Nakum 1:7 - Ala Wone Peenok Peebi Mbanak

⁷ Aliku ALA ti, obeelom lombok wonage, Aaninggin inoba kwi'nage kenok, ineebe op logorak eeppiiga at aret wonage, Iniki at oba panggonak wonogwe nogo, liirogon inarum wake, Eeke menggerak kwe,

Nakum 1:7 ပူးပေါင်းရင်းမြစ်များ

1 Mbinineegwaarak 16:34

At Aliku ALA abu obeelom logonet, Aakumi iniki kunik mbake nogo ti, Mondok-mondok aret logogin me, Wa, yogwi,

1 Mbinineegwaarak 5:20

Eeko logonet, “Yeenggwa niret o,” yinuk, inoone nggwok paga Ala yogo mbareegwa, iniki Ala oba panggombunuk, tamban eereegwaarak nogo, at Ala nen aruk konembunuk, yeenggwaarage logonet, it Kagari mendek inom ogogwaarak nogo abok aret ineenggime piige mbareegi,

2 Mbinineegwaarak 13:18

Ti eereegwaarak nogo ti, it aap Yekura mendek nen inombomini inogoba Aliku Ala paga panggombunuk eereegwaarak me, ne ti eyom paga it Iterali tebenogo piinok, ineegin tiyak yereegerak.

2 Mbinineegwaarak 32:11

At Kitikiya nen ari logonet, Aliku ninogoba Ala nen aret aap Atiyut inowe endagembogut eenggime nen ndinninabigin me, niniki Ala paga panggonak logowok o, yinuk, yorage nogo ti, it inambi inom, niyo inom, abu nen kambuwak nduk, awuri inambokan lagangge agaarik o.

2 Mbinineegwaarak 32:21

Eeko mbareegwa, Aliku ALA nen malayikat ambi nappi wage mbareegi, it aap wim eeka wakaa'ngget inom, inoweewi inom, aap ineegin warak inoweewi inom, aap Atiyut mendek inowe endagembogut awooliya wurit nagagim wonogwe nogo abok aret inoorogo piyareegerak. Inoorogo piige mbareegi, aap endagembogut nogo enggali mbakak ame nage nagagerik, agugi awi wurik me unggunuk wonage me, at lombok ndaganabeegerak apuri nen aret wooluwak paga warogo pereegwaarak.

2 Mbinineegwaarak 32:8

At iyo'me agaarak ti, we aakumi aret o. Ndi, nit niniyo'me agaarak perak, Aliku ninogoba Ala aret me, at nen aret yeenggwa nirage, at nen aret nit nineegin tiyak yuwak nduk, eeppinanege, eerigin o,” yinuk, at Yekura inowe endagembogut Kitikiya nen yorage kagak, aakumi nogo nen, “Ti kenok, nit eeriyak op aret kogo o,” yinuk, iniki kwi'nagagerak.

Etara 3:11

Mi'nogo nogogwaarik, “Kaliku ALA kawi wuriyak nogo owak abu aret wurako o,” yinuk, ndawi wako logonet, Aliku ALA alut eekwi, “Wa!” yogwi, eereegwaarak. Ndi, eeko logonet, “Kat obeelom aret o. Nit Iterali mendek yi, Mondok-mondok kiniki kunik ee'ninake logomunggun o,” yinuk, it aakumi abok nen, “Kaliku ninogoba ALA wa,” yinuk, keekok yogogwaarak.

Ndawi 1:6

It aap iniki abe koonak nen eerit nogwe nogo, Aliku ALA nen enegen wogonake menggerak kwe, It aap maluk eeka nen eerit nogwe nogo, Lek eerogo piige menggim time aret nogo menggaarak o.

Ndawi 20:1

“Nonggop eeri?” yinuk, Kiniki piirik wonage logonet, Aliku ALA yoge keenok, At nen wone onggo yokkege, At Yakup ogoba Ala endage kungge keenok mulunogo pagage, Eeruwak o.

