kagak alik paga nomoniren nogwe iyareegirak o.

Yeremiya 25:14

Ndi, it aakumi time menggaarak kunduk, aakumi inanebunu apit aret inom, aap inoweewi inendagembogut inom, nen inayeloman mini eeppiinok logowak nduk, eerogo piige logonet, it eeko nogogwaarak inom, ineenggi paga eeppiinet nogo nogogwaarak inom, onggo ndak-ndak eeppiige logogin o,” yinuk, yegerak o.

Yeremiya 29:26

Tepaniya wae. At Aliku ALA nen at eebe unde logonet awi wurik arum logonok nduk aap Ala unde Yoyara obaane'me kat aret mippagagerak o. Ndi, it aap Ala yorage kagak yoraga ti, kumili negen yogwe me, it aap ti mendek inoone agan nogwe iinok, ineenggi-iniyok keele maarogo piige, inenggaanok mbutigeele paga yilunogo piige, eeriyak aret me,

Yeremiya 46:21

Wage kenok, it Metit mendek inawuri aap ineegin warak onggo kolaga inom wonogwe ti, lembu aagalogwe inamok ambik mengga kwak wonogwe me, It onggo eeppiyoorak eyom panggoni wage, Aaninggin inoba piyoorak ne nogo ari wage, eerigin me, It ko wappunuk puk arugun lek ambugwi aret kole mbaganit nagun o.

Yeremiya 6:14

Eeko logonet, inawin kunik kwak an napuri inoba aaninggin wonage kwe, Ti iya lek o, yinuk, yorogwe, Iniki ugun tayenak lek iigak, Kiniki ugun tayenak logonip o. Kiniki ugun tayenak logonip o, yinuk, yorogwe, Eeko menggaarak.

Yeremiya 8:11

Eeko logonet, inawin kunik kwak an napuri inoba aaninggin wonage kwe, Ti iya lek o, yinuk, yorogwe, Iniki ugun tayenak lek iigak, Kiniki ugun tayenak logonip o, kiniki ugun tayenak logonip o, yinuk, yorogwe, Eeko menggaarak.

Leendawi 2:14

“Ndogop arigin o,” yinuk, yokkega nen yokkogo nogogwaarak nogo ti, pilit aret yokkugwi, Ambi eeppagarak lek kagak yokkugwi, Keele maakkeren pagi nookwak, “Maluk ndogop eeke agandik o,” yinuk, kin paga yokkega'lek kat eeke nogo kagaarogo pugwi, “Ala nen yegerak me, yokkogo o,” yinuk, yokkogo nogogwaarak nogo ti, pilit-pilit yokkugwi, Tu abe kagak alik paga nomonggeren nogwe, Eeko nogogwaarak o.

Yetikiyen 13:10

It pilit yaga nen napuri tu kobak eerogo piigo logonet, iniki ugun tayenak lek iigak kwe, Kiniki ugun tayenak logonip o, yinuk, yorogwe, it napuri yugum yagat maluk-maluk wukwi iinok, it pilit yaga nen abe eeka'lek nggabok anggup paga mbenenogo pugwi kwak eekwi, eekwi me,

Yetikiyen 13:3

At Aliku Itok Menggerak ALA nen ari logonet, It aap yi mendek ndi mendek eeriyak inabi paga kaga'lek kagak wi negen logonet, iniki mba'nuk, agan nugwi mban mugurok nogwe nogo inabuwa o.

Yetikiyen 25:17

Nanini nen eereegwaarak onggo eeppiyoorak mbake nogo, mondok alik lombok eeppiige, ndi, nanini kani kunik negen mi'nage logonet, eereegwaarak onggo inoba kwippiige, eerigin o. Nanini nen eereegwaarak onggo inoba piige neenok, Naliku ALA an aret ineenu arugun o,” yinuk, yegerak me, yagi o, yoragagirak.

Yetikiyen 38:23

Ti eeriminggirak paga an mondok tiyanak minggirak inom, an kikak nakeelik alik leenak minggirak inom, neyaawak nduk, eerigin o. It aakumi inanebunu ambik lombok nen an neyaawak nduk, inenggaanom paga eeke neenok, it nen Naliku ALA an aret ineenu arugun o,” yinuk, yegerak me, yokkigi o.

Yetikiyen 9:10

an nen it inabuwa mbake, inabuwa nen teppiige, eerigin lek it eekwi ndak-ndak aaninggin inoba kwippiige agarik o.”

Oteya 14:1

It Tamariya mendek nen inogoba Ala an yorage ineebi mbakwi me, It eekwi paga aaninggin inoba kwippiyoorak nogo ti, inobaalombok aret o. Wooluwak paga ineebe inoorogo piigwi, Inaagalogwe awo ngget ndarak nogo inanep yombak inoorogo piigwi, Inakuwi elege ndaka'lek awo inabila wonogwe nogo kilirik-ndowanak eerogo wumbiinet wogwe, Eerugun o, yinuk, yegerak me, yokkiragi o,” yoragagirak.

