Nappiigak 13:23 - Ala Wone Peenok Peebi Mbanak

²³ Ala nen at Ndawut abok yoreegerak nogo ndak-ndak ombowologwe wiganak ambi paga nen aakumi Iterali inagap ndaka at Yetut aret nda'nagagerak.

Nappiigak 13:23 ပူးပေါင်းရင်းမြစ်များ

2 Tamuwen 7:12

Ndi, at perak, nda'nagagerak eyom abu aret panggoni wage kenok, ombomini kambunuk nogogwam wonogwe me, inom yonggonggola nage kagak, an nen at lombok apuluk ndaremenggerak nogo, obaane'me mippege logominggirik, apuluk abu'me piige logowam mondok-mondok logowak nduk, eeppigin o.

Ndawi 132:11

Kaliku ALA nen wone kumbuk mbanogo Ndawut yoge, Lek arigin lek a'me aruwak nduk, kumbuk mbanogo yoge, Eeke logonet, “Kat kaput ambi ndaremenggendak nen Kat wone lengganogo yorage menggenom Kwippiminggirak wone lengganogo yorage logogin o.

Yetaya 11:1

Eyo muurik andokon Itayi paga nen agarip ndake, Omanggen paga agarip ndappunuk, anggen yege, Eerigin o.

Yetaya 11:10

Ne ti eyom paga eyo omanggen Itayi paga agarip ndaremenggerak nogo yi aakumi ndi aakumi ineenu agak aret mi'nage, aakumi inanebunu lombok nen at abu'me ari unggwogwe iinok, at logowam mondok tiyak ari, eeke logogin o.

Yetaya 43:11

An o! An ti, Naliku ALA aret o! An lek neenok, inagap ndaka ambi mondok lek aret o.

Yetaya 45:21

It alom ngge panggombunuk eekwi nogo, an lik togon yo'nugwi, Wone nonggop yo'niriyak nogo inagugi inom wone mbanggwi, Eeruwak o. Wone agaarak yi, aga'lek kagak ariyak nduk, o aa'nduk lombok ta nen yoranet nage, O maan nen wone ti, ta nen inaruk paga pit nage, Eereegerak mbakop? An Naliku ALA nen yoragagirak nogo lek a? An wonage neegak, Ala alik ambi wonage lek aret o. Inagap Ndaka iniki abe koonak alik ambi lek, an Ala nalik aret minggirak o.

Yetaya 7:13

Yoge mbareegi, Yetaya nen at yoge logonet, “Kit Ndawut paga wiganak yi, kinaruk liirogon konenggo logonip o. Aakumi iniki yungguppunuk, wonogwe inabut mbanggwi nogo kiname'lek kundugu kenok, nogoba Ala iniki yungguppunuk menggerak kunduk, abut mbaniyak mbako ogotik ya?

Yeremiya 30:9

Ata, Naliku inogoba Ala an inom, at Ndawut mippiminggirak inowe endagembogut inom, Nit mban ninayeloman logonet, eeko logogun,” yegerak o.

Amot 9:11

“It Iterali nen aakumi o Erom eegu yumbunik wonogwe nogo inabu'me piigwi, It yi aakumi ndi aakumi, Nogoba Ala aret o, yinuk, yogo logomenggaarak nogo, inabu'me piigwi, Eeruwak nduk, Ne ti eyom paga Ndawut awooliya wurik langgunnagagerak nogo obaane'me wuke, Yugum pak wurik langgunogo pereegwaarak nogo, obaane'me wuke logonet, aa'nduk wurik wonagagi kwak eerogo pege, Eerigin,” yegerak o. Eerigin yegerak yi, Aliku ALA nen aret yegerak me, yokkiragi o.

