Ndawi 37:31 - Ala Wone Peenok Peebi Mbanak

³¹ Ala wone yugu Muta liiru mbaneegerak nogo Inikime porogo wonogwe kenok, Tu nogo logonet, eraabin tuk togon yigeebu wambugun lek o.

Ndawi 37:31 ပူးပေါင်းရင်းမြစ်များ

Ayup 23:11

At iyok pit nage me, an niyok time aret pit nage, Nena agi-ogu agak eeka'lek tu at nage menggim mban nage,

Ndawi 1:2

At aap ti nen Aliku ALA wone yugu nogo inikilom mbake, Ala wone ko'lu-kii'me inikime koonit nage, Eeke menggerak o.

Ndawi 119:11

Kat maluk eeppagukwak, koone yugu nogo woppunuk, Ninikime liirogon porogo minggirak o.

Ndawi 119:98

Koone, “Yogop ee'nu ndogop ee'nu,” yugu nogo An mondok-mondok ninikime porogo minggirak me, Nawim iniki lek negen iigak, an perak wone ti paga Niniki warak lombok eerogo panege menggerak o.

Ndawi 121:3

Kiniyok eraabin tuk togon eekkirage kero pikkinake, At kinarum waka nogo, nogo lomok yaga'lek eenik aret wonage,

Ndawi 17:5

Kat kiyok mugurok mban nage minggirak me, An niyok eraabin perak togon noolik o.

Ndawi 37:23

It tu nogo logorak Aliku ALA nen koonogo piige, Ndi, it eerit nogo logorak nogo at inikilom mbake, Eeke menggerak o.

Ndawi 40:9

Kaliku ALA wae. Kapuri nggwok kuwak eerak inenggela'me logonet, Kat obeelom mban eeppiige menggendak wone nogo Noone puk logorak ee'naka'lek Yoroorak mban ee'nake menggerak kat keenu aret o.

Ndawi 44:18

Kat mbo paganuk mbaganiyak ee'ninake, Tu kat yo'nirage nogo mbo punuk, tu alik paga nogwe, Eeka'lek kwe,

Ndawi 73:2

Togop aret kwe, an perak, It maluk eeka ineenggi warak lombok ogwe nenegen iige, Iniki wogoppaka nen ineenggi warak eekkologwe ti, An togon eerikit lak, it mban eekkologwe yi, Neebi, lombok inombake, Eeke mbaki, Niyok eraabin tuk togon wambuurak ee'nake, An ngginnariyak negen ee'nake, Eekerak o.

Kini Wuppiige 14:15

Aap iniki yuundurak nogo nen yi wone ndi wone ugun aret wagangge menggerak kwe, Aap iniki penenak nen perak, liippunuk eerit nage menggerak.

Kini Wuppiige 4:4

Wonage neegak, nogoba nen wone mamunnege logonet, “An nen yokkege yi, kinikime liirogon woppunuk porogo wonage, Yogop ee'nu ndogop ee'nu, wone yokkege yi, liirogon aret eerit nage, Eeke keenok, Keenik mondok aret logomunggun o.

Yetaya 51:7

Kit koonak eeko logorak kineenu monggotak yi wae. Kit an napuri eeko logorak noone yugu kinikime porogo monggotak yi wae. Wone an yokkirage yi, konenggo logonip o. Aakumi nen miyuk-meya eerogo pinagagwi iinok, kinagabiti ogwe, Inoone yi-wu yokkirogwe iinok, kiniki lek-lek age, Eerugup o.

Yeremiya 31:33

“Ti eyom abu aret age kenok, it Iterali paga wiganak wone ngget mendek ninom koonogo puurak nogo yi aret. Eeko logorak yoragagirak nogo inikime nabenogo piige, Inikime liiru negen mbanogo piige, Eerigin me, An nen it inogoba age, ndi, it nen an napuri ogwe, Eerugun o.

Yetikiyen 27:6

Eyo teno o Mbatan mendek paga niyo alelo mbanggak tabonogo pugwi, Eyo ndiindi o Kitim ogobak mbanik aa'nggi paga nen at andik ndoonogo punuk, gajah eyak enggela'me nabenogo pit nogwe,

Pelaareegerak 6:6

Ne yogondak an nen, Yogop ee'nu ndogop ee'nu, wone mamunggirage yi, abok aret liippunuk, waganggo logonip o.

Iberani 8:10

Ti eyom abu aret age kenok, it Iterali paga wiganak wone ngget mendek ninom koonogo puurak nogo yi aret. Eeko logorak wone yoragagirak nogo, inikime nabenogo piige, It inikime liiru negen mbanogo piige, Eerigin me, An it inogoba age, ndi, it an napuri ogwe, eerugun o.