Nggalatiya 6:8 - Ala Wone Peenok Peebi Mbanak

⁸ kit kiniki maan mendek nen eeriyak eekkinake nogo, eerit nugwi kiinok, anggen yugu maluk mendek mbanggologwe nogo kokwak, kineebe aret kambumunggup o. Ndi, Aberiniki nen yokkirage nogo mban mugurok nogwe kiinok perak, anggen yugu abe mendek mbanggologwe ti pogom, mondok-mondok kineenik aret logomunggup o.

Nggalatiya 6:8 ပူးပေါင်းရင်းမြစ်များ

Ayup 4:8

Yabu waganggo mengga kwak, it aakumi maluk eerit nugwi, Ndi, awi yubunggo mengga kwak, aakumi maluk eeppiinet nugwi, Eeko menggaarak nogo ti, Anggen ti mendek mban aret mbanggo'net nugwi iige minggirak o.

Kini Wuppiige 11:18

It aap maluk mendek eerit nogwe onggo kologwe ti, lek ariyak mendek kologo menggaarak kwe, It aap awi yumbunit nogo mengga kwak, obeelom mban eerit nogwe onggo ti perak, mondok logorak mendek aret kologo menggaarak.

Kini Wuppiige 22:8

Aap ambi nen maluk mendek awi yumbunit nage kenok, maluk mendek anggen aret mbanggolage me, At anini eeppiinet nage paga ayuk warak eekkolage nogo lek aret eerogo pake menggerak.

Wone Alom Kibingga 11:6

Iri'ngga yumbunemenggendak nogo, “Ambi ti, op arigin,” ilik, “Ambi ti op arigin a?” Ilik, “Imbirak aret obeelom aremenggi a?” nogo ti, kat keenggo'lek me, O kubondendok paga yi mendek ndi mendek awi yumbunit nage, ndi, o kiyoma kunduk, keenggi awiirak puk wonaga'lek eerit nage, Eeke logot o.

Yetaya 32:20

Kit perak, niyo eneeri wundit wage menggim abok aret yi mendek ndi mendek awi yumbunit nogwe, Kinaanggumi tapi inom, keledai inom, inagari'ngga mbanogo nenet nugu logowak nduk, wondet eerogo teppiigwi, Eeko logonet, Kinale'nggen mban mbako logomunggup o.

Yeremiya 12:13

Naliku ALA nanini kani kunik negen inoba piige me, It an napuri nen gandum awi yumbunogo pegaarak kwe, anggen abe yege lek iri'ngga alok-palok mban lagangge, It yabu ta'liila eekaarak kwe, anggen maluk mban yege, Eeke paga Inenggali mbakak nugu agaarik o,” yinuk, yegerak o.

Oteya 10:13

Togop aret eeko logowak mbakirak kwe, it nen awi yumbunggwi kwak maluk eerit nugwi, Anggen mbanggwi kwak, maluk eekkologwe, Eeko agaarik o. It pilit pugunit nogo nogogwaarak ti, anggen mbanak kwak nenet nogo agaarik o. It inomaawi paga, inawuri ineegin warak ineebe ambik paga, iniki panggombunuk wonogwe me,

Oteya 8:7

It Iterali ti nen, awi yumbunggwi kwak o wiya aret yumbunggwi me, anggen mbanggwi kwak o wiya omaawi lombok nombok-kombok warit wage logonet, ineebe aret inooke kaagun o. Gandum awi yakaatak ero laganggetak kwe, anggen yega'lek wonage me, nano mendek yigirogo tepung eeriyak? Lek aret o. Ndi, anggen yege logonetak en ti, aakumi inambik nen mbanogo nonggo logonetak me, ti togon meek aret a'netak o.

Matiyut 19:29

An nendage nggwok aruwak nduk, kinagalo-kinogoba inom, kinowe-kinawot inom, kinaaganapuri inom, kinawi wurik inom, kineyabu aago inom, mbo pugwi kiinok, obaane'me kalo logonogo wokkirage logomenggerik, mondok-mondok kineenik logobagip nduk, eekkinabigin o.