Takariya 9:9

O Tiyon aagalogwe kit yi wae. Kinale'nggen nen lubuk yogwe. O Yerutalem aagalogwe kit yi wae. Kinale'nggen nen kina'mit piyanggogwe, Eeko logonip o. A'me nggelok eeppinagit nage, kinagap ndake, Iniki yanggonak logonet yokkirage, Eeke menggerak kinowe endagembogut nogo keledai awo ndarak amborowak paga kwi'ndak kiya wage ti, kinigen kaanip o.

Matiyut 1:1

At Ndawut Abarakam imbirak inombooluk Yetut Keritut ombomini nda'narit wundi wogogwaarak inendage liiru mbanak yi o.

Matiyut 1:21

At aagaluk aap aret ndarigin o. Ndi, ndake kenok, owe-awot inomaluk nogo at nen lek eerogo punuk, inagap ndarigin me, endage Yetut aret toonenu o,” yinuk, yoge kagagerak.

Matiyut 21:9

eeko mbareegwa, nogo paga wage kagak, it ando inaa'nduk wogwe, it ando ambo'me wogwe, eeko logonet, “Ndawut ombooluk yi, Otana, yuwok o. Ninogoba Ala endage paga wage yi, wogoppuwok o. It mbogut irimbaga menggaarak kunduk, Otana, yuwak o,” yinuk, keekok agan wogogwaarak.

Matiyut 22:42

“Ala nen leenogo mippereegerak Mesias nogo ti, kit nen nonggop mbakop? At ta ombooluk mbakop?” Yorage mbareegi, it nen, “Mesias ti, Ndawut ombooluk aret mbako o.”

Lukat 1:69

Ninagap nda'ninabuwak nduk, at ayeloman Ndawut ombowologwe wiganak omaawi warak lombok ambi mippereegerak o.

Yaya 4:42

Abet mbako nogogwaarik, it nen kwe nogo yogo logonet, “Yogondak kat yo'niragandak paga mban lek o. Ata, nit nen aret at oone ninaruk konenggo nogoorik, aakumi abok inagap ndaka abet aret nineenu ogoorak me, ti paga niniki at oba panggombunuk, abet mbako ogoorik o,” yinuk, yoreegwaarak.

Yaya 7:42

Ala nen leenogo mippereegerak Keritut nogo ti, ombo Ndawut wonagagim o Mbe'lekem aret nda'narigin o, yinuk, Ala wone liiru mbaneegerak nogo lek a?” yinuk, yogogwaarak.

Nappiigak 13:32

At Ala nen ari logonet, O yogondak kat an naput age, Ndi, an kat kogoba age, Eekoorak o, yinuk, Ndawi Mbanak pasal 2 paga liiru mbaneegerak nogo ndak-ndak Ala nen Yetut kambunuk nogo menggam nen eenik agago mippereegerak ti paga, Ala nen ninombomini abok paganogo yoragagerak nogo, inombowologwe nit ninake aret a'me lik yereegerak me, obeelom wone yi aret yokkirogo ogoorik.

Nappiigak 2:30

At Ndawut nogo ti, Ala nen yorage kagak yoraga mendek aret me, Ala nen wone kumbuk mbangge logonet, Ndawut yoge, Ndawut wae. Kat kombowologwe ambi wone lengganogo yorage mengge'nom kobaane'me logowak nduk an nen mippigin o, yinuk, yoreegerak wone nogo eenu wonagagerak me,

Nappiigak 3:26

Ti kenok, at Ala nen at ayeloman eenik agago mippege nagaarik, kit maluk eekwi nogo kinalitak lombok mbo pugwi kiinok, at ale'nggen kinoba pinagawak nduk, aa'nduk kit aret kinowagam nappi wagaarak o,” yinuk, at Peterut nen wone ti aret yoragagerak.

Nappiigak 4:12

It aakumi yi awi ndi awi o nggween paga yime menggaarak abok aret, Aap yi nen aret kinagap ndakkinabigin o, yinuk, endage ambi kunogo yo'niroolik o. Ata, at Yetut alik nen mban kinagap ndakkinabigin o, yinuk, yo'niragagerak o.”

