Oteya 7:16 - Ala Wone Peenok Peebi Mbanak

¹⁶ An Tiyanak Lombok Minggirak nen yeenggwaaraakit nduk, yo'nugwi lek mbo panugwi me, It ti, maale nambukaatak tak mbilak wuk ari menggi kwak wonogo agaarik o. Inoone maluk mendek mban agan nugwi ti paga inoweewi inendage warak nogo wooluwak paga warak wanggo logogun o. Ti eekwi paga o Metit time nen inagi'ndok kanggo logogun o, yinuk, yegerak me, yokkiragi o,” yoragagirak.

Oteya 7:16 ပူးပေါင်းရင်းမြစ်များ

Ndawi 12:3

“Nit ninoone agan nugwi mban abe o. Ninogoba nen, Ndogop yuurak mage o, yinuk, yo'niroorak ambi lek me, Yuurak mbakoorak mban agan nugu logogun o,” Yinuk, iniki wogoppatit nugwi, Inoone amburu ndik-ndik agan nugwi. Eekwi nogo Kaliku ALA nen inale'lok nggaruk togon nappiyet o.

Ndawi 12:5

Kaliku ALA nen ari logonet, “It aap meek mendek tebenogo piigwi, It ineenggi lek nen, Yogop eeppinanuwak lak, ao, yinuk, iniki wakkologwe, Eekwi iinok, An pilak ari logonet, Ndogop eeppinanuwak lak, ao, nombakwi nogo, Inagap ndarogo piyaagin,” yereegindak me,

Ndawi 17:10

Inabuwa mbaka'lek it inake mban koonggo'net nugwi, Wogoppako logonet, wone agan nugwi, Eeko menggaarak.

Ndawi 52:2

Kat aap pilit pugungga yi wae! Kamili nogo ti, Aap inamboro mbangga engget ambik kwak logonet, Aakumi maluk eeppiyoorak wone mban mbanit nege,

Ndawi 57:4

Aakumi nen an nooruwok nduk eekwi ti, Singa aakumi nibininaburak kwak wonogwe, Ineyak ti, maale-wooluwak kwak wonogwe, Inamili ti, paloowi engget ambik kwak wonogwe, Eerak logonet, An wanggeppaninuk wonogo agaarik o.

Ndawi 73:9

It inoone paga nen At mbogut paga menggerak nogo meek eerogo pugwi, Inamili irip paga it o nggween paga wonogwe nogo inabok mbanit nugwi, Eeko menggaarak o.

Ndawi 78:37

Iniki mbere logonet, at mugurok nogwe, Ala inom wone nggaruk togon koonogo pereegerak nogo liippega'lek ugun-ugun eerit nugwi, Eereegwaarak.

Ndawi 78:57

Inombomini iniki mbere logonet, wone liippega'lek Ugun-ugun eerit nogogwa kwak ndak-ndak eekwi, Yigin amborowak kalok wurik me nambukaatak kwe, Ta'mbilak wuk ari menggi kwak it togop eerak wonogwe,

Yetaya 3:8

Aliku ALA inenggela'me abu tiyanak wonage kwe, it inoone yogwe paga, it eerit nugwi paga, Endage tebenogo pogo logonet, miyuk-meya eerogo pugwi me, Kota Yerutalem muk langgok-panggok eeke, O Yekura abu aret mi-mi wangge, Eeke agaarik o.

Yeremiya 18:18

Yorage mbareegi, it aap ineebi nombakwi nen yogo logonet, “It aap Ala unde nen eeko logorak wone mamunnirogwe nogo lek age, it aap iniki warak nen ninaruk wakwi nogo lek age, ndi, Ala nen yorage kagak yoraga nen nit yo'nirogwe nogo lek age, eerigin lek me, aap Yeremiya ari menggerak ti, lek eerogo puurak koonuwok nduk, woraanip o. At wone yo'nirage nogo aret abut laganogo at yogwi, ndi, at, Yogop eeriyak, ndogop eeriyak, yo'nirage liippega'lek mbo pugwi, eekwi paga oone lek arigin me, eeruwok aret o,” yinuk, yereegwaarak me,

Yeremiya 3:10

An nen Iterali eeppiige abok aret it ugun-ugun eekwi inawuluk Yekura nogo nen inigen iige nagagerik, iyokan neya wagagerak kwe, iniki abe paga woroolik o. Ata, neya wage yuwak wagagerak o,” yinuk, Aliku ALA nen an yo'negerak.

Yeremiya 42:18

At Omaawi Lombok Menggerak Iterali inogoba Aliku Ala nen yegerak nogo yi aret. It Yerutalem wonogogwaarak nogo nanini inom, niniki aagi inom, inoba piyareegi kwak, it o Metit namenggaarak wonogwe iigak, nanini inoba piyaagin o. Inoba piige neenok, Aakumi pulunik aret, yogwe, inamineeri ne agan nage iigwi, inendage kumbunuk pulunogo piigwi, meek eerogo piigwi, eeko logogun me, inanggween yi, inigen ambinom kaagun mondok lek,” yegerak me, yokkiragi o.

Yetikiyen 23:32

At Aliku Itok Menggerak ALA nen yegerak nogo yi aret. “Oweeluk aniyoowak ti, ambe nggwok o'lu warak lombok eno korok togon toolak wonage me, awuluk aret nagin o. Ti nengge kenok, aakumi nen miyuk-meya eerogo pugwi, Ha! yinuk, agi'ndok kanggwi, eerugun o.

