Oroma 12:3 - Ala Wone Peenok Peebi Mbanak

³ Ala nen, “At yi, an noone yoranet nege logowak o,” yinuk, iniki kunik en onggo lek we aret unde eeppaneegerak nogo paga kit abok aret wone ambi yokkira o. Kit obeelom wone abet mbako mbareegup, Ala eyabu eeko logobagip nduk, kinalitak lombok unde eeppinagareegerak nogo, liippunuk, “An yi aret unde eeppanegerak kagi,” yinuk, ndak-ndak eerit nogo logonet, kat mbuuluk unde eeppagareegerak kagak, “An iya lombok unde eeppanegerak kagi,” yinuk, wogoppako logogup o. Ata, “An yi aret wo'negerak me,” yinuk, kiniki tebenak logonet, eerit nogo logonip o.

Oroma 12:3 ပူးပေါင်းရင်းမြစ်များ

Kini Wuppiige 25:27

Nggiin amburu ambik nenggak yuurak ti maluk aret o. Ndi, aap ambi endage tiyappuwak nduk, oone ambik agan nage ti kunduk, maluk aret o.

Kini Wuppiige 26:12

Aap ambi iniki lek kagak iniki warak ombaruwak nduk wogoppake nogo kage menggendak ilik, lek a? Aap iniki abe wi nen iniki warak eekkoloorak ti, op negen kwe, aap ti perak, iniki warak eekkoloorak abu meek aret o.

Wone Alom Kibingga 7:16

Togop me, kat kenggaawak lek eekkoloorak mbaken? Lek me, “An abu obeelom lombok logokit,” mbake, Ndi, “Niniki warak ambik lombok eekkolaakit,” mbake, Eeriyak mage o.

Mika 6:8

Nit aakumi yi, obeelom eeko logorak ti, Aliku ALA nen muk yo'niragagerak o. Ndi, Aliku ALA nen eeko logorak ninombake nogo ti, ngge o? Lek o. Nit eeko logorak ninombake nogo ti, a'me nggelok eeppiinet nugwi, Aakumi inabuwa mbako logorak ninikilom mbakwi, Niniki tebeppatinuk, ninogoba Ala mugurok nogwe, Eeko logorak ninombake ti aret o.

Lukat 18:11

Imbirak Ala awi wurik me unggwi nogo nogogwaarik, aap Pariti nogo nen mi'na'nuk, tamban eekkolage logonet, Ai, nogoba Ala! It aakumi yogoot wagangga inom, maluk eeka inom, mbabi eeka inom, ndi, aap o unde inake wu kuwak eeka yi nogo inom, an togop kwak lek me, wa yokkege agarik o.

Yaya 3:34

At Ala nen nappi wagagerak ti, Ala wone mban ari menggerak. Ala nen at Aberiniki wogoge logonet, ambi eeriyak kenok, abok endak mban eeke logowak nduk, wogoreegerak.

Oroma 1:5

Ninowe Yetut Keritut eereegerak paga, Ala iniki kunik en eeppanege kagak, it yi aakumi ndi aakumi abok aret iniki abet mba'nuk obeelom wone liirogon woppunuk, eeko logowak nduk yoranet nage, Yetut Keritut endage nggwok aruwak nduk, tiyappit nage, eeke logokit nduk, an neyabu nappiigak mendek agago paneegerak.

Oroma 11:20

Kit mbakwi ti abet aret kwe, it abet mbaka'lek iinok, pendenogo nappiyareegerak. Ndi, kit perak, abet mbakwi paga kumbinagareegerak wonogo logonet, kiniki wogoppatugup o. Wogoppatumonggotak paga pendenogo nappinagukwak, mondok kinagabiti mbako logonip o.

