Nggalatiya 3:1 - Ala Wone Peenok Peebi Mbanak

¹ Kit Nggalatiya mendek yi wae. Yetut Keritut eyo karo-karo paga kambeegerak wone nogo, kumaarak lek mondok kin paga aret paganogo yokkirage nagagirak konenggo nogogutak kwe, yogondak ta nen kugi pulunogo pinagagerak kenok, kiniki lek kumili negen agan nugu ogotik?

Nggalatiya 3:1 ပူးပေါင်းရင်းမြစ်များ

Matiyut 24:24

It ando nen we piliret, Keritut nogo an aret o, ndi, Ala nen yo'nege kagak yokkiraga mendek ti, an aret o, yinuk, agan wogo logomenggaarik, it aakumi ugun iniki nomoninakwi, ndi, it Ala apuri miirogo leeninabeegerak nogo, iniki nomoninaburak op kaamun ilik? yinuk, nomoninakwi, eeruwok nduk, inagabiti warak mendek inom, eerubok mendek inom, eeremenggaarak kwe, it agan woraagun ti, kiniki abet mbarubok o.

Matiyut 7:26

Ndi, it yi aap ndi aap an noone inaruk konembunuk, liirogon eekulik kenok perak, aap iniki lek nen awi mbini paga wureegerak nogo pogom it aret o.

Lukat 24:25

Yogo mbareegwa, at Yetut nen it yorage logonet, “Kit wi kiniki yunduurak aret kiigi o. It aap Ala nen yorage kagak yoraga nen wone yokkirogo nogogwaarak nogo abok aret mbet-mbet abet mbarulik nonggop nduk wonogotak?

Nappiigak 16:6

Ti'nuk, at Aberiniki nen, “O Atiya time Ala wone yora nagup o,” yorage mbareegi, at Pawulut oreewi inom nogwe nogo, o Pirigiya nen o Nggalatiya nogo nogogwaarik,

Nappiigak 6:7

Ndi, Ala wone nogo nggwok aret wiganinuk nage kagak, o Yerutalem time it at oone woorak nduk ambi nabek unggwagak mban eeko logonet, ambik aret ogwe, ndi, it Ala unde nogo kunduk ambik aret, “Wone waawi o,” yinuk, abet mbakwi, eereegwaarak.

Oroma 10:16

Togop kwe, at Yetaya nen ari logonet, Nogoba o. “Wone nit agan wogoorak nogo taani nen abet mbakwi o,” yinuk, yereegerak nogo ndak-ndak, it aakumi Iterali abok wone obeelom wone yorogwe nogo wagangga'lek aret agaarik o.

Oroma 2:8

Ndi, it ando inobaalombok mban eekkoloorak koombunuk eerit nogo logonet, Ala yereegerak nogo mugurok naga'lek, maluk mban eekwi iinok perak, Ala nen, “Aap yi, abu maluk aret o,” yinuk, anini nen maluk eeppiyaagin o.

Oroma 6:17

Kit aa'nduk maluk ayeloman aret wogogutak kwe, yogondak perak, wone mamunggirogogwaarak nogo kiniki mbere lek ambit paga mondok li'luk eerogo woppunuk, eerit nogwe me, Ala mondok, “Wa,” yinuk, keyage wake agarik o.

1 Korindut 11:26

Nit Yetut woroorak tokkogo logonet, roti inom, amburu toolak inom, ne ambi nenggak, ne ambi nenggak eeko logonet, “Ninowe Yetut ninake abet aret kambeegerak kagi,” yinuk, nggwok paga paganggo monggoorak.

1 Korindut 2:2

An kinenggela'me logonet, yi wone ndi wone ugun yokkiroorak mbarulik. Ata, Yetut Keritut eeke nagagerak wone yokkirage logonet, at eyo karo-karo paga wareegwaarak wone nogo mban aberak logonet, yokkirage logokit mbareegirak.

2 Korindut 10:5

At Ala mban ninenggaawak paga logonet, it abe wone taganogo punuk inoone we ugun agan nugwi nogo inoone lek eerogo piigwi, “Ala wone mban kineenu a'nuk logorak ti meek o. Ata, yi wone ndi wone abok aret kineenu ariyak perak op o,” yinuk, wogoppatit nugwi nogo tebenogo piigwi, ndi, nit niniki mba'nuk eeriyak koonit nugwi nogo tebenogo punuk, Keritut yo'nirage kenok mban eekwi, eerit nogo ogoorik o.

2 Korindut 11:3

Waalo oone amburu ndik-ndik kwe Kawa yoge logonet, at ambokan laganeegerak pogom, it aap alik nen inoone amburu ndik-ndik yokkirogwe iinok, “Keritut oone mban konenggo logowok o,” yinuk, abet aret miireegutak nogo mbo punuk, nomonggiren nogwe iyo, nagabiti mbake logonet, yokkirage agarik o.

