Nggalatiya 5:10 - Ala Wone Peenok Peebi Mbanak

¹⁰ Nit ninowe ninom ambit kunik me, an mbake minggirak nogo, kit ndak-ndak mbako logonet, eerit nogo logorak abet aret kinomba'nuk yokkiragi o, noreewi. Ndi, at nomonggiren nage nogo perak, Ala nen maluk onggo eeppigin me, agabiti mbake logowak o.

Nggalatiya 5:10 ပူးပေါင်းရင်းမြစ်များ

Nappiigak 15:24

It ando ninom monggoorak nogo, nit nen nappiya woroolik kagak, kinowagam wogo nagaarik, Yogop ee'nip o, yinuk, yokkiragaarak nogo paga, kiniki taganogo pinagago mbaka, kiniki piirik wonogwe nogo, ninaruk konenggoorak o.

1 Korindut 5:5

“Ninowe Yetut woroorak eyom paga kiniki agap ndaruwak nen, yogondak keebe maluk eeppagage logowak nduk, ninowe Yetut awone kili'niragagerak nogo paga keebe apit aret Ibilit eenggi paga pagago o,” yinuk, yogo logomonggotik, mondok endekem wumbunu o.

2 Korindut 1:15

“It nen, Pawulut alom yi nduk, liiru mbannirage kogo o, yinuk, liippunuk, wo'nabugun,” mbake logonet, aa'nduk kiya wage mbareegi, kiniki ale'nggen mbareegutak nogo ndak-ndak, ne ambinom ale'nggen mbarubagip nduk, pekkiya woroorak ti abet aret kooneegirak.

2 Korindut 10:2

It aakumi ando nen yogo logonet, “It nggween paga mendek eeko mengga kwak, Pawulut oreewi inom ndak-ndak ambi kolaawok nduk eerit nogo agaarik,” mbakwi iinok, an noone omaawi paga it yoroorak mbakirak nogo kokwak, kiya wage logominggirik, kit togop ndak-ndak yokkirookwak, noone yanggorogon yokkirage yi aret liippunuk, eeko logonip o.

2 Korindut 10:6

Nit yokkirogwe nogo, “Eeko logowok o,” yinuk, liirogon eerit nogwe kiigo logomonggoorik, it ando, “Eeko logorak, nineebi,” mbakwi nogo, it eeppiyoorak Ala nen li'luk eerogo pinanege kagak ninoone omaawi paga yorogo logogun o.

2 Korindut 13:10

An nen aakumi maluk eeppiyaakit nduk, Ala nen at oone unde eeppanulik. Ata, aakumi iniki kole eerogo piyaakit nduk, oone kili'nereegerak me, an kiya wage logominggirik, noone omaawi lok togon yokkirookwak, awo waga'lek logonet, wone yi liiru paga mbanogo nappinagi wagi o.

2 Korindut 2:3

Liiru aa'nduk mbaneegirak nogo ti, an niniki ale'nggen wonage neenok, kit togon kiniki ale'nggen wonogwe abet aret mbake me, kiya wage logominggirik, kit obeelom eekwi paga niniki ale'nggen kinombarikit lak, maluk eekwi paga niniki wakkolookwak me nduk, puk age logonet, liiru mban aa'nduk mbanogo nappi wagagirak nogo o.

2 Korindut 2:6

Kit aa'nduk kineebe apit nen maluk onggo eeppereegutak ti mban aret logowak nen teppinip o.

2 Korindut 5:16

Togop me, it aakumi abe iinok mban yorogo mengga kwak, nit togop yorogo logogun lek o. It aakumi nen, “Keritut ndogop o,” yinuk, liippunuk, yogo nogogwa kwak, nit aa'nduk togop aret yogo nogogurak kwe, yogondak nit togop yogwe lek o.

2 Korindut 7:16

Kit eerit nugwi abok aret obeelom mban eerit nugu logomunggup abet aret kinombake logonet, an niniki ale'nggen mbake agarik o.

2 Korindut 8:22

It kiya wogwe nogo, ninoreeluk ambi inom nappi wogo o. At ninom eerit nogo logonet, mondok liippunuk eerit nage kogoorak me, ninoone konembunuk, “Mondok abet aret kuwak eerugun,” kinombake logonet, “An kunduk, liirogon yeenggwaarage logokit o,” yinuk, kiya wage ti o.

