Nappiigak 13:39 - Ala Wone Peenok Peebi Mbanak

³⁹ Ala yereegerak Muta nen liiru mbaneegerak eerit nogo logonet, maluk eekwi nogo, Kinoba lek o, yinuk, obeelom agago pinagarak meek aret kwe, kiniki Yetut oba panggombunuk abet mbakwi paga perak, Ala nen, Kit maluk eekwi nogo kinoba lek o, yinuk, obeelom agago pinagagin aret o, yinuk, yokkirage agarik o.

Nappiigak 13:39 ပူးပေါင်းရင်းမြစ်များ

Ayup 25:4

At Ala nogo nen, Aap yi, iniki abe koonak aret kagi o, yoge, Ndi, kumi nen ndaganakaatak inaagalogwe nogo Iniki kikak naka'lek ambi wonogwe iige, Eeriyak ti, nonggoti mbaken?

Ayup 9:20

An aap obeelom aret kwe, Noone yikkolage ti paga nen kat aap abe lek maluk aret, yo'nege, Ndi, an maluk eeka'lek aret kwe, Wone yiminggirak ti paga nen, Kat maluk aret, yo'nege, Ee'netak o.

Ndawi 143:2

It aakumi o nggween paga wonogwe inenggela'me Aap ambiriluk ambi iniki abe koonak kat kageelik me, Kayeloman an yi, nowak looniyak mage o.

Yetaya 53:11

Andi yagan wappunuk, “Aakumi obeelom eerogo piyaakit nduk, eekirak kagi,” yinuk, iniki ndonggo yigin o. “At eeppereegwaarak paga at iniki abe koonak nayeloman nogo nen, Aap abe o, yinuk, aakumi apit aret obeelom eerogo piige, Inomaluk inoba luurik wonage nogo piyangge, Eerigin o.

Yeremiya 31:32

It inombomini o Metit nen pigiren wundi wage logonet, an inogonggelo kwak aret kwe, Ninom wone koonogo pereegirak nogo ti, eeka'lek taganogo pereegwaarak me, Wone ti mendek an ambinom ninom koonogo pigin lek o. Ata, wone alik ngget mendek ninom koonogo pigin o,” yinuk, Aliku ALA nen aret yegerak.

Abakuk 2:4

Ndi, wone eebe liiru mbaniyak nogo yi aret. It aap iniki koonak lek nggolawe nogo iniki wogoppako menggaarak kwe, It aap iniki abe koonak nogo perak, abet mbakwi ti paga ineenik aret logogun o,” yinuk, an yo'negerak o.

Lukat 10:25

Ti'nuk, peebi ne ambi paga aap Ala wone liiru mbanak unde ambi Yetut abut mbanikit nduk, wage nagagerik, yoge logonet, “Ngguru wae. An mondok-mondok neenik logokit nduk, nonggop eeri o?”

Lukat 10:28

Yoge mbareegi, at Yetut nen, “Op yagan o. Yagandak nogo ndak-ndak eeke keenok, keenik aret logomunggun o.”

Lukat 18:14

Imbirak tamban togop aret eereegwaarak kwe, at tamban aa'nduk eereegerak nogo lek o. Ata, peebi eereegerak nogo mban Ala nen, Aap ti, iniki obeelom aret kagi o, mbake kagak, ame aret nagagerak. Aap ambi iniki tiyappake kenok, tebembege, ndi, iniki tebeppake kenok perak, tiyappege, eeke menggerak o, yinuk, yokkiragi o,” yoragagerak.

Yaya 1:17

Ala nen wone lengganogo yoge kenok, Muta nen yo'niragagerak kwe, Ala iniki kunik nen eeppinanege, “Ala ndogop menggerak o,” yinuk, liirogon paganogo yo'nirage, eereegerak nogo ti, Yetut Keritut aret o.

Yaya 5:24

Yorage nagagerik, ambinom yorage logonet, “It aap an noone konembogo nagaatik, iniki at nappani wagagerak nogo oba panggombunuk, abet mbakwi nogo ti, mondok-mondok ineenik aret logogun o. Ndi, it aap ti, kanggo menggam nen ineenik eeginake menggim muk unggwi wogogwaarak me, Ala nen inowak loonogo maluk onggo eeppiyaagin lek o, yinuk, mondok abet aret yokkiragi.

Nappiigak 10:43

Ala nen yorage kagak yoraga nogo abok aret at abok mban paganggo logonet, Kiniki at oba panggombunuk abet mbakwi kiinok, at Yetut eeremenggerak paga kinomaluk lek eerogo pinagagin o, yinuk, yorogo nogogwaarak o,” yoragagerak.

Oroma 10:10

Niniki abet mbakwi paga Ala nen, “Aap yi, oba lek me, obeelom aret kagi,” yinuk, yo'nirage, ndi, “Yetut ti, ninowe aret o,” yinuk, aakumi inenggaanom paganggwi paga Ala nen ninagap ndake, eeke menggerak.

Oroma 10:4

At Ala nen Muta yoreegerak wone nogo at Keritut nen a'me lik togon agago pereegerak me, nit aakumi abok niniki Keritut oba panggombunuk abet mbakwi niinok, obeelom agago pinanege menggerak.

Oroma 3:19

Ti kenok, Ala nen, “Yogop ee'nu, ndogop ee'nu,” yinuk, wone Muta yoreegerak nogo abok aret it woppunuk eeko menggaarak ti, inake aret nineenu me, it yi aap ndi aap o yime menggaarak abok aret inoone lek agago piinok, “Nit abok aret maluk eekwi onggo eeppinanigin kogo o,” yinuk, yelok kaawak nduk, wone Muta yoreegerak kogo ogoorik o.