Oroma 11:25

Nowe-nawot o. Wone ambi kote kumaarak wonage yi, kineenu arubagip nduk, yokkira o. Ala nen it Iterali mendek inogogumbuk aruwak nduk, eeppiyareegerak nogo ti, mondok-mondok eeppiyareegerak lek o. Ata, it aakumi endekem mendek, “Aap ndogop ineenggi nabu'me piyaagin o,” yinuk, koonogo pereegerak nogo, kuli abu aret ari nage kenok, it Iterali inogogumbuk wonogwe nogo yanggonogo piyaagin o. Wone kote kumaarak nogo ti aret me, “An iya,” yinuk, wogoppako logogup o.

Oroma 12:16

Kinoreewi kinom kiniki ambit eeppunuk, eerit nogo logonip o. “An iya,” yinuk, “It aap inendage lek ninom eeriyak nineebi o,” yuurak mage o. Ata, kinom aret eerit nogo logonip o. “An abu neenu me, an iya,” mbako logogup o.

1 Korindut 15:10

Togop me, at Ala nabuwa mba'nuk, eeppaneegerak nogo paga yogondak nobaabut alik eerit nage neego ogotik o. Ala nabuwa mba'nuk, eeppaneegerak nogo ti, we aanom warogo eeppanulik o. It nappiigak ando nogo ti, we mbuuluk iya negen eeko nogogwaarak kwe, an perak, mondok iya lombok eeke nagagirak. Ti eeke nagagirak nogo ti, an nen ta lek o. Ata, Ala nabuwa mba'nuk, eeppanege kagak, niniki aganggen kerek togon eeke nagagirak me yagi o.

1 Korindut 3:10

Ndi, an eerit nage logokit nduk, Ala iniki kunik nen unde eeppaneegerak nogo ndak-ndak eerit nage logonet, aap eenggi paalo aago o wuke menggi kwak, an o eyak liirogon wuppit nagagirak nogo paga, it aap alik nen eebe aret wukwi me, it inalitak eebe wukwi nogo nen ugun-ugun wukwi iyo, an eyak wuppereegirak nogo paga mban iniki liippunuk, eebe aret wuko logowak o.

1 Korindut 7:17

Ala nen, “Aap ti, togop logowak o,” yinuk, koonogo pinagareegerak nogo togop aret logonet, ambi eeko logobagip nduk, unde eeppinagareegerak nogo ndak-ndak aret eeko logonip o. It Ala apuri kuwak eerit nogo menggaarak nogo, wone ambit ti mban aret lengganogo yorage minggirak.

2 Korindut 10:13

Nit nineebe nen aret Ala wone yora naga'lek kenok, we ugun, “Nit ninapuri aret o,” yinuk, yugun lek o. Ata, Ala nen, “Time aret yora nogo logonip o,” yinuk, yo'niragagerak nogo time nanuk, liirogon yorogwe niigak, obeelom wone waganeegwaarak nogo kenok mban, “Yi nit ninapuri aret me op eeko o,” yinuk, niniki ale'nggen mbako ogoorik. Ndi, “O Korindut kunduk yora nanip o,” yinuk, yo'nirage mbareegi, liirogon yokkirogwe niigak, obeelom wone waganeegutak me, “Kit kunduk, ninapuri aret o,” mbako logonet ninale'nggen mbako ogoorik o.

2 Korindut 12:13

It Ala apuri yi awi ndi awi kuwak eeko menggaarak eeppiinet nage nagagirak nogo kwak, an kit ngge eeppinaga'lek neenok, yogo ogotik? Kinake eerit nage logonet, “Onggo wo'ninip o,” yinuk, yokkiroolik eekirak ti perak, maluk eekirak aret kagi o.

2 Korindut 12:7

Alik tam warak aakumi kogolik mendek nenegen kagagirak nogo paga, “An iya o,” yinuk, wogoppatit nage neyo, Ala nen andi ambi nagabolo paga alok negen ngguurogo paneegerak ti paga Ibilit awot ambi wage nagagerik, wogoppake neyo, nenggali wappanegak mban eeke menggerak o.

Nggalatiya 6:3

Kit aap iya lek kwe, “Nit iya o,” mbakwi kiinok, kit aret kinambokan laganggologo ogotik o.

Epetut 3:2

At Ala nen iniki kunik ee'nake logonet, kit obeelom eeppinagawak nduk, unde eeppaneegerak nogo ti, kit muk kineenu o.

