Nappiigak 5:14 - Ala Wone Peenok Peebi Mbanak

¹⁴ Togop aret kwe, it aap inom, kumi inom, ninogoba Yetut oba panggombunuk abet mbako nagaatik, ambi nabek unggwagak mban eeko logonet, ineebe ambik ogogwaarak.

Nappiigak 5:14 ပူးပေါင်းရင်းမြစ်များ

2 Tamuwen 6:19

Ale'nggen inoba piige nagagerik, it aakumi Iterali time wonogwe nogo aap a, kumi a, abok aret tapi enggaanggum inom, oroti longgo warak ambi inom, anggur anggen woloonak oroti worarak mendek ambi inom, inalitik-inalitak tumburiragagerak. Tumburirage mbareegi, it aakumi abok aret iname lombok nogogwaarak.

Etara 10:1

At Etara nogo Ala awi wurik enaame taati ena wanduk yagak eeke logonet, tamban eeke, omaluk pagangge, le ari, eeke me, it Iterali mendek ambik lombok aago kumi-aap inom, wologwe-komologwe inom, at owagam kuwak ari wogo nogogwaarik, togop aret inoone nggwok paga leenggu maareegwaarak.

Nekemiya 8:2

Yogo mbareegwa, tut 7 penenak tanggal 1 paga it kuwak ari wogogwaarak aap inom, kumi inom, it wone op woorak abok aret inom, inigen iigak, aap Ala unde Etara nen eeko logorak wone yugu liiru mbanak nogo wonok wage nagagerik,

Wundeegwaarak 35:22

ndi, kumi inom, aap inom, abok aret iniki nen aganake mugurok mban mbuti emas inogobak ayo inom, inaruk tiimba inom, inamberaarenggen inom, inagiinggen inom, mbuti emas paga ogobakkigirik yi mendek ndi mendek abok aret, Yi Aliku ALA ake o, yinuk, Aliku ALA titik eerogo punuk, wogogwi nogo mendek, wonok Aliku ALA titik eerogo wogori wogwe,

Nappiigak 2:41

Eeke mbareegi, it aakumi nen at oone waganeegwaarak nogo yiime wuppiyareegwaarak. Ne ti eyom paga inom nabennari unggwogogwaarak nogo, ineebe lambuk togon aap ambik tiga ribu aret.

Nappiigak 2:47

Ala alut eekwi iigak, aakumi abok nen it Ala apuri ti, iniki kunik aganako nogogwaarak. Ndi, ninogoba nogo nen ko'lu-kii'me it aakumi inagap ndarogo ambit nabek kuwak eeppiige nagagerak.

Nappiigak 22:4

Eeke logonet, it aakumi ineenik logorak tu mugurok nogwe nogo, inoorikit nduk neebi-neeba eeginake logonet, kumi nen, aap nen, keele maarogo piige, mambiigo menggam mambiige, eeke nagagirak.

Nappiigak 4:4

Ndi, it wone yorogwe iigak koneneegwaarak nogo aap mban ineebe ambik lima ribu aret abet mbareegwaarak.

Nappiigak 6:7

Ndi, Ala wone nogo nggwok aret wiganinuk nage kagak, o Yerutalem time it at oone woorak nduk ambi nabek unggwagak mban eeko logonet, ambik aret ogwe, ndi, it Ala unde nogo kunduk ambik aret, “Wone waawi o,” yinuk, abet mbakwi, eereegwaarak.

Nappiigak 8:12

at Piliput nogo nen Ala abu'me piyoorak wone obeelom wone nogo inom, Yetut Keritut eereegerak wone inom, yoragagerak iniki abet mbako mbareegwa, aap inom, kumi inom, yiime wuppiyareegerak.

Nappiigak 8:3

Aleenggu maakwi iigak kwe, at Tawulut nen perak, it Ala apuri kuwak eerit nogwe nogo kumi nen, aap nen, lek eerogo piinet nage logonet, o ambi me unggwage, niigogo wumbiige, ambi me unggwage, niigogo wumbiige, eerit wogoren keele maarogo mambiigo menggam nogome piya nage nagagerak.

Nappiigak 9:2

yoge logonet, “Nogoba wae. O kota Ndamitik it Yakuri tamban eeko menggam unde lombok nen inigen kaawak nduk, kat nen it kumi aap ineenik logorak at aru mugurok nogwe iyo, pigogo keele maageren Yerutalem woraakit nduk, liiru mbanniru o.”

Nappiigak 9:31

Nappogo nogogwaarik, nogome logonet, it Ala apuri o Yureya kuwak eerit nogwe inom, o Nggalileya kuwak eerit nogwe inom, o Tamariya kuwak eerit nogwe inom, ale-pale eeginabit naga'lek iinok, inikiigun logonet, iniki kole ogwe, Aberiniki nen yeenggwaarage kagak inogoba Ala inagabiti mbako logonet, ineebe ambik wigannogwe, eereegwaarak.

Nappiigak 9:35

At mi'nagagerak nogo, it o Lira mendek inom, o Taron mendek inom, abok aret inigen kogo nogogwaarik, it eeko nogogwaarak nogo mbo punuk, ninogoba Yetut oone waganeegwaarak.

Nappiigak 9:42

At Peterut kwe eenik agago mippereegerak wone o Yope time abok aret wigak ari mbareegi, aakumi ambik iniki ninogoba Yetut oba panggombunuk abet mbareegwaarak.

Nggalatiya 3:28

Kinobaabut ambit Keritut mendek ogogutak me, yi Yakuri mendek yi Yunani mendek, yi aap inayeloman aago mendek, yi aap inayeloman aago lek mendek, yi aap yi kwe, togop yuurak mondok lek aret o. Nit abok Keritut Yetut ninom kunik me, nineebe ambit aret ogoorik o.