Ndawi 95:3 - Ala Wone Peenok Peebi Mbanak

³ Aliku ti, mondok nggwok Ala aret wonage, Aakumi inagugi abok aret inirimbaga at endagembogut abu tiyanak aret wonage,

Ndawi 95:3 ပူးပေါင်းရင်းမြစ်များ

Nekemiya 8:6

Mbiningge nagagerik, “Kaliku Ala mondok nggwok kat aret o,” yinuk, alut eeke kagak, it aakumi abok aret ineenggi nippunuk, yogo logonet, “Abet aret o. Abet aret o,” yinuk, inendobanggun yindumbunuk, inetenggen nggween paga wanduk yagak yogo logonet, Aliku ALA alut eeko nogogwaarak.

Ndawi 104:1

Niniki yi wae. Aliku ALA tiyappege logot o. Kaliku nogoba Ala wae. Kat mondok nggwok lombok wonage, Kat abu tiyanak kayuk warak keenok, “Wi,” kugwi nogo Kobaanggi-kobaangge li'luk eerak kwak wonage,

Ndawi 135:5

At Aliku ALA ti, mondok iya lombok wonage, Yi kugi ndi kugi abok aret tebenak iigak, ninogoba Ala perak, mondok tiyanak wonage, Eeke menggerak an neenu aret o.

Ndawi 145:3

Kaliku ALA nggwok lombok menggendak me, Kalut eeko logorak ti, op aret o. Kendage mondok nggwok lombok wonage ti, Aakumi nen liippuurak meek aret o.

Ndawi 47:2

It aakumi nggween paga mendek abok aret Inowe endagembogut abu nggwok Tiyanak Lombok Menggerak Aliku ALA ti, mondok iya me, Aakumi abok aret, “Ia!” yinuk, Inagabolo ne agan nage menggerak o.

Ndawi 47:3

Yi aakumi ndi aakumi ninabu'me piya wage, Aakumi nggween paga nit ninoone mban konenggo logowak nduk, eerogo piige, Eereegerak o.

Ndawi 96:4

Aliku ALA ti, mondok iya lombok me, At mban tiyappogo logorak ti, op aret o. Yi kugi ndi kugi abok aret inayuk warak aret kwe, At inirimbaga lombok me, at mban ayuk wuko logonip o.

Wundeegwaarak 12:12

Ti eekwi wonogwe iigak, Naliku ALA an aret me, oonikiya ti paga o Metit irip-irip abok aret nage logonet, aakumi Metit mendek inapuri manggu ndarak inom, inaanggumi aa'nduk ndarak inom, abok aret inooke, inagugi abok aret inomaawi lek eerogo piige, eerigin o.

Wundeegwaarak 18:11

It aakumi Metit mendek iniki wogoppako logonet, aakumi Iterali eeppiigo mbareegwa, at Aliku ALA nen eeppiyareegerak ti paga, yi kugi ndi kugi inomaawi lek tebenak iigak, Aliku ALA alik mban omaawi ambik menggerak neenu agi o.”

Yetaya 44:8

An o aa'nduk nen wone yi agan nage, Eeriyak nogo eeka'lek kagak yorage, Eerulik ya? Noone yorage liirogon koneneegwaarak nogo it aret me, Inaganak wake, inagabiti mbakwi, eerugwaarik o. An wonage neegak, an kwak Ala alik ambi wonage mbakop? Lek aret o! An yugum kwak nomaawi minggirak kokwak, ambi wonage an kaga'lek aret o,” yinuk, yegerak me, yokkiragi.

Yeremiya 46:18

At endagembogut endage Omaawi Lombok Menggerak Aliku ALA nen ari logonet, “Yi puut ndi puut enggela'me puut Tabot menggi kwak, Niyo kole yenggenak laut ambet paga puut Karemen menggi kwak, At ayuk warak ambi togop aret ari woraagin o, yinuk, an mondok neenik minggirak nendage kumbunuk yagi o.

Yeremiya 48:15

O Mowap yigirogo pi unggwogwe, O Mowap kota-kota oonda mbani unggwogwe, At aagalogwe aap tawe abu leenak wakaa'ngget mendek inoorogo piigwi, Eerugun o,” Yinuk, at endagembogut endage Omaawi Lombok Menggerak Aliku ALA nen aret yegerak o.

Ndaniyen 4:37

At mbogut paga time endagembogut menggerak nogo, eeke menggerak abok aret abe mban eeke, at eerit nage nogo a'me nggelok mban eerit nage, iniki wogoppakwi iinok tebenogo piige, eeke menggerak me, yogondak an Nebukanetat nen at ayuk wuke, alut eeke, endage tiyappege, eeke agarik o.

Maleyaki 1:11

“Oonegen lagi wage menggim nen nok, kilu yi nage menggim kuli, yi aakumi ndi aakumi inenggela'me abok aret an nendage mondok tiyanak logogin o. Aakumi inanebunu lombok inenggela'me nendage abu tiyanak logogin me, an nendage kumbunuk, yi o ndi o abok aret nake obari abe mendek kani kunggwi, an nake abe pugwi iinok, nale'nggen nen wagangge nogo mendek wo'nugwi, eeko logogun o,” yinuk, at Omaawi Lombok Menggerak Aliku ALA nen aret yegerak o.

Maleyaki 1:14

“An aakumi inowe nendagembogut mondok iya lombok wonage, ndi, yi aakumi ndi aakumi inenggela'me nendage tiyanak nayuk warak wonage, eeke minggirak me, it aap ambi nen aanggumi inenggela'me ngguunok abe an woorak mendek ambi wonage me, Ala ake pigi o, yinuk, kumbuk mbanogo pemenggaarak kwe, mbo punuk, obaane'me alik aga'lu mendek ogoba an Ala wo'niri wage ti, nambokan laganogo wo'nege me, at mondok pulunik aret logowak o,” yinuk, at Omaawi Lombok Menggerak Aliku ALA nen aret yegerak me, yokkiragi o.

Matiyut 5:35

ndi, nggween yi, Ala iyok pege menggim me, nggween endage kumbunuk yorogwe, ndi, o Yerutalem ti, aap nggwok endagembogut wonage menggim me, kota Yerutalem endage kumbunuk, yorogwe, eeriyak mage o, yinuk, yokkiragi o.

Pelaareegerak 7:21

At Aliku kinogoba Ala omaawi ambik ayuk warak iya lombok menggerak nogo, kinenggela'me wonage me, it aakumi ti, ineebe paga kinaganak ndik-ndik eeriyak mage o.