Nggalatiya 1:6

At Keritut kinabuwa mba'nuk kambeegerak nogo paga, Ala nen obeelom eerogo pinagakit nduk miikkinabeegerak nogo kagak mbo punuk, wone alik mendek ambi mbet-mbet woorak eekwi kiige nagarik, “Wi!” kirage agarik o.

Nggalatiya 2:14

Ndi, an togon Ala nen abet aret yereegerak obeelom wone yugu kagak alik eerit nugwi iige nagagirik, it apit inenggaanom paga Peterut yoge logonet, “Kat aap Yakuri mendek aret kwe, it Yakuri mendek eeko mengga kwak eeka'lek logonet, it endekem mendek eeko menggaarak nogo op aret eekendak kwe, yogondak it endekem mendek nen it Yakuri mendek eekwi kwak eeko logowak nduk, nonggop nduk mamunirage agandik o?” yinuk, enggali wappereegirak.

Nggalatiya 3:3

Kit kiniki ngget ndakkinabeegerak nogo ti, Aberiniki nen aret kwe, yogondak wone Muta yoreegerak nogo eerit nogwe paga, “Niniki kole eekkolaawok o,” yinuk, eeko ogotik ya? Kit kiniki lek wi negen aret eekwi kiigi o.

Nggalatiya 4:9

yogondak perak, Ala kineenu ogwe, ndi, Ala nen kit togon kineebe eenu age, eereegutak me, kit nonggop nduk, wone abe yugu nogo mbo punuk, obeelom eekkinaburak lek kagak aanom warogo eeko nogogutak wone nogo, “Ambinom abu'me tebenak logowok,” mba'nuk, kiniyok paga yungguninuk wa nogo ogotik?

Nggalatiya 5:11

Ndi, noreewi o. An perak, alom ngge paga piyak-payak ee'nakwi mbakop? An, “Kinagabolo mbaniyak o,” agan nege logonetak en, piyak-payak agago paninetak lek kwe, Yetut eyo karo-karo paga kambeegerak wone yoranet nage logonet, “Kinagabolo mbaniyak lek o,” yinuk, non mbanogo piinet nage paga, inanini nombako logonet piyak-payak ee'nako agaarik o.

Epetut 3:8

It Ala apuri alik leenak nogo abok aret tiyanak wonogwe iigak, an abu inabu'me tebenak tit neegak kwe, Keritut oba ngginik kagak eeppinanit wundi wage menggerak wone nogo, kit aap endekem mendek yokkirage, ndi, at yi mendek ndi mendek wakkagagerak Ala nogo nen wone o maan koonak kote kumaapporogo wonagagerak nogo, nonggop eeppinaniyak koonogo pereegerak yi aakumi ndi aakumi abok ineenu eeppiige, eeke logokit nduk, iniki kunik ee'nake logonet unde eeppaneegerak.

Epetut 4:14

Togop me, noreewi o. Yi kilaarak-mogonik eeke logonet, yi mendek ndi mendek piyanogo nippege, o wiya nen yi mendek ndi mendek wonok nage, eeke menggi kwak, elege-aabologwe ti, togop aret wonogwe me, kit kunduk togop logonet, it aakumi pilit wone yogo menggaarak nogo nen aakumi inambo'me laganuwok nduk, iniki koombunuk, inoone amburu paga nomoniren nawok nduk, agan nugwi wone ti mendek kit ugun konenggo logorak mage o. Ata, Keritut iniki mondok kole menggi kwak, nit togop aret niniki kole eeppinanit wundi wage kenok, nit elege-aabologwe togop ti ndak-ndak logogun lek o.

Epetut 5:15

Togop me, kit eerit nogo monggotak nogo, mondok liippunuk eerit nogo logonip o. O yi eyom paga aakumi nen maluk mondok alik negen eerit nogo logorak koonggwi me, kiniki lek we ugun eerit nogo logorak ti mage o. Ata, kiniki mondok warak logonet, “O yogondak obeelom eeriyak ambi yi, nanonggwan agaarak me, eerikit o,” mba'nuk, eerit nogo logonip o.

Pelaareegerak 32:6

Kit aakumi kiniki lek wi-wa yi wae. Ala nen obeelom eeppinagit wage onggo nogo togop eeriyak op mbakop? At Ala ti, kinogoba a'nuk, kinonggo mbanogo pinagage, Kinanebunu ambit mendek agago pinagage, Eereegerak ti lek mbakop?

2 Tetalonika 1:8

it aakumi Ala ineenggo'lek obeelom wone ninowe Yetut eeke nagagerak wone nogo wagangga'lek iinok, maluk onggo wogora woraagin eyom nogo paga niniki tayenogo pinanigin o.

