Oroma 7:7 - Ala Wone Peenok Peebi Mbanak

⁷ Ti kenok, nit wone nonggop yuwok mbakop? Ala wone yugu Muta liiru mbaneegerak nogo ti, maluk aret mbakop? Mondok lek o. Wone Muta yo'netak lek en, an maluk eeke minggirak neenu a'netak lek o. Wone yugu ti paga nen, “Uugwe-uugwe eerugup o,” yenetak lek nen, an uugwe-uugwe mbake ti, neenu a'netak lek o.

Oroma 7:7 ပူးပေါင်းရင်းမြစ်များ

Wakkagagerak 3:6

Yoge mbareegi, at kwe nogo nen eyo ti pekkage nagagerik, abu obeelom aret mbareegi, “Anggen yugu ti, noorak op aret o. Ndi, nengge neenok, yi wone ndi wone abok aret neenu arigin,” mbake nagagerik, eyoonggen nogo aret mbanogo nenggegerak. Nengge nagagerik, ando aap nogo wogoge mbareegi, aret nenggegerak.

2 Tamuwen 11:2

Nogome logonet, ne ambi paga oonegen kilu yi nage kagak, at Ndawut nogo, nogo yege nagagerik, eenik a'nuk, endagembogut awi o nggwok abe wurik nogo yugum paga ndoonogo maarak awe aago paga nege-wege logonet, kwe ambi abu kigirikwe ngguu'mo wake enegen kagagerak.

Ndawi 119:96

Yi mendek ndi mendek abu obeelom wonage Mbako menggaarak nogo ti, Abu obeelom lek kagak obeelom aret mbakwi kwe, Koone, “Yogop ee'nu ndogop ee'nu,” yugu nogo perak, Maluk ambi lek abu obeelom wonage kage minggirak o.

Wundeegwaarak 20:17

Aap ambi awi wurik a, akweeluk a, ayeloman kumi-aap a, aanggumi lembu-keledai a, amindik-amendek abok aret kiniki nen uugwe-uugwe mbariyak mage o,” yinuk, wone ti abok aret at Ala nen aret yoragagerak.

Mika 2:2

It nen aakumi ineyabu eerak uugwe mba'nuk kologwe, Inawi wurik uugwe mba'nuk tebenggologwe, Inawi wurik inom, inoreewi ineyate pugu inom, ndinggologwe, Eeko menggaarak.

Matiyut 5:28

an nen perak, Yi aap ndi aap kumi inigen pegiigo nagaatik, iniki nengge kenok ti, muk inikime nen wukaarak aret, yokkiragi o.

Lukat 12:15

Yoge nagagerik, Yetut nen aakumi yorage logonet, “Kinamendek apit wonage nogo paga kineenik eeko logorak lek me, uugwe-uugwe mbakwi kiyo, kiniki tum wako logonet, liippogo logonip o,” yoragagerak.

Lukat 20:16

Lek o. Wage logomenggerik, it eyabu arum wonogwe nogo inoorogo piinok, inobaane'me it aap alik arum logowak nduk, mippiya woraagin o,” yinuk, yoragagerak. Yorage nogo it aakumi konenggo nogogwaarik, “Togop eeriyak mage o, ninogoba.”

Nappiigak 20:33

Kit kinawu mbuti perak emas inom, kinambogoyum inom, an uugwe mbake logolik o.

Oroma 13:9

Ala nen, “Kumi ugun wurinaburak mage o. Aap wariyak mage o. Yogoot kiraariyak mage o. Aap inamendek uugwe-uugwe mbariyak mage o,” yinuk, “Yogop ee'nu, ndogop ee'nu,” yereegerak wone liiru mbanak nogo eeko logonet, eeko logorak wone yereegerak alik ambi inom abok aret ti, “Ineebe iniki kunik eekkologo mengga kwak, it inom menggaarak ti, togop aret iniki kunik aganako logowak o,” yinuk, yereegerak wone lambuk togon yi paga mban wonage kenok, yokkirage agarik o.

Oroma 3:20

Togop me, Ala nen wone lengganogo Muta yoreegerak eekwi paga Ala nen, “Kat aap obeelom aret o,” yinuk, yigin lek aret. Ata, “An maluk eeke minggirak aret kagi,” yinuk, yelok kogo logowak nduk, lengganogo Muta yoreegerak o.

Oroma 3:5

Nit abe koonak eeka'lek maluk eekwi paga nen Ala abe koonak mban eeke menggerak yelok kogwe kenok, nit nonggop yuurak mbakop? “At Ala anini nen maluk ee'ninake ti, at liippinanega'lek logonet, eeppinanege menggerak kogo o,” yinuk, togop yoriyak op mbakop? An yagi ti, aakumi yogo mengga kwak yagi o.

Oroma 4:1

Togop me, wone yi, nit aakumi ninombo Abarakam eereegerak nogo nonggop yuwok o?

Oroma 4:15

Ala wone yugu liiru mbanak wonage ti paga nen, Ala anini ninoba pinanege, kogo monggoorak kwe, wone yugu ambi lek logonetak en, “Maluk eekendak o,” yinuk, yo'niraga'lek aret logonetak.

