Oroma 8:11 - Ala Wone Peenok Peebi Mbanak

¹¹ Ndi, kanggo menggam nen Yetut eenik agago mippereegerak at Ala Aberiniki nogo kinikime wonage kenok, at Keritut eenik agago mippereegerak nogo nen Aberiniki wokkiragagerak kinikime wonage nogo paga kit kanggo monggotak mendek aret kwe, kineenik agago mippinagagin o.

Oroma 8:11 ပူးပေါင်းရင်းမြစ်များ

Yetaya 26:19

It kat kapuri kambeegwaarak nogo perak, ineenik ogwe, Inowak nggininik abok aret mi'nogwe, Eerugun me, Kit aap nggween taambinagareegwaarak wonogwe yi wae. Kineenik a'nuk, kinale'nggen nen keekok yogo logonip o. O weege kagak konaananggen nen iri'ngga-kale'ngga ki eerogo pege menggi kwak, It kambeegwaarak nggween taanak wonogwe nogo ngget nda'nogwe kwak ineenik agago mippiyaamunggun o.

Yetikiyen 37:14

An Naberiniki inikime mambiige neenok, ineenik aremenggaarak piya nage logomenggirik, it inanggween paga time logowak nduk, teppiyaagin o. Ti eeke neenok, Nit eeppinaniyak Aliku ALA yereegerak nogo aret eerogo pinaneegerak kogo o, yinuk, Naliku ALA an aret ineenu arugun o,” yinuk, Aliku ALA nen aret an yo'nereegerak o.

Yaya 14:17

It o nggween paga yime menggaarak nogo nen Aberiniki inigen kogwe, ndi, eeke yelok kogwe, eeka'lek me, it at eebe woorak ti meek o. Kit perak, at kinom wonage, ndi, peebi, kinikime logogin me, eebe kineenu aret o.

Yaya 5:21

Nogoba nen aakumi kanggaatak ineenik agago mippiige menggi kwak, aput an niniki nen aap ambi eenik eeppuurak mbake kenok ti, eenik agago mippigin aret o.

Nappiigak 2:24

at kanggo menggam time mondok tebenak logorak meek me, kambunuk nogo menggam time yagan wake logokwak Ala nen eenik agago mippegerak o.

Oroma 16:10

Keritut iniki kunik logonet, liirogon eerit nage kage nagarak at Apelet nogo keyage wappege, at Aritobulut apurilogwe inom keyage wappiige, eeki o.

Oroma 16:3

“At Akwila akweeluk Piritikila imbirak an ninom ndak-ndak Keritut Yetut ake eeko nogoorak nogo keyage wappiigi o.

Oroma 16:7

It Andoronikut Yuniyat imbirak an awo Keritut abet mbaka'lek neegak, it aa'nduk abet mbakwi, it nappiigak inenggela'me inoweewi tiyanak aret wonogwe, ndi, it an ninom keele maarogo mambinaneegwaarak wonogwe, eereegurak paga, it an noreewi lombok aret me, keyage wappiigi o.

Oroma 16:9

Keritut ninom kunik logonet, ake eeko monggoorak at Urabanu inom, niniki kunik at Itakit inom, imbirak keyage wappiigi o.

Oroma 6:12

Togop me, kinagabolo kanggo monggotak mendek kagak kiniki nen nengge nogo mugurok nogo logonet, maluk eeriyak mban eekkinake kero, tebenogo pegak eeko logonip o.

Oroma 8:1

Togop kenok, nit Keritut Yetut ninom kunik monggoorak me, “Kit maluk eekotak me, onggo eeppinagagin o,” yinuk, yo'nirage mondok lek o.

Oroma 8:12

Togop me, noreewi o. Nit ambi eeriyak ninoba agaarik o. Ninoba wonage ti, niniki maan mendek nen eeriyak ee'ninake kenok, mugurok noorak lek o. Ata, Aberiniki nen yo'nirage kenok mban eeko logorak ninoba wonage ti aret.

Oroma 8:2

Keritut Yetut ninom kunik me, at nineenik ee'ninake menggerak Aberiniki nogo nen ari kenok mugurok nogwe niinok, “Maluk eeriyak,” yo'nirage wone yugu inom, maluk eekwi iinok, kanggo logorak wone yugu inom, nit ambinom ee'ninake kero, wondet agago pinaneegerak.

Oroma 8:9

Togop kwe, kit yi perak, kiniki maan mendek nen eeriyak eekkinake kenok eekwi lek o. Ata, Ala Aberiniki kinikime wonage kenok, Aberiniki nen yokkirage nogo mban eeko monggotak kiigi o. Ndi, Keritut nen Aberiniki nappi wagagerak nogo kinikime wonage lek kenok, kit Keritut apuri lek o.