Yetikiyen 36:20

Yi aakumi ndi aakumi inenggela'me time arit nogo nogogwaarik, wonogwe iigak, it nogogwam nogome nen yogo logonet, At Aliku ALA apuri yi aret kwe, inanggween wogoragagim nogome nen wumbiigerak yi, iyaanip o, yinuk, yogo nogogwaarak paga nendage abu abe alik leenak wonage nogo, maluk eerogo pogo nogogwaarak.

Ndaniyen 7:25

At nen at Tiyanak Lombok Menggerak nogo meek eerogo pege, at apuri alik leenak nogo aaninggin-paaninggin eerogo piige, eeke logonet, Ndi eyom paga ndogop eeriyak, wone yugu inom, eeko logorak wone yugu inom, mbo punuk, alik koongge logowak nduk wakkage, eeremenggerak me, at Tiyanak Lombok Menggerak apuri alik leenak nogo, eenggime piyamenggerak wonogwe iigak, tahun kenagan eeppunuk, ambi oolo aret eerigin o.

Oteya 11:5

Eeke nagagirak kwe, it inomaluk mbo puurak ineebi mbareegwaarak paga iniyokan o Metit nogwe, Ndi, it aap Atiyut mendek nen inabu'me piinok, wone lengganogo yorogwe, Eeko logogun nogo lek a?

Oteya 11:7

It an napuri nen an abu mbo paniyak kooneegwaarak me, An Tiyanak Lombok Minggirak nendage kumbunuk, Yeenggwa niret o, yinuk, yo'nirimenggaarak kwe, Noone onggo ambi yoraga'lek puk aret arigin o.

Oteya 6:4

It Eparayim mendek ti, an nano eeppiyoorak mbako agaarik? Ndi, it Yekura mendek kunduk, nonggop eerogo piyoorak mbako agaarik o? O wege paga tit nake nagaatik, lek age menggi kwak, Oonikiya konaananggen luurogo pege nagaatik, kubondendok lek age menggi kwak, It iniki kunik ee'nakwi ti, togop aret agaarik o.

Oteya 7:13

It an mbo paninuk nomo agan nogogwaarak me, inabuwa o! An yorage nogo, Eeriyak, ineebi mbareegwaarak me, ineebe lek eerogo piyaagin o. Inagap ndarogo piyaakit lak, ao, mbake kwe, an nenggaanom paga inoone pilit mban yo'nogo menggaarak o.

Oteya 9:3

Aliku ALA nen kit Eparayim nggween wokkiragagim nogome wonogo logomunggup lek kiniyokan o Metit nogwe, Ndi, o Atiyut time nen mbi ogole warak mendek nunggwi, Eeko logomunggup o.

Oteya 9:4

Kit o time logonet, Aliku ALA ake anggur amburu kilirogo pumunggup lek o. Ndi, at ake warogo wogogwi nogo kunduk, ale'nggen nen waagin lek mban. Ake warogo wogorumunggup ti, aakumi kanggwi iinok, inabugo laago larogo nonggo mengga kwak aret me, Nunggwi kiinok, maluk eerogo patumunggup o. Kit at ake pi wogwe nogo, at waagin lek kit kinalik kinake aret me, Aliku ALA awi wurik me pi unggugup o.

Oteya 9:6

Kit kineebe lek eerogo pinagagwi me nen kinagap ndakko'nok mbaganumonggotak kwe, It Metit mendek nen kineebe kuwak eerogo pinagagwi, Ndi, it o Membit mendek nen kineebe kinoorogo nggween taambinagagwi, Eerugun me, Kinamendek onggo nggwok mbuti perak yumbunogo pomonggotak nogo paga iri'ngga taanogo pege, Ndi, kinawi wurik me alok yinik-kunik eerogo pege, Eerigin o.

Maleyaki 3:13

Aliku ALA nen ari logonet, “Inoone andiigwi yo'nogo logonet kwe, Nit ninoone andiigwi ngge yogoorak me, yigi, yinuk, yogwe iigi o.

Maleyaki 3:14

Inoone andiigwi yo'nugwi nogo ti, At ayuk wuko logonet, alut eeko monggoorak nogo ti, we aanom warogo aret eeko monggoorak o. Yogop ee'nu ndogop ee'nu, at yo'nirage nogo eerit nugwi, at Omaawi Lombok Menggerak Aliku ALA enegen kagak, maluk eeko nogogurak paga niniki wakko'net nogwe, eeko monggoorak nogo ti, nano eekkolaawok nduk, eeko ogoorik? Lek aret o.

Matiyut 12:36

Aakumi inoone liippaka'lek logonet, agan nugu menggaarak nogo abok aret peebi inowak looninaburak eyom paga wone onggo paganogo yorugun aret me,

Lukat 8:13

Ndi, yugum eeri paga wambit nagagerak nogo ti, it aakumi Ala wone konembunuk, inale'nggen logonet, Ala wone waganggo nagaatik, luulu abet mbakwi kwe, inikime awi liirogon yakkoloolik me, peebi iniki abut mbangge eyom paga mbo pogo menggaarak nogo aret o.

Yakobut 3:5

Ti pogom ninamili aret o. Nineenggi-niniyok nggwok kagak, ninamili mbuuluk nogo nen yogootak paga ndugwi nggwok wigak ari menggerak. Kani anggen mbuuluk nen tekkani nggwok nengge menggerak nogo abe'nip o.

Wayu 13:5

At nggeewo anini warak niyome nen wundi wagaarak nogo tut 42 penengge kagak, wogoppake logonet, Ala miyuk-meya eerogo pege, ndi, wone lengganogo yorage, eeke logowak nduk, waalo nggwok nogo nen awone kilirege kagarak.