Epetut 3:4

kit pekkogo logomonggotik, an Keritut agote wone nonggop togon liippereegirak nogo kineenu arumunggup o.

Epetut 4:16

Nineenggi-niniyok yeregerak-peregerak abok aret eeriyak ake punik alitak lombok wonage kwe, nineebe ambit ninomanggen paga yinik-kunik eerak logonet, eerit nage kenok, nineebe mondok op aret menggerak nogo kokwak, nit Ala apuri ninanobak kwak Keritut ninom togop aret kunik me, niniki-kiniki kunik eeko logonet, ninalitak eeriyak unde eeppinaneegerak nogo ndak-ndak eerit nugwi niinok, Keritut eebe mondok obeelom aret logonet, nit nineebe paga wiganit nage logogin.

Pilipi 2:13

At Ala nen eeriyak inikilom mbake menggerak nogo, kit nen, “Eerikit,” mbakwi, ti'nuk, eebe aret eekwi, eekwi nogo ti, Ala nen mban aret koonggirage menggerak.

Kolote 1:29

Kiniki mondok kole ogwe kiyaakit nduk, Keritut omaawi mondok alik negen eeppanege kagak, an puk aga'lek kit kinake mondok nggwiirit-nggwaarit eeke agarik o.

Kolote 2:13

It aakumi inagabolo mbanogo nappogo mengga kwak, kiniki maan mendek nen maluk eeriyak eekkinake alom nogo omaawi awo lek eerogo pega'lek logonet, yi maluk ndi maluk eerit nogo nogogutak paga kambak kwak aret wonogogutak kwe, “Yogop ee'nu, ndogop ee'nu,” wone yugu liiru mbanak ndak-ndak nit eeka'lek niinok, Ala nen, “Maluk onggo ndogop eeppiyaakit o,” mba'nuk, eenggi lingginogo liiru mbaneegerak aaninggin kinoba wonagagerak nogo, “Mondok mbo pikit o,” yinuk, liiru mbanak nogo Keritut inom eyo karo-karo paga nabenogo punuk, kinomaluk tigitogon lek eerogo pege nagagerik, Keritut kinom kineenik agago mippinagareegerak.

1 Timotiyut 1:14

Ninowe Keritut Yetut ninom kunik me, iniki kunik nen obeelom eeppanegak mban eeke logonet, an Ala wone abet mbarikit nduk ee'nake, ndi, aakumi niniki kunik aganabikit nduk ee'nake, eereegerak.

1 Timotiyut 2:15

Kwe nogo maluk eereegerak ti kwe, it kumi nogo iniki warak logonet, Ala wone abet mbakwi, aakumi iniki kunik aganakwi, ndi, maluk eeka'lek Ala ake leenak wonogwe, eekwi iinok perak, it inaagalogwe ndaganakwi iigak, Ala nen inagap ndaganake logogin o.

1 Timotiyut 2:9

Ndi, it kumi iniki warak nen inayum-inagali liirogon yikkologo mengga kwak, yi kumi ndi kumi abok aret iniki warak a'nuk, togop aret inayum-inagali nggirik-nggerok liirogon aret yikkologo logowak o. Ineeruwak awi wuppunuk laanggwi, mbuti abinakwi mendek yirikwi, eyoonggen laambu kigirikwe nogo mendek yikkologwe, ndi, yum onggo nggwok kenok mban kunogo yirikwi, eekak yuurak ti mage o.

Titut 2:12

Ninogoba nggwok Ala ninagap ndaka Yetut Keritut, “Wi!” ugwi iigak, kin ari woroorak nogo, nit niniki lunik logonet, ninale'nggen paga tokkogwe me, Ala iniki kunik nen yo'nirage logonet, “Kit o nggween paga yime Ala kinagabiti mbaka'lek maluk eekwi inom, nggween paga eeriyak kiniki nengge inom, mbo punuk, kiniki warak a'nuk, maluk eeka'lek obeelom mban logonet, Ala wone liippunuk, mugurok nogo logonip o,” yinuk, yo'nirage menggerak.

