Matiyut 6:13 - Ala Wone Peenok Peebi Mbanak

¹³ Ninabut mbanuwak nduk, pinani nagun o. Ndi, at abu maluk mendek nogo nen maluk ee'ninake kero, ninagap ndaru o. (Kabu'me piinok menggenom arum wonage, Komaawi ambik lombok wonage, Kat mondok tiyanak wonage, Eerak menggendak me, Yogondak inom, peebi inom, lek arigin lek mondok-mondok aret logogin o. Amin.) yinuk, yogo logonip o.

Matiyut 6:13 ပူးပေါင်းရင်းမြစ်များ

Wakkagagerak 22:1

Ti'nuk, ne ambi paga at Ala nen Abarakam iniki abut mbanikit nduk, yoge logonet, “Abarakam wae,” yoge mbareegi, at Abarakam nen, “Yu o, nogoba.”

1 Endagembogut 1:36

Yorage mbareegi, at Yoyara aput Mbenaya nen aap endagembogut nogo yoge logonet, “Wone ti abet aret yagandak me, wa! At Aliku kat nowe kendagembogut kogoba Ala nen wone ti, omaawi aret eerogo pege logogin o.

1 Mbinineegwaarak 16:36

Iterali inogoba Aliku Ala ti, Aa'nduk nen nok age yobok kuli Endage mondok-mondok tiyanak menggerak me, Alut eekak mban yogo logowok o,” yinuk, ari mbareegi, it aakumi abok aret, “Ti abet aret yagan o,” yinuk, Aliku ALA alut eereegwaarak.

1 Mbinineegwaarak 29:11

Kaliku nogoba ALA o. Mbogut-nggween unde wonage kat aret me, Yi aap ndi aap iigak, Kat mondok iya, komaawi ambik, Kendage tiyanak, kayuk warak, Aakumi nen wiigugo agaarik o. Kaliku nogoba ALA o. Yi aap ndi aap inabu'me piinok, Wonogo menggam tebenak iigak, Kat kabu'me piinok, Wonage menggenom abu tiyanak aret o. Yi mendek ndi mendek abok tebenak iigak, Kalik mban tiyanak inarum wonage o.

1 Mbinineegwaarak 4:10

At Yabet nogo nen Iterali inogoba Ala yoge, “Kale'nggen noba panege logonet, nanggween ambe wigarogon wo'nege, aaninggin noba kwi'nage logonet, andi-pandi ee'nake kero, keenggi nggorek paga noba'nake, narum wonage, eeke logot o,” yinuk, tamban eeke mbareegi, nggino yoreegerak nogo at Ala nen ndak-ndak aret eeppereegerak.

Ndawi 10:16

Kat Kaliku ALA Mondok-mondok kendagembogut aret menggendak me, Yi aakumi ndi aakumi kanggween paga wonogwe nogo Lek eerogo piyaamunggun o.

Ndawi 106:48

Iterali inogoba Kaliku Ala o. Kat aa'nduk nen nok, yogondak nen, Mondok-mondok aret wonage menggendak me, Kendage tiyappogo logowok o. It aakumi abok aret nen, “Abet aret,” yuwak o. Aliku ALA tiyappogo logowok o.

Ndawi 41:13

Togop aret me, Iterali inogoba Kaliku ALA nogo o! O aa'nduk nen, yogondak nen nok, peebi nen Mondok-mondok kendage tiyanak aret logowak o. Abet aret yagi o. Abet aret yagi o.

Ndawi 47:2

It aakumi nggween paga mendek abok aret Inowe endagembogut abu nggwok Tiyanak Lombok Menggerak Aliku ALA ti, mondok iya me, Aakumi abok aret, “Ia!” yinuk, Inagabolo ne agan nage menggerak o.

Ndawi 47:7

Ala ti, it aakumi o nggween paga wonogwe abok aret Inowe endagembogut at aret wonage me, At anep pugu ndawi waruwok o.

Ndawi 72:19

At endage mondok-mondok tiyanak aret wonage me, At wogoppugwi, Eeko logowok o. O nggween paga yime abok aret At endage mban ndak warak logowak o. Abet aret yagi o. Abet aret yagi o.

Ndawi 89:52

Kaliku ALA kendage Mondok-mondok tiyanak aret logowak o. Abet aret yagi o. Abet aret yagi o.

