Mika 1:1 - Ala Wone Peenok Peebi Mbanak

¹ Aap Yotam kunduk, Akat kunduk, Kitikiya kunduk, it Yekura mendek inoweewi inendagembogut a'nuk, wone lengganogo yoragak eekwi iigak, o Tamariya inom, kota Yerutalem inom, eeppuurak nogo, Aliku ALA nen aap o Mereyet mendek Mika nogo, abi paga yoge nagagerak nogo yi aret.

Mika 1:1 ပူးပေါင်းရင်းမြစ်များ

2 Endagembogut 15:32

At Eremaliya aput Peka nogo Iterali inowe endagembogut wonage kagak, tahun ambi eeppunuk, ambi age paga at Utiya aput Yotam nogo, Yekura inowe endagembogut agagerak.

2 Endagembogut 15:5

Ndi, at Aliku ALA nen andi kage logowak nduk, aap endagembogut nogo awin aaga'ne eerogo pereegerak me, awi alik wurogo pereegwaarak time aret wonage logonet, kambi noorak age kagak, at aput Yoram nogo, aap endagembogut awi o nggwok abe wurik nogo unde wonage, ndi, aakumi o time wone lengganogo yorage, eeke nagagerak.

2 Endagembogut 16:1

At Eremaliya aput Peka nogo endagembogut wonage kagak, tahun 16 eeppunuk, ambi age paga at Yotam aput Akat nogo, Yekura inowe endagembogut agagerak.

2 Endagembogut 18:1

At Ela aput Koteya Iterali inowe endagembogut wonage kagak, tahun mbere eeppunuk, ambi age paga, at Akat aput Kitikiya nogo aakumi Yekura inowe endagembogut a'nuk, wone lengganogo yorage nagagerak.

2 Mbinineegwaarak 28:1

At Akat nogo ndarak kagak tahun 20 age paga endagembogut a'nuk, o Yerutalem logonet, wone lengganogo yorage kagak, tahun 16 eereegerak. Aliku ALA enegen kagak, ombo Ndawut obeelom eeke nagagi kwak, at obeelom togop eeke logolik.

2 Mbinineegwaarak 29:1

At Kitikiya nogo ndarak kagak, tahun 25 age paga aap endagembogut a'nuk, o Yerutalem logonet, wone lengganogo yorage kagak, tahun 29 eereegerak. At agalo ti, aap Takariya apuluk kwe endage Abiya aret.

Yetaya 1:1

Aap Utiya, Yotam, Akat, Kitikiya, it nen aakumi Yekura inoweewi inendagembogut ambi agak, ambi agak, eeko logonet, wone lengganogo yoragak eekwi iigak, o Yekura inom, kota Yerutalem inom, eeppuurak at Amot aput Yetaya abinggaanggo paga kage nagaatik, yorage nagagerak nogo yi aret.

Yetaya 1:2

Kat mbogut yi wae. Karuk konengge, Kat nggween yi wae. Liippege, eekwi kiigak, Aliku ALA nen yegerak nogo yi o. “Napuri an nen ndegeninake, tawe eeginake, eeke nagagirak kwe, It an noone konembunuk eeriyak ineebi nombako agaarik o.

Yetaya 7:1

Aap Utiya ombooluk Yotam aput endage Akat nogo, o Yekura inowe endagembogut wonage kagak, aakumi o Aram mendek inowe endagembogut Eretin inom, Iterali inowe endagembogut aap Eremaliya aput Peka inom, nen o Yerutalem tebenggolaawok nduk wogo nogogwaarik, wakkogogwaarak mendek, meek aret agagerak.

Yeremiya 26:18

“At Kitikiya it Yekura inowe endagembogut wonage eyom paga aap o Moreteyet mendek endage Mika nogo nen it Yekura mendek abok aret wone yorage logonet, At Omaawi Lombok Menggerak Aliku ALA nen yegerak nogo yi aret. O Tiyon ti, yabu waganggo mengga kwak eerogo pege, O kota Yerutalem ti, yigirik-noonom eerak logonak logowak nduk, eerogo pege, Ndi, puut paga nawi wurik wonage nogo eyoongga tibinik-wandinik eerogo pege, Eerigin, yegerak o, yinuk, yoragagerak.

