Mika 4:1 - Ala Wone Peenok Peebi Mbanak

¹ O age yobok paga Aliku ALA awi puut paga wurik wonage nogo, Yi puut ndi puut tiyarogon wonogwe ti, tebenak kagak, puut ti mban tiyanak wonage, Puut-puut mbuulogwe teberogon wonage nogo enggela'me puut ti mban tiyak ari, Eerigin o, yinuk, koonogo pigin me, Yi aakumi ndi aakumi puut ti paga niyo nage mban menggi kwak togop aret unggwi wogo logogun o.

Mika 4:1 ပူးပေါင်းရင်းမြစ်များ

Wakkagagerak 49:1

Ti'nuk, at Yakup nen, “Kit peebi eekkinake logorak wone yokkiraakit nduk, an nowagam panggorogon kuwak ari woraanip o,” yinuk, yoragagerak at apuri abok aret kuwak eeko mbareegwa, yorage logonet,

Wakkagagerak 49:10

Aap endagembogut ambin mbanak Mondok kat Yekura keenggime aret wonage, Ndi, ogoba nen aput awone kilirigetak nogo Porogo wonage menggi kwak, Kat keebe paga wiganak nogo nen mban wone ti, Eenggime pipporogo wonage, Eerit namenggi-namenggi Wone Alom Unde nogo kin ari wage kenok, Yi aakumi ndi aakumi inanebunu lombok abok aret At ari kenok mban eeko logogun o.

Ndawi 110:3

Kat komaawi tiyak ari eyom paga It kawuri wim eeka nen inobaanggi-inobaangge abe lombok li'luk eekko'nok Inale'nggen paga kinom wim eeri unggwogwe, Kubondendok konaananggen luuri wage menggi kwak, “Ninom wim eeruwi o,” yinuk, kawuri aap tawe nogo kiyo'me ari wogwe, Eerugun o.

Ndawi 22:27

Kaliku ALA yi o ndi o unde wonage, Yi aakumi ndi aakumi abok aret Wone lengganogo yorage, Eeke menggendak me, It aakumi o irip-irip menggaarak nogo Kaliku ALA koba abeppunuk, Melak togon kowagam wogwe, Yi aakumi ndi aakumi inanebunu lombok kat kabu'me tebe yi wa'nuk kayuk wukwi, Eeko logogun o.

Ndawi 48:1

Aliku ALA abuut alik leenak menggim ninogoba Ala agota paga wonage nogo, Mondok iya aret me, at tiyappogo logorak ti, op aret o.

Ndawi 86:9

Nogoba o. Kat Ala kalik aret wonage, Abu nggwok lombok wonage, eerubok mendek eeke, Eeke menggendak me, Yi aakumi ndi aakumi ogobakkigirogo piyareegindak nogo Abok aret wogo logomenggaarik, Kat kabu'me tebe yinuk, kalut eekwi, Kat kendage kunogo tiyappagit nugwi, Eeko logogun o.

Yetaya 27:13

Ndi, ne ti eyom paga mban oone nggwok eeka trompet nogo oone pu nggwok eeke kenok, it aakumi Iterali mendek o Atiyut kobak ogogwaarak nogo inom, o Metit mbo nappiya nogogwaarak nogo inom, puut alik leenak Tiyon kota Yerutalem nogome kuwak ari wogo logomenggaarik, Aliku ALA alut eeko logogun o.

Yetaya 43:6

Napuri wo'niru o, yinuk, o omarip paga pa'nggwe yoge, Napuri inili ari mage o, yinuk, o ame pa'nggwe yoge, Eeke logonet, Napuri wologwe o nda nen, Napuri komologwe o nggween irip-irip nen,

Yetaya 49:6

“At Yakup paga wiganak inanebunu aa'nduk ninom kunik wonogogwa kwak eerogo piige, It aakumi Iterali ando yumbunik nogo iniyokan wogoret piya wage, Eerenok nduk, Nayeloman eerogo pagage nagarik, unde eeppagagirak nogo ti, yabu mbuuluk kagak unde eeppagagirak me, Aakumi inagap ndarogo piyoorak wone koonogo piyareegirak nogo It aakumi inanebunu lombok o irip-irip wonogwe inenggela'me eya eerogo piige logonok nduk, unde eerogo pagagin o,” yinuk, yo'negerak o.

