Oroma 10:19 - Ala Wone Peenok Peebi Mbanak

¹⁹ Ndi, ambi yokkira o. It aakumi Iterali mendek obeelom eeppiyoorak wone kobak wonogogwaarak kenok, yokkirage mbako ogotik? Ti lek mban. At Muta nen ari logonet, “It aakumi inendage lek alik mendek eeppiige paga napuri nen, Ao, mbakwi, Ndi, aakumi inanebunu wi-wa mendek eeppiige paga napuri nen inanini ogwe, Eeruwak nduk, eeppiyaagin o,” yinuk, yorage,

Oroma 10:19 ပူးပေါင်းရင်းမြစ်များ

Yeremiya 10:14

It aakumi abok ti, iniki lek wi negen aret agaarik o. It aap mbuti emas paga eeka nen ogut ogobakkigirogo pugwi ti, Oone lek ogut mban ogobakkigirogo pugwi me, inenggali ogo menggaarak.

Yeremiya 10:8

Kugi ogut eyo paga ogobakkigirik aanom warogo alut eekwi ti nen wone mamunirogo menggaarak me, It aakumi ti, iniki apit wi negen aret wonogo agaarik o.

Oteya 2:23

Eerit nage paga nale'nggen kaakit nduk, an napuluk ti, Anggween paga time aret logowak nduk eerogo pege logominggirik, Aa'nduk endage, Abuwa lek, tooneegirak nogo, abuwa nen niniki kunik eeke, Ndi, aa'nduk endage, Napuri Lek, tooninabeegirak nogo, Napuri aret, yorage, Eeke neenok, It nen, Kat ninogoba Ala aret, yo'nogo logogun o,” yinuk, yereegerak o.

Oroma 10:18

Togop kwe, it abok obeelom wone awo konengga'lek aret wonogogwaarak kenok, yokkirage mbako ogotik? Lek o. “It inoone nogo o nggween paga yime abok aret wiganinuk, nage, Iname yoragaatak nogo, o irip-irip ndak wa'narit nage, Eereegerak o,” yinuk, liiru mbanak ti paga it abok koneneegwaarak aret kenok yokkiragi o.

Oroma 11:11

Togop me, ne ambi paga yokkira o. It Iterali mendek nen iniyogobit lik togon eegirage mbareegi, Ala nen peebi wogonaburak lek mondok ambokan mbo piyareegerak mbakop? Ti lek o. It Iterali mendek Ala wone taganeegwaarak paga Ala nen it endekem konenggulik mendek inagap ndake kenok, it nen, “Nit togon ninagap ndariyak kwe, it mban ndaganake, ao!” mbaruwak nduk, eeginabeegerak.

Oroma 11:14

Kit an wone yokkirage nogo waganggwi kiinok, it an nowe-nawot Iterali mendek nogo nen, “Nit togon abet mbaruwok lak, it mban yorage ti, nineebi a,” mba'nuk, it ando iniki abet mbako mbaremengga, “Ala nen inagap ndaruwak lak ao,” yinuk, niniki lunik agarik o.

Oroma 3:26

Togop eereegerak paga, at nen o yogondak irip kunduk eeppinanege, ndi, nit aakumi niniki Yetut oba panggombunuk abet mbakwi niinok, “Aap yi, oba lek o,” yinuk, obeelom agago pinanege, eeke kaawok nduk, eereegerak me, yokkiragi o.

1 Korindut 1:12

Kit nen yogo logonet, “An nogoba Pawulut. An nogoba Apolot. An nogoba Kepat. An nogoba Keritut,” yogo logonet, kinalitak mogonggologwe konengge nagagirik, yokkiragi o.

1 Korindut 10:19

An wone ti ngge nduk yokkirage mbakop? “Obeelom eekkolaabagip nduk, kugi aanggo warogo nonggo logonip o,” yinuk, yokkirage mbakop? Ndi, “Maluk eekkinake kero, kugiwak amili kunggo logonip o,” yinuk, yokkirage mbakop?

1 Korindut 11:22

Wologwe! Kinagi-kinambi nonggo logorak kinawi wurik lek kenok, Ala awi wurik me ugun-ugun eeri unggwogo ogotik? Ndi, Ala apuri kuwak eeko menggaarak meek eerogo piigo logonet, it inamendek lek nogo inenggali kaawak nduk, eeginakwi lek mba'nuk yogo ogotik? Kit togop aret eekwi me, an nonggop yokkira? “Kit op aret eekwi o,” yinuk, yokkiroorak mbakop? Mondok lek o.

1 Korindut 12:2

Kit aa'nduk, Ala wone konengga'lek wonogo logonet, kugiwak nebet-ndalok ariilik mendek kagak, “Ndogop yo'nirage kogo,” yinuk, mugurok nogo nogogutak nogo, kineenu aret o.

1 Korindut 15:50

Noreewi o. An wone yokkirage yi, kit liippatubagip nduk, yokkira o. Ninagabolo nggween mendek yi, nggonengga'lek kagak Ala abu'me piige menggim unggwi nagun lek o. Ndi, ninagabolo pili ariyak mendek nggonenogo mbo pega'lek kagak, ninagabolo ngget mondok logorak mendek yippinanigin lek mban o.

1 Korindut 7:29

Noreewi o. Yogondak o nggween paga yime kogo monggoorak nogo lek ariyak eyom abu koorok panggok yegerak me, yogondak nen, kit aap kinakuwi warak nogo nen kinakuwi lek negen a'nuk, wonogwe,

Pelaareegerak 32:21

Mbo paninuk, nalut eekwi nobaane'me kugi ayuk wukwi iinok, Neebi o, yinuk, niniki laakot inombake, Kugi nen ambi eeppiyoorak lek kagak kugiwak aanom warogo ayuk wukwi iinok, An nanini wungge, Eeruwak nduk, Eerogo paneegwaarak me, It aakumi inendage lek alik mendek eeppiige paga napuri nen, Ao, mbakwi, Ndi, aakumi inanebunu wi-wa mendek eeppiige paga napuri nen inanini ogwe, Eeruwak nduk, Eeppiyaagin o.

Titut 3:3

Nit kunduk, maan togop aret nineenggo'lek wi negen wonogwe, wone yo'niragaatak konengga'lek wonogwe, tu alik me nomo agan nogwe, aap ambi ayeloman yoge kenok, “E o,” yinuk, eeke menggi kwak, nit niniki nengge kenok eeriyak ninikilom mbakwi nogo mban eekwi, eeko nogogurak. Yi mendek ndi mendek eerit nogo logonet, maluk mban eekwi, neebi-keebi yogwe, nanini-kanini yogwe, ti mendek mban eeko nogogurak kwe,

1 Peterut 2:10

Kit maan aa'nduk nen Ala apuri lek aret wonogogutak kwe, yogondak perak, at apuri eekkinabeegerak wonogwe, ndi, kit aa'nduk Ala nen kinabuwa mbake nagagerak nogo kineenggo'lek wonogogutak kwe, yogondak perak, at Ala kinabuwa nen obeelom eeppinagage nogo liippugwi, eeko ogotik o.