Nggalatiya 1:7

Wone obeelom wone alik ambi inom wonage lek aret kwe, it aap ando nen Keritut eeke nagagerak obeelom wone nogo, “Abut laganuwok o,” yinuk, wone alik ambi inom nabenogo agan nugwi ti paga, kit kiniki naalop-kaalop eerogo pinagagwi iigirak me nduk, yokkiragi o.

Nggalatiya 2:6

Ndi, it ninoweewi inendage warak yagarak nogo ti, Ala nen ninetenggen maloppinaninuk, ambi yi, iya, ambi yi, meek, ninombakeelik me, an togon inendage ti paga iya mbakeelik kwe, it ninoweewi inendage warak me, it nogo nen, “Kat yorage menggendak ti, wone yi inom eeko logowak nduk yorage logot o,” yinuk, an yo'nugwi lek puk mban wonogwe iyareegirak.

Nggalatiya 3:1

Kit Nggalatiya mendek yi wae. Yetut Keritut eyo karo-karo paga kambeegerak wone nogo, kumaarak lek mondok kin paga aret paganogo yokkirage nagagirak konenggo nogogutak kwe, yogondak ta nen kugi pulunogo pinagagerak kenok, kiniki lek kumili negen agan nugu ogotik?

Nggalatiya 4:11

an kinake eeke nagagirak nogo ti, “We aanom warogo eeke nagagirak kulik?” mba'nuk, niniki aaninggin ee'nake o, noreewi.

Nggalatiya 4:17

It aap ando nogo ti, kiniki nomongginabuwok nduk, iniki aganggen kerek togon kwaakkinabit wogwe kwe, ti paga obeelom eeppinagawok nduk, kinabuwa nen kiya wogwe lek o. Ata, “Ninoone konembunuk, iniki aganggen kerek togon, mu'neren nogo logowak,” mba'nuk, kiya wogo menggaarak.

Nggalatiya 4:20

An kinenggela'me logonet, kit eerit nugwi kiige logominggirik, noone yanggorogon yokkiroorak, “Ao,” mbake kwe, kit eekwi an kiiga'lek me, niniki piirik togon logonet, noone alik negen aret yokkirage yi abet aret o, napuri.

Nggalatiya 5:12

It aap kiniki abut laganit unggwogwe nogo, inagabolo ti mban mbaniyak lek o. Ata, eebe inom aret mbanogo nappako logowak nduk, teppiyaanip o.

Nggalatiya 5:7

Ala abet aret ari menggerak wone nogo, kit aa'nduk, kiniki aganggen paga op aret mugurok nogwe kiige nagagirak kwe, Ala wone mbo pubagip nduk, ta nen kiniki nggagambunuk nomonggiren nage agaarik o?

Nggalatiya 6:17

An Yetut wone yoranet nage paga ee'nabit nogo nogogwaarak nawin oban noba kunik yogobi wonage me, an mbo panubagip nduk, it kiniki nggagani wogwe nogo, inawone ambinom mbaniyak neebi me, mondok mbo piyaanip o.

Pilipi 3:15

Kit kiniki muk kole agaarak kenok ninom togop aret mbe agan nogo logowok o. Ndi, kit ando togop eeriyak mbaka'lek kenok, eeko logobagip nduk, Ala nen aret eekkinabigin me,

2 Tetalonika 3:4

Kit eeko logorak wone lengganogo yokkirogo monggoorak nogo ti, muk eekwi nineenu aret kwe, ambinom eeko logobagip nduk, ninowe nen eeppinagagin abet aret mbako ogoorik o.

1 Timotiyut 1:20

It aap Kimeneyut kunduk, aap Alekandet kunduk, togop eereegwaarak me, an nen Ala endage miyuk-meya eerogo pugwi inagabiti mbaruwak nduk, Ibilit unde eeppereegirak aret o.

Pilemon 1:21

An liiru mbanggege yi nogo mban kat eeke logonok nduk, yokkege ti lek o. Ata, ando kat kiniki nen koombunuk ambinom nggwok togon eeke logomunggun abet aret kombake logonet mbanggigi o.