Ndawi 112:4 - Ala Wone Peenok Peebi Mbanak

⁴ It aap a'me nggelok mban eeppiigwi, Iniki yanggonak logonet, eeppiinet nogwe, Aakumi inabuwa mbakwi, iniki koonak mban wonogwe, Eekwi nogo O yumaak kwak logomenggaarak kwe, O eya pindanogo piige logogin o.

Ndawi 112:4 ပူးပေါင်းရင်းမြစ်များ

Ayup 11:17

O liingge eya nggwok eeke ti, mbuuluk. Ndi, kiniki eya eerogo pagage ti, nggwok aret o. O apit aago wonage ti, o kubondendok eya kwak eerogo pagage,

Ayup 22:28

Eeriyak koonogo pemenggendak nogo, ndak-ndak aret ari nage, Kat nage keegak karu eya eerogo pagage, Eeke logogin o.

Ayup 29:3

At andi wuninik nenggaawak paga eya eerogo panege, O apit aagome nage neegak, naru eya eerogo panege, Eeke nagagerak o.

Ndawi 106:1

At Aliku ALA tiyappogo logowok o! At Aliku ALA obeelom mban menggerak me, “Wa,” yogo logonip o. Aakumi inabuwa nen iniki kunik aganake nogo ti, Lek ageelik mondok aret wonage menggerak o.

Ndawi 116:5

At Aliku ALA ti, Iniki yanggo yinuk eeppinanege, Eekwi ndak-ndak eerogo pinanege, Ninogoba Ala ti, ninabuwa lombok mbake,

Ndawi 145:17

Aliku ALA eerit nage menggerak abok aret A'me nggelok mban eerit nage, At eeke menggerak abok aret ti, Aakumi inabuwa mba'nuk eeppiinet nage, Eeke menggerak.

Ndawi 37:6

O ket yanggo aago weege menggi kwak, kit abe mban eekwi kin eeppinagage, O liingge teretak eerogo pege menggi kwak, Kinawone mbanogo punuk, “Kit maluk eerulik abe o,” yinuk, yokkirage, Eeke logogin o.

Ndawi 97:11

Aap iniki abe nogo inoba eya eerogo piige, Iniki koonak nogo inale'nggen mbaruwak nduk eeppiige, Eeke logogin o.

Kini Wuppiige 21:21

Aap ambi nen obeelom mban eeppiinet nage, aakumi inabuwa mban mbarit nage, eerit nage paga At eenik wonage logonet ale'nggen kage, obeelom mban wonage, ayuk warak wonage, Eeke menggerak o.

Yetaya 50:10

Kit kinenggela'me nen at Aliku ALA agabiti mbake, At ayeloman wone ari kenok liirogon eeke, Eeke menggerak ta wonage agaarik o? At o eya paga nageelik apit paga wonage logonet eerit nage nogo nen Aliku ALA abet mbake, At ogoba Ala iniki oba panggombege, Eeruwak o.

Yetaya 58:10

It aap mbi abu wonogwe iinok, it noorak mbakwi nogo aret wogorogwe, It aap tebenak mendek nen, Ndi mendek wo'niraawak lak, mbakwi iinok, wogorogwe, Eekwi iinok, It eya eeginake nogo o apit aago wonage nogome eya ari unggwage, It kunduk o apit aago wonogwe nogo o liingge eya kwak eerogo piige, Eerigin o.

Yetaya 58:8

Ti aret me, ti eekwi iinok, o kilin nagake menggi kwak eya pindanogo piige, Inawinde-inobaande aago nogo mbet-mbet lek eerogo piige, Eerigin o. Iniki abe koonak logonet eerit nugwi nogo, inabok aa'nduk konenit wogwe iigak, ineebe peebi wogwe, Ndi, Naliku ALA tiyanak neenok, Wi! yogwe nogo, inambokan mulunik kagak wogwe, Eerugun o.

Maleyaki 4:2

It an nendage tiyappogo logonet, nayuk wuko menggaarak iinok perak, oonegen wundi wage logonet, aakumi inagabolo mbiganogo piige menggi kwak, at obeelom eeppiinet nega nogo, wundi wa'nuk, towe kwak wiga agan it obeelom eeppiinet nage logogin o. Tapi aagaluk anggenogona wonage me, wumbugwi iinok, ale'nggen paga kunu wonet nege menggi kwak, it inale'nggen nen togop aret agan nugu logogun o.

Lukat 6:36

Kinogoba nen aakumi inabuwa mbake logonet, obeelom eeppiige menggi kwak, kit ndak-ndak aakumi inabuwa mbako logonet, obeelom eeppiinet nogo logonip o,” yinuk, yoragagerak.

Yaya 12:46

Kit ambi nen kiniki noba panggombunuk, abet nombakwi kiinok, o apit paga wonogwe kiyo, o eya paga logobagip nduk, an eya pogom aret o nggween paga yime wagagirak.

Epetut 4:32

Mbo punuk, kinom nabuwa-kabuwa eeko logonet, kiniki yanggonak paga at ambi obeelom eeppegak eeko logonip o. Keritut eereegerak nogo paga Ala nen kit kinomaluk lek eerogo pereegerak nogo ndak-ndak, kit-kit aret maluk eekkologomonggotak nogo, mari eerogo mbo pogo logonip o.

Epetut 5:15

Togop me, kit eerit nogo monggotak nogo, mondok liippunuk eerit nogo logonip o. O yi eyom paga aakumi nen maluk mondok alik negen eerit nogo logorak koonggwi me, kiniki lek we ugun eerit nogo logorak ti mage o. Ata, kiniki mondok warak logonet, “O yogondak obeelom eeriyak ambi yi, nanonggwan agaarak me, eerikit o,” mba'nuk, eerit nogo logonip o.

Epetut 5:9

It eya paga logonet eerit nogo menggaarak anggen yugu nogo ti, aakumi obeelom eeppiinet nugwi, maluk eeka'lek Ala ari menggerak nogo ndak-ndak eerit nugwi, iniki mbere lek ambit logonet, inoone abet mban agan nugwi, eeko menggaarak me,

1 Yaya 2:29

At Keritut ti, abe koonak mban eeke menggerak kineenu me, it aap obeelom eeko menggaarak nogo, “Yi at Ala nen aret ndaganabeegerak kagi o,” yinuk, abet aret mbarumunggup o.

1 Yaya 3:10

Ala apuri inom, Tile apuri inom, nano paga nineenu ariyak nogo yi aret. It aakumi obeelom eeka'lek maluk mban eekwi, inowe-inawot iniki kunik eekwi lek ineebi mbakwi, eekwi iinok ti, Ala apuri lek aret yelok iigo monggoorak.

1 Yaya 3:7

Napuri niniki kunik yi, wae. It aakumi ugun nen kit nomonggiren nogwe iyo, liippogo logonip o. Aap ambi maluk eeka'lek obeelom mban eeke kenok, at Keritut maluk eekeelik mondok obeelom mban wonage nogo pogom aret menggerak o.