Oroma 1:3

Wone obeelom wone ti, Ala aput ninowe Yetut Keritut eereegerak wone nogo aret. At eebe ti, Ndawut ombooluk aakumi aret nda'nagagerak kwe,

Oroma 11:26

At Ala nen ari logonet, “Wondet Eerogo Piiga nogo, o Tiyon nen wundi wage logomenggerik, It Yakup mendek nen Ala wone liirogon eeriyak mbaka'lek nogo, liippunuk, eerit nogo logowak nduk, eerogo piyaagin o. Inomaluk lek eerogo pikit nduk, wage logominggirik, It ninom wone abuk nggaruk togon koonogo pi woraagin nogo ti aret o,” yinuk, yoragagerak liiru mbanak ndak-ndak it Iterali mendek abok aret inagap ndari woraagin kogo o.

2 Peterut 1:1

At ninagap ndaka Yetut Keritut ninogoba Ala nogo nen nit obeelom eerogo pinanikit nduk, eereegerak paga wone abet mba'nuk, waganeegurak niniki kunik porogo wonogwe nogo, kit ninom ndak-ndak waganeegurak me, an Timon Peterut Yetut Keritut ayeloman ayonggo nappiigak mendek agago paneegerak nogo nen, kit abok aret wone ambi yokkira o.

2 Peterut 1:11

Ti eeko logomonggotak kenok, nit ninagap ndaka ninowe Yetut Keritut abu'me piige menggim mondok-mondok menggim nogome, at Ala nen, “Kit aret unde eekkola woraanip o,” yinuk, yokkiraagin o.

2 Peterut 2:20

“Ninagap ndaka ninowe Yetut Keritut nineenu me, nggween paga yime maluk eeriyak ee'ninake menggerak nogo nineebi o,” yinuk, inambo'me mbo pereegwaarak kwe, ti'nuk, aa'nduk eeko nogogwaarak nogo, inikime aberogo eerit nogwe iinok, inobaabut aa'nduk mbuuluk obeelom negen logonet, eeko nogogwaarak kwe, peebi irip paga nen abunuk, maluk nggwok aret eekkologo menggaarak me,

2 Peterut 3:18

Ninogoba Ala iniki kunik nen eeppinanege menggerak nogo kit kiniki kole aruwak nduk, ambinom eeppinagage, ndi, at ninagap ndaka ninowe Yetut Keritut eebe kineenu aret kwe, ambinom kineenu arubagip nduk, eerogo pinagage, eeke logogin o. Yogondak nen, nok, mondok logorak kuli at eebe mondok tiyanak aret logowak o, yinuk, an Peterut nen abu aret yokkiragi o. Wa!

2 Peterut 3:2

It maan aa'nduk Ala nen aap at oone yorogo logowak nduk, leenogo piyareegerak wone yorogo nogogwaarak nogo inom, ndi, ninagap ndaka ninowe nen, “Yogop eeko logowak o,” yinuk, it aap nappiigak mendek yorage kagak, yokkirogo nogogwaarak nogo inom, kit abeko logobagip nduk, liiru yi mbanggiragi o.

1 Yaya 4:14

Ndi, ninogoba nen yi aakumi ndi aakumi abok aret inagap ndaruwak nduk, at aput nappi wagagerak nogo ninigen kogo nogogurik, paganogo yokkirogo monggoorak.

Wayu 22:16

Kit an napuri yi awi ndi awi kuwak eerit nogo monggotak nogo, peebi eeriyak wone yi, paganogo yokkira woraawak nduk, nayonggo nege menggerak malayikat ambi nappi wagarak nogo ti, an Yetut nen aret o. O weerikit nduk eeke kagak, laaluguragan ambiret kere ari nogo pogom anebunu Ndawut paga wiganak agarip ndarak nogo an aret o,” yinuk, yo'negerak.