Oteya 9:1 - Ala Wone Peenok Peebi Mbanak

¹ Kit Iterali yi wae. Kwe ogonggelo mbo punuk, aap alik muguren nage menggi kwak Kinogoba Ala mbo punuk, at oone liirogon wagangga'lek logonet, Gandum agabolo mbelanggo menggam nen kwe ya wukak paga onggo kologwe kwak eekwi nogo kinikilom mbakwi me, Kit Iterali yi, kiniki ale'nggen mbakwi, Yi aakumi ndi aakumi inale'nggen nen kwirabik-kwirabok yogo mengga kwak yogwe, Eerugup o.

Oteya 9:1 ပူးပေါင်းရင်းမြစ်များ

Ndawi 73:27

It aap kat mbo paganuk mbaganggwi nogo, Ineebe lek eerogo piige, It aap kat liirogon mukkeren naga'lek nogo, Abok aret inenggaawak lek eerogo piige, Eerumunggun o.

Yetaya 17:11

Yarumonggotak ne ti eyom paga lagangge logowak nduk, wolalogwe kinokkagak yogwe, Ndi, ko'lu kubondendok ambit-mbit waruwak nduk, liirubu koorogo alome pugwi, Eerumonggotak kwe, Kugilingga kinoba kwi'nage, kineebe andi eekkinake, Eeriyak eyom paga Anggen abe mbanggologo logogun lek aret mbako logonip o.

Yeremiya 2:19

It maluk eekwi nen aret maluk eeginake, It an noone ineebi mbakwi nen aret ineebe andi-pandi eerogo piige, Eerigin o. Togop me, it nen, Ninogoba Aliku Ala mbo pugwi, At ayuk wukwi, eeka'lek niinok, Abu maluk aret eekwi, niniki andi eekkoloorak mendek eekwi, eeko ogoorik kogo o, yinuk, Ineenu ogwe, iniki liippugwi, eeko logowak o,” yinuk, at ninogoba Omaawi Lombok Menggerak Aliku ALA nen yegerak me, yokkiragi o.

Yeremiya 2:20

Aliku ALA nen ari logonet, “Yum aaninggin nen nggoorok togon eerogo mbo pogo mengga kwak O maan togon, At oone yugu aaninggin me, ambinom eeriyak nineebi o, yinuk, mbo pugwi, Keele maarak mbanogo mbo pogo mengga kwak, Wone yugu paga keele maarak negen wonogwe yi, mbanogo mbo puwi o, yinuk, mbo pugwi, Aliku ALA mban mugurok nogo logogun lek o, yogwe, Eeko nogogwaarik, Yi puut ndi puut tiyanak wonage me inom, yi eyo ndi eyo eno'mbak wiganak abu'me inom, Kumi mbabilu nen, Ee'ninabuwak o, yinuk, winnarit nogo mengga kwak it togop aret eerit wogo nogogwaarak o.

Yeremiya 44:17

Nit ninombomini inom, ninoweewi inendagembogut inom, ninoweewi inengga warak inom, nen o Yekura kota-kota kunduk, o Yerutalem tu paga tu paga kunduk, ninagugigwe endage, Mbogut-Kwe, ake obari abe kaga kani kunggwi, ake anggur amburu kilirogo pugwi, eeko nogogwa kwak, nit ndak-ndak aret eeko logogun o, yinuk, yogoorak nogo aret eeko logogun o. Ake wogogwi eyom ti paga ninambi ndonggorogon nunggwi, ninale'nggen paga wonogwe, andi ee'ninaka'lek obeelom aret wonogwe, eeko nogogurak kwe,

Leendawi 4:21

O Erom Aagalukwe o Uyut paga wonage menggendak kat yi wae. I'ndok kangge, kale'nggen mbake, eeriyak mbake kenok ari logot o. Kat kunduk amburu toolak wokkeremenggerak nengge keenok, kumili kumbunuk wonage keegak, Kayum nggoorogo kagabolo kin eerogo pagagun o.

Yetikiyen 16:15

“At togop aret eerogo pereegirak kwe, at nen, Natenggen abu kigirikwe, mbake, ndi, Nendage abu wigak yegerak kagi, mbake, eeke nagagerik, kumi ya wurinakak kwak kumbunuk, aap tu at wonage me ti paga wogwe iinok, inom nogo yege logonet, Ee'nabuwak, mban mbake, aap ugun nen, Nimbirak nogo yuwok o, ari kenok, eebe kigirikwe kagak aret imbirak nogo yugwi,

Yetikiyen 16:30

Aliku Itok Menggerak ALA nen ari logonet, “Ee'nabuwak, mbake nogo tebenogo puurak meek kenok, kwe ya wukak enggali lek eerit nege menggi kwak aret eerit nege agaarik o.

Yetikiyen 20:32

It nen yogo logonet, Nit yi aakumi ndi aakumi alik mendek kwak, yi o ndi o aakumi inanebunu lombok nen eyo inom, yugum inom, alut eeka kwak, ariyak uugwe mbako ogoorik o, yogwe iigirak ti, ndak-ndak arigin abu lek o.