Matiyut 25:46

yorage logominggirik, it aap nogo, inomaluk onggo mondok-mondok yagan wako logowak nduk, nappiyaagin kwe, it iniki abe koonak menggaarak nogo perak, ineenik mondok-mondok logowak nduk, eeginabigin o, yinuk, yoraagin,” yoragagerak.

Lukat 18:30

o yogondak aret obaane'me apit aret wogorigin o. Ndi, peebi age yobok eyom nogo paga at mondok-mondok eenik aret logogin o, yinuk, abet aret yokkiragi o,” yoragagerak.

Yaya 4:14

niyo an nen wogoraminggirak nunggwi iinok perak, abu eeginabigin mondok lek o. Niyo an nen wogoraminggirak nogo, eneeri inikime nen kila-kila wungge logonet, mondok-mondok ineenik eeginake logogin o.”

Yaya 4:36

Aap ambi awi yake, ambi anggen mbangge, eekwi nogo imbirak ambugwi aret iniki ale'nggen mbaruwak nduk, at anggen mbangge nogo onggo kolage menggerak aret o. At onggo kolage ti, it aakumi mondok-mondok ineenik logowak nduk anggen mbanak kwak kuwak eerogo piige nogo aret o.

Yaya 6:27

Mbi lek ariyak mendek nogo mban yabu eeko logogup o. Ata, aap aret nda'nagagirak an nogo nen mbi mondok-mondok logorak mendek wokkirage nogo koloorak yabu mban eeko logonip o. An ti mendek aret wokkirage logokit nduk, nogoba Ala nen ineenu agak eerogo paneegerak nogo o.”

Oroma 13:14

Kiniki maan mendek nen maluk eeriyak eekkinake kenok, “Niniki nengge yi, noba tayok yuwak nduk, nonggop eeri?” yinuk, koonit nugu logogup o. Ata, kineegin-kinarege li'luk aago monggotak kwak, kinowe Yetut Keritut kiniki me liinik logonet, eerit nogo logonip o.

Oroma 6:13

Ndi, “Maluk eeriyak ee'ninake nogo, nineenggi-niniyok paga eeriyak op aret o,” yinuk, wondet agago mbo pugup o. Ata, aakumi kanggaatak ineenik agago mippiigo mengga kwak, kit togop aret ogogutak me, obeelom mban eerit nogo logobagip nduk, kineenggi-kiniyok abok aret Ala mban wogo'nuk logonip o.

Oroma 6:23

Maluk eekwi onggo ti, kanggwi aret kwe, at Ala nen onggo lek we wo'niragagerak ti, ninowe Keritut Yetut ninom kunik logonet, nineenik mondok-mondok logorak ti aret o.

Oroma 8:11

Ndi, kanggo menggam nen Yetut eenik agago mippereegerak at Ala Aberiniki nogo kinikime wonage kenok, at Keritut eenik agago mippereegerak nogo nen Aberiniki wokkiragagerak kinikime wonage nogo paga kit kanggo monggotak mendek aret kwe, kineenik agago mippinagagin o.

Oroma 8:13

Kiniki maan mendek nen maluk eeriyak eekkinake nogo mban mugurok nogwe kiinok ti, kambumunggup aret kwe, maluk kinikime lagi wage nogo, Aberiniki nogo paga warogo wuppogo logomonggotak kenok perak, kineenik aret logomunggup o.

Oroma 8:6

It aakumi iniki maan mendek nen eeriyak aganake kenok mban eerit nugwi nogo, Ala inom ogoorak aret me, iniki maan mendek nen yorage nogo mban eekwi iinok, kambugun aret kwe, Aberiniki nen yorage kenok mban eerit nugwi iinok perak, ineenik mondok mendek kologwe, ndi, Ala inom kunik me, iniki tayenak ale'nggen aret kogwe, eeko logogun o. Iniki maan mendek nen, “Eeriyak,” yorage nogo nen Ala wone yugu, “Eeruwok o,” yinuk, Ala abu'me tebe yaga'lek me, wone yugu nogo eeriyak meek o.