Wundeegwaarak 15:18

Piya nage logomenggendik, Kaliku ALA nen mondok-mondok inarum aret logomunggun o,” yinuk, Muta nen ndawi tiyaneegerak nogo ti aret.

Kini Wuppiige 30:8

Ambi, niniki mbere logonet ari, noone pilit ari, eeke nogo mbo pege, Ndi ambi, neenggi lek eeppanege, neenggi warak eeppanege, eeka'lek we nambi ko'lu-kii'me nengge logorak punik nogo mban wo'nege, Eeke logot o.

Yeremiya 15:21

It aakumi maluk eeka ineenggime nen kagap ndarogo pagage, It aap iniki worokot ineenggime nen wondet eerogo pagage, Eerigin o,” yinuk, at Aliku ALA nen aret yegerak o.

Yeremiya 28:6

“Abet aret yagan o! Yagandak ti, Aliku ALA nen togop aret eeruwak o! At Aliku ALA nen yokkege kagak, yo'niragandak nogo a'me aret nggelok ari logonet, yi mendek ndi mendek Aliku ALA awi wurik me eekak inom, it aakumi piya nogogwaarak nogo inom, abok aret o Mbaben nen wogoren o yime piya woraawak o!

Ndaniyen 4:25

Nogoba kat nogo ti, aakumi wonogwe me nen wumbagamenggaarak ndiimbu-nggwiya kinom penaame time nege logonet, tapi iri'ngga mbanogo nenet nugu mengga kwak, kat nenet nege, mbogut paga nen konaananggen wuppi woramenggerak paga keebe miin ngguluk-nggolak aago nege, eeke logomunggun o. Ti eerak nege keegak, tahun 7 aret koba nage kenok, aakumi inabu'me piinok menggam abok aret at Tiyanak Lombok Menggerak alik en unde logonet, wone lengganogo yorage logowak nduk, mippiyoorak mbake kenok aret mippiige menggerak abet aret kagi o, yinuk, mbarumunggun o.

Ndaniyen 7:18

Mi'narugun kwe, it aap at Tiyanak Lombok Menggerak apuri alik leenak mendek nen at abu'me piige menggim wone lengganogo yorogo logowak nduk, unde eeppiyaagin me, unde logonet, mondok aret wone lengganogo yorogo logogun o. Yorogwe iigak, lek arigin lek mondok-mondok aret logogin o, yinuk, yo'negerak.

Matiyut 26:41

Niniki nen obeelom eeriyak mbakwi kwe, nineebe nen eeriyak meek ee'ninake menggerak me, maluk eeriyak kinikime nggagani wage kero, tum wako logonet, tamban eeko logonip o.”

Matiyut 28:20

yi wone ndi wone yokkirage nagarak nogo ndak-ndak eeko logowak nduk, mamunirogwe, eerit nugu logomunggup o. Ndi, yogondak kuli nen nok, age yobok kuli paga an mbo pinagagin lek mondok-mondok ninom aret logogin o,” yinuk, yoragagerak.

Matiyut 5:37

Eeriyak mbakwi kenok, Eeruwok o, yogwe, ndi, eeriyak lek mbakwi kenok, Eeriyak nineebi o, yogwe, eeko logonip o. Ambi inom nabenogo yuurak eekkinake nogo ti, at maluk eeke menggerak nogo nen aret yuurak, yokkirage me, yugup o, yinuk, yokkiragi o,” yoragagerak.

Matiyut 6:10

Nit kat kabu'me logowok nduk, eeppinani mok o. Mbogut paga kat kiniki mbake menggendak eeko mengga kwak, Nit nggween paga yime togop aret eeko logowok nduk, eeppinanu o.

Yaya 17:15

It aap nggween paga yime menggaarak iigak, kat kapuri mban nggigininabenok nduk, yokkege lek o. Ata, at maluk eeke menggerak nogo nen maluk eeppiya wage kero, liirogon ndegeninake logonok nduk, yokkigi o.

1 Korindut 10:13

Kit kiniki nggagangginake menggerak nogo ti, alik mendek paga lek o. Ata, yi aakumi ndi aakumi iniki nggaganinake menggerak nogo mendek paga mban aret kit kiniki nggagangginake kaamunggup kwe, at Ala nen nit ee'ninake nogo, mondok liippinanege menggerak me, kiniki nggagangginake kagak, kinomaawi lek arit unggwage logonet, maluk eekwi kiyo, Ala nen tu mbininogo pinagagin o.