Ndawi 25:8

Kaliku ALA kiniki obeelom koonak mban wonage me, It maluk eeko menggaarak nogo Tu abe paga nawak nduk, titik irage menggendak.

Ndawi 27:5

Aaninggin ambi noba ari wage kenok kawooliya wurik me paninuk wonage, Kat kawi wurik me kumaappaninuk wonage, Neebe yugum lunik paga pani lagangge, Eerumunggun o.

Ndawi 37:39

Aap iniki abe koonak nogo inagap ndarogo piige, Aaninggin inoba kwi'nage kero, Yugum pak wurogo pereegi kwak eerogo piinok wonage, Eeke menggerak nogo ti, Aliku ALA aret o.

Ndawi 37:40

It aap nogo ti, Aliku ALA nen Yeenggwaarage logonet wondet eerogo piige, Ineebe op logowok nduk, Aliku ALA abu'me menggaarak me, Aap maluk mendek ineenggime nen ndinogo inagap ndarogo piige, Eeke menggerak o.

Ndawi 46:2

Togop aret me, Nggween alom na'ndo-wa'ndo eeke, Puut-puut langgu-langgu yi nggwok yenggenak laut inikime wangge, Yi nggwok laut kilaarak-mogonik eeke logonet, Aa'nggolagak eerogo nippit wage, oone pu ari, Eeke paga Puut-puut abok aret ndipuk agan nage, Eeremenggerak kwe, Nit perak, ninagabiti mbarugun lek o.

Ndawi 50:15

Eekwi me, maluk eeppinagarak eyom panggoni wage kenok, Ninagap ndaru o, yinuk, nggino yo'nugwi kiinok, An nen kinagap ndake neenok, Kit an nendage tiyappanggo logomunggup o,” Yinuk, yoraagin o. Ti yorage kagak kwe, aap maluk mendek nogo yorage logonet,

Ndawi 59:16

Togop aret kwe, maluk noba ari wage kenok, Kat keebe paga kumaarogo panege, Pak wurik kwak, keebe aret mulunogo panege, Eeke menggendak me, Komaawi nogo ndawi paga kanep pege, Nabuwa lombok mbake menggendak nogo Kubondendok nen ndaame paga kanep pege, Eerigin o.

Ndawi 71:3

Neebe op logokit nduk unggwi nagak nayugum mulunik kwak kat aret me, nobarogo panege, Nayugum lunik kwak, nayugum pak wurogo pereegi kwak, Kat aret me, nagap ndaruwak nduk, Wone lengganogo wumbege, Eeru o.

Ndawi 86:7

An yokkege neenok, yeenggwa nege menggendak me, Maluk noba age kenok, noone nggwok paga yokkirigin o.

Ndawi 9:10

It aakumi iniki Kaliku ALA koba panggombunuk mukkeren wogwe iinok, Kat mbo piigeelik me, Kendage inom, eeke menggendak inom, ineenu nogo nen Iniki koba panggombunuk aberak menggaarak o.

Ndawi 91:15

Yeenggwa niru o, yo'nege kenok, yeenggwaage, Maluk eeppugwi iinok, ili ari, Aap ineenggime nen ndinogo wumbege, At endage tiyappege, Eeke logogin o.

Kini Wuppiige 18:10

Aliku ALA endage ti, o nggorek omaawi wurik kwak aret wonage me, Aap iniki abe koonak nogo nen mbe agan time unggwi na'nuk, ineebe obeelom aret wonogo menggaarak o.