1 Korindut 15:42

It kanggwi ineenik agago mippiyoorak ti, togop aret o. Nit nabelan-kabelan eerogo pinanege logonet, aakumi nen awi yako mengga kwak, nit ninagabolo pili ariyak mendek yi, nggonenogo mbo punuk, obaane'me mondok logorak mendek yirippinanege,

Nggalatiya 6:7

Ala ambokan laganggulik kagak, ambokan laganggwi kiinok, kit aret kinambokan laganggologwe me, liippako logonip o. Aap ambi awi yaremenggerak nogo ti, anggen ti mendek aret mbanggolage menggerak me,

1 Timotiyut 1:16

alom ti paga at nabuwa mba'nuk teppaneegerak. Peebi it aakumi ineenik mondok logorak mbaremenggaarak nogo nen iniki at oba panggombunuk, abet mbakwi paga waganggo logorak nogo, in wakkagak eeko logorak an neebe aret o. Nit nen Keritut Yetut maluk eeppugwi kwe, onggo mbet-mbet eeppinanege lek liippunuk eeppinanege menggerak nogo, maluk eeka abe iyagalo an neebe nogo paga kin aruwak nduk, nabuwa mba'nuk, teppaneegerak.

Titut 3:7

At Ala iniki kunik nen eeppinaneegerak paga, “Aap yi, oba lek o,” yinuk, abu obeelom aret eerogo pinanege nagagerik, aap ambi ogoba eyate kolage menggi kwak, nit nineenik mondok-mondok logorak niniki lunik nogo kolaawok nduk, Aberiniki ndonggok togon wo'niragagerak.

Yakobut 3:18

It aakumi iniki lambumbiinet nega nogo nen awi anggen yako mengga kwak, aakumi iniki lambunik logowak nduk eeppiinet nugu nagaatik, ti'nuk, anggen kole age kenok, mbanggologo mengga kwak, aakumi obeelom mban eerit nugwi paga iniki ugun tayenak ale'nggen paga wonogwe iigo menggaarak o.

2 Peterut 2:12

Wam nggwiya nda'nogo nagaatik, iniki lek ugun eerit nugwi iigak, aakumi nen pippiinok, inoorogo lako mengga kwak, it aap ti, togop aret iniki lek me, we ugun ambi eeriyak aganake kenok mban eerit nogo logonet, wone ineenggo'lek kagak, miyuk-meya eerogo pugwi me, wam nggwiya inoorogo lako mengga kwak, it maluk eekwi onggo at Ala nen aaninggin inoba kwippiige logonet, ineebe togop aret inoorigin o. It iniki nengge nogo mugurok nogo logonet, inagabiti nen kote eeriyak mbaka'lek tena'me aret eerit noorak inikilom mbako menggaarak me, kinambokan laganiyak inikilom mbako logonet, kinom lambunna'nuk, mbi nunggwi me, inagabolo mili inawin aaga'ne kunik nogo pogom, it aap ti, kinenggela'me togop aret menggaarak o.

Wayu 22:11

Yoranet nege keegak kwe, it maluk eeko logorak mbakwi kenok, maluk aret eekwi, ndi, eeriyak lek mendek kagak ugun-ugun eerit nogo logorak mbakwi kenok, ugun aret eerit nogwe, ndi, it ando maluk eeka'lek obeelom mban eeko logorak mbakwi kenok, obeelom mban eerit nogwe, ndi, it ando kikak naka'lek Ala ake mban leenak logorak mbakwi kenok, Ala ake leenak wonogwe, eekkologo logowak o,” yinuk, yo'nege kagarak.