Oteya 5:9

Aaninggin inoba piyoorak ne ari wage kenok, Eparayim nogo kaliirubu pup eerogo piyaagin o. Togop aret me, it Iterali inanebunu lombok inenggela'me, Wone yi, abet aret eerigin, mbaruwak nduk, yorage agarik o.

Oteya 8:13

An nake pugu nogo, it nen warogo wo'nugwi, Nake warak nogo enggaanggum it nunggwi, Eeko menggaarak kwe, Naliku ALA nen ninikilom mbakeelik aret agarik o. It maluk eekwi ti, an niniki aberak logonet, onggo aaninggin inoba kwippiyoorak nogo ti, Iniyokan o Metit nappiyaagin ti aret!

Oteya 9:8

Kit Eparayim kinarum logorak Ala nen mippiyareegerak nogo ti, it aap at yorage kagak yokkiraga nogo aret kwe, It yi tu ndi tu nogwe me abok aret yilunogo piyaawak nduk, keele pit nogwe, It inogoba Ala awi wurik me time yokkirogwe iigak, kineebi lombok inombakwi, Eeko ogotik o.

Amot 8:2

Titi'nege logonet, “Amot wae. Kat nano mendek kenegen kagan o?” Yo'nege mbareegi, “Muun yarak me, anggen kole agaarak mbanak yonggolak kagi o.” Yoge mbareegi, Aliku ALA nen an yo'nege logonet, “It an napuri Iterali eeppiyoorak eyom nogo muk panggoni wagaarak me, an nen ambinom inili eerogo teppiyaagin lek eeppiyaagin aret o,” yinuk, yo'nege kagagirak.

Mika 2:11

Aap pilit pugunogo inambokan lagangga ambi nen wage logomenggerik, ari logonet, An perak, anggur amburu inom, kumili aganaka amburu inom, ndonggok togon nonggo logorak yokkirage logogin o, yinuk, yoraga nogo mendek it inobam aret me, inenggela'me logonet yoragak yuurak op aret o,” yinuk, yegerak me, yokkiragi o.

Mika 7:4

It aap ti abok aret ineraambe maluk lombok wonogwe kwe, inenggela'me ambiriluk ambi eraambe mbuuluk obeelom negen wonage nogo ti, alok kwak wonage, Ndi, it abok iniki nggolawe wonogwe kwe, it inenggela'me ambiriluk ambi iniki mbuuluk abe koonak wonage nogo ti, poondo alok kwak wonage, Eerak aret menggaarak o. It inigen wokkiren nega woroorak yokkirogo menggaarak nogo, ne muk ari wagaarak wonage, At Ala pekkiya woroorak ne nogo, muk ari wagaarak wonage, Eerak aret me, O yogondak naalop-kaalop eeginaburak abu aret agaarak o.

Tepaniya 3:4

At enggela'me it Ala nen yorage kagak yoraga nogo ti, liirogon yoraga'lek ugun-ugun yorogwe me, “Yi abet aret yo'nirogwe,” mbaka'lek wonogwe, At enggela'me it aap Ala unde nogo nen Ala ake leenogo pugu nogo, maluk eerogo pugwi, Ala wone Muta nen liiru mbaneegerak nogo, taganogo punuk, it mbakwi nogo mban mugurok nogwe, Eeko menggaarak o.

Marakut 3:21

“Aakumi ambik me, mbi noorak meek o,” yogwe at owe-awot inaruk konembogo nogogwaarik, “Aap yi kumili-kumili negen agan nege yi, piga nawok o,” yinuk, piga nawok nduk eereegwaarak.

2 Korindut 5:13

Nit yorogwe paga, “Kumili o,” yo'nirogwe iigak kwe, Ala tiyappuurak nduk, agan nugwi niigak, yo'nirogwe me, op aret o. Ndi, “Aap iniki warak logonet, yo'nirogwe o,” yinuk, yogwe iinok ti, kit ambi eeppinagawok nduk, yokkirogwe me, op mban o.

Wayu 16:19

Ti eeke kage nagarik, wonage me, o kota nggwok nogo nggween mondok nggoguk ari logonet, kenaga'ndak mogonnage, ndi, yi awi ndi awi nggween paga kota-kota nogo abok aret yigirik-noonom arit nage, eeke kagak, at Ala nen, “O kota nggwok Mbaben nogo perak, at maluk eeke onggo anggur amburu toolak kwak an nanini lombok ombake minggirak toolak nogo, yogondak aret oba kilirogo wuppigi o,” yinuk, kilirogo wuppege kagarak.