Yetaya 25:4

Aakumi it nen eekkoloorak meek mendek nogo ineebe op logowak nduk, inarum wonage, It aap ineenggi lek mendek nen, “Nonggop eeruwi?” yinuk, lin wakwi nogo kat nen ndegeninake, Eekendak o. It aap iniki worokot linik inanini ti, O mayu woroorak eeke logonet, wiya omaawi wake menggi kwak, O karume mo tele-tele ari menggi kwak, Togop aret menggaarak me, O mayu nen inooke kero, ooliya wurik kwak eerogo piige, Mo andi inooke kero, ngguna'me eerogo piige, Eekendak o. It aap inambik inoone ya-kwa agan nugwi nogo inoone lek eerogo piige, Mo andi keket ari me, ndugwi lamunogo pege menggi kwak, It iniki worokot linik logonet, inale'nggen nen ndawi warit nugwi nogo inoone mbanogo piige, Eeke menggendak o.

Yetaya 32:2

O wiya warit wage kagak yugum nen mulumbiinok menggi kwak, O wiya nabuninuk wage kagak, ineebe op logowam nobappiinok menggi kwak, O karume niyo eneeri ambik wundit wage menggi kwak, Karu kole nonggolak me mo andi nen yugum kole abu'me ari unggwogo mengga kwak, It aap ti, inalitak lombok togop aret eeppiinok logogun o.

Yetaya 50:10

Kit kinenggela'me nen at Aliku ALA agabiti mbake, At ayeloman wone ari kenok liirogon eeke, Eeke menggerak ta wonage agaarik o? At o eya paga nageelik apit paga wonage logonet eerit nage nogo nen Aliku ALA abet mbake, At ogoba Ala iniki oba panggombege, Eeruwak o.

Yeremiya 16:19

Kaliku ALA wae. Kat komaawi eeppanega, Nobak wurik kwak wonaga, aaninggin noba age kenok, neebe op logokit nduk, kabu'me panega, kat aret o. Yi aakumi ndi aakumi kat kowagam ari wogwe, O nggween irip-irip me nen kat keya wogwe, Eeko logomenggaarik, Kat yokkogo logonet, “Ninombomini ti, abe mendek ambi porogo logolik o. Ata, inambokan lagangga abe eeppiyoorak lek aanom warogo kagak inagugiwak ti mban porogo wonogogwaarak o.

Yeremiya 17:17

Aaninggin noba ari wage kenok, neebe op logorak kabu'me panega kat aret me, Namineeri ne agan noorak mendek eeppaniyak mage o.

Yeremiya 24:5

“Iterali inogoba Naliku Ala nen ari logonet, Wuliinggen abe yi kwak ti, it Yekura mendek o yime nen kugun wogoren o Mbaben piya nagagirak me, op eekirak mbake ti aret o.

Yeremiya 33:11

aakumi inale'nggen nen yogwe, iniki ale'nggen nggelok yi unggwage logonet noone-koone yogwe, kwe aap imbirak lambunggo logonet inoone yogwe, ndi, it aakumi iniki ale'nggen nen, At Aliku ALA abu obeelom aret o. At iniki kunik ee'ninake nogo ti, lek aga'lek mondok-mondok aret ee'ninake menggerak me, At Omaawi Lombok Menggerak Aliku ALA, Wa! yogo logowok o, yinuk, an nake wo'niri wogo logonet yogwe, eekwi nogo ambinom inaruk konenggo logogun, yegerak o. Aliku ALA nen ari logonet, O aa'nduk obeelom lombok wonagagi kwak eerogo pigin o, yinuk, yegerak me nduk yagi o.

Leendawi 3:25

It aakumi Aliku ALA iniki lunik wonogwe, Iniki nen at mugurok nugwi, Eekwi iinok, At nen obeelom eeppiige menggerak o.

Ndaniyen 3:28

Iigo nogogwaarik, aap Nebukanetat nogo nen it kuwak ogogwaarak nogo yorage logonet, “It Tarerak, Metak, Abe'nego nogo iniki inogoba Ala oba panggonak menggaarak me, An nagugi ogut aago ayuk wuriyak o, yinuk, wone lengganogo wumbigirak nogo paga it nen yogo logonet, Nit at agugi alut eerugun lek o. Ninogoba Ala mban alut eekwi, at abu'me mban tebe yinuk, ayuk wukwi, eerugun o, yinuk, kambuurak inagabiti lek aret puk agaarak paga kani omoonuk wunuk ari me nen at ayeloman mini yi, inagap ndarogo wumbiya woraawak nduk, inogoba Ala nen malayikat ambi nappi wagaarak me, it inogoba Ala endage tiyappogo logowok o.