Titut 2:2

It aap inanggok ti, iniki tum waka kenok, inayuk warak kenok, iniki warak kenok, it iniki abet mbakwi nu'lek menggaarak kenok, aap togop mendek logowak nduk, yorage logot o. Aakumi abok abet aret iniki kunik aganakwi, ndi, aaninggin inoba age kenok inogogumbuk logonet, waganggwi, eeko logowak nduk, yorage logot o.

Titut 2:4

Ala wone miyuk-meya eerogo pukwak, it kumi ndugum nogo nen inogonggelomini inom, inaagalogwe inom, iniki kunik aganakwi, iniki warak ogwe, inoreewi inabuwa nen inigen tebenak nugwi, iname liirogon wonogwe, kumi iniki obeelom logonet, inogonggelomini inabu'me tebe yinuk, inoone konenggwi, eeko logowak nduk, it kumi inanggok nogo nen kumi ndugum mamunirogo logowak o.

Titut 2:6

Ndi, it wologwe tawe ti, togoti aret iniki warak logowak nduk, inaruk wake logot o.

Yakobut 4:6

Aberiniki iniki togop aret wakkolage kagak kwe, maluk mbo puwak nduk, Ala iniki kunik nen eeppinanegak mban eeke menggerak. Ti kenok, Ala nen ari logonet, “It aakumi iniki wogoppako menggaarak nogo, an nen tebenogo piige minggirak kwe, Iniki tebenak menggaarak nogo perak, niniki kunik nen eeppiige minggirak o,” yinuk, yereegerak Ala wone liiru mbanak wonage o.

1 Peterut 1:13

Togop me, nowe-nawot o. “Peebi at Yetut Keritut wage eyom paga Ala iniki kunik en obeelom eeppinani woraagin o,” yinuk, wone ti paga kiniki mondok lunik logonet, li'luk agago punuk, kinagaket paga logonip o.

1 Peterut 4:11

Yi eekak ndi eekak eeko logonet, ninowe Yetut Keritut eereegerak paga at Ala endage tiyak yuwak nduk, kit ambi nen Ala wone yoroorak mbakwi kenok, Ala ari menggerak wone nogo aret yorogwe, ndi, ambi nen aakumi yeenggwaarogo logorak mbakwi kenok ti, Ala omaawi eeppinagage kagak yeenggwaaranet nogwe, eeko logonip o. At Ala ti, abu tiyanak mondok-mondok ayuk warak logowak o. Amin!

1 Peterut 4:7

O age yobok paga eeriyak abu koorok panggo yi wagaarak me, tamban eeko logobagip nduk, kiniki kwi'ndak nu'lek logonet, kinagaket paga logonip o.

1 Peterut 5:5

Togop me, kit aap tawe nen eeko logorak wone ambi yokkira o. Kinogobamini nen inoone yokkirogwe iinok, kinaruk liirogon konembunuk eeko logonip o. “It aakumi iniki wogoppako menggaarak kenok, Ala nen tebenogo piige menggerak kwe, Iniki tebenak wonogwe iinok perak, Inabuwa nen obeelom eeppiige menggerak o,” yinuk, yereegerak Ala wone liiru mbanak wonage me, kit abok aret kiniki tebenak logonet, yeenggwa-yeenggwa eeko logonip o.

1 Peterut 5:8

Kit kinom ogoorak monggotak Tile nogo nen maluk eekkinabikit nduk, nggeewo anini warak pogom nibingginaburak eyak nde agan kwaakkinabit nege me, kit mondok kiniki warak a'nuk, kinagaket paga logonet, tum wakkologo logonip o.

3 Yaya 1:9

Ala apuri time kuwak eeko menggaarak nogo, inake liiru mbuuluk ambi mbanogo nappi wagarak kwe, aap Ndiyoterepet nogo nen, “Inenggela'me an mban tiyanak logokit o,” yinuk, inikilom mbake menggerak me, noone woolik o.