Yetaya 54:2

“At nen nggween agi-ogu inom, iru-ogwe inom, wiganogo pit nage, Ndi, at paga ndarak nen yi aakumi ndi aakumi inanggween tebenggologo logonet, It wonogogwam kota-kota yi oone ndi oone lek nogome ye mbanggola unggwogwe, Eerugun me, Ando pegak eerugurik o. Ata, awooliya wurik ti, ambinom akom pogukkage, Awooliya wurik yum tugunik nogo mbiganogo pege, Awooliya keele pugunik ti, ambinom nggigippege, Eyak yinik nogo mondok nu'lek eerogo pege, Eeke logowak o.

Yetaya 56:7

An nen it aap ti wogoren nabuut alik leenak nogome piya nage, Tamban eeko menggam nawi wurik me iigak, inale'nggen kaawak nduk, eeppiige, An nake kani kunggo menggam warogo wo'nugwi, nake we wo'nugwi, eekwi nogo aret wagangge, Eerigin o. Ti eerigin nogo ti, Nawi wurik ti, yi aakumi ndi aakumi inanebunu lombok tamban eeko menggam aret, yogo logowak nduk, eerigin o,” yinuk, yegerak me, yagi o.

Yeremiya 16:19

Kaliku ALA wae. Kat komaawi eeppanega, Nobak wurik kwak wonaga, aaninggin noba age kenok, neebe op logokit nduk, kabu'me panega, kat aret o. Yi aakumi ndi aakumi kat kowagam ari wogwe, O nggween irip-irip me nen kat keya wogwe, Eeko logomenggaarik, Kat yokkogo logonet, “Ninombomini ti, abe mendek ambi porogo logolik o. Ata, inambokan lagangga abe eeppiyoorak lek aanom warogo kagak inagugiwak ti mban porogo wonogogwaarak o.

Yeremiya 26:18

“At Kitikiya it Yekura inowe endagembogut wonage eyom paga aap o Moreteyet mendek endage Mika nogo nen it Yekura mendek abok aret wone yorage logonet, At Omaawi Lombok Menggerak Aliku ALA nen yegerak nogo yi aret. O Tiyon ti, yabu waganggo mengga kwak eerogo pege, O kota Yerutalem ti, yigirik-noonom eerak logonak logowak nduk, eerogo pege, Ndi, puut paga nawi wurik wonage nogo eyoongga tibinik-wandinik eerogo pege, Eerigin, yegerak o, yinuk, yoragagerak.

Yeremiya 3:17

Ne ti eyom paga o Yerutalem endage ti, Aliku ALA Wone Lengganogo Yorage Menggim o, yogo logogun me, it aakumi inanebunu lombok abok aret Naliku ALA nendage tiyappogo logowak nduk, o Yerutalem kuwak eeri wogo logogun o. Iniki maluk inogogun mbuk lombok logonet, eerit nogo nogogwaarak nogo ambinom eerit nogo logogun lek o.

Yeremiya 31:12

Wogo logomenggaarik, puut Tiyon paga ari wa'nuk, inale'nggen nen keekok yogwe, Naliku ALA an nen obeelom eeppiige logonet, Gandum inom, anggur amburu ngget toolak inom, tayitun amburu inom, kambin-ndomba inaagalogwe inom, lembu-tapi inaagalogwe inom, Yi mendek ndi mendek abok aret mondok nggwik togon wogoraminggirak paga Iniki ale'nggen nen i'ndok nggi yogwe wonogwe, Eeko logogun o. Ineebe logorak nogo ti, kom yarak me niyo mbininogo mambi wagaatak me, abe kwit agan lagangge menggi kwak aret logogun me, Le yogo nogogwa kwak ambinom yogo logogun lek o.