1 Timotiyut 6:4

at nen, “An neenu o,” nduk, wogoppatit nage kwe, kobak kagak we ugun agan nege o. At aap ti nen wone, “Yi ndogop me, ti ndogop me,” ari logonet, wone wake, ndi, wone mbuuluk yugu kagak ndugwi pege, eerit nage logorak ti, inikilom lombok mbarit nage menggerak. At togop eerit nage kenok, it aap ando Ala ari menggerak wone nogo mondok kobak logonet, maluk mban koonggwi nogo nen, “At ari kenok mban koneniyak, yo'nirogwe me,” yinuk, neebi-keebi yogwe, “An iya, kat iya,” yogo logonet ndugwi pugwi, at meek ombako logonet abok mbanit nogwe, ndi, inom wone mondok wakak mban eekwi, eeko menggaarak. It aap ti, “Ala wone liippunuk eerit nogwe niinok, nineenggi warak eekkolaawok,” mbako menggaarak kwe

Iberani 11:8

Ndi, at Abarakam kunduk, Ala nen, “Eyate kwak nggween ambi kat unde logonok nduk, wokkirigin me, nak o,” yoge mbareegi, o ti, eenggo'lek kwe kagak, “Abet aret wo'nirigin,” mba'nuk, nagagerak.

Iberani 5:9

Teppege mbareegi, nit ee'ninake menggerak nogo, at abu li'luk eerogo mamunggolage nagagerik, nit at oone woppunuk, eerit nogwe nogo, abok aret nineenik mondok-mondok logowok nduk, ninagap ndake logorak alom at aret agagerak me,

1 Peterut 1:22

“Iri'ngga-kale'ngga ero kwit agan lagangge nagaatik, ti'nuk, mbuk age, Ndi, iri'ngga anggen laambu yege kenok, aakumi nen, Wi! egaatak kwe, ne ambit liingge mono-mono wangge, Eeke menggerak nogo ti, Nit aakumi nineebe ti kwak aret kwe, Ala wone ti perak, mondok itok aret menggerak o,” yinuk, yereegerak liiru mbanak ndak-ndak, Ala wone lek ageelik mondok itok menggerak nogo aakumi waganggwi iinok, ineenik eeginake menggerak obeelom wone nogo aret yokkirogogwaarak waganggo mbareegup, mondok kineenik logobagip nduk, kiniki ngget ndakkinabeegerak nogo ti, aakumi inapuri ndaganakaatak kambit nogwe nogo pogom lek o. Ata, at mondok eenik menggerak Ala nen aret ndakkinabeegerak me, kit Ala ari menggerak wone konembunuk, “Ndak-ndak eeko logowok o,” yinuk, eerit nogo logonet, maluk kinikime wonage nogo mbo pereegutak me, yogondak kiniki laakot paga kinoreewi Ala apuri kinom kunik aganako logogup o. Ata, kiniki abe paga aret kinoreewi kinom niniki-kiniki kunik eeko logonip o.

1 Peterut 4:17

At Ala nen ari logonet, “It aakumi iniki abe koonak nogo aaninggin eeppiinet unggwogwe iigak inagap ndarigin me, It an noone konengga'lek maluk mban eerit nogwe nogo perak, nonggop togon eeppiyaagin mbakop?” yinuk, yereegerak ndak-ndak, at Ala nen nit yi aap ndi aap abok aret ninawone mbanogo ninowak loonninaburak eyom abu panggo yi wagaarak me, nit Ala apuri aa'nduk ninawone mbambunuk, at oone yugu ndak-ndak eeka'lek logomonggoorak kenok, onggo eeppinanigin me, it Ala wone obeelom wone nogo mondok wagangga'lek iinok ti, inawone mbangga'lek teppiyaagin mbakop? Lek o. Inawone abu mbanogo punuk, mondok alik negen eeppiyaagin o.

Wayu 2:20

mbuuluk ambi ninggin eekwi iigirak me, yoraawak nduk, yoriyak, yokkiri o. Kwe Iteben nogo nen, An Ala wone yorage minggirak mendek aret o, yinuk, an nayeloman mini ineebe ambik nomoniren nage logonet, kumi ugun-ugun wurinabit nogwe, ndi, kugi aanggo warak nunggwi, eerit nogo logowak nduk, mamunirage kagak kwe, mberega'lek, Op aret o, yinuk teppugwi iigirak me, abu neebi lombok ee'nake kenok yagi o.

1 Tamuwen 13:13

Yoge mbareegi, at Tamuwen nen at Tawun yoge logonet, “Kat aap wirogon aret eekendak keegi o. At Aliku kogoba Ala nen wone lengganogo yokkegerak nogo aret liirogon ee'netak nen, aakumi Iterali inowe kendagembogut mondok-mondok inarum logonok nduk, koonogo paganetak kwe,