1 Korindut 15:16

Ndi, it aakumi kambeegwaarak nogo, peebi ineenik eerogo mippiyaagin lek mbakwi kenok, at Keritut kangge nagagerik, eenik agagerak nogo eenik arulik mondok-mondok kambeegerak mbako logonetak.

1 Korindut 6:14

Ala nen ninowe eenik agago mippereegerak me, nit kunduk, at omaawi paga nineenik agago mippinanigin o.

2 Korindut 4:11

Nit ninagabolo kanggwi yi paga, Yetut nggween paga logonet eeke nagagerak aakumi kin kaawak nduk, nit nineenik awo wonogwe yi, Yetut eereegerak wone agan nugwi paga ko'lu-kii'me nineebe ninookwi iinok, kanggwi negen aret eeko ogoorik o.

2 Korindut 4:14

At ninowe Yetut eenik agago mippereegerak nogo nen peebi nit ndak-ndak nineenik agago mippinanege logomenggerik, Yetut ninom logowok nduk, kit ninom at owagam pinani nagin nineenu me, obeelom wone ti, mondok abet mbako logonet, yogo ogoorik o.

2 Korindut 5:4

Nit ninagabolo maan mendek yi, “Nineebi o,” yinuk, mbo punuk, we ninagap mbelanak logorak mbakwi lek o. Ata, nabelan-kabelan eeppinanege logonet, ngget mendek mbet-mbet yippinanuwak lak “Ao,” mbarit nogo logonet, ooliya maan wurik yi paga aaninggin kagak aret nogo ogoorik o.

Nggalatiya 6:8

kit kiniki maan mendek nen eeriyak eekkinake nogo, eerit nugwi kiinok, anggen yugu maluk mendek mbanggologwe nogo kokwak, kineebe aret kambumunggup o. Ndi, Aberiniki nen yokkirage nogo mban mugurok nogwe kiinok perak, anggen yugu abe mendek mbanggologwe ti pogom, mondok-mondok kineenik aret logomunggup o.

Pilipi 3:21

Wambi wage logonet, at omaawi paga yi mendek ndi mendek abok aret at abu'me logowak nduk, tebemborogo menggerak nogo paga nen ninagabolo maluk pili age menggerak mendek yi, nggonenogo mbo punuk, obaane'me at agabolo mondok alik ngget mendek nogo aret yippinanigin o.

Iberani 13:20

Ndi, yogondak abu aret o, noreewi. Nit niniki ugun tayenak ale'nggen logowok nduk eeppinanege menggerak Ala nogo nen wone koonogo yo'niragagerak nogo, “Mondok-mondok eerigin o,” yinuk, abet mbako logowok nduk, ndomba mondok liirogon ndegenninake menggerak ninowe Yetut nogo, ninake amiya kili'nage mbareegi, kambunuk nogo menggam nen eenik agago mippereegerak me,

1 Peterut 3:18

Nit maluk eekwi nogo abok aret lek eerogo pikit nduk, at Keritut ne ambit paga aret kambeegerak. At maluk eekeelik obeelom mban eeke menggerak nogo nen, nit obeelom eekwi lek maluk mban eekwi nogo, Ala abu'me pinanikit nduk at eebe aap aret age mbareegi, warogo pereegwaarak nit ninake aret kambeegerak kwe, Aberiniki nen eenik agago mippereegerak.

Wayu 1:18

Neenik nitok minggirak an aret o. Aa'nduk kambeegirak kwe, yogondak perak, neenik mondok-mondok wonage yi neyet o. Kanggwi inom, kambunuk nogo menggam inom, imbirak an mban aret unde logonet, tu paaka kunci porogo minggirak o.

Wayu 11:11

Kage nagarik, nenegen neegak, nogo kenagan yippunuk, o ambi weegerak liingge paga Ala nen ambebubu aap mbere nogo inikime mambiige mbaki, it apit inigen iigak, ineenik a'nuk, mi'nogo mbaka, mbogut paga nen oone nggwok ari logonet, “Lagi wa'nip o,” yorage mbaki, inaruk konembunuk, “It op kangga o,” yinuk, inale'nggen mbakwi nogo inigen iigak, ndugwi enggela'me mbogut paga laganggwi iinok, aakumi nogo nen, “Ia!” yinuk, iniki ma'nogo logonet, inagabiti ambik ogwe iigirak.