1 Korindut 14:16

Ala alut eeko logonet, kiniki abe'naga'lek kagak, ambi inoone lalin negen woppunuk, tamban eekwi kiinok, it aakumi ando kinom kuwak eeppunuk, tamban eekwi nogo, kat ari it kobak ariyak me, nonggop togon, “Abet aret yigi o,” yinuk, “Amin,” yugun mbakop?

2 Korindut 1:20

Ndi, Ala nen, “Eekkinabigin o,” yinuk, yo'nirage menggerak abok aret, “Keritut eereegerak paga abet aret eerigin,” mba'nuk, yo'nirage kenok, Ala endage tiyappogo logonet, “Amin,” yogo monggoorak me, nit ndak-ndak abet aret, “Eeruwok,” mbako logonet, yokkirogo monggoorak.

Nggalatiya 1:4

O yogondak yi paga, it aakumi nggween paga mendek nen maluk mban eerit nogo menggaarak nogo, ninom eekwi niyo, ndinogo wo'ninabikit nduk, at ninogoba Ala mbareegerak nogo ndak-ndak, nit maluk eekwi niinok, ninowe Yetut Keritut nen, “Inake kambikit o,” yinuk, ninake kambeegerak.

Pelaareegerak 8:16

peebi obeelom mban logobagip nduk, kinabut mbangge, kiniki tebeppatiyak nduk eeppinagage, eerit karume wundi wage logonet, kinombomini ineenggo'lek mendek mbi mana nabagip nduk, wokkiragagerak nogo o.

Pelaareegerak 8:2

At Aliku kinogoba Ala nen tu karume wokkiren wage logonet, It aakumi yi, Yogop ee'nu ndogop ee'nu, an yorage nogo liirogon porogo wonogwe iyaamun ilik, lek a? yinuk, kinikime nano wonage nogo eenu arikit nduk, kinabut mbangge, kiniki tebenak logomunggup nduk eeppinagage, eeke kagak, tahun 40 aret eereegerak nogo kiniki abe'nip o.

1 Tetalonika 1:10

ndi, Ala nen at aput Yetut kambunuk nogo menggam nen eenik agago mippege mbareegi, peebi anini nen nit maluk eeppinanege kero, ninagap ndareegerak Yetut mbogut paga nen wambi woroorak nduk, kit tokkogo monggotak nogo inom, abok aret nit yo'nirogo menggaarak.

2 Tetalonika 3:3

At ninowe perak, mbo pinanegeelik mondok liirogon ninake eeke menggerak me, at nen kinomaawi eeppinagage, ndi, at maluk eeke menggerak nen maluk eeppinagukwak kinarum wake, eeke logogin o.

1 Timotiyut 1:17

Ndi, yogondak, naput o. Yi o ndi o aakumi aa'nduk wonogogwaarak inom, yogondak wonogwe inom, peebi logorak inom, ninogoba endagembogut kanggeelik mondok itok eenik menggerak ninigen kogolik alik menggerak Ala nogo endage mondok-mondok tiyanak ayuk warak logogin o. Amin!

Iberani 11:36

it ando miyuk-meya eerogo piinok yawi inookwi, ando mbutigeele paga ineenggi-iniyok maarogo mambiigo menggam mambiigwi,

1 Peterut 5:8

Kit kinom ogoorak monggotak Tile nogo nen maluk eekkinabikit nduk, nggeewo anini warak pogom nibingginaburak eyak nde agan kwaakkinabit nege me, kit mondok kiniki warak a'nuk, kinagaket paga logonet, tum wakkologo logonip o.

2 Peterut 2:9

Ala nen togop aret eeginabit wundi wagagerak me, nit at apuri at oone eerit nugwi nogo aaninggin mendek ninoba age kenok, ninagap ndake, ndi, it obeelom eekwi lek maluk eeko menggaarak nogo peebi age yobok paga inowak loonogo punuk, maluk inoba kwippiige, eeriyak nogo at eenu aret me, eerigin aret mbako logowok o.