Ndaniyen 6:23

Yoge mbareegi, at aap endagembogut nogo iniki ale'nggen ambik age nagagerik, at Ndaniyen nogo mbuun ambena nen nippi woraawak nduk, yoragagerak nippi wogo mbareegwa, at Ndaniyen iniki at ogoba Ala oba panggonak wonage menggerak me, at agabolo ambiriluk ambi nibinik lek aret wundi wagagerak kogogwaarak.

Yowen 3:16

Aliku ALA abuut Tiyon paga nen singa oone nggwok ari menggi kwak oone nggwok ari, O ngguurubu eeke menggi kwak o Yerutalem nen oone ari, Eeke kenok, Mbogut-nggween na'ndo-wa'ndo eerigin kwe, At Aliku ALA perak, apuri nobarogo piinok wonage, It Iterali mendek yugum pak negen wurogo piinok wonage, Eerigin o.

Tepaniya 3:12

At kota enggela'me time it aap iniki tebenak logonet, yanggonak mban eekwi, It iniki Naliku an ALA noba panggombunuk, mu'neren wogwe, Eeko logomenggaarak nogo perak, O kota yime logowak nduk, teppiyaagin o.

Matiyut 27:43

Iniki Ala oba panggonak logonet, An Ala aput aret o, ari nagaarak me, Ala nen inikilom ombake kenok, agap ndaruwak o,” yinuk, yereegwaarak.

Matiyut 7:23

Yo'niremenggaarak kwe, an nen it yorage logonet, Kit maluk eeko monggotak yi, an mondok neenggo'lek me, an wonage me nen mbaganinip o, yinuk, yoraagin o,” yoragagerak.

Yaya 10:14

Ndomba obeelom ndegeninaka an aret o. Nogoba nen an eenu menggerak,

Yaya 10:27

An nandomba ti, an noone konenggo menggaarak. An nen it neenu minggirak me, it nen an mu'neren wogo menggaarak.

Oroma 11:22

At Ala iniki yanggonak paga eeppiige, anini paga eeppiige, eeke menggerak nogo liippinip o. Aakumi maluk eekwi iinok, anini inoba piige menggerak kwe, “Ala iniki yanggonak paga eeppinanege me, at yo'nege kenok mban eerit nage logokit o,” yinuk, eerit nogwe kiinok perak, at yanggorogon aret eeppinagage logogin o. Ndi, lek kenok, kit togon Ala nen pendenogo nappinagagin aret o.

Nggalatiya 4:9

yogondak perak, Ala kineenu ogwe, ndi, Ala nen kit togon kineebe eenu age, eereegutak me, kit nonggop nduk, wone abe yugu nogo mbo punuk, obeelom eekkinaburak lek kagak aanom warogo eeko nogogutak wone nogo, “Ambinom abu'me tebenak logowok,” mba'nuk, kiniyok paga yungguninuk wa nogo ogotik?

2 Timotiyut 2:19

o wurik ili agago liiru mbanogo pogo mengga kwak, Ala eeriyak kooneegerak nogo, “Mondok logogin,” mbaruwak nduk, ari logonet, “An napuri kenok ti, neenu aret minggirak o.” Ndi, ambi, “Yi aap ndi aap abok aret, An Ala aput aret o, yogwe iinok, It maluk eekwi nogo mbo pogo logowak o,” yinuk, yereegerak me, it aap ti togop aret eeko menggaarak kwe, Ala nen, “Eeriyak,” kooneegerak ti, o eyak wurabak nu'lek menggi kwak, mondok nu'lek aret logogin o.