Yetikiyen 21:10

Aakumi inoorit nawak nduk, wooluwak ngget abu kenenak wonage, Ambe laambu tup eerak wonage, Eerak me, O yabok eeke kwak wooluwak ti, lan agan nage agaarik o. An napuri it Yekura mendek inambim mbanak paga iniki ale'nggen mbariyak mbaken? Wooluwak ti nen yi eyo ndi eyo mbim mbanak paga ogobakkigirik nogo meek eerogo pege menggerak o.

Oteya 10:5

It o Tamariya menggaarak nen inayuk wuka tapi aagaluk ogut eerak o Mbet-Awen wonage nogo, Wonok o nda time pi nogwe iyo, inagabiti mbakwi, Iniki wakkologo logonet, le yogwe, It aap inagugi ogut eerak abu abe eerak me, pi wakwi it kugi unde nogo nen kunduk, le yogwe, Eerugun o.

Oteya 2:12

Ndi, It iniki kunik nen ee'nakwi onggo eyo yi aret wo'nireegwaarak o, Yinuk, yereegerak ageyo anggur yarak inom, ageyo wuli yarak inom, abok aret maluk eerogo punuk, Eyoongga negen eerogo piminggirak me, it ndiimbu-nggwiya nen lek eerogo nonggo logogun o.

Oteya 4:12

It an napuri ti, eeriyak kobak kenok yoraawak nduk, eyo paga kugi ogut aago nogo yogwi, Eyo obate mbanak kagak kwe, Onggo yo'nirage, mbakwi, Kumi ugun eeginaburak iniki nen yorage kenok, ugun-ugun eeginabit nugwi kwak, An inogoba Ala liirogon mu'neren naga'lek mbo paninuk, alik mendek muguren nugwi, Eeko agaarik o.

Oteya 5:4

“It eerit nugwi ti paga yilunogo pateegwaarak me, iniyokan inogoba an Ala neya woroorak meek aret agaarik o. Kumi ugun eeginaburak iniki nen yorage kenok, ugun-ugun eerit nugwi kwak eerit nugwi, Ninogoba Ala at aret, nombakwi lek mbo panugwi, Eeko agaarik o.

Oteya 5:7

It nen Naliku ALA liirogon mu'neren naga'lek logonet, Kwe elege terak ndarogo piinet nage menggi kwak, Iterali togop aret eerogo piinet nugwi me, An mbo paninuk alik mugurok nogwe nogo nen ineebe ambeme yonggorinake logonet, ineyabu yarak inom ambeme yonggoligin o, yinuk, yegerak me, yokkiragi o,” yoragagirak.

Amot 3:2

“It aakumi ndarak logok lombok abok aret o nggween paga wonogwe iigak, It Iterali mban an napuri logowak nduk, leenogo piyareegirak me, It yi maluk ndi maluk eekwi paga aaninggin inoba kwippiyaagin o, Aliku ALA nen aret yegerak me, yokkiragi o,” yinuk, yoragagirak.

Amot 4:5

Wa! yo'nogo logonet, oroti piike menggerak mendek inom punuk, worarak nogo nake kani kunggwi, Inale'nggen nen, We wogori, yinuk, wo'nogo nagaatik, iniki tiyappatit nugu logonet, agan nugwi, Eekwi ti aret eerit nogo logowak o. Ti eerit nogo menggaarak nogo ti, it Iterali inikilom mbakwi nogo aret me, inobaalombok eerit nogo logowak o,” yinuk, at Aliku Itok Menggerak ALA nen aret yegerak me, yokkiragi o.

Amot 6:13

Kit nen o Lorabat tebenggologo nogotik, ale'nggen mbakwi, Ndi, o Karanayim kunduk tebenogo punuk, yogo logonet, “O ti, nit ninomaawi lombok paga tebenggologoorak nogo lek a?” yinuk, wogoppakwi, eekwi kiigi o.

Amot 8:10

Inale'nggen nen laago lako logomenggaarak nogo obaane'me inayum maluk nibinik mendek yippunuk, iniki wakkologwe, Ndawi piyanggo logomenggaarak nogo obaane'me leenggu maakwi, Inayum nibinik maluk yippunuk nugwi, Ineeruwak inanobak puluk ko eerogo pakwi, Aap ambi aput ambolom kangge kenok, leenggu maake kwak maakwi, Eeko logowak nduk, Eerogo piyaagin o. Ti eeriminggirak paga ne ti eyom ariyak age yubuni nage kagak, iniki abu alik negen wakko'net unggwogo logogun,” yinuk, at Aliku Itok Menggerak Ala nen yegerak o.

Yakobut 4:16

Ko'lu eeriyak kineenggo'lek kagak, kineenu negen eekko'nok wogoppakwi ti, maluk aret eekwi kiigi o.

Yakobut 5:1

Kit aap kineenggi warak yi, kinaruk logonip o. Kit andi yagan wako logorak eyom panggoni wage me, kinale yikkologwe, kinaleenggu maakkologwe, eeko logonip o.