1 Yaya 3:8

At Tile o maan iyaalok nen maluk eerit wundi wage menggerak me, aap ambi maluk mban eeke menggerak kenok, at Tile aput aret menggerak. Ndi, at Ala aput wambi wagagerak nogo ti, at Tile nen yi eekak ndi eekak eeke menggerak nogo abok aret, mondok lek eerogo pikit nduk, wambi wagagerak.

Wayu 1:18

Neenik nitok minggirak an aret o. Aa'nduk kambeegirak kwe, yogondak perak, neenik mondok-mondok wonage yi neyet o. Kanggwi inom, kambunuk nogo menggam inom, imbirak an mban aret unde logonet, tu paaka kunci porogo minggirak o.

Wayu 19:1

Ti konengge nagarik, wonage me, o mbogut paga time aakumi ambik abu alik negen komaarak inoone nggwok ambugwi yogo mengga kwak yogo logonet, “Kat kalik komaawi ambik ninagap ndaka kendage mondok tiyanak, ninogoba Ala wa.

Wayu 19:4

it mbogut paga wonogwe inoweewi ineebe 24 inom, aakumi nen iigulik mendek ineebe 4 nogo inom, at wone lengganogo yorage menggim Ala time kwi'ndak wonage kagak abu'me tebe yinuk, alut eeko logonet, “Ninogoba wa, wa,” yinuk, “Amin,” yogwi naruk konenggirak.

Wayu 2:10

Togop eeppiigwi iigak kwe, it Ala apuri eeppiyoorak koonak wonage nogo ti, lek aga'lek awo aret wonage me, inagabiti mbakwi iyo, apuri yoraawak nduk, yoriyak, yokkigi o. Tile nen ari logonet, An aaninggin-paaninggin inoba piige neenok, nonggop eekwi iyaamun? yinuk, inabut mbanikit nduk, aakumi iniki nggagangge mbaremenggi, it Ala apuri o Timirina ineebe keele maarogo o mbuuluk me mambiyamenggaarak wonogwe iigak, nogo aap ambit eenggi aret yugun o. It nogo nen, Eeppinanugwi iigak, kambi noorak kuli ariyak op aret o, yinuk, mondok inogogumbuk logonet, waganggwi iinok, mondok-mondok ineenik logorak mendek nggare-nggare mendaarak nogo yippiyaagin o.

Wayu 21:4

Mbogut-nggween aa'nduk ogobakkigirik nogo paga logonet, iniki aaninggin kogo nogogwaarak nogo, lek agaarak me, ngget ogobakkigirik nogo paga inogoba Ala inom logonet, inale amburu mbanogo piyamenggerak me, kanggwi, tabun ndoombunuk le yogwe, iniki wakkologwe, andi kogwe, eeko logogun abu lek o,” yinuk, ari naruk konenggirak.

Wayu 3:10

Ndi, Kit kinogogumbuk kiniki kwi'ndak logonet eeko logonip o, yinuk, yoragagirak nogo, konembunuk liirogon aret eekwi me, peebi yi aakumi ndi aakumi nggween paga menggaarak abok aret inabut mbanikit nduk, aaninggin-paaninggin inoba piya woroorak eyom nogo paga, it an napuri ti, inoba arukwak, an nen ndegeninake logogin o.

Wayu 3:14

“Ndi, ambi at malayikat Ala apuri o Laworikiya kuwak eekwi inarum menggerak nogo nen apuri yoraawak nduk, yoriyak, yokkiri o. At Ala nen yi mendek ndi mendek wakkaakit mbake kagak, wakkagagirak alom an aret me, Ala nonggop menggerak mondok liirogon abet aret paganogo ari minggirak nendage Amin nogo nen,

Wayu 5:13

it mbogut paga wonogwe inom, nggween paga wonogwe inom, nggween abu'na wonogwe inom, yi nggwok yenggenak laut inikime nugwi inom, Ala nen ogobakkigireegerak yi mendek ndi mendek yi aakumi ndi aakumi abok aret inoone nggwok paga ndawi wako logonet, “Nit abok aret, at wone lengganogo yo'nirage menggim kwi'ndak wonage nogo inom, Ndomba Aagaluk nogo inom, kimbirak obeelom aret o, yinuk, Inabu'me tebe yinuk, inalut eekwi, inendage tiyappiigwi, eeko logonet, inoone mondok-mondok konenggo logogun o,” yinuk, yogwe iigak,