Oteya 1:1

It aap Utiya inom, Yotam inom, Akat inom, Kitikiya inom, nen it aakumi Yekura mendek inoweewi inendagembogut a'nuk, wone lengganogo yoragak eekwi, ndi, at Yowat aput Yerobeyam nogo Iterali inowe endagembogut a'nuk wone lengganogo yorage, eekwi iigak, at Aliku ALA nen aap Mbeeri aput Oteya wone yoreegerak nogo yi aret.

Oteya 4:15

It Iterali ti, kumi ya wuginakak kwak eerit nugwi kwe, it Yekura perak, togop eerugwaarik o. It o Nggiligan paga kugi alut eerit nogwe, O Mbet-Awen lagi nogwe, An neenik minggirak Naliku ALA nendage kumbunuk, kumbuk mbanggwi, Eerugwaarik o.

Oteya 8:14

It Iterali an nen ogobakkigirinabeegirak nogo inami eerogo mbo paninuk, Inoweewi inendagembogut inawi nggwok abe mban wurogo piinet nogwe, It Yekura mendek nen kota-kota ambik aret wurogo pit nanuk, yugum pak nggabe eerogo pit nogwe, Eereegwaarak kwe, An nen o kota-kota time abok aret kani kunik mbo wuppi woraagin me, kani nen pup eerogo nagin o, yinuk, yegerak me, yokkiragi o,” yoragagirak.

Amot 1:1

O mi awo waga'lek kagak tahun mbere eeppunuk, ambi awo eeke paga at aap Utiya aakumi Yekura mendek inowe endagembogut a'nuk wone lengganogo yorage, ndi, at aap Yowat aput Yerobeyam nogo, aakumi Iterali mendek inowe endagembogut a'nuk wone lengganogo yorage, eekwi iigak, aap ndomba ndegeninaka o Tekowa mendek ambi endage Amot nogo nen it Iterali mendek eeppiyoorak abi paga kage nagagerik, yoragagerak nogo yi aret o.

Amot 6:1

It aakumi Iterali mendek nen, “Yeenggwa niraawak o,” yinuk, Aakumi ando tebenak iigak, it ambi abu tiyanak menggaarak inenggela'me nen kit kinengga warak kiya wogo menggaarak abok aret O Tiyon paga, “Niniki ugun obeelom wonogwe,” mbakwi inom, Puut Tamariya paga, “Niniki ugun tayenak nu'lek aret wonogwe,” mbakwi inom, kinabuwa o!

Mika 1:5

Ti apit eeke nogo ti, at Yakup nen Ala wone taganogo pereegerak paga, Iterali paga wiganak inomaluk paga, aret eeke agaarik o. At Yakup nen Ala wone taganogo pege menggim nogo ngge o? Lek o. O Tamariya aret nogo lek a? Ndi, it Yekura mendek inomaluk eeko menggam tiyarogon nogo ngge o? Lek o. O kota Yerutalem aret nogo lek a?

Mika 3:9

It aap Yakup paga wiganak inoweewi kit yi wae. It Iterali paga wiganak inarum monggotak yi wae. Wone yi, kinaruk konenggo logonip o. Aakumi a'me nggelok eeppiinet noorak wone kineebi mbakwi, Obeelom eerit noorak wone nogo yaga-taga eerogo pit nogwe,

Abakuk 1:1

Ala nen yoge kagak yoraga Abakuk nogo, peebi eeriyak abinggaanggo paga yoreegerak yi aret.

2 Peterut 1:21

it aap aa'nduk Ala wone yorogo nogogwaarak nogo nen iniki koombunuk yorogo logolik o. Ata, Aberiniki inikime lik yi unggwage mbareegi, Ala nen yorage kagak yorogo nogogwaarak nogo kineenu arubagip nduk yokkiragi o.