Oroma 5:20

Ala nen aa'nduk Abarakam wone abok yoreegerak nogo eekwi iigak kwe, peebi wone ambinom Muta yoreegerak nogo ti, it aakumi nen, “Mu-mage agan nege yi, kagak eeginombaawok,” yogo logonet, Ala wone taganogo pit nogo logowak nduk, Muta wone peebi yoreegerak. Ti eerit nogo logonet, maluk nggwok eerit nogwe iinok, Ala nen inabuwa nggwok togon mbake nagagerik, iniki kunik nen obeelom eeppiinet nege nagagerak.

Oroma 6:15

Togop me, nonggop eeruwok o? Ala nen Muta yoreegerak wone nogo, nit eekwi lek o. Ata, Ala iniki kunik en onggo lek we aret obeelom eeppinanege kagak eeko monggoorak me, nit maluk eeko logorak op mbakop? Mondok lek o.

Oroma 7:11

Maluk alom niniki me wonage nogo mi'na'nuk, wone eeriyak mage yugu nogo konembunuk, nambokan lagangge logonet, “Wone yugu nogo taganogo punuk maluk eeriyak nanonggwan agaarak me, eeru o,” yinuk, yo'nege kenok eeke minggirak me, wone yugu nogo nen aret noorogo negen paneegerak agarik o.

Oroma 7:13

Ndi, noorogo negen paneegerak nogo ti, wone yugu obeelom nogo nen an noorogo negen paneegerak mbakop? Abu lek o, noreewi. Ata, an maluk eeriyak ee'nake nogo ti, maluk aret yelok kaakit nduk, wone obeelom yugu nogo nen, “Kit maluk eekwi kiinok kambumunggup o,” yinuk, yereegerak nogo paga kambigin neenu agagirak me, “Eeriyak mage,” wone yugu nogo ti paga, “Maluk eekwi ti, abu maluk aret me, kambigin aret kagi,” mbarikit nduk, yo'nirage menggerak kogo o.

Oroma 7:5

Nit niniki maan mendek nen yo'nirage kenok, eerit nogo logonet, Ala nen Muta wone yoreegerak nogo konembunuk, “Niniki nen nengge nogo eeruwam, Mu-mage, yo'nirage yi, nineebi a,” yinuk, ninanini mi'nage kenok, maluk ugun eerit nogo nogogurak anggen yugu ti, kambit nogo nogogurak ti aret.

Oroma 7:8

Wone togop ye'netak lek nen, maluk eeriyak ee'ninake nogo ti, “Maluk aret kagi o,” yinuk, mbako logonetak lek o. Ala wone Muta liiru mbaneegerak paga nen, “Uugwe-uugwe mbariyak mage o,” yereegerak ti, neenu logonet kwe, maluk alom niniki me wonage nogo nen mi'na'nuk, “Uugwe-uugwe mbariyak nanonggwan kagak mu-mage mban yo'nege yi, neebi a,” yinuk, wone yugu nogo taganogo punuk, uugwe-uugwe mban mbarit nege nagagirak.

1 Korindut 15:56

Aakumi kanggwi iinok, inooriyak amburu andiigwi kwak, niniki me andi kogwe ti, maluk alom ninikime wonage ti nen aret. Ndi, nit maluk eekwi nineenu ee'ninaburak alom nogo ti, wone Muta yoreegerak aret kwe,

Epetut 5:3

Kit Ala apuri ake leenak aret kagak, kumi ugun wurinabit nugwi, kiniki kumi paga mban lunik logonet, ugun-ugun eerit nugwi, uugwe-uugwe mbakwi, eerit nugwi kiinok, it aakumi ando nen, “Ala apuri aret kwe, maluk eekwi iyaanip o,” yinuk, kinombakwi iyo, liippunuk, eeko logonip o.

Pelaareegerak 5:21

Aap ambi akweeluk a, awi wurik a, eyabu yarak a, ayeloman kumi-aap a, aanggumi lembu-keledai a, amindik-amendek abok aret kiniki nen uugwe-uugwe mbako logorak mage o.

Kolote 3:5

Togop me, noreewi o. Kumi ugun wurinabit nogwe, kiniki kumi paga mban lunik nugwi, kiniki nengge nogo mugurok nogwe, maluk eeriyak mban kinikilom mbakwi, yi mendek ndi mendek koloorak uugwe mba'nuk, tiyappugwi nogo ti, kugiwak alut eekwi ndak-ndak me, uugwe-uugwe mbakwi, eeriyak mage o. Ti eerit nogwe kiinok, Ala anini abet aret kinoba pinagarak me, ti eeriyak eekkinake nogo abok aret mondok warogo wuppogo logonip o.

Yotuwa 7:21

Kugun wogo yum nggorek kigirikwe o Mbaben mendek penggaarak abe mendek inom, wu mbuti perak aaninggin mbere wakkaanuk, ambi oolo negen ari nage inom, mbuti emas aaninggin ambi oolo negen ari nage nogo inom, an nen nenegen kage nagarik, uugwe nen wagangge nagarik, nawooliya wurik me nggween kabunogo mbuti perak nogo abena pege nagarik, ando ogombaga kumaappigirak wonage o, nogoba.”