Yeremiya 48:47

Togop aret eerugun kwe, peebi nen o Mowap aa'nduk wonagagi kwak eerogo pigin o,” yinuk, Aliku ALA nen aret yegerak me, yokkiragi o. O Mowap aaninggin eeppuurak liiru mbanak kuli ti aret.

Yetikiyen 38:16

Napuri Iterali tebenogo piyaawak nduk, o iyaagi nggween enete kuurik lek eerogo pege menggi kwak, togop aret eerit woraagun o. Ndi, peebi ne ambi paga at Nggok nogo ti, napuri nanggween paga wonogwe nogo tebenogo piyaawak nduk, an nen wonok woraagin me, yi aakumi ndi aakumi inigen iigak, at eeppege paga, Aliku ALA kikak nakeelik alik leenak menggerak kogo o, yinuk, an neebe ineenu arugun o,” yinuk, yegerak me, yokkigi o, yoreegirak.

Yetikiyen 43:12

Ala awi wurik me eeko logorak wone yugu nogo yi aret. O puut kirin enaagan-ambokan abok aret ti, alik leenak abu mage lombok menggim aret o. Ala awi wurik me wone eeko logorak nogo ti aret o,” yinuk, an yo'nege kagagirak.

Ndaniyen 10:14

Ndi, kabinggaanggo kagandak nogo ti, o age yobok ti eyom paga ariyak kagandak me, o peebi it aakumi kat mendek eeppiyoorak mbininogo yokkirikit nduk, keya wagi o.”

Ndaniyen 2:28

at mbogut paga menggerak Ala nogo nen perak, wone kote nobarak mendek kin paga yorage menggerak me, at nen aret o peebi ariyak nogo kat nogoba kendagembogut Nebukanetat kabinggaanggo paga yokkegerak o. Nogo yege keegak kabi kagandak inom, kabinggaanggo paga yokkegerak inom, nogo yi aret o.

Ndaniyen 2:35

Iyok ti, yigirogo pege nagaarik, ambulok mbuti owak paga aago inom, aanogum-omarip mbuti tembaga paga eerak inom, amiguwak-obaak mbuti perak paga aago inom, ndi, anobak mbuti emas paga ogobakkigirik inom, ambugwi aret yigirik-noonom eerogo pegerak me, gandum anggen mbanak mbelanggo menggam age paga nenenggo logonet, ameneno leenogo pugu nogo eegu-ando pegeelik o wiya nen wonok mondok lek aret eerogo pege menggi kwak, yigirik nogo ando puulik abu lek eerogo pegerak kwe, yugum yelek togon wanggerak nogo perak, puut kole eerogo pege logonet, o nggween abok aret enete lek eerogo pit nage kagandak o.

Ndaniyen 2:44

It aap inendagembogut a'nuk wone lengganogo yorogwe ti eyom paga at mbogut unde menggerak Ala nen aap ambi aakumi abu'me piinok logowak nduk mondok-mondok omaawi lombok eerogo pigin me, aakumi nen lek eerogo pugwi, aakumi inambik nen unde eekkologwe, eerugun lek o. At abu'me piinok logowam mippemenggerak nogo nen it aakumi eegu inabu'me piinok menggam abok aret tebenogo piige, lek eerogo piige, eerigin kwe, at abu'me piinok logowam mippemenggerak ti perak, mondok aret logogin o.

Ndaniyen 7:14

Pi wogo mbaka, at ayuk warak logonet, wone lengganogo yorage logowak nduk eerogo pege, endage tiyappege, endagembogut logonet unde logowak nduk eeppege, eeke mbaki, yi aakumi ndi aakumi inom, aakumi inanebunu lombok yi o ndi o wonogwe inom, aakumi inoone alitak inom, abok aret at abu'me tebe yinuk, alut eekwi iigirak o. At ayuk warak logonet, wone lengganogo yorage logorak ti, lek arigin lek mondok-mondok yorage, ndi, at abu'me piinok menggim ti, tebenogo pugun lek mondok omaawi wonage, eeke kagarak o.