Oroma 3:20

Togop me, Ala nen wone lengganogo Muta yoreegerak eekwi paga Ala nen, “Kat aap obeelom aret o,” yinuk, yigin lek aret. Ata, “An maluk eeke minggirak aret kagi,” yinuk, yelok kogo logowak nduk, lengganogo Muta yoreegerak o.

Oroma 4:15

Ala wone yugu liiru mbanak wonage ti paga nen, Ala anini ninoba pinanege, kogo monggoorak kwe, wone yugu ambi lek logonetak en, “Maluk eekendak o,” yinuk, yo'niraga'lek aret logonetak.

Oroma 4:24

Ata, nit abok ninake aret yereegerak o. Nit obeelom agago pinanuwak nduk, ninowe Yetut kanggo menggam nen eenik eerogo mippereegerak abet mba'nuk niniki at oba panggombugwi nogo abok ninake aret yereegerak.

Oroma 5:1

Togop me, yogondak niniki at oba panggombunuk abet mbakwi paga at Ala nen, “Aap yi, oba lek o,” yinuk, obeelom agago pinaneegerak me, ninowe Yetut Keritut eereegerak paga ninikiigun tayenak Ala ninom kunik aret ogoorik o.

Oroma 5:20

Ala nen aa'nduk Abarakam wone abok yoreegerak nogo eekwi iigak kwe, peebi wone ambinom Muta yoreegerak nogo ti, it aakumi nen, “Mu-mage agan nege yi, kagak eeginombaawok,” yogo logonet, Ala wone taganogo pit nogo logowak nduk, Muta wone peebi yoreegerak. Ti eerit nogo logonet, maluk nggwok eerit nogwe iinok, Ala nen inabuwa nggwok togon mbake nagagerik, iniki kunik nen obeelom eeppiinet nege nagagerak.

Oroma 5:9

Ndi, yogondak at amiya paga Ala nen, “Aap yi, oba lek o,” yinuk, obeelom agago pinaneegerak me, “Peebi Ala nen ninagap ndarigin lek, anini eeppinanigin o,” yinuk, yogo ogotik? Mondok lek o. Ninagap ndarigin aret mbako logowok o.

Oroma 8:1

Togop kenok, nit Keritut Yetut ninom kunik monggoorak me, “Kit maluk eekotak me, onggo eeppinagagin o,” yinuk, yo'nirage mondok lek o.

Oroma 8:3

Wone Muta yoreegerak nogo eeriyak op mbakwi kwe, niniki maan mendek nen, “Eeriyak lek o,” yo'nirage paga eeriyak meek kenok, at Ala nen kooneegerak nogo ti, nit maluk eekwi nogo lek eerogo puwak nduk, at aput lombok aap pogom logonet, maluk eeriyak kagak kwe, eeka'lek wonagagerak paga ninomaluk lek eerogo pereegerak o.

Oroma 9:31

nit aakumi Iterali mendek perak, “Nit obeelom eerit nugwi paga eeppinanuwak,” mbareegurak kwe, eeppinanulik kagi o.

1 Korindut 6:11

Kit maan nen aap togop aret wonogogutak kwe, ninowe Yetut Keritut eereegerak paga ninogoba Ala Aberiniki nogo nen kinomaluk koorogo pinagage, Ala ake leenogo pinagage, ndi, “Aap yi, oba lek o,” yinuk, kiniki obeelom agago pinagage, eereegerak o.

Nggalatiya 2:16

Ala nen wone Muta yoreegerak nogo ndak-ndak eekwi niinok, “Aap yi, oba lek o,” yinuk, obeelom agago pinanigin lek o. Ata, Keritut Yetut abet mbakwi nogo paga, “Aap yi, oba lek o,” yinuk, obeelom eeppinanege menggerak nineenu me, nit togon Keritut Yetut abet mbareegurak o. Wone Muta yoreegerak nogo eekwi paga, “Aap yi, oba lek o,” yinuk, obeelom agago piyaagin lek me, nit Yakuri mendek kunduk, obeelom agago pinanuwak nduk, wone Muta yoreegerak nogo eekwi lek o. Nit togon, Keritut abet mbareegurak aret o.

Nggalatiya 2:19

wone Muta yoreegerak kagak alik eereegirak paga noorogo paneegerak kambeegirak negen me, yogondak, “Yogop ee'nu, ndogop ee'nu,” yo'nege nogo, an koneniyak mondok meek o. An Ala ake mban neenik agarik o.

Nggalatiya 3:8

Obeelom wone awo kenom ari waga'lek kagak, at Ala nen, “Yi aakumi ndi aakumi o nggween paga yime abok aret kat paga inale'nggen kogo logogun o,” yinuk, Abarakam yoreegerak ti paga it aap Ala nen yorage kagak yoraga nen, “Aakumi endekem mendek abet mbakwi iinok, Ala nen, It yi, inoba lek o, yinuk, obeelom agago piyaagin,” yelok kaawak nduk, Abarakam yoreegerak me, yelok kogo nogogwaarik, liiru mbaneegwaarak.

Nggalatiya 5:3

Kit kinagabolo mbaniyak mbakwi kenok, wone, “Yogop ee'nu, ndogop ee'nu,” yugu liiru mbanak nogo, ambiriluk ambi eeriyak lek ti lek mondok tigitogon eeko logorak ariyak me, mbo pubagip nduk, muk yokkiragagirak me, ne ambinom yokkiragi o, noreewi.

Iberani 10:11

It aap Ala unde abok aret ko'lu-kii'me kulinik-kalinik aakumi inake eeko logonet, tapi-ndomba nogo mendek mban warogo Ala wogogo nogogwaarak kwe, inomaluk lek aga'lek itok aret wonagagerak.