Ndawi 145:18 - Ala Wone Peenok Peebi Mbanak

¹⁸ It aakumi nen Aliku ALA yogwi, Iniki ambit eeppunuk inoone nggwok paga yogwi, Eekwi iinok, At mbo piigeelik yeenggwaarage menggerak o.

Ndawi 145:18 ပူးပေါင်းရင်းမြစ်များ

Ndawi 119:151

Kaliku ALA wae. Kat perak, Nimbirak koorok aret wonage me, Koone, “Yogop ee'nu ndogop ee'nu,” yugu ti, Pilit lek abet aret o.

Ndawi 119:2

Aliku ALA aberak logorak wone yugu liippugwi, Iniki ambit eeppunuk, at mugurok nogwe, Eeko menggaarak kenok, inale'nggen aret mbakwi, Eeko logogun o.

Ndawi 17:1

Kaliku ALA wae. Kat nen liirogon a'me nggelok eeppanege logonok nduk, Yokkege me, karuk konengge, Noone nggwok paga yokkege yi, liippanege, An pilit lek abet aret tamban paga yokkege me, karuk nggoongge, Eeke logot o.

Ndawi 34:18

Aakumi iniki wakkologwe wonogwe iinok, Aliku ALA inom koorok aret wonage, Iniki aan mbele aago wonogwe iinok, at pilanogo piige, Eeke menggerak o.

Ndawi 46:1

Nineebe op logowok nduk Abu'me pinaninuk wonage, omaawi eeppinanege, Aaninggin ninoba age kenok yeenggwa nirage, Eeke menggerak ti, Ala aret o.

Ndawi 46:5

At Ala o kota time aret menggerak me, Kota ti, pup eerogo pugun lek o. O weerikit nduk eeke kagak, maluk eeppi wogwe iyo, Ala nen o ti, ili eeppunuk logogin o.

Kini Wuppiige 15:8

Aap maluk mendek nen ake warogo Aliku ALA wogogwi nogo, at eebi lombok mbake menggerak kwe, Aap iniki koonak nen tamban eekwi iinok perak, koneniyak inikilom mbake menggerak.

Yetaya 58:9

Ti eeko logonet, Naliku ALA yo'nugwi iinok, an nen wone onggo yorage, Yeenggwa niret o, yo'nugwi iinok, an nen, An yime agarik o, yinuk, yorage, Eeke logogin o. Tapi eyo aaninggin inuut paga pogo mengga kwak it inoreewi aaninggin inoba piigwi, Inoreewi inenggali wappiigwi, Meek eerogo piigo logonet, inoone lok togon yorogwe, Eekwi ti, mbo punuk,

Leendawi 3:57

Noone yokkereegirak karuk konembunuk, neya wage nagagindik, “Kagabiti mbarugun o,” yinuk, yo'nege, Eereegindak o.

Oteya 7:14

It nen, Ninogoba yeenggwa niret o, yinuk, iniki abe paga yo'nugwi lek o. Ata, an mbo paninuk, gandum inom, anggur amburu ngget toolak inom, Inambik inagugi nen wo'niraawak o, yinuk, It nogo yogo menggam logonet le yogwe, Ineebe nggawi penek eerogo pakwi, Eeko menggaarak o.

Matiyut 23:13

Wone ambinom yorage logonet, “Kit Ala wone liiru mbanak unde aap Pariti kinom kiniki laakot logonet, eeko monggotak yi, aakumi at mbogut paga mendek abu'me unggwogwe iyo, tu narogo wumbiigwi, kit unggwaga'lek logonet, it unggwi woroorak mbakwi nogo, tu non mbanogo piigwi, eeko monggotak me, kinabuwa o! (

Yaya 14:23

Yoge mbareegi, at Yetut nen, “Aap ambit ambi iniki kunik ee'nake kenok, an noone liirogon aret eeke logogin o. Ti eeke kenok, an nogoba nen at iniki kunik eerigin o. Ndi, an nogoba nimbirak at ka wogo logomonggoorik, ninom aret logogun o.

Yaya 4:24

Ala ti, aakumi inigen kogolik mendek me, it aap at alut eeriyak mbakwi nogo iniki paga nen abet mba'nuk, at alut eeko logowak o.”

Pelaareegerak 4:7

Togop aret me, at Aliku ninogoba Ala korotok wonage me, nit kulinik-kalinik nggino yogo monggo kwak, aakumi ineebe nggwok wiganak ambi ngge nen inogoba togop yogwi wonage mbakop?

Yakobut 4:8

Kit Ala owagam nogwe kiinok, at kunduk, kit kinowagam ari wage logogin o. Kit maluk eeko monggotak yi, kineenggi kookwi, ndi, kiniki mbere yi, ambit eeppunuk kinomaluk mbo pugwi, eeko logonip o.