Ndaniyen 7:18

Mi'narugun kwe, it aap at Tiyanak Lombok Menggerak apuri alik leenak mendek nen at abu'me piige menggim wone lengganogo yorogo logowak nduk, unde eeppiyaagin me, unde logonet, mondok aret wone lengganogo yorogo logogun o. Yorogwe iigak, lek arigin lek mondok-mondok aret logogin o, yinuk, yo'negerak.

Ndaniyen 7:22

at Anggok Ageelik Itok Menggerak nogo wage nagaarik, At Tiyanak Lombok Menggerak apuri alik leenak yi, aap abe iigak maluk eeppiige o, yinuk, inagap ndarogo piinok, it wone lengganogo yorogo logorak eyom panggoni wagaarak me, unde eeppiige kagarak nogo kunduk, alom liirogon yo'niruwak nduk yoge, eekirak o.

Ndaniyen 7:27

Lek eerogo punuk, it aakumi inabu'me piinok logonet, it inalik iniki koombunuk wone lengganogo yoranet nugwi, inayuk warak logonet, inoone omaawi paga yoranet nugwi, inendage tiyanak logonet agan nugwi, eeko logowam o mbogut abu'me yime abok aret at Tiyanak Lombok Menggerak apuri alik leenak nogo unde eeppiyaagin o. Eeppiyamenggerak unde wonogwe iigak, at abu'me piinok logowam ti, lek arigin lek mondok aret logogin me, it unde eeppiyamenggerak nogo abok aret at abu'me tebe yinuk, ayuk wukwi, at oone ari kenok konenggwi, eeko logogun o, yinuk, yo'negerak o.

Oteya 3:5

ti'nuk, mbo punuk, iniyokan inogoba Aliku Ala mugurok wogwe, inowe endagembogut Ndawut nogo oone konenuwok nduk, wogwe, eeko logogun o. O irip paga panggoni wage kenok, inaganak warit Aliku ALA owagam wogwe, ale'nggen inoba piyaawak nduk, yori wogwe, eeko logogun nduk, yoreegirak o.

Mika 3:12

Togop aret yogo monggotak me, o Tiyon ti, yabu kabunogo nippit nogo mengga kwak age, O kota Yerutalem ti, nggween yigirik-noonom eerak logonak negen age, Ndi, puut Ala awi wurik menggim ti, alok-palok mban kunogo pege, Eerigin o.

Takariya 14:10

O Nggeba nen nok, kota Yerutalem ambokan o ame pa'nggwe kota Irimon kuli nggween ti abok aret, o Araba-Yoraran kobak nabunogo pereegi kwak eerogo pigin kwe, o kota Yerutalem perak, tu unggwogo menggam endage, Mbeniyamin, kuli nen nok, tu unggwogo menggam endage, Aa'nduk, kuli nen nok, tu unggwogo menggam, Unggu'me, kuli nen nok, o nggorek wurik Kananen kuli nen nok, aap endagembogut ake anggur aambiranggo menggam kuli, tiyarogon menggerak ndak-ndak aret eerogo pigin o.

Takariya 2:11

Ne ti eyom paga yi aakumi ndi aakumi abok aret Naliku ALA ninom lambumbunuk, it an napuri arugun me, an it inenggela'me aret logogin o. Ti eeke neenok, at Omaawi Lombok Menggerak Aliku ALA nen an nappani wagaarak kineenu arumunggup o.

Takariya 8:3

At Aliku ALA nen an yo'nege logonet, “An niyokan o Tiyon wage logominggirik, o kota Yerutalem enggela'me time aret logogin o. Time wonage neegak, o Yerutalem endage ti, Kota Liirogon Eeka o, yogwe, ndi, Nomaawi Lombok Minggirak Naliku ALA nabuut nogo endage, Puut Alik Leenak o, yogwe, eeko logogun o,” yinuk, yo'nege,

Maleyaki 1:11

“Oonegen lagi wage menggim nen nok, kilu yi nage menggim kuli, yi aakumi ndi aakumi inenggela'me abok aret an nendage mondok tiyanak logogin o. Aakumi inanebunu lombok inenggela'me nendage abu tiyanak logogin me, an nendage kumbunuk, yi o ndi o abok aret nake obari abe mendek kani kunggwi, an nake abe pugwi iinok, nale'nggen nen wagangge nogo mendek wo'nugwi, eeko logogun o,” yinuk, at Omaawi Lombok Menggerak Aliku ALA nen aret yegerak o.

Nappiigak 2:17

Ala nen ari logonet, Peebi o age yobok paga yi aakumi ndi aakumi abok aret an Naberiniki inoba wuppi woraagin o. Inapuri wologwe-komologwe yorage neegak, an ari nogo yoranet nugwi, Inapuri wologwe tawe nen inabinggaanggo kogwe, Inogobamini inanggok nen inabi kogwe, Eeko logogun o.

Iberani 1:2

o yogondak irip paga perak, ninenggela'me logonet, ogoba oone yo'nirage logowak nduk, aput lombok nappi wagagerak o. “Naput mban yi mendek ndi mendek unde logowak o,” yinuk, mippege nagagerik, ogoba nen, “Yogop ee'nu, ndogop ee'nu,” yoge kagak, aput nogo nen mbogut-nggween yi mendek ndi mendek abok aret wakkagagerak.

2 Peterut 3:3

Kit kineenu arubagip nduk, wone aa'nduk lombok yi aret yokkira o. Peebi o age yobok paga it aakumi miyuk-meya eerogo piigwi, iniki nen nengge kenok mugurok nogwe, eeka nogo nen, wogo logomenggaarik,

Wayu 11:15

Yo'nege mbaki, nenegen wonage me, malayikat 6 inarompet oone eeko mbaka, ambi nogo nen arompet nogo oone eeke mbaki, it mbogut paga time nen inoone nggwok yogo logonet, “O nggween paga time aakumi inabu'me piinok menggam abok aret, at ninogoba inom, at leenogo mippereegerak Keritut inom, imbirak inoone konenggo logowok nduk, inabu'me ari waga o. Ari wogwe iinok, Keritut nogo nen inowe endagembogut logonet, mondok-mondok wone lengganogo yorage logogin o,” yinuk, yogwe iigirak.

Wayu 15:4

Ninogoba o. It taani nen kayuk wukwi, kendage tiyappagagwi, eeka'lek logogun mbaken? Lek aret o. Kat maluk eekeelik kalik leenak obeelom mban menggendak o. Kat mondok a'me nggelok mban inowak loongge menggendak ineenu me, It aakumi inanebunu lombok abok aret kowagam tebe yi wogo logomenggaarik, kalut eeko logogun o,” yinuk, ndawi wakwi iigirak.

Wayu 20:4

Pege mbaki, wone lengganogo yorogo menggam eyo ndoonogo pit nagaarak nogo kage nagarik, it ti paga kwi'ndak wonogwe nogo aakumi inowak loonggo logowak nduk, unde eeppiige kagarak. Ti kage nagarik, it Ala wone mugurok nogo logonet, Yetut wone paganogo yoragagerak nogo abet mba'nuk, yoranet nogwe iigak, inenggaanok mbanogo piyareegwaarak inogoma nogo iigirak. It ti nen, “At nggeewo aa'nduk lagi wagaarak eebe inom, ogut ogobakkigirik nogo inom, nit alut eerugun lek o. Ndi, nggeewo endage nogo ti, nit ninenggaawak paga inom, nineenggi paga inom, ti kunduk, liiru mbanogo puurak lek mban o,” yinuk, yogwi iinok, inenggaanok mbanogo piyareegwaarak inogoma nogo ineenik a'nuk Keritut inom tiyanak logonet, wone lengganogo yorogwe iigak